Ông peh sı̄ Kiâm-chúi-káng thiaⁿ Thâu-siā ê kàu-hoē Tek-the̍h-chng ê lâng. I sǹg sı̄ Thâu-siā kàu-hoē khí-ki ê lâng. Ū Thâu-siā ê kàu-hoē i chiū tit-tio̍h tō-lí, chha-put-to tı̄ 40 hoè ê sı̂-chūn. Iā tùi siat kàu-hoē chiū hō͘ lâng kéng i tng-chit chò chip-sū, kàu Thâu-siā siat chò tông-hoē liáu-āu chiū seng chò tiúⁿ-ló, kàu i 73 hoè chiū bô tng-chit; chèng hoē-iú koh lâu chit, i tùi bo̍k-su tı̍t-tı̍t sı̂ kóng, i lāu lah hı̄-khang chhàu-lâng, tı̄ Tāi-hoē ê sı̂ beh kap lâng gı̄-lūn kàu-hoē ê sū, lóng bô thiaⁿ-kı̀ⁿ. Só͘-í bo̍k-su thé-thiap i nı̂ lāu tng-chit iā chin kú hō͘ i sı̂, chiah chhiáⁿ hoē-iú koh kéng pa̍t lâng. Tùi i bô tng-chit iû-goân sı̄ chı̄n-tiong tı̄ kàu-hoē bô thè. Lūn Ông peh it-seng sı̀n Chú ê hó bô͘-iūⁿ ài pâi-lia̍t kúi-nā hāng:--
1. Ông peh ê chı̄n-tiong. Tùi Ông peh tng-chit ū le̍k-koè khí saⁿ pang ê lé-pài-tn̂g. Thâu chı̍t pang sı̄ chháu-chhù chha̍k tek ê, sı̄ Ông peh pún-sin kap i ka-tı̄ chhù-lāi ê lâng khí ê, lóng bô khai kàu-hoē ê chı̂ⁿ. Koh lé-pài-tn̂g lāi ê bı̂n-chhn̂g, tek-bı̍h-lō͘ chiū sı̄ thoân-tō só͘ ēng ê chho͘ ke-si lóng sı̄ Ông peh pún-sin ê kang chhòng ê, iû-goân iā bô khai kàu-hoē ê chı̂ⁿ. Āu-lâi kàu-hoē khah chı̀n-pō͘ chháu-chhù siuⁿ e̍h, chiū koh chha̍k saⁿ keng khàm-hiā ê, ē iông-ún tit chiâⁿ pah lâng chū-chı̍p. Taⁿ khí chit tè hiā ê, iû-goân sı̄ i ka-tı̄ ê kang, khí-thâu ū kúi-nā ê hiaⁿ-tı̄ tàu pang-chān. Kàu āu-lâi hiaⁿ-tı̄ chò liáu siān tı̍t-tı̍t liu, chiū soà chhun Ông peh chı̍t lâng teh chò, i lóng bô siūⁿ siān, iā hit sı̂ sı̄ hā-thiⁿ sı̂ jı̍t tng joa̍h. Pún chng ê sè-sio̍k lâng chiū thí-chhiò kóng, “Hāiⁿ ah! Ông peh lí chiah-nı̍h lāu lah, iā jı̍t-thâu tng joa̍h, lóng bô lâng pek lí, lí án-choáⁿ hiah gōng, ta̍k jı̍t toà chia teh kho̍k-kho̍k”. Ông peh thó͘-khùi chiū kóng, Ài-ah! Lín chiah ê lâng m̄-bat Siōng-tè ê in.
Iā hit sı̂ chin kú bô lo̍h hō͘, pún-chng sè-sio̍k lâng chiū kóng, Ông peh ah lí ê lé-pài-tn̂g tio̍h kín khàm, in-ūi lín ê Siōng-tè khoàⁿ lí boē khàm soà m̄ lo̍h hō͘. Kàu Ông peh lé-pài-tn̂g tú khàm liáu chiū lo̍h toā hō͘. M̄-kú pún-chng ê lâng bô chhéⁿ-gō͘ kó-jiân m̄-bat Siōng-tè ê in. Taⁿ chit pang sı̄ tē jı̄ pái khí ê. Iā tē saⁿ pang koh khí sı̄ goá tı̄ Thâu-siā ê sı̂. Chú 1906 nı̂ ê sı̂-chūn chiū koh khí chı̍t keng sin pài-tn̂g ê chū-chı̍p nn̄g pah goā lâng. Khí chit keng sı̄ hō͘ sai-hū pau chò, sió kang sı̄ ta̍k hoé-chàu ê hiaⁿ-tı̄ ngē-kha-keng lûn-liû; Ông peh sui-jiân hia lāu chhit-cha̍p goā hoè lah, i iā lûn-liû kap lâng chò sió kang thâu toè kàu boé. Che chin chiàⁿ sı̄ Ông peh ê chı̄n-tiong lah!
2. Ông peh ê khek-kí. I lâi thiaⁿ tō-lí ê sı̂-chūn sı̄ kan-khó͘ lóng bô chhân-gia̍p, kàu thiaⁿ tō-lí liáu-āu Siōng-tè chiū chiām-chiām siúⁿ-sù kàu hō͘ i ū chhân-gia̍p. Chóng-sı̄ i lóng bô seⁿ kiáⁿ thang tit i ê chhân-gia̍p; só͘-í i boē sí ê sı̂-chūn, chiū chiong i hiah ê chhân-gia̍p pun chò 4 hūn hō͘ i ê chhin cho̍k, chı̍t lâng chı̍t tiuⁿ khau-su, lóng bē-sái bē tit. Iā múi hūn múi nı̂ tio̍h la̍p 5 kho͘ hō͘ kàu-hoē chò thoân-tō sin-kim ê lō͘-ēng, Ông peh bô beh tùi in lâi thiu chò ka-tı̄ ê lō͘-ēng kàu tı̄ pah-hoè nı̂ lāu. Che sı̄ i ê khek-kí. Chóng-sı̄ Ông peh sin-khu-piⁿ ū chı̍t pah kho͘ ê hiān gı̂n, m̄-kú i iā bô beh lâu chò ka-tı̄ ê lō͘-ēng; i ū tùi kàu-hoē kóng-bêng, Thâu-siā ê kàu-hoē nā koh khí sin lé-pài-tn̂g, i beh chiong hit pah kho͘ chò khí pài-tn̂g ê só͘-hùi. Só͘-í tı̄ 1906 nı̂ koh khí sin lé-pài-tn̂g, i chiū the̍h hiàn hō͘ kàu-hoē.
Koh chı̍t hāng chhân-gia̍p pun hō͘ i ê chhin cho̍k, iā hit pah kho͘ kóng-bêng beh hiàn hō͘ kàu-hoē liáu-āu; i chiū ka-tı̄ koh-chài phah piàⁿ, khui soaⁿ ku̍t phiâⁿ chèng hoan-chû, ō͘-á, kiuⁿ, lí-á, chhek-á, án-ni siu án-ni chia̍h, m̄-bián khò pa̍t lâng; sui-jiân hiah lāu m̄-kú sin-thé chin ióng-kiāⁿ, chin gâu thoa-boâ. Iā i só͘ chia̍h ê jı̍t-sı̍t chiū-sı̄ hoan-chû-chhiam phoè tāu-chiùⁿ chin khiām; goá nā khı̀ thàm i, khoàⁿ i chia̍h hoan-chû-chhiam phoè tāu-chiùⁿ, chiū kā i kóng, Ông peh lí chiah nı̍h lāu lah, m̄ thang choan chia̍h hoan-chû-chhiam tio̍h chham khah chē bí, ia̍h tio̍h bé tām-po̍h khah hó ê mı̍h lâi phoè. I chiū ı̀n kóng, Chit hō jı̍t-sı̍t goá to iáu chia̍h ē lo̍h-khı̀. Nā i ê cha-bó͘-sun khoàⁿ i sin-thé tām-po̍h phoà-pēⁿ, hoan-chû chhiam chham khah kāu bí, i chiū hiâm i, kiò i khah khiām, bí-chhek chin kùi. Taⁿ i ê khı̂n-khiām só͘ chek-chū ê chı̂ⁿ hiàn hō͘ Siōng-tè chò kàu-hoē ê lō͘-ēng, chhin-chhiūⁿ thoân-tō sin-kim, pún tông ê cha̍p-hùi á-sı̄ chān pa̍t ūi, nı̂-nı̂ lóng chò thâu tāi-seng lâi kau. Taⁿ chit ê sı̄ Ông peh khek-kí tı̄ kàu-hoē.
3. Ông peh ê jı̂n-ài. Tùi Ông peh thiaⁿ tō-lí liáu-āu khí-thâu kàu lō͘-boé chin gâu chio-ho͘ lâng lâi sı̀n Chú. Iā chin gâu thiàⁿ-thàng lâng thé-thiap sàn-hiong lâng. Só͘-í ū chē-chē lâng tùi khoàⁿ Ông peh ê jı̂n-ài thiàⁿ lâng siū kám-kek lâi sı̀n Chú. Nā hit hō sàn-hiong kan-khó͘ ê lâng kā i chioh chı̂ⁿ, i bô the-sı̂, iā bô sǹg in ê lı̄-sek. Lūn i kap lâng kau-chiap óng-lâi sim-koaⁿ chin khui-khoah, sui-jiân hō͘ lâng khah phiⁿ i bô ài kap lâng kè-kàu, chin gâu thun-lún. Nā kàu-hoē lāi á-sı̄ kàu-hoē goā ê lâng kàu i ê ke put-chí khiân ı̀ hó lé khoán-thāi lâng. Lūn thoân-tō ê lâng i koh khah ka-poē ê kèng-tiōng khoán-thāi. Che sı̄ Ông-peh ê jı̂n-ài.
Taⁿ lūn Ông pek ho̍k-sū Siōng-tè ê jia̍t-sim kap i ê hó phín-hēng chip-siú sèng-tō pang-chān kàu-hoē chı̄n-sim chı̄n-le̍k m̄-bián lóng-chóng kóng. M̄-nā kàu-hoē lāi ê lâng toā o-ló chun-kèng i, chiū kàu-hoē goā ê lâng siông-siông kóng: “Pa̍t-lâng m̄ chai, khoàⁿ tio̍h Ông peh ê hó phín-hēng ún-tàng chiūⁿ thian-tn̂g.”
Taⁿ chiū-sı̄ tı̄ kin-nı̂ 1909 nı̂ 4 goe̍h 2 hō (lūn 2:12) chiū an-jiân tò-khı̀ Pē tau, hióng-siū 78 hoè. Sı̍t-chāi chin kiong-hí, Ông peh taⁿ í-keng thoat-lı̄ sè-kan it-seng ê kan-khó͘, hióng-siū Thian-tông éng-oán ê toā hok-khı̀. Hit jı̍t sàng-chòng ê lâng ū nn̄g pah goā, sǹg sı̄ chin chē lâng; khó-kiàn Ông peh chò lâng chin ē hō͘ lâng kèng-tiōng-tit. Taⁿ siá kúi jı̄ chhiáⁿ khoàⁿ Pò ê lâng ē chhú i ê hó bô͘-iūⁿ lâi hāu-hoat.
(Tâi-lâm Kàu-hoē-pò tē 291 koàn, 1909 nı̂ 6 ge̍h)
