Piān-tong

Cha̍p goā nı̂ chêng, tı̄ lán Tâi-oân lâm-pō͘ Soaⁿ-toē-mn̂g ê hū-kūn ê chı̍t ê sió-sió chng-siā. Tı̄ beh jı̍p chng-siā ê tang-pêng-bı̄n, ū chı̍t keng chháu-chhù-á, í-keng chin kū, in-ūi khàm tı̄ chhù-téng ê chháu lóng í-keng piàn o͘ lah. Tı̄ hit lāi-bı̄n ū toà chı̍t ê ma-ma kap i ê ta-po͘-kiáⁿ, miâ kiò-choè A-hoâ. In lóng bô chhân, iā bô hn̂g. Só͘-í chit ê choè ma-ma ê tio̍h ta̍k jı̍t tı̄ thiⁿ beh kng ê sı̂ khí-lâi, thang khı̀ ta̍k só͘-chāi khoàⁿ ū lâng teh loê han-chû bô? Nā ū, chiū khioh tām-po̍h lâi ı̂-chhı̂ in ê seng-oa̍h. Ū sı̂ nā bô han-chû thang khioh, chiū jı̍p-khı̀ soaⁿ-nı̍h khioh chhâ khı̀ boē, tùi án-ni thang tit-tio̍h tām-po̍h ê chı̂ⁿ lâi seng-oa̍h. Só͘-í in ê seng-oa̍h thang kóng hui-siông ê kan-khó͘. Taⁿ, ū chı̍t jı̍t, i ê kiáⁿ A-hoâ tùi ha̍k-hāu tńg-lâi, kā i ê ma-ma kóng, “Ma-ma, goán lāu-su kóng, tùi bı̂n-á-jı̍t khí, ta̍k ê ha̍k-seng lóng tio̍h chah piān-tong khı̀ ha̍k-hāu, thang lı̄-iōng tiong-tàu sı̂ ê chı̍t tiám-cheng lâi pó͘-sı̍p, á-sı̄ choè sı̍p-toê, nā bô oē éng-hióng khó Tiong-o̍h.” I ê lāu-bú thiaⁿ liáu-āu, hui-siông ê hoaⁿ-hí. In-ūi i pún-sin m̄-bat jı̄, chin ài i ê kiáⁿ-jı̂ ū hó ê chiân-tô͘ lâi kái-siān in ê seng-oa̍h. Chóng-sı̄ tı̄ lēng-goā chı̍t hong-bı̄n, tı̄ i ê sim-lāi hui-siông ê kan-khó͘. In-ūi tı̄ in chhù-nih, tû-khí in ta̍k jı̍t chia̍h pn̄g ê nn̄g tè oáⁿ, nn̄g siang tı̄, chı̍t ki thng-sı̂, nn̄g ê poâⁿ-á kap nn̄g ê oáⁿ-thâu, í-goā lóng bô ū thang choè piān-tong khoeh-á ê khı̀-kū; iah chhù koh bô chı̂ⁿ thang khı̀ boé piān-tong khoeh-á. Bô hoat-tō͘, i chiū kā i ê kiáⁿ A-hoâ kóng, “A-hoâ, bı̂n-á-jı̍t lán bô piān-tong khoeh-á thang hō͘ lí chah khı̀ ha̍k-hāu, ma-ma seng ēng chàng-hio̍h-á kā lí pau, hō͘ lí chah khı̀ ha̍k-hāu hò͘ⁿ.” A-hoâ thiaⁿ in ma-ma ê oē liáu-āu, sim-lāi chin tio̍h-kip koh kiaⁿ-hiâⁿ. In-ūi tùi i jı̍p-ha̍k í-lâi, siông-siông ū tông-o̍h chhiò i ta̍k jı̍t lóng chhēng chin bái ê saⁿ, koh bô chı̂ⁿ thang khı̀ hok-lı̄-siā boé mı̍h chia̍h. Só͘-í tı̄ hioh-khùn ê sı̂-kan kap i saⁿ-kap thit-thô ê pêng-iú chin chió. Taⁿ bı̂n-á-jı̍t i nā koh bô piān-tong khoeh-á thang chah pn̄g, i ê tông-o̍h it-tēng oē koh chhiò i sı̄ chı̍t ê “sàn-kúi.” M̄-kú i ê lāi-sim sui-jiân kan-khó͘, i tı̄ goā-piáu lóng bô piáu-hiān chhut-lâi. In-ūi i chai, i ê ma-ma í-keng ta̍k jı̍t ūi-tio̍h i chı̄n choè toā ê khùi-la̍t lâi hō͘ i khı̀ ha̍k-hāu tha̍k-chheh lah. Só͘-í i ēng hoaⁿ-hí ê piáu-chêng ı̀n i ê lāu-bú kóng, “Ma-ma, ēng chàng-hio̍h-á pau pn̄g hó, chia̍h liáu thang tı̀m tiāu, bián koh the̍h chı̍t ê khang ê piān-tong khoeh-á tńg-lâi.” I ê ma-ma thiaⁿ-tio̍h chit ê gín-ná, tı̄ chiah soè-hàn chiū oē hiáu thé-thiap lāu-bú ê kan-khó͘, chin siū kám-tōng, só͘-í bô hêng tiong chhun chhut i chû-ài ê siang-chhiú, chiong i ê kiáⁿ lám tı̄ heng-chêng, iah ba̍k-sái chhin-chhiūⁿ tn̄g soàⁿ ê liām chu, chı̍t tih chı̍t tih tih lo̍h tı̄ i só͘ thiàⁿ ê kiáⁿ-jı̂ ê thâu-mn̂g. Siāng-sı̂ tı̄ i ê sim-lāi koat-tēng kóng, “Bı̂n-á-jı̍t goá ê kiáⁿ khı̀ ha̍k-hāu, goá it-tēng beh khı̀ khah hn̄g ê só͘-chāi khioh khah choē ê han-chû, á-sı̄ chhâ lâi boē, thang hō͘ goá ê kiáⁿ A-hoâ boé chı̍t ê piān-tong khoeh-á kap khah hó ê mı̍h-phè, hō͘ i chah khı̀ ha̍k-hāu thang kè chı̍t jı̍t kap lâng sio-siāng ê seng-oa̍h, hō͘ i iā ū khoài-lo̍k ê chı̍t jı̍t.” Keh-jı̍t, A-hoâ kó-jiân ēng chàng-hio̍h-á chah pn̄g khı̀ ha̍k-hāu. Kàu tiong-tàu chia̍h pn̄g ê cheng tân ê sı̂ i ê sim hui-hiông ê kiaⁿ-hiâⁿ, iā chū-pi-kám in-ūi só͘ chah ê mı̍h-kiāⁿ, hō͘ i bô ióng-khı̀ chiong só͘ chah-lâi ê pn̄g the̍h chhut-lâi chia̍h. In-ūi i kám-kak só͘ ū ēng piān-tong khoeh-á chah pn̄g ê tông-o̍h lóng teh ēng khoàⁿ-khin kap hò͘ⁿ-kı̂ ê gán-kong teh khoàⁿ i, hit sı̂ hō͘ i sim-lāi sán-seng chı̍t ê put-pêng kap oàn-thàn ê liām-thâu, chiū-sı̄ goá pı̂ⁿ-pı̂ⁿ sı̄ ha̍k-seng, cháiⁿ-iūⁿ goá thái oē siⁿ tı̄ sàn-chhiah lâng ê ka-têng. Ah! Goá nā chhin-chhiūⁿ goá ê a-peh in hiah hó-gia̍h, ū hn̂g koh ū tiàm, m̄-chai beh joā-nih-á hó leh. Chóng-sı̄ tú-tú tı̄ chit ê sı̂, tı̄ i ê sim-lāi iáu ū chı̍t ê siaⁿ teh kā i kóng, “Lí ê ma-ma tng tı̄ lí tiong-tàu teh hioh-khùn ê sı̂, i iáu koh tı̄ iá-goā teh choè kang, ūi-tio̍h beh iúⁿ-chhı̄ lí. Iah lí só͘ chah lâi ê tiong-tàu tǹg sı̄ i poâⁿ-soaⁿ kè-niá, thoa-boâ kan-khó͘ lâu huih-koāⁿ só͘ oāⁿ-lâi--ê, lí cháiⁿ-iūⁿ lia̍h hiah ê choè kiàn-siàu ah, lí tio̍h lia̍h hiah ê choè êng-kng chiah tio̍h.” I siūⁿ kàu chia, chiū chhun-chhut i ngia̍uh-ngia̍uh-chhoah ê siang-chhiú jı̍p-khı̀ toh-á-lāi, chiong só͘ chah lâi ê pn̄g the̍h--chhut-lâi, hē tı̄ toh-téng, ēng khiân-sêng ê sim kı̂-tó kám-siā liáu-āu, chiū ēng hoaⁿ-hí koh bô kiàn-siàu ê sim-chêng lâi chia̍h. Sui-jiân tng i teh chia̍h ê sı̂, chē chiàⁿ-pêng ê chı̍t ê hó-gia̍h lâng ê kiáⁿ toā siaⁿ soan-pò͘ kóng: “A-hoâ bô piān-tong khoeh-á, koh chah han-chû-chhiam pn̄g, phè kiâm-hı̂ kap chhài-pó͘.” Chóng-sı̄ A-hoâ ēng ké bô thiaⁿ-kı̀ⁿ lâi tùi-hù i, chí-ū chēng-chēng lâi chia̍h i ê ma-ma kā i chún-pı̄ ê chia̍h mı̍h. Taⁿ kàu hit ē-po͘, ha̍k-hāu pàng-o̍h beh tńg-khı̀ chhù ê lō͘-chiūⁿ, A-hoâ tı̄ i ê sim-lāi iáu teh siūⁿ piān-tong ê sū. I siūⁿ kóng, goá it-tēng m̄-thang chiong tông-o̍h ê thí-chhiò kā ma-ma kóng, bián-tit hō͘ i siong-sim. Chóng-sı̄ bô phah-sǹg, tng i kàu chhù ê sı̂, i ê ma-ma í-keng teh tán i, ēng chû-ài ê bı̄n-iông hoan-gêng i. Tng A-hoâ kap i ê ma-ma jı̍p khı̀ chhù-lāi ê sı̂, hoat-hiān tı̄ chia̍h-pn̄g toh-téng ū khǹg chı̍t ê kim-n̂g ê piān-tong khoeh-á tı̄ hia, sı̄ i ê ma-ma kin-á-jı̍t khioh-chhâ só͘ oāⁿ lâi ê tāi-kè. A-hoâ khoàⁿ-tio̍h i lāu-bú thiàⁿ i kàu chiah chhim, m̄-kam i siū lâng khoàⁿ-khin, chiū tùi i ê ma-ma kā i lám-teh, soà lâu-chhut kám-kek kap kám-siā ê ba̍k-sái, iā chiong kin-á-jı̍t tâng-o̍h ê thí-chhiò, chhin-chhiūⁿ o͘-ian lóng pe-soàⁿ, oân-choân boē kı̀-tit. （Lú-soan Ge̍h-khan Tē 61 kı̂, 1965 nı̂ 1 ge̍h)