Phoà-pēⁿ Jı̍t-kı̀
Chhiah-iām-iām ê jı̍t-thâu
Tiám-to̍h sèⁿ-miā ê goân-thâu
Nńg-siô-siô ê sin-khu
Tòng bē tiâu hoat-sio ê un-tō͘
Khoàⁿ-tio̍h Chheng-bûn sio-hut-hut tú chhut-pán ê siáu-soat-chı̍p “Sat-ba̍k-á ê chu-bı̄”, lāi-té ū chı̍t-phiⁿ “Seⁿ kap Sí ê Melody”, tha̍k-liáu goá ū chin chhim ê kám-chhiok kap thé-hoē. Siáu-soat chú-kak A-kheng, cho͘-gū chin pi-chhám, goân-pún bí-hó ê chiân-têng, in-ūi phoà-pēⁿ, jı̂n-seng tō khai-sí piàn-sek. M̄-tāⁿ tēng-hun ê cha-po͘-lâng húi-hun, koh chhut-kok pàng-sak i kap goân-pún ê sêng-lo̍k. Chim-chiok siūⁿ--khí-lâi, chit-chióng ê jı̂n-seng cho͘-gū, tng lí bı̄n-tùi seⁿ-sí koan-thâu, siōng su-iàu ài-jı̂n ê koan-sim ê sı̂, soah tit-tio̍h chin chân-khok ê hoê-èng kap tùi-thāi, hit-chióng ê cho͘-gū m̄-chai beh oàn-thiⁿ iah-sı̄ beh oàn-tē? Soaⁿ-bêng hái-sè nā tú-tio̍h chân-khok hiān-sı̍t ê khó-giām, tō chai sı̄ chin sı̄ ké? Jı̂n-seng ū-sı̂-chūn tō-sı̄ ē tú-tio̍h lí bô hoat-tō͘ kè-sǹg ê tāi-chı̀ hoat-seng, kin-á-jı̍t hong-pêng lōng-chēng, siáⁿ-lâng chai bı̂n-á-chài ē khí hong-thai? Phoà-pēⁿ tō-sı̄ siōng phó͘-phiàn ê ı̀-goā, sui-jiân A-kheng sı̄ siáu-soat lāi-té ê jı̂n-bu̍t, m̄-koh i ê cho͘-gū tō oa̍h-thiàu-thiàu tı̄ hiān-sı̍t ê siā-hoē tú ē tio̍h, mā ē chhut-hiān tı̄ lán sı̀-kho͘-liàn-tńg ê chhin-chiâⁿ-gō͘-cha̍p--nih.
Kò͘-sū ê chú-kak tài-tio̍h『紅斑性狼瘡』(SLE), kap goá chit-má tio̍h--ê sı̄ put-chí-á chiap-kı̄n ê pēⁿ, lóng sı̄『免疫系統』 chhut būn-tê ê pēⁿ. Goá tı̄ 2000 nı̂ joa̍h-thiⁿ, chèng-sı̍t tit-tio̍h『肌無力症』(MG), m̄-koh chèng-thâu tı̄ khah-chá 1997 nı̂ tō chhut-hiān--a, kan-taⁿ sı̄ chèng-thâu iáu bô giâm-tiōng, mā bô bêng-hián, tō chı̍t-tang koè chı̍t-tang kàu oân-choân hoat-pēⁿ, chiah chai tāi-chı̀ toā-tiâu lo͘h. Koh-khah soe--ê sı̄ koh tio̍h『類風濕關節炎』(RA), chı̍t-chióng “bē sí é gâm”, chin-chiàⁿ sı̄ lâng nā soe, chèng pû-á ia̍h ē seⁿ chhài-koe. Ka-chài seⁿ tı̄ i-ha̍k hoat-ta̍t ê hiān-tāi siā-hoē, hoat-bêng ê io̍h-á hō͘人chia̍h thàng hái--ê, nā-sı̄ lí ê peh-jı̄ ū-kàu tāng.
Goá kap chú-kak bô kāng-khoán--ê sı̄ goá phoà-pēⁿ chı̀n-chêng tō kiat-hun--a, goán thâu-ke kin-pún tō bē-hù hiō-hoé, koh goá gín-á í-keng seⁿ--lo̍h, hō͘ i bô hoat-tō͘ piàn khiàu, hûiⁿ-tı̍t i tō-sı̄ ài hū-chek kàu-té, chí-hó jı̄n--a, chit-tiám goá chin chheng-chhó͘. Ka-chài goá ê pēⁿ sı̄ kè-ang liáu chiah hoat-pēⁿ, nā bô tı̄ hun-in chit-tiâu lō͘, it-tēng mā chhin-chhiūⁿ kò͘-sū lāi-té ê chú-kak, ài bı̄n-tùi chân-khok ê siā-hoē hiān-sı̍t.
Sin-khu ê pēⁿ-thiàⁿ bô sǹg siáⁿ-mih, siōng kan-khó͘--ê sı̄ sim-lí cheng-sı̂n siōng ê chek-boâ kap ap-le̍k. Koè-khı̀ ha̍k-seng sı̂-tāi, goá tō-sı̄ ài ūn-tōng ê gín-á, cháu-sio-jiok,『吊單槓』, hō͘ lâng ê ı̀n-siòng tō-sı̄ chho͘-ióng chho͘-ióng á koh oa̍h-thiàu oa̍h-thiàu. Siūⁿ bē kàu chiah kúi-nı̂ ê sı̂-kan, goá tō ùi chı̍t-chiah oa̍h-thiàu ê “lo̍k-á” piàn-chò chı̍t-chiah『趴趴熊』, liân it-poaⁿ lâng phó͘-thong sı̂-á siōng ki-pún ê tōng-chok: kiâⁿ, cháu, thiàu, pê, lóng piàn-chò chiok chia̍h-la̍t, chit-chióng “bô-la̍t-kám” sı̄ chiok toā ê táⁿ-kek. 30 chhut-thâu ê lâng, thoa-tio̍h 70 goā hoè lâng ê thé-la̍t, tài tio̍h chit-chióng pēⁿ ê hó-chhù sı̄ thê-chá thé-hoē chò “lāu-lâng ê chu-bı̄”. Hó-lih-ka-chài se-hng ū chhut ko-jı̂n hoat-bêng『大力水手的波菜(大力丸)』kap Bí-kok sian-tan, hō͘ goá koh ē-tàng ı̂-chhı̂ ki-pún ê seng-oa̍h lêng-le̍k, sui-bóng ū bē-chió ê hù-chok-iōng ài jím-siū kap sêng-tam, m̄-koh he mā sı̄ put-tek-put ê soán-tek. Pēⁿ kú--a, tùi seⁿ-sí ū khah khui-khoah ê siūⁿ-hoat, mā o̍h ē-hiáu ài taⁿ su-iâⁿ, che sǹg sı̄ chı̍t-chióng put-tek-put ê sêng-tióng.
(TGB Thong-sı̀n tē 84 kı̂, 2006 nı̂ 9 goe̍h)