Poê-iúⁿ Gín-ná

Hoān gín-ná tn̄g-ni ê sı̂ bē-tit-thang it-chı̄n siāng khoán . Chóng-tio̍h khoàⁿ bó-sin kap gín-ná ê seng-khu àn-cháiⁿ-iūⁿ. Siat-sú chò bó ê lâng sin-thé bô ióng-kiāⁿ, chiū eng-kai tio̍h chá tn̄g-ni khah hó; tāi-iok nā kàu peh káu goe̍h chiū thang kā i tn̄g . Nā-sı̄ bó-sin khı̀- le̍k chhiong-chiok, gín-ná loán-jio̍k,tio̍h thèng-hāu khah bān,chiah thang.Hoān- nā gín-ná taⁿ-chiah hoat chhùi-khí , m̄- thang tn̄g-ni , chhùi-khí nā bān hoat ,iā m̄-thang tn̄g-ni, tāi-khài tio̍h kàu tō͘-chè chiah lâi tn̄g , in-ūi chı̍t-nı̂ liáu-āu, bó ê ni chiām-chiām bô la̍t , bē-ē poê-iúⁿ gín-ná. Nā beh tn̄g-ni iā m̄-thang hut- jiân-kan , tio̍h tāi-seng kà i chia̍h pa̍t- mı̍h koàn-sı̀, tùi chiām-chiām kàu chū- jiân . Hoān chhit-goe̍h jı̍t ê gín-ná ,múi jı̍t nn̄g-pái tio̍h ēng hó ê gû-leng hō͘ i chia̍h , kap chúi kiáu-chiâu ; liân-āu chúi thang chiām-chiām kiám khah chió; á-sı̄ hô tām-po̍h mı̄-hún chú hō͘ i chia̍h, á-sı̄ bí-moê iā thang . Nā beh tn̄g-ni tio̍h tn̄g mê-sı̂, kan-ta jı̍t--sı̂ chá-àm nn̄g-pái hō͘ i chia̍h , kı̀-jiân chia̍h bô loā-chē , ni-chiap iā tùi án-ni ná chió . Kiám-chhái gín-ná m̄-khéng chia̍h pa̍t-mı̍h , put-hông tán- hāu i iau chiah hō͘ i chia̍h, moê pn̄g mı̄-pau lóng thang, to̍k-to̍k gín-ná tı̄ cha̍p-peh goe̍h jı̍t ê tāi-seng , tek-khak tio̍h ēng ni chò kin-pún , it-khài chhiⁿ-chho , iû-jı̄, chhài-se, koé-chí , iàu-kín m̄-thang hō͘ i chia̍h . Ū chò pē-bó ê lâng, put-lūn chhı̀n-chhái mı̍h lóng hō͘ gín-ná chia̍h, tı̀-kàu ū-sı̂ bē siau-hoà, phoà-pı̄ⁿ soà sí, he̍k-sı̄ bô tn̂g hoè-siū . Ū-sı̂ làu-sià ê chèng-thâu lóng sı̄ tùi chit-hō chhut--lâi . In-ūi ēng toā-lâng ê sı̍t-bu̍t hō͘ gín-ná chia̍h. Ná-chhin-chhiūⁿ chiong toā-lâng ê kang hō͘ gín-ná chò , tek-khak sı̄ chò bô hoat , tek-khak ē siū siong . Só͘-í it-khài tê kap ka-pi lóng m̄-sı̄ ha̍h chia̍h ni gín-ná ê lō͘-ēng . Chhin-chhiūⁿ chiú sı̄ koh khah lı̄-hāi , chò pē-bó--ê kap chiàu- kò͘ gín-ná ê lâng tio̍h kín-sı̄n kéng-kài .

(Tâi-oân Hú-siâⁿ Kàu-hoē-pò tē 113 koàn, 1894 nı̂ 8 ge̍h)