Phoe
[Chit tiuⁿ phoe sı̄ Tè I-seng ê Lēng-chun kap Lēng-tông siá lâi kā Má-kai Pı̄ⁿ-ı̄ⁿ ê hoān-chiá seh-siā--ê; taⁿ ài lo̍h tı̄ chia, soà hō͘ lia̍t-ūi chai hoān-chiá ê hó-ı̀]. Phoe kià hō͘ tiàm tı̄ Tâi-oân só͘ thiàⁿ ê pêng-iú hiaⁿ-chí siu, pêng-an. Lín ū kià nn̄g ki chin súi kim ê Sı̍p-jı̄-kè lâi sàng goán, iā kā goán nn̄g lâng kiong-hō; goán kàu-ke̍k hoaⁿ-hí. Chit nn̄g ki kim Sı̍p-jı̄-kè, goán lia̍h-choè ke̍k pó-poè, iā sı̄ thang sı̂-sı̂ hián-bêng lín thiàⁿ-thàng ê Kı̀-liām-phín. Tùi chia thang chai, lín iû-goân ū teh thiàⁿ lán ê Chú Iâ-so͘ Ki-tok, chiū-sı̄ hiàn-sin choè lán ke̍k-toā ê Kiù-chú. Taⁿ tio̍h ióng-kiāⁿ, iā tio̍h hó-táⁿ, in-ūi Kiù-chú Iâ-so͘ sı̄ lín chı̄n-tiong ê pêng-iú. Tio̍h kia̍h-ba̍k khoàⁿ Kiù-chú kóng, Chú Iâ-so͘ ah, goán to̍k-to̍k teh oá-khò Lí, chiū-sı̄ toā kap pe̍h-pe̍h ê Kiù-chú; goán oá-khò Lí âng ê pó-huih lâi tit-tio̍h chheng-khı̀ koh chiâⁿ sèng. Siat-sú lín kiaⁿ, lín ê choē-koà hō͘ lín kap Sèng ê Siōng-tè saⁿ-lı̄, tio̍h hó-táⁿ, in-ūi ū khui chı̍t káng ê pó-choâⁿ, thang lâi soé-chheng lín ê choē; iā tı̄ Sı̍p-jı̄-kè-kha, ū I i-tı̄ ê só͘-chāi. Chhin-chhiūⁿ Sèng-si ū kóng, tı̄ Sı̍p-jı̄-kè-téng ū 5 ê siong-jiah: Chiū-sı̄ tı̄ Kok-kok-thaⁿ só͘ siū--ê. Chiah-ê siong thoè goá teh Kı̂-tó, Bô m̄-sı̄ ū kong-hāu ê Kı̂-tó, Chiū-sı̄ thoè goá chhut-thâu ê Kı̂-tó. Chiah-ê siong ia̍h teh kóng, tio̍h sià-bián ah, tio̍h sià-bián. Ia̍h m̄-chún chı̍t-ê í-keng boē tò-tńg ê choē-jı̂n lâi sí-bô. Chòng lín ê táⁿ, tı̄ chia lín ū ke̍k-toā ê I-seng, iā ū ke̍k toā khùi-la̍t ê Pang-chō͘-chiá. Tio̍h kim-kim khoàⁿ I, soà kóng, Ki-tok ah ! goán to̍k-to̍k him-bō͘ Lí, goán só͘ khiàm-kheh--ê, tı̄ Lí lāi-bı̄n ū chhē--tio̍h. Ki-tok ah ! Kiû Lí hû-chhı̂ poa̍h-tó ê lâng, hû-chō͘ ià-lán ê lâng, i-tı̄ ū pı̄ⁿ ê ,iā kiû Lí tio̍h ín-chhoā chhiⁿ-mı̂--ê. Goán nn̄g lâng jı̍t-jı̍t teh kı̂-tó siàu-liām lín; iā ū teh ǹg-bāng lín ê sin-thé chiām-chiām ná ióng-kiāⁿ. Iā m̄-nā teh thoè lín kı̂-tó, chiū-sı̄ goán nn̄g lâng ū koat-tēng beh khí chı̍t keng pı̄ⁿ-sek tı̄ Ngāu-san I-ı̄ⁿ, thang ha̍h tı̄ 4 ê lâng ê lō͘-ēng, che sı̄ beh nı̂-nı̂ choè hoān-chiá ê lō͘-ēng. Kàu goán nā tò-khı̀ kı̀ⁿ Thiⁿ Pē liáu-āu, chit keng chhù thang choè goán ê Kı̀-liām-sek. Taⁿ goán só͘ thiàⁿ, só͘ chun-kèng ê kiáⁿ kap sim-pū, nā tı̄ goán nı̂-lāu koh loán-jio̍k ê sı̂, hoaⁿ-hí kap goán saⁿ-kap toà, khiok goán khah sóng-khoài. Chóng-sı̄ in nn̄g lâng teh pang-chān lín, goán ê sim sı̍t-chāi boán-chiok; só͘-í ūi-tio̍h in nn̄g lâng goán kám-siā Thiⁿ Pē, iā kiû Siōng-tè, hō͘ in oē choè lín toā-toā ê lı̄-ek lâi hióng-hok. Ài koh kóng, goán lia̍h chit nn̄g ki Tâi-oân ê kim Sı̍p-jı̄-kè choè kùi-khı̀ ê sàng-phín; iā ài pò lín chai, goán sı̂-sı̂ teh ǹg-bāng lín tit-tio̍h hok-khı̀. Tı̄ lán ê Chú Iâ-so͘ ê kau-poê ê pêng-iú. Tè Ek-gı̂, Tè Jı̂n-lí. (Tâi-oân Kàu-hoē-pò tē 537 koàn,1929 nı̂ 12 ge̍h)