Pe̍h-oē-jı̄ ê Lı̄-ek

Ē-mn̂g ê Bo̍k-su, Tong Hián-lí kū-nı̂ ū chhut chı̍t-ê lūn chhiáⁿ Chiang-choân Tâi-oân kok kàu-hoē ê lâng lâi chò : Tê-ba̍k chiū-sı̄ “ Pe̍h-oē-jı̄ ê Lı̄-ek ” . Āu-lâi ū chih-tio̍h káu lâng ê lūn ; chiū chhiáⁿ Má I-seng, Kam Bo̍k-su kap i tàu-khoàⁿ, phêng chhú koân-kē ; tē-it miâ siúⁿ gı̂n gō͘-ê, tē jı̄ miâ siúⁿ gı̂n saⁿ-ê, tē saⁿ miâ siúⁿ gı̂n nn̄g-ê, tē sı̀ miâ siúⁿ gı̂n chı̍t-ê . Phêng-liáu chhú :---

1. Ia̍p Bo̍k-su,toà tı̄ Sió-khe.
2. Lâu Bō͘-chheng, Tâi-oân-hú-siâⁿ .
3. Lí Chhah-lâi, Kó͘-lōng-sū.
4. N̂g Tek-siān, Ē-mn̂g.

Lô͘ Sam-goân, Kó͘-lōng-sū .

Tong Bo̍k-su taⁿ tńg-khı̀ Tāi-Eng-kok : ū chiong chiah-ê lūn kau goán : goán siūⁿ tio̍h ı̀n hō͘ Kàu-hoē ê lâng chiâu chai, hō͘ ta̍k lâng him-bō͘ tha̍k pe̍h-oē-jı̄ . Taⁿ chiong tē-it tē-jı̄ chit nn̄g miâ ê lūn chiàu chhù-sū lâi ı̀n tı̄ ē-té . In-ūi thâu-chı̍t-tiuⁿ ê Kàu-hoē-pò ı̀n-bē-liáu, thèng-hāu tē jı̄ tiuⁿ chiah koh ı̀n .

Ia̍p Hàn-chiong

Lūn choè Pe̍h-oē-jı̄ ê Iàu-kín

Taⁿ khí-thâu choè chit-ê pe̍h-oē-jı̄ ê, i-ê ı̀-sù sı̄ cháiⁿ-iūⁿ ah ? Chiū-sı̄ beh hō͘ lâng oē-bat, só͘-í chí ēng jı̄-cha̍p-saⁿ ê jı̄-bú tiāⁿ-tiāⁿ, chiū-sı̄ a, b, ch, chh, e, g, h, i,j, k, kh,l, m, n, ng, o, o͘, p, ph, s, t, th, u ; che sı̄ beh hō͘ lâng koē jı̄n . Koh tı̄ jı̄-cha̍p-saⁿ ê jı̄-bú ê tiong-kan ū hun-pia̍t tûn-im, chhí-im, chı̍h-im, âu-im, phı̄ⁿ-im ê koh-iūⁿ ; chhin-chhiūⁿ b, p, ph, u, sı̄ tûn-im ; ch, chh, g, k, kh, s sı̄ chhí-im ; h, i, j, l, t, th sı̄ chı̍h-im ; o, o͘, e sı̄ âu-im ; m, n, ng sı̄ phı̄ⁿ-im ; che sı̄ beh hō͘ lâng tha̍k-liáu oē hun-bêng . ( Khoàⁿ 1 Ko-lı̂m-to 14 : 9 . )

Koh ū ēng pat-im choè kı̀-hō, lâi hun-pia̍t piâⁿ-cheh, hō͘ lâng khui-chhùi chiū ū koâiⁿ-kē tāng-khin ê chhù-sū, m̄-sái hūn-loān . Koh ēng chhiat-im choè hoat-tō͘ lâi tàu chiâⁿ jı̄, ū-ê nn̄g-jı̄ tàu chiâⁿ chı̍t-jı̄, ū ê saⁿ-sı̀-jı̄ gō͘-jı̄ tàu chı̍t-jı̄, che sı̄ beh hō͘ lâng koē tha̍k . Chóng-sı̄ jı̄-bú sui-jiân chió, nā ēng i pâi-lia̍t saⁿ-tàu, chiū ū chhian-piàn bān-hoà ēng lóng boē liáu . Che sı̄ thâu-sū, ē-bı̄n pâi-lia̍t gō͘-toāⁿ tāi-lio̍k lâi gı̄-lūn .

Tē-it-toāⁿ

Lūn tha̍k pe̍h-oē-jı̄ khah-iâⁿ tha̍k Tiong-kok jı̄, chiū-sı̄ koē tha̍k, koh m̄-sái lēng-goā koé-seh ; in-ūi Tiong-kok jı̄ put-chí choē, koé-seh put-chí oh ; khe-khó Khong-hi jı̄-tián ê jı̄ boē sǹg-tit, chı̍t-jı̄ siông-siông ū kúi-nā hō koé-seh . Gín-ná tùi chhit-poeh hè jı̍p-o̍h, tio̍h tha̍k-chheh kàu chhit poeh nı̂, cha̍p-lâng tiong chhang-miâ-ê kiám-chhái ū chı̍t-nn̄g lâng tāi-khài oē bat khah-chhián ê jı̄, chí ū bat jı̄-im tiāⁿ-tiāⁿ, lóng boē hiáu-tit koé-seh; tio̍h koh tha̍k cha̍p-goā nı̂ chiah oē koé-seh . Kiám-chhái só͘ koé ū sı̂ ia̍h oē chhò-gō͘, oh tit ta̍k-jı̄ ta̍k-kù hun-bêng, che m̄-sı̄ Tiong-kok jı̄ ê m̄-hó, to̍k-to̍k sı̄ in-ūi ha̍k-būn ê oh-tit cheng-kong, koh koé-seh boē it-tēng ê iân-kò͘.

Taⁿ tāi-lio̍k kú-khí chı̍t-nn̄g jı̄ choè pı̂n-kù . Chhin-chhiūⁿ kò͘--jı̄, ū só͘-chāi koé choè iân-kò͘, ū só͘-chāi koé choè pún-jiân, ū só͘-chāi koé choè só͘-í . Koh chhin-chhiūⁿ í--jı̄, ū só͘-chāi koé choè ēng, ū só͘-chāi koé choè thang, ū só͘-chāi koé choè in-ūi . M̄-nā án-ni, iáu ū choē-choē oh-tit koé ê jı̄, sui-jiân chiū phok-ha̍k ê lâng ia̍h boē-oē ta̍k jı̄ koé-seh kàu bêng . Khoàⁿ Bo̍k-su ū sı̂ chhiáⁿ Siù-châi lâi kà Sèng-chheh, ia̍h bat koé-seh m̄-tio̍h, m̄-sı̄ in-ūi i m̄-bat jı̄, á-sı̄ boē hiáu--tit koé-seh, to̍k-to̍k sı̄ in-ūi jı̄-gı̄ ê koé-seh boē oē it-tēng ê iân-kò͘ . Taⁿ hit-hō ū ha̍k-būn ê lâng siōng-chhiáⁿ boē-oē koé-seh kàu tú-hó, hô-hòng chhián-ha̍k ê lâng thài-thó oē koé-seh Sèng-chheh kàu bô chhò-gō͘ ah? Nā boē-oē koé-seh Sèng-chheh, beh thái oē bêng-pe̍k tō-lí ah ? Só͘-í ū sim siat-kàu ê lâng ài thoân tō-lí tı̄ ta̍k-kok, tek-khak tio̍h chiong Sèng-chheh hoan-e̍k hit só͘-chāi ê jı̄ kàu bêng, hō͘ lâng thang tha̍k .

Chóng-sı̄ Tiong-kok jı̄ put-chí oh-tit koé-seh, só͘-í chiah choè chit-ê pe̍h-oē-jı̄ hō͘ lóng-chóng ê lâng thang o̍h ; koh chiong Sèng-chheh kap ta̍k-hō ê chheh hoan-e̍k pe̍h-oē-jı̄ tha̍k, ka-kı̄ káng-kiù chheh-lāi ê tō-lí . Siat-sú bô chit hō pe̍h-oē-jı̄, chiū put-chí chió lâng oē hiáu-tit tha̍k Sèng-chheh. Che sı̄ hián-bêng tha̍k pe̍h-oē-jı̄ ū khah-iâⁿ tha̍k Tiong-kok jı̄.

Tē-jı̄-toāⁿ

Lūn siá pe̍h-oē-jı̄ khah-iâⁿ siá Tiong-kok jı̄, chiū-sı̄ koē siá, koh ta̍k-jı̄ ū jı̄ thang-siá, in-ūi Tiong-kok-jı̄ put-chí oh-siá, chhián-ha̍k ê lâng boē-hiáu-tit siá khah-chhim ê jı̄, ia̍h lóng boē-hiáu-tit siá phoe; siat-sú ū sı̂ siá phoe, kı̂-tiong siông ēng thó͘-jı̄, lóng bô koé-seh, hō͘ khoàⁿ phoe ê lâng boē bêng i ê ı̀-sù, chiū oē chhò-gō͘, nā-sı̄ phok-ha̍k ê lâng siá-phoe, khah siông sı̄ ēng chhim ê jı̄-gán, hō͘ lâng khoàⁿ-liáu lóng boē hiáu-tit, m̄ ta̍t-tio̍h siá pe̍h-oē-jı̄ ê phoe, ta̍k-kù hun-bêng lóng boē chhò-gō͘, ia̍h-sı̄ koē siá, lâng nā o̍h siá, kiám-chhái chı̍t-ge̍h-jı̍t, kiám-chhái kúi-nā ge̍h-jı̍t, put-lūn ta-po͘-lâng, hū-jı̂n-lâng, í-kı̍p gín-ná, lóng-chóng oē-hiáu-tit siá phoe, koh só͘-siá ta̍k-kù hun-bêng, hō͘ khoàⁿ phoe ê lâng it-chı̄n oē hiáu-tit i ê sū, bián-tit chhò-gō͘ .

Lūn kàu kı̀-siàu, ia̍h sı̄ án-ni, in-ūi Tiong-kok-jı̄ ū choē-choē bô jı̄ thang siá, ū-sı̂ tio̍h chioh-ēng pa̍t ê jı̄ lâi thoè i, phı̀-jū lâng-miâ, ū-ê bô jı̄ thang-siá, nā chioh-ēng pa̍t ê jı̄, to̍k-to̍k siá ê lâng ka-kı̄ chai, pa̍t-lâng khoàⁿ liáu chiū boē hiáu-tit, m̄-chai sı̄ chí sı̄m-mı̍h lâng, siat-sú ēng pe̍h-oē-jı̄ lâi siá, chiū m̄-sái chioh-ēng, in-ūi lóng ū jı̄ thang siá, ia̍h hō͘ khoàⁿ ê lâng m̄-sái chhò-gō͘, che sı̄ siá pe̍h-oē-jı̄ khah-iâⁿ siá Tiong-kok-jı̄ sı̄ bêng .

Ū lâng kóng, tek-khak khah-su Tiong-kok-jı̄, in-ūi Tiong-kok-jı̄ oē thong-hêng tı̄ Tiong-kok cha̍p-poeh-séng, kap Jı̍t-pún, An-lâm, Ko-lê, Liû-khiû chiah ê kok, pe̍h-oē-jı̄ put-kò sı̄ Chiang-choân nn̄g-hú oē ēng-tit nā-tiāⁿ, kàu khah-hn̄g ê só͘-chāi im-gú put siong-tông chiū boē ēng--tit, cháiⁿ-iūⁿ kóng khah-iâⁿ Tiong-kok-jı̄-ah ? Án-ni-siⁿ, sı̄ chhin-chhiūⁿ ēng sió-niá lâi pí toā-soaⁿ, ēng kau-lâu lâi pí toā-hái, sı̄ put-chí chhò-gō͘.

Chiū beh ı̀n-i kóng, m̄-sı̄ án-ni, só͘ kóng ê khah-iâⁿ . m̄-sı̄ in-ūi thong-hêng, sı̄ in-ūi ha̍p-ēng tiāⁿ-tiāⁿ, in-ūi chit-ê pe̍h-oē-jı̄ m̄-sı̄ lóng-chóng lâng thong-hêng ê lō͘-ēng, to̍k-to̍k sı̄ choè koé-seh Sèng-chheh bô-chhò ê lō͘-ēng, koé-seh Tiong-kok-jı̄ ê Sèng-chheh siông-siông ū koé m̄-tio̍h, án-ni chiū kiaⁿ-liáu oē chhò-gō͘ tō-lí, in-ūi Tiong-kok-jı̄ boē-oē ta̍k-jı̄ tiāⁿ-tio̍h ê koé-seh, siat-sú Sèng-chheh nā chı̍t-jı̄ ê chhò-gō͘, chiū kiaⁿ-liáu ná-kú ná-chhò, kūn nā chha hô-lí, hn̄g chiū chha chheng-lí, ( khoàⁿ 2 Pí-tek 3 : 16. ) siat-sú chiong Sèng-chheh it-khài hoan-e̍k pe̍h-oē-jı̄, chū-jiân chı̍t-jı̄ ia̍h-boē chhò, hō͘ tha̍k ê lâng sim bêng tō-lí, chiū bô-m̄ thong-ta̍t .

Khe-khó chāi-chá chiah-ê phok-ha̍k ê lâng, chū-chı̍p tı̄ Ai-kı̍p kok ê A-le̍k-san-tāi siâⁿ, chiong kui-phō sin-iok hoan-e̍k choè Hi-lı̄-nı̂ ê jı̄, iàu-kín sı̄ beh pó-hō͘ Sèng-keng, kiaⁿ-liáu āu-lâi ê lâng thoân chhò, in-ūi Hi-lı̄-nı̂ ê jı̄ ta̍k-jı̄ ū tiāⁿ-tio̍h ê ı̀-sù, só͘-í kàu-taⁿ hit-ê chheh iáu tı̄-teh, thang-choè sin-iok ê pún-bûn, hō͘ ta̍k-kok sı̀n-Chú ê lâng m̄-sái chhò-gō͘ tō-lí .

Taⁿ choè chit-ê pe̍h-oē-jı̄ sui-jiân boē pí-tit Hi-lı̄-nı̂ ê jı̄, iáu-kú ǹg-bāng oē pó-hō͘ tha̍k Sèng-chheh bô chhò-gō͘ ê lō͘-ēng, hō͘ Chiang Choân nn̄g-hú sı̀n Chú ê lâng lóng-oē bêng Sèng-chheh iàu-kín ê ı̀-sù, koh lūn-kàu i-ê lō͘-ēng, ia̍h-thang kóng sı̄ chin-khoah, chhin-chhiūⁿ chêng-nı̂ Tō͘ Ka-tek Sian-siⁿ ū choè chı̍t-phō pe̍h-oē jı̄-tián, sı̄ choè chiah-ê Se-kok lâng ha̍k-sı̍p Chiang Choân thó͘-im ê lō͘-ēng, khó-kiàn pe̍h-oē-jı̄ oē lı̄-ek chin-choē kok ê lâng, koh kūn sı̂ Táⁿ-má-jı̄ Sian-siⁿ ū choè jı̄-lūi piān-khó, i-ê jı̄-im koé-seh lóng-sı̄ ēng pe̍h-oē-jı̄ choè chú, hō͘ ta̍k-hō ê lâng koē-koē bat Tiong-kok ê jı̄, che it-hoat hián-bêng pe̍h-oē-jı̄ ê lı̄-ek.

Tē-saⁿ-toāⁿ

Lūn pe̍h-oē-jı̄ toā lı̄-ek tı̄ ū ha̍k-būn ê lâng í-kı̍p chèng-lâng, chiū-sı̄ hō͘ ū ha̍k-būn ê lâng thang chiong Sèng-chheh hoan-e̍k thó͘-im choè chù, kap hoan-e̍k ta̍k-hō ê khoàn-sè-bûn, lâi kà-sı̄ ta̍k-hō ê lâng, chóng-sı̄ hit-ê ū ha̍k-būn ê lâng beh kà-sı̄ lâng, iàu-kín tio̍h in-jı̂n jı̂-si, hit-ê pêng-sò͘ ū tha̍k Tiong-kok chheh ê lâng, chiū chiàu i só͘-bat ê chhián chhim lâi kà-sı̄ i, hit-ê pêng-sò͘ bô tha̍k Tiong-kok chheh ê lâng, kap hū-jı̂n-lâng gín-ná, pí ū tha̍k-chheh ê lâng ke kúi-nā-cha̍p pē, siat-sú it-khài ēng Tiong-kok jı̄ lâi kà-sı̄ i, kàu-bé oh-tit chiâⁿ, tio̍h ēng pe̍h-oē-jı̄ kà i; ǹg-bāng lóng-chóng oē-chiâⁿ, bêng-pe̍k tō-lí sı̀n Kiù-chú lâi tit-tio̍h kiù .

Goá siūⁿ Siōng-tè chiong Sèng-chheh siúⁿ-sù sè-kan, m̄-nā beh hō͘ ū ha̍k-būn ê lâng tit-tio̍h kà-sı̄, sı̄ beh hō͘ lóng-chóng ê lâng siū I ê kà-sı̄, in-ūi bān-kok ê lâng bô-lūn lâm-hū ló-iù, bô-m̄-sı̄ Siōng-tè ê kiáⁿ-jı̂, Siōng-tè choè bān peh-sı̀ⁿ ê pē, I ēng bān-mı̍h iúⁿ-chhı̄ lâng ê seng-khu, tē-it iàu-kín, sı̄ ēng tō-lí iúⁿ-chhı̄ lâng ê sim-sı̂n, sı̄ hō͘ ū ha̍k-būn ê lâng tāi-seng siū kà-sı̄, jiân-āu thang kà-sı̄ pa̍t-lâng .

Só͘-í thoân tō-lí ê lâng kàu ta̍k-kok siat-kàu, tek-khak tio̍h ēng hit só͘-chāi ê jı̄ hoan-e̍k Sèng-chheh lâi kà-sı̄ lâng, taⁿ kàu Tiong-kok chiū chiong Sèng-chheh hoan-e̍k Tiong-kok jı̄ lâi kà Tiong-kok ê lâng, chóng-sı̄ Tiong-kok jı̄ sui-jiân thong-hêng, iah put-chí ū koh-iūⁿ, ū só͘-chāi nā-sái tha̍k jı̄-im chiū chai ı̀-sù, chhin-chhiūⁿ koaⁿ-im ê jı̄ nā tha̍k jı̄-im chiū oē bêng ı̀-sù, í-goā sui-jiân tha̍k jı̄-im, bô kàu-gia̍h thang chai ı̀-sù, tek-khak tio̍h koé-seh thó͘-im kàu bêng, chiah oē chai ı̀-sù.

Só͘-í thoân tō-lí ê lâng kàu ta̍k só͘-chāi tio̍h chiàu hit só͘-chāi ê lâng ê thó͘-im choè-chiâⁿ pe̍h-oē-jı̄ hō͘ lâng thang o̍h, kàu lóng-chóng oē hiáu-tit tha̍k sèng-chheh, kap ta̍k-hō ê chheh, án-ni pe̍h-oē-jı̄ m̄-nā chı̍t-iūⁿ, tek-khak tio̍h ha̍p hit só͘-chāi ê thó͘-im chiah oē ēng--tit, chhin-chhiūⁿ Siōng-hái, Hok-chiu, Kńg-tang, Soàⁿ-thâu, Ē-mn̂g, Tâi-oân, lóng ū i-ê pe̍h-oē-jı̄, sui-jiân ta̍k só͘-chāi ê pe̍h-oē-jı̄ bô saⁿ-tâng, chóng-sı̄ tha̍k pe̍h-oē-jı̄ ê lâng, i tit-tio̍h lı̄-ek bô m̄ saⁿ-tâng, chiū-sı̄ bêng tō-lí, hoán-hoé choē, sı̀n Iâ-so͘, tit-tio̍h kiù, lâi hióng-siū éng-oán oa̍h, tùi án-ni khoàⁿ, pe̍h-oē-jı̄ ê toā lı̄-ek sı̄ bêng .

Goá ū chı̍t-ê ti-kí ê pêng-iú,sı̄ choè Bo̍k-su, i chêng-nı̂ ū tit-tio̍h chı̍t-pún sin-bûn, kı̀-chài chı̍t-ê ū hàu ê cha-bó͘-kiáⁿ kám-kek i-ê lāu-pē ê tāi-chı̀, siông-sè tha̍k chit-pún chheh put-chí ū ı̀-sù, chiū chhiáⁿ chı̍t-nn̄g ê tâng-im ê hiaⁿ-tı̄ saⁿ-kap tha̍k, ta̍k-lâng ê sim bô m̄ siū i-ê kám-kek, soè-jı̄ siūⁿ nā oē khek ı̀n-pán, ı̀n sàng lâng khoàⁿ, bô lūn kàu-lāi kàu-goā, tek-khak ū lı̄-ek,chóng-sı̄ chheh-lāi jı̄-gı̄ iáu-chhim, kı̂-tiong ū choē-choē oh-tit koé, bô ta-oâ chhiáⁿ pàng-hē-teh.

Kàu kū-nı̂ i ū koh tha̍k pe̍h-oē-jı̄ ê sin-bûn cha̍p-lio̍k, kı̂-tiong ū kı̀-chài Le̍k-sú-ka ê tāi-chı̀, sim-koaⁿ put-chí him-bō͘, hut-jiân siūⁿ-tio̍h chit-pún sin-bûn kap Le̍k-sı̄-ka chha-put-to, chiū chiong chit-pún chheh hoan-e̍k pe̍h-oē-jı̄, sàng kau Táⁿ-má-jı̄ Sian-siⁿ ı̀n chiâⁿ chheh, ǹg-bāng hō͘ lâng tha̍k ia̍h oē siū kám-kek, che sı̄ it-hoat hián-bêng pe̍h-oē-jı̄ toā lı̄-ek tı̄ ū ha̍k-būn ê lâng, í-kı̍p chèng-lâng .

Tē-sı̀-toāⁿ

Lūn lâng iàu-kín tio̍h tha̍k pe̍h-oē-jı̄, taⁿ téng-bı̄n í-keng gı̄-lūn ê toā ū lı̄-ek, chhin-chhiūⁿ án-ni, chiū bô-lūn lâm-hū ló-iù lóng-chóng tio̍h un-khûn lâi o̍h kàu se̍k, kàu oē hiáu-tit káng-kiù tō-lí, chiū pún-sin thang tit-tio̍h lı̄-ek, ia̍h-thang lı̄-ek pa̍t-lâng;m̄-nā ta-po͘-lâng nā-tiāⁿ, chiū hū-jı̂n-lâng lâi-o̍h ia̍h-thang kà-sı̄ i ê kiáⁿ-jı̂. In-ūi hū-jı̂n-lâng beh tha̍k Tiong-kok ê jı̄ kàu oē kà-sı̄ lâng, sı̄ put-chí oh ; siat-sú ū lâng oē, ia̍h-sı̄ khah chhián ê chheh tiāⁿ-tiāⁿ, nā tha̍k pe̍h-oē-jı̄ kàu cheng-kong, chiū-oē kà-sı̄ lâng tha̍k ta̍k-hō ê chheh .

Khe-khó Se-kok ê hū-jı̂n-lâng khah-choē ū tha̍k-chheh, lóng oē kà-sı̄ i-ê kiáⁿ-jı̂, bián-hùi i-ê tiōng-hu ê sim-sı̂n, hō͘ i-ê tiōng-hu thang liāu-lí goā-bı̄n ê tāi-chı̀; khó-kiàn hū-jı̂n-lâng tha̍k-chheh chin ū lı̄-ek. Chóng-sı̄ hū-jı̂n-lâng tha̍k Tiong-kok-jı̄ put-chí oh-tit sêng-kong, in-ūi jı̄ put-chí choē ; nā-sı̄ tha̍k pe̍h-oē-jı̄ , chiū bô-m̄-chiâⁿ, in-ūi i-ê jı̄ put-chí chió, koh koē-tha̍k ê iân-kò͘ .

Ū lâng kóng, pe̍h-oē-jı̄ chin-sı̄ oh-tha̍k, in-ūi ū lâng tha̍k-liáu lóng boē hiáu--tit, ū lâng sui-bóng oē-hiáu-tha̍k, ia̍h oh-tit se̍k, cháiⁿ-iūⁿ kóng sı̄ koē-tha̍k ah? Chiū beh ı̀n-i kóng, che sı̄ tùi i-ê bô liû-sim kap bô-bêng kı̂-tiong ê hoat-tō͘; iat-sú nā liû-sim un-khûn, koh bêng i-ê hoat-tō͘, chiū tek-khak koē-koē oē hiáu--tit, ia̍h-oē se̍k. Bat khoàⁿ-kı̀ⁿ kàu-hoē-lāi ê gín-ná oē tha̍k chit-ê pe̍h-oē-jı̄ kàu chı̄n hó-thiaⁿ, koh-oē kà-sı̄ pa̍t-lâng, ia̍h-oē siá-jı̄ kàu chı̄n súi ; che sı̄ hián-bêng pe̍h-oē-jı̄ koē-tha̍k ê pı̂n-kù .

Taⁿ lâng nā liû-sim lâi tha̍k chiū tek-khak oē sêng-kong; khó-sioh hiān-sı̂ kàu-hoē-lāi cheng-kong tı̄ pe̍h-oē-jı̄ ê lâng sı̄ put-chí chió, m̄-nā m̄-bat Tiong-kok-jı̄ ê lâng hiâm-oh m̄-ài tha̍k, chiū ū ha̍k-būn ê lâng ia̍h m̄-ài tha̍k, in-ūi i phah-sǹg tha̍k Tiong-kok-jı̄ koàiⁿ-sı̀, tha̍k-liáu hó-thiaⁿ koh chiâⁿ-kù, nā tha̍k pe̍h-oē-jı̄ tio̍h ho͘, tio̍h tàu, ia̍h oh-tit chiâⁿ-kù, tùi án-ni m̄-ài tha̍k. Che sı̄ tùi i bô tùi-tiōng pe̍h-oē-jı̄ ê iân-kò͘, to̍k-to̍k bô-siūⁿ tha̍k Tiong-kok-jı̄ tio̍h-ēng cha̍p-goā-nı̂ ê kang-hu,siat-sú tha̍k pe̍h-oē-jı̄ nā kam-goān chhin-chhiūⁿ tha̍k Tiong-kok-jı̄ cha̍p-hūn chı̍t-hūn ê tio̍h-boâ, tek-khak oē khah-iâⁿ tha̍k Tiong-kok-jı̄ ê se̍k .

Bat khoàⁿ-kı̀ⁿ Se-kok ê Bo̍k-su teh tha̍k pe̍h-oē-jı̄ pí tha̍k Tiong-kok-jı̄ khah-se̍k, khah chiâⁿ-kù, in-ūi tha̍k Se-kok-jı̄ koàiⁿ-sı̀, koh Tiong-kok-jı̄ Put-chí-choē, ia̍h oh-tit koé-seh, pe̍h-oē-jı̄ put-chí-chió, ia̍h m̄-sái lēng-goā koé-seh. Koh tha̍k Tiong-kok-jı̄ m̄-nā oh hiáu-tit koé-seh, ia̍h oh bêng tō-lí, m̄ ta̍t-tio̍h tha̍k pe̍h-oē-jı̄ ê khoài, oē hiáu-tit khoài bêng tō-lí ; só͘-í lâng-lâng iàu-kín tio̍h liû-sim un-khûn tha̍k pe̍h-oē-jı̄ .

Tē-gō͘-toāⁿ

Lūn tha̍k pe̍h-oē-jı̄ ê hoat-tō͘. Taⁿ lâng nā beh o̍h ta̍k-hāng ê tāi-chı̀ . tek-khak tio̍h tāi-seng bêng i-ê hoat-tō͘, o̍h-liáu chiah oē chiâⁿ, bô tit-tio̍h hoat-tō͘--ê, sui-jiân ài-o̍h, kàu-bé ia̍h oh-tit chiâⁿ .

Chhin-chhiūⁿ án-ni, lâng beh tha̍k pe̍h-oē-jı̄, kap siá pe̍h-oē-jı̄, iàu-kín tio̍h tāi-seng bêng hit-ê hoat-tō͘, khoàⁿ thâu-sū só͘-lūn chit-ê pe̍h-oē-jı̄ ê iàu-kín ; sui-jiân sı̄ put-chí kán, chóng-sı̄ kı̂-tiong ū ún-bı̂ ê hoat-tō͘, lán m̄-thang khoàⁿ-khin; iàu-kín tio̍h soè-jı̄ káng-kiù kàu bêng, jiân-āu ha̍k-sı̍p, chiah ǹg-bāng oē cheng-kong .

Taⁿ ū sı̀-hāng pâi-lia̍t tı̄ ē-toé. Tē-it-hāng, tio̍h jı̄n-bêng jı̄-bú. Tē-jı̄-hāng, tio̍h hun-pia̍t pat-im, thâu-im bô kı̀-hō; tē -jı̄-im, ēng chı̍t-phiat choè kı̀-hō, chhin-chhiūⁿ “ ′ ” ; tē-saⁿ-im, ēng chı̍t-thoa choè kı̀-hō, chhin-chhiūⁿ “ 、 ” ; tē-sı̀-im, ēng sı̀-jı̄ hē tı̄ bé-jı̄ choè kı̀-hō,chiū-sı̄ h, k, p, t ; tē-gō͘-im, ēng jı̂n--jı̄ choè kı̀-hō, chhin-chhiūⁿ “ ^ ” ; tē-la̍k-im sı̄ kap tē-jı̄-im saⁿ-tâng ; tē-chhit-im, ēng chı̍t-u̍ih choè kı̀-hō, chhin-chhiūⁿ “ -” ; tē poeh-im, ēng chhin-chhiūⁿ tē-sı̀-im, koh ke chı̍t-kiā choè kı̀-hō, chhin-chhiūⁿ “ | ” . Taⁿ chit-ê tē-jı̄-hāng, miâ sui-bóng ū pat-im sı̍t-chāi nā ū chhit-im tiāⁿ-tiāⁿ, in-ūi tē-jı̄ kap tē-la̍k nn̄g-im saⁿ-tâng. Tē-saⁿ-hāng sı̄ saⁿ-tàu ê kı̀-hō, khí-thâu ēng nn̄g-jı̄ tàu-choè chı̍t-jı̄, kiám-chhái ēng saⁿ, sı̀, gō͘ jı̄ tàu-choè chı̍t-jı̄ ia̍h-ū chóng-sı̄ lâng tio̍h jı̄n-sek, khoàⁿ bó͘-jı̄ tàu bó͘-jı̄ sı̄ sím-mı̍h jı̄, chı̍t-ē khoàⁿ-kı̀ⁿ chiū oē jı̄n-tit, lóng bián-ēng chhiat-im lâi ho͘. Tio̍h o̍h kàu án-ni, chiah-thang sǹg sı̄ bat pe̍h-oē-jı̄ ê lâng. Tē-sı̀-hāng, sı̄ tio̍h-bêng ta̍k-hō ê kı̀-hō, in-ūi ū khí-kù kap lâng-miâ toē-hō-miâ ê kı̀-hō, lóng tio̍h-ēng toā-pún ê jı̄ hē-tı̄ thâu-jı̄ lâi hun-pia̍t i. Koh ū kàu-kù bē kàu-chat, sı̄ ēng chı̍t-tiám koah ū thoa-bé choè kı̀-hō, chhin-chhiūⁿ “, ” koh ū kàu-chat iáu-bē kóng bêng-pe̍k i-ê tāi-chı̀--ê, sı̄ ēng téng-bı̄n chı̍t-tiám, ē-bı̄n chı̍t-tiám koah ū thoa-bé choè kı̀-hō, chhin-chhiūⁿ “ ; ” ; koh ū kàu-chat í-keng kóng bêng-pe̍k i-ê tāi-chı̀--ê, sı̄-ēng chı̍t ı̂ⁿ-tiám choè kı̀-hō, chhin-chhiūⁿ “ . ” ; koh ū saⁿ-liân-kù put-lūn nn̄g-jı̄ á-sı̄ saⁿ-jı̄, sı̄ ēng chı̍t-u̍ih tı̄ tiong-ng choè kı̀-hō, chhin-chhiūⁿ “ -” ; koh ū oē-bé, sı̄ ēng nn̄g sió-u̍ih hē tı̄ bé-jı̄ ê tiong-ng choè kı̀-hō, chhin-chhiūⁿ “--” ; koh ū mn̄g-ê kı̀-hō, sı̄ ēng chı̍t-oan-khiā, ē-bı̄n ke chı̍t-tiám choè kı̀-hō, chhin-chhiūⁿ “ ? ” ; koh ū kı̂-khoài kap thó͘-khùi, sı̄ ēng chı̍t tı̍t-khiā, ē-bı̄n ke chı̍t-tiám choè kı̀-hō, chhin-chhiūⁿ “ ! ” ; koh ū ín sèng-chheh [á-sı̄ pa̍t-hō ê chheh] ê oē, thâu ēng nn̄g-tiám koah thoa-bé kau-khí, bé-bı̄n ēng nn̄g-tiám koah thoa-bé kau-lo̍h choè kı̀-hō, chhin-chhiūⁿ “ ” . Taⁿ lâng nā chit-ê hoat-tō͘ liû-sim khı̀-o̍h, chai cháiⁿ-iūⁿ tio̍h-khí, cháiⁿ-iūⁿ tio̍h-soah, ū jı̄ tio̍h tha̍k khah-tāng, ū jı̄ tio̍h tha̍k khah-khin, tha̍k-kàu se̍k-se̍k, chiū tha̍k chit-ê pe̍h-oē-jı̄ pí tha̍k Tiong-kok-jı̄ khah hó-thiaⁿ, ı̀-sù ia̍h khah koē-bêng .

Lūn kàu siá-jı̄ ia̍h sı̄ án-ni, tùi án-ni khoàⁿ, pe̍h-oē-jı̄ sı̍t-chāi ū toā lı̄-ek, lán kiám m̄-tio̍h tùi-tiōng liû-sim lâi-o̍h mah ?

[Chêng tē-it, tē-jı̄, tē-saⁿ tiuⁿ ê Kàu-hoē-pò, ū ı̀n Ia̍p Bo̍k-su só͘-chò lūn pe̍h-oē-jı̄ ê lı̄-ek. Taⁿ chiong Lâu Bō͘-chheng tē-jı̄-miâ ê lūn ı̀n tı̄ chia hō͘ lín tha̍k . I só͘ chò-ê khah-té, só͘-í thang chò-chı̍t-ē ı̀n . ]

Thiⁿ-ē ta̍k-kok ê jı̄ bô lóng siāng-khoán; tàu-tí lóng ū lō͘-ēng; taⁿ chè pe̍h-oē-jı̄ iā sı̄ bûn-jı̄-tiong ê chı̍t-lūi, i-ê lı̄-ek lâng, pí pa̍t-hō ê jı̄, iáu ū khah-kín khah-khoài . Taⁿ chiong i-ê lō͘-ēng tāi-lio̍k lâi kóng tı̄ ē-té .

Pe̍h-oē-jı̄ ē pang-chān kàu-hoē heng-ōng, tú-tio̍h khún-tio̍k bē hoè-bô . Kàu-hoē só͘-í bô heng-ōng, in-ūi jı̍p-kàu ê lâng bô chhim-chai tō-lí; bô chhim-chai tō-lí, in-ūi ka-tı̄ bē-hiáu tha̍k Sèng-keng; bē-hiáu tha̍k Sèng-keng, in-ūi m̄-bat jı̄ . Khóng-chú-jı̄ oh ké-soeh, nā bat bô chhim, iû-goân khoàⁿ bē-lâi; kan-ta thiaⁿ Sian-siⁿ kóng, chiū só͘ bat--ê iú-hān, bô thiaⁿ-tio̍h--ê chiū m̄-chai; thiaⁿ kú--ê iū bē kı̀-tit, hô-hòng ū sı̂ hō͘-lâi chúi-chhim chó͘-tòng; sè-sū kiáu-jiáu, pēⁿ-thiàⁿ chó͘-gāi, bē-ē ta̍k lé-pài lóng kàu lé-pài-tn̂g thiaⁿ tō-lí ? Thiaⁿ tō-lí ê lâng nā khéng khı̂n tha̍k pe̍h-oē-jı̄, chiū chı̍t-nı̂-kú put-lūn lâm-hū ló-iù lóng ē ka-tı̄ tha̍k Sèng-keng, khah chai tō-lí; m̄-bián thèng-hāu kàu pài-tn̂g thiaⁿ tō-lí, tı̄ ke-lāi chá-àm iā thang tha̍k, tit-tio̍h lı̄-ek. Koh ū-sı̂ tú-tio̍h chó͘-tòng bē tàng kàu pài-tn̂g siū kà-sı̄, chiū thang ka-tı̄ khoàⁿ chhián-bêng tō-lí ê chheh, iúⁿ-chhı̄ sim-sı̂n, iā ē lı̄-ek thiaⁿ ê lâng. Kàu-hoē ê lâng nā bô khoàⁿ-khin pe̍h-oē-jı̄, tek-khak ē ná-kú ná-toā chı̀n-pō͘. Koh thiaⁿ-kı̀ⁿ A-hui-lı̄-ka ê tang-pêng ū chı̍t-ê hái-sū, miâ Má-ta̍t-ka-su-ka, tı̄ hia kàu-hoē tú-tio̍h khún-tio̍k, jı̄-gō͘-nı̂-kú bô Bo̍k-su tı̄-teh ; kàu khún-tio̍k soah, Bo̍k-su koh khı̀, khoàⁿ-kı̀ⁿ sı̀n Chú ê lâng pí-chêng koh khah-chē; chiū-sı̄ in-ūi ū pún-tē ê pe̍h-oē-jı̄ ê Sèng-chheh tı̄-teh, lâng ē hiáu ka-tı̄ tha̍k. Che thang pı̂n-kı̀ kàu-hoē ê lâng m̄-thang bô tha̍k pe̍h-oē-jı̄ .

Pe̍h-oē-jı̄ ē hō͘ lú-jı̂n ū tı̀-hūi . Hū-jı̂n-lâng ê châi-tiāu bô khah-su ta-po͘-lâng, só͘-í ē bô ha̍k-būn, in-ūi Khóng-chú-jı̄ oh-tha̍k . Nā boeh tha̍k pe̍h-oē-jı̄, tùi la̍k-hoè kàu cha̍p-hoè sı̀-nı̂ ê kú, chiū bô bē-hiáu-siá ê jı̄, ia̍h bô bē-hiáu-tha̍k ê chheh ; án-ni kiám m̄-sı̄ chin toā ê lō͘-ēng?

Pe̍h-oē-jı̄ ē hō͘ ta̍k-téng chò-kang ê lâng ē hiáu tha̍k Sèng-chheh, kap chai chē-chē hāng ê tāi-chı̀. Ta̍k-téng chò-kang ê lâng ta̍k-jı̍t ū kang tı̂ⁿ-poàⁿ, iáu-kú nā boeh tha̍k pe̍h-oē-jı̄ ún-tàng ē khí-lâi. Goá khoàⁿ hiān-sı̂ teh thiaⁿ tō-lí--ê khah-chē sı̄ choh-sit kap cháu-thàn ê lâng, pún m̄-bat poàⁿ-jı̄; tùi thiaⁿ tō-lí chiàⁿ ta̍k-pái An-hioh-jı̍t o̍h tha̍k jı̄-bó, tng tú-á teh-tha̍k ê sı̂ m̄-káⁿ siūⁿ ē bat, nā-sı̄ kàu-boé lóng ē ka-tı̄ tha̍k, m̄-bián tiāⁿ-tiāⁿ oá-khò pa̍t-lâng lâi kà . Chiong-lâi pe̍h-oē-jı̄ ná chē lâng bat, chiū pe̍h-oē-jı̄ ê chheh iā ē ná-chhut ná-chē iūⁿ, kiám-chhái Thian-bûn Tē-lí ê chheh ; á-sı̄ Soàn-ha̍k Kek-bu̍t ê chheh; Le̍k-tāi ê tāi-chı̀,ta̍k-kok ê sin-bûn; che lóng ē ke-thiⁿ lâng ê tı̀-hūi; án-ní-siⁿ kiám thang kóng pe̍h-oē-jı̄ m̄-bián tha̍k ē chò-tit ?

Pe̍h-oē-jı̄ ē hō͘ lâng khah-khoài bat Khóng-chú-jı̄. Nā seng tha̍k pe̍h-oē-jı̄ kàu ē siá, tı̄ tha̍k Khóng-chú-jı̄ ê sı̂ hoān ū m̄-bat ê jı̄, kap bē-hiáu ké-soeh ê ı̀-gı̄; nā-sái mn̄g sian-siⁿ chı̍t-pái, ēng pe̍h-oē-jı̄ chù -bêng, chiū ē ka-tı̄ tha̍k, m̄-bián kiaⁿ koh bē kı̀-tit; án-ni sı̄ tha̍k Khóng-chú-jı̄, iā tio̍h kiam ēng pe̍h-oē-jı̄ . pe̍h-oē-jı̄ oē hō͘ m̄ bat tha̍k Khóng-chú-jı̄ ê lâng bat Khóng-chú-jı̄. Goá só͘ bat ê thoân-tō ê lâng, lāi-tiong ū nn̄g lâng chū soè bô tha̍k-chheh, kàu jı̄-cha̍p chhut-thâu hè chiah thiaⁿ tō-lí, o̍h-tha̍k pe̍h-oē-jı̄; hiān-sı̂ liân Tn̂g-lâng-jı̄ ê Sèng-chheh, kap sin-bûn iā khoàⁿ oē lâi: nā m̄ sı̄ bat pe̍h-oē-jı̄ thài-thó ū thang án-ni?

Pe̍h-oē-jı̄ ē hō͘ lâng khoài tù-chheh. Lâng nā bat pe̍h-oē-jı̄ hoān ū lı̄-ek lâng ê tāi-chı̀, ài tù-chheh pò lâng chai, thang sûi-siūⁿ sûi-siá; m̄-bián hoân-ló bô bûn-hoat, bô tiám-kù, hō͘ lâng iàm-chiān m̄ ài khoàⁿ i só͘ tù ê chheh . Ia̍h ē hō͘ khoàⁿ-chheh ê lâng khoài bêng, m̄-bián ū-ê khoàⁿ ē bêng, ū-ê khoàⁿ bē-bêng ê chó͘-gāi . Nā ēng Khóng-chú-jı̄ tù-chheh bô hiah khoài, beh khoàⁿ lâng só͘ tù ê chheh kàu lóng bêng iā sı̄ oh. M̄ ta̍t-tio̍h pe̍h-oē-jı̄ ha̍p nn̄g-pêng ê lâng ê lı̄-piān.

Pe̍h-oē-jı̄ ē hō͘ sàn-hiong-lâng ê chú-tē ū tı̀-hūi. Sàn-hiong-lâng ê chú-tē châi-chêng bē lóng khah-su hó-gia̍h-lâng ê chú-tē ; khó-sioh sè-hàn ê sı̂ i bô tha̍k-chheh ; á-sı̄ tha̍k bô kúi-nı̂ koh khı̀ chò-kang, kàu-boé ū tha̍k ná bô tha̍k, iû-goân m̄-bat jı̄. Pe̍h-oē-jı̄ nā tha̍k kàu ē siá, chiū m̄-bián-kiaⁿ ē hùi-bô-khı̀, in-ūi ū jı̄-bó thang chhiat-im, chı̍t-ē ho͘, jı̄ chiū tı̄-teh ; khoàⁿ beh kóng sím-mı̍h oē, siūⁿ lâi tàu chiū ū jı̄, m̄-bián chhin-chhiūⁿ Khóng-chú-jı̄ ū tha̍k-tio̍h--ê chiàⁿ bat, bô tha̍k-tio̍h--ê chiū m̄-bat . Koh tio̍h ū tha̍k koè, chiàⁿ chai hit-ê kò͘-tián, bô tha̍k-koè, chiū m̄-chai hit-ê in-iû. Koh lâng nā beh bat Khóng-chú-jı̄ kàu khoàⁿ ē lâi, siá ē khı̀, tio̍h tùi sè-hàn tı̍t-tı̍t tha̍k kàu chiâⁿ-cha̍p-nı̂-kú chiàⁿ-ē, iā ū kàu chiâⁿ cha̍p-nı̂-kú, kah i tha̍k pun lâng thiaⁿ, kóng bē tit-lâi; ū tāi-chı̀ kah i kı̀, siá bē tit lâi. Pe̍h-oē-jı̄ m̄-bián tha̍k hiah-chē-nı̂: m̄-bián tùi sè-hàn tha̍k nā kàu bat, beh-tha̍k beh-siá bô m̄ sûi -ı̀ . Kàu-hoē-tiong ê lâng chia̍h kàu saⁿ-cha̍p-goā-hoè, sı̀-cha̍p-goā-hoè, gō͘-cha̍p-hoè chiah o̍h-tha̍k pe̍h-oē-jı̄ ê lâng put-chí chē, koah-sı̄ kàu se̍k-se̍k ē tha̍k hō͘ pa̍t-lâng thiaⁿ. Ū chè pe̍h-oē-jı̄, sàn-hiong lâng ê chú-tē m̄-bián khó͘ m̄-bat jı̄ .

Pe̍h-oē-jı̄ ē hō͘ bô siū kàu-hoà ê lâng pı̀ⁿ-chò ū ha̍k-būn; kū-té bô-jı̄ pı̀ⁿ-kàu ū jı̄. Chá-jı̍t lâm-iûⁿ chē-chē hái-sū bô siū kàu-hoà; m̄-bat lé-gı̂, sı̄m-chı̀ thâi-sí lâng soà chia̍h-bah. Tùi ū Bo̍k-su khı̀ thoân tō-lí, ha̍k-sı̍p i-ê thó͘-im chhòng pe̍h-oē-jı̄ ; tùi án-ni hong-sio̍k toā piàn-oāⁿ, lâng chiām-chiām ū tı̀-hūi, kok-tō͘ ná -kú ná-heng ; kàu-hoē lâng-gia̍h chı̍t-nı̂ chı̍t-nı̂ ke. M̄-sı̄ pe̍h-oē-jı̄, thài-thó ē hō͘ bô jı̄ ê só͘-chāi pı̀ⁿ-chò ū jı̄, piàn-oāⁿ kàu hiah-kín ? Lán ê Hông-tè chai soaⁿ--nı̍h ê chhiⁿ-hoan m̄-bat lé-gı̂, tiâu-tı̂ siat gı̄-o̍h chhiáⁿ sian-siⁿ lâi kà, tùi siat kàu-taⁿ chiong-kı̄n peh-nı̂-kú; chha-put-to bô chı̍t-ê bat-jı̄ . In-ūi jı̄ kap oē bô siāng, tāi-seng kan-ta tha̍k jı̄-im lóng bē-hiáu sím-mı̍h ı̀-sù, tha̍k-liáu tio̍h koh ké-soeh. Hiah-ê chhiⁿ-hoan ê gín-ná kan-ta thiaⁿ Sian-siⁿ kóng, ná chhin-chhiūⁿ ah-á thiaⁿ lûi, thiaⁿ chı̍t-ê siaⁿ tiāⁿ-tiāⁿ. Phı̀-jū nā chiong pe̍h-oē-jı̄ hoan-e̍k in ê im, tha̍k in ê oē, tek-khak khah ū èng-hāu .

Goá chiàu goá gû-gōng ê ı̀-kiàn, chiong pe̍h-oē-jı̄ kap Khóng-chú-jı̄ saⁿ-pí lâi-lūn, m̄-sı̄ hiâm Khóng-chú-jı̄ bô lō͘-ēng; put-kò kóng pe̍h-oē-jı̄ khah khoài bat, hō͘ lâng khah-kín chı̀n-pō͘ ; m̄-bián kàu kú-kú tiāⁿ-tiāⁿ hō͘ jı̄ pa̍k-teh . Iū koh ha̍p tı̄ lâm-hū ló-iù, pı̂n-chiān hù-kùi ta̍k-téng ê lâng lóng tha̍k ē khí. Án-ni kiám m̄-sı̄ put-chí toā lō͘-ēng?

Lâng chún-nā bat Khóng-chú-jı̄ kàu chin-chhim, nā koh ke bat pe̍h-oē-jı̄, iā-sı̄ ke chı̍t-hāng ê lō͘-ēng. Kiám ū lâng hiâm kóng bat siuⁿ-chē-iūⁿ-jı̄ m̄-hó mah ?

(Tâi-oân Hú-siâⁿ Kàu-hoē-pò tē 1~3,7 tiuⁿ, 1885 nı̂ 7~9 ge̍h, 1886 nı̂ 2 ge̍h)