Phı̂ⁿ-ô͘ Seng-oa̍h kiàn-bûn
Kok-ūi kèng-thiàⁿ ê tho̍k-chiá pêng-an. Tı̄ Phı̂ⁿ-ô͘ seng-oa̍h nn̄g nı̂ kú, in-ūi choè sûn-hoê kang-chok, só͘-í khah ū ki-hoē khı̀ ta̍k ê tó-sū, chū-jiân oē khoàⁿ tio̍h chin-choē kap Tâi-oân bô siāng khoán ê sū, kám-kak chin sim-sek, chit chūn lâi kài-siāu kúi hāng, ǹg-bāng oē hō͘ tāi-ke khah liáu-kái Phı̂ⁿ-ô͘ ê chêng-hêng thang kè-sio̍k koan-sim tı̄ Phı̂ⁿ-ô͘ ê thoân-tō. 1. Hı̂ kap han-chû. Phı̂ⁿ-ô͘ ê lông-sán-bu̍t m̄-ta̍t-tio̍h Tâi-oân pún-tó, ū chin-choē sı̄ chia boē thang sán-seng ê, chhin-chhiūⁿ bí kap choē-choē khoán ê chhiⁿ-chhài, lóng tio̍h ǹg-bāng Tâi-oân ê kiong-kip. Chia ê chú-iàu lông-sán-bu̍t sı̄ han-chû, che sı̄ ta̍k ê tó-sū lóng oē thang chèng ê, han-chû chiū chiâⁿ-choè Phı̂ⁿ-ô͘ lâng ê chú-iàu chia̍h-liāu-phín. Sui-jiân 3 nı̂ lâi ūi-tio̍h hān-chai, han-chû kiám siu, tı̀-kàu tio̍h tùi Tâi-oân pún-tó phoè han-chû lâi chia̍h, iā boē in-ūi án-ni oân-choân kái choè chia̍h bí, sı̄ in-ūi chia̍h han-chû phè hı̂ ê chu-bı̄ chin ha̍h, te̍k-pia̍t sı̄ joa̍h-thiⁿ, han-chû thng phè hı̂ sı̄ chin lı̄-kháu. Tú-chiah lâi Phı̂ⁿ-ô͘ ê sı̂, khoàⁿ tio̍h chia ê lâng kan-ta chia̍h han-chû phè hı̂, kám-kak chin khó-lı̂n, chóng-sı̄ āu-lâi thiaⁿ kóng Phı̂ⁿ-ô͘ sı̄ hó-gia̍h lâng chia̍h han-chû, sòng-hiong lâng chiah ū chia̍h bí, sı̄ in-ūi hó-gia̍h lâng ka-kı̄ ū thó͘-toē thang chèng-choh, ū han-chû thang siu-sêng, m̄-bián boé bí; sòng-hiong lâng ka-kı̄ bô han-chû thang siu chiah boé bí lâi chia̍h. Khoàⁿ-kı̀ⁿ chia ê lâng hiah ài chia̍h han-chû soà khí hò͘ⁿ-kı̂, boé han-chû chú thng lâi phè hı̂ khoàⁿ chı̍t-ē, chiah chai han-chû kap hı̂ sı̍t-chāi chin ha̍h, chin hó-chia̍h, han-chû thng nā chham tām-po̍h thn̂g lo̍h-khı̀ oē koh-khah hó-chia̍h. Nā ū ài chia̍h hı̂ ê tho̍k-chiá “han-chû phè hı̂,” chhiáⁿ lín chhı̀ hit ê chu-bı̄ khoàⁿ leh, hı̂ nā jú chhiⁿ chiū oē kám-kak jú hó-chia̍h, phah-sǹg lí oē ná chia̍h ná ài chia̍h. Chiàu goá khoàⁿ, Phı̂ⁿ-ô͘ lâng chia̍h han-chû ê pí chia̍h bí khah choē (Má-kong tû goā). Koh hı̂ chin-choē chū-jiân sı̄ phè hı̂, ná chhin-chhiūⁿ chin khó-lı̂n. Chóng-sı̄ Phı̂ⁿ-ô͘ lâng ê thé-keh lóng chin chho͘-toā, koh ióng-chòng, iā tn̂g hè-siū, 70 hè í-siōng ê lāu-lâng chin-choē, tı̄ Āu-liâu ū chı̍t ūi 103 hè ê lāu-lâng iáu oē chhng chiam, che kiám-chhái sı̄ chia̍h hı̂ kap han-chû ê koan-hē. Tı̄ chit khoán soè-soè ê ko͘-tó iā khoàⁿ-kı̀ⁿ Siōng-tè ê un-tián kap thiàⁿ-thàng, hō͘ bô chhut-sán bí ê só͘-chāi ê Phı̂ⁿ-ô͘ lâng ū han-chû thang chia̍h, m̄-nā bián gō sí, hoán-tńg ū khah ióng-chòng ê sin-thé. 2. Kim-koe ê liāu-lí. Phı̂ⁿ-ô͘ chhiⁿ-chhài lūi ê sán-liōng chin chió, jú hn̄g ê lı̄-tó chiū jú chió, che iā sı̄ hō͘ Phı̂ⁿ-ô͘ lâng ê seng-oa̍h bô hoat-tō͘ thang kap Tâi-oân kāng khoán. Kim-koe tı̄ Tâi-oân sı̄ chin chho͘-sio̍k, choē-choē lông-hu sı̄ teh chhı̄ ti, chóng-sı̄ tı̄ Phı̂ⁿ-ô͘ sı̄ chin tin-kùi ê chia̍h-mı̍h. Kim-koe chhoah chhiam chhá bí-hún sı̄ Phı̂ⁿ-ô͘ chhut-miâ ê liāu-lí ê chı̍t hāng, che iā sı̄ lâi Phı̂ⁿ-ô͘ chiah chia̍h tio̍h ê, sı̍t-chāi chin hó-chia̍h. Koh Phı̂ⁿ-ô͘ ê koà-chhài iā chin chió, kiâm-chhài sı̄ lóng tùi Tâi-oân lâi--ê, chóng-sı̄ lı̄-tó ê lâng ēng ka-kı̄ chèng ê kim-koe sı̄ⁿ choè kiâm-chhài, lâi chú kim-koe hı̂ iah sı̄ khui pı̂ ê hù-sı̍t-phín, sı̍t-chāi chin sim-sek, che sı̄ Phı̂ⁿ-ô͘ liāu-lí ê chı̍t hāng. 3. Hı̂ koaⁿ kap kê lūi. Phı̂ⁿ-ô͘ thang kóng sı̄ hái-sán ê ông-kok, joa̍h-thiⁿ sı̂ chhut-sán koh-khah choē, sió pō͘-hūn tı̄ Phı̂ⁿ-ô͘ boē í-goā, lóng siau tùi Tâi-oân khı̀, chóng-sı̄ pha̍k choè hı̂-koaⁿ chiah boē chhut khı̀ Tâi-oân ê iā boē chió. Koh ū chhut-sán chin-choē ê hı̂-pó͘, chia ê joa̍h-thiⁿ chin iām-jia̍t koh bô hō͘-chúi, só͘-í hı̂-pó͘ pha̍k chı̍t jı̍t chiū ta, thang phoè khı̀ Tâi-oân. Siat-sú Phı̂ⁿ-ô͘ ê khı̀-hāu nā chhin-chhiūⁿ Ki-liông put-sı̂ teh lo̍h-hō͘, chiū chai só͘ chhut-sán tāi-liōng ê hı̂ kap hı̂-pó͘ sı̄ bô hoat-tō͘ thang pha̍k, oē soà siông-siông chhàu-khı̀ lah. Chóng-sı̄ Siōng-tè chin kı̂-biāu ê an-pâi, hō͘ chia ê khı̀-hāu bô hō͘ koh iām-jia̍t, thang pha̍k chin-choē hı̂-koaⁿ kap hı̂-pó͘. Siōng-tè sı̍t-chāi sı̄ kı̂-biāu koh thiàⁿ-thàng ê Siōng-tè. Koh-chài Phı̂ⁿ-ô͘ lâng iā chin gâu sı̄ⁿ kê, chhin-chhiūⁿ chu-lê kê, teng-hiuⁿ kê, hê-á kê, hái-than kê téng, chin-choē khoán. Pún-lâi sı̄ ūi-tio̍h tang-thiⁿ ê mı̍h-phè, ke-ke hō͘-hō͘ to ū sı̄ⁿ kê, ná chhin-chhiūⁿ Tâi-oân ê lông-bı̂n sı̄ⁿ am-koe á-sı̄ chhài-thâu chı̍t iūⁿ, in-ūi tang-thiⁿ hong chin thàu, lia̍h hı̂ khah bô lı̄-piān, chiū chiong chin-choē khoán ê hái-sán-bu̍t sı̄ⁿ choè kê choè tang-thiⁿ ê mı̍h-phè. Chóng-sı̄ kap Tâi-oân ê kau-thong khah chı̀n-pō͘, koh hı̂-gia̍p ke chin hoat-tián ê kin-á-jı̍t, chiah ê kê lūi soà chiâⁿ-choè Phı̂ⁿ-ô͘ bêng-sán, sı̄ lâi Phı̂ⁿ-ô͘ koan-kong ê lâng chin hó ê lé-phín. Chu-ūi Lú Soan ge̍h-khan ê tho̍k-chiá, goá kin-á-jı̍t lóng sı̄ kài-siāu Phı̂ⁿ-ô͘ lâng ê chia̍h-hoat, in-ūi chu-ūi tho̍k-chiá toā pō͘-hūn lóng sı̄ ka-têng chú-hū, tùi chia̍h ê hong-bı̄n chin chhù-bı̄ ài gián-kiù, só͘-í chiong tı̄ chia só͘ keng-giām kap khoàⁿ tio̍h ê siá chiah ê lâi choè lín tāi-ke ê chham-khó . Chóng kóng, Phı̂ⁿ-ô͘ lâng ê seng-oa̍h sı̄ kán-tan koh phok-sò͘, m̄-ta̍t-tio̍h Tâi-oân ê lâng, lâi Phı̂ⁿ-ô͘ kang-chok ê thoân-kàu-chiá ū sı̂ iā tio̍h kap in siāng khoán ê seng-oa̍h. Chhiáⁿ kok-ūi kèng-ài ê tho̍k-chiá, tı̄ lín kı̂-tó tiong oē kı̀-tit thoè Phı̂ⁿ-ô͘ kı̂-tó, lâi piáu-sı̄ lín ê koan-sim sı̄ chhim-chhim só͘ pài-thok ê, goān Chú un kap lín tāi-ke tı̄-teh.
(Lú-soan Goe̍h-khan tē 70 kı̂, 1965 nı̂ 10 goe̍h)