Pe̍h-oē-jı̄ Thó͘-siūⁿ

Goá chhut-sı̀ tı̄ Tâi-oân í-keng 50 goā nı̂; lâng phah-sǹg lāu-lah, kı̂-sı̍t iáu-boē. Hàn-bûn hiaⁿ in ū sò͘-bān ê hiaⁿ-tı̄, m̄ ta̍t goán sò͘ cha̍p-ê. Lâng o̍h hàn-bûn chı̍t nı̂ kú, m̄-ta̍t lâi chhoē goá sı̀ gō͘ jı̍t. Ū lâng bô tha̍k ha̍k-hāu chı̍t nı̂, á poàⁿ goe̍h-jı̍t : Sin-Kū-iok ē hiáu tha̍k, Si ē hiáu gı̂m, phoe ē-hiáu siá; che bô m̄-sı̄ goá khan-sêng--ê. Kı̄n-lâi ēng goá lâi tù ê chheh, hoan-e̍k ê chheh, á-sı̄ Sèng-hoē-pò, Kàu-hoē-pò téng-téng. Lâng nā tı̄ pài-tn̂g á-sı̄ ê-hng sı̂, chiong kóng êng oē ê sı̂-kan lâi chhoē goá, tek-khak ē bat hiah ê chheh, tit-tio̍h chē-chē ha̍k-būn kap bat Siōng-tè ê chin-lí. Boē bat goá ê hiaⁿ-tı̄ ah ! lín ta̍k lé-pài jia̍t-sim khı̀ thiaⁿ tō-lí sı̄ hó; m̄-kú tio̍h koh lâi bat goá, goá chhiáⁿ lín chhin-ba̍k khoàⁿ Siōng-tè ê Sèng-keng, thang chò lín ka-têng ê thoân-tō. Hiān-sı̂ goá tı̄ Chú-jı̍t-o̍h lóng sı̄ kap sè-sè-hàn gín-á chò pêng-iú. Sian-siⁿ put-chí ài in bat goá, m̄-kú in put-chí hòng-tōng; ū-ê sian-siⁿ kah in lâi liām, chek-sı̂ liām kàu se̍k liu-liu. Nā kiò i chı̍t-jı̄ chı̍t-jı̄ lâi jı̄n, i chiū lām-sám kā goá hō pa̍t miâ, chhin-chhiūⁿ goá sı̄“ak” i kóng sı̄ “ah”, goá sı̄ “oh” i kóng sı̄ “ok”. Che goân-in sı̄ in-ūi in iáu sè-hàn chhùi-chı̍h iáu tūn, ba̍k-chiu phoê iáu kāu; m̄-kú iā ū koan-hē tı̄ sian-siⁿ ê kàu-hoat kap kàu chhâi ê put-tek-tong. Chóng iáu chı̍t khoán-ê í-keng toā lâng. Nā sái kà in bó-ba̍k hō͘ tàu ê hoat, in ka-kı̄ tek-khak liâm-piⁿ ē hiáu.Í-keng bat goá ê pêng-iú ah ! lín bat ia̍h tio̍h pun in bat. Lán lâi lēng-goā kó͘-bú in lâi tha̍k, hō͘ in tı̄ chhù-nı̍h ē-hiáu bat Sèng-keng chò in ka-têng ê thoân-tō, án-ni lán kiám bô chı̄n-tiong tı̄ Siōng-tè ê bı̄n-chêng ? (Tâi-lâm-kàu-hoē-pò tē 418 koàn, 1920 nı̂ 1 goe̍h)