Puigcerda Noevo 01

It A-tek chē kè-têng-á lâi tı̄ Madrid ê hui-lêng ki-tiûⁿ, i sió-chhái thiⁿ chin chē, chiah hō͘ hit-ê ùn-chiàng ta̍p-èng kā tàu-saⁿ-kāng, thè i kā hêng-lí siuⁿ-á thoa-khı̀ check-in, ùn-chiàng khoàⁿ A-tek ê thâu-khak téng-bı̄n iáu koh hō͘ io̍h-chúi-pò͘ pau kah ba̍t-chiuh-chiuh, kan-taⁿ ba̍k-bâi í-hā ū khoàiⁿ-lâng, tò-kha khōng chio̍h-ko khōng kah kāu-kāu-kāu, tò-chhiú giâ chı̍t-ki koái-á, iáu bô siáⁿ ē-hiáu tuh, sui-bóng i keng-koè hiah-ê khó͘-è liáu-āu, kui sin-khu kan-taⁿ chhun hit-kha sè-kha hêng-lí-siuⁿ, i mā kāng-khoán the̍h bē-iâⁿ, chit-ê ùn-chiàng ē ín--i, kā chhia chhah--leh, kam-goān seng-lí mài chò, lâi kā tàu koāⁿ mı̍h-kiāⁿ khı̀ check-in, ū chı̍t-poàⁿ ê goân-in sı̍t-chāi sı̄ in-ūi tông-chêng--i. Lo̍h-chhia chha-put-to beh oá chı̍t tiám-cheng liáu-āu, A-tek í-keng kàu-tı̄ sı̀-cha̍p-it hō ê chiūⁿ-ki-mn̂g piⁿ, i kā kha khoè tı̄ tùi-bı̄n ê í-liâu-á téng, kı̀ⁿ nā kiâⁿ--koè ê lâng lóng bē kı̀m-tit beh kā i ke siòng--chı̍t-ê, ū gín-á khoàⁿ-tio̍h soah khí-ài-chhiò, ū-lâng chhi-bú-chhı̄-chhū kóng che sı̄ m̄-sı̄ teh phah tiān-iáⁿ. A-tek pún-lâi tō sán-thio, sin-koân 169 kong-hun, thé-tāng kan-taⁿ 58 kong-kin, i lâng goân-té tō pe̍h-bah-té, put-sı̂ mā hông tòng-chò kha-chhiam chhiú-iù ê tha̍k-chheh-lâng.Taⁿ lâng hō͘ io̍h-chúi-pò͘ kap chio̍h-ko pau tiâu--leh, khoàⁿ--khí-lâi kui-ê lâng bē-su ke chı̍t-ê chhùn-chhioh, sim-sek sim-sek. Chóng--sı̄ A-tek bô sim-chiâⁿ khah chim-chiok lâi khoàⁿ pa̍t-lâng teh kā pí-tn̂g lūn-té, i kui-ê sim-lāi kan-taⁿ it-tit siūⁿ beh khak-tēng chı̍t-kiāⁿ tāi-chı̀ ---- hiah-ê kı̀-tı̂, tàu-té sı̄ chin sı̄ ké, sı̄ chiàⁿ-káng ū-iáⁿ ê tāi-chı̀, ia̍h chiah sı̄ chı̍t-ê ū-hûn bô-iáⁿ ê bāng. I ū thiaⁿ pēⁿ-ı̄ⁿ ê hō͘-sū kóng ka-tı̄ sı̄ hông ùi France kap Espana ê kau-kài kiù tò--tńg-lâi ê, koh nā m̄-sı̄ hit saⁿ-ê kang-lâng chái-khí bô koáⁿ-tio̍h pah-suh, ēng kiâⁿ--ê beh khı̀ keh-piah-chng choh-sit; nā m̄-sı̄ kı̂-tiong ê chı̍t-ê lâng jiō kín, koh choaⁿ-á toā-toā tián-tián khiā tı̄ lō͘-piⁿ tō ǹg soaⁿ-kheⁿ kā soān--lo̍h, sūn-soà chù-sı̂n teh “him-sióng” chit-ê lâng-kang ê chúi-chhiâng, i ko͘ chı̍t-ê tiàu tı̄ gō͘-cha̍p kong-chhioh ē-kha ê chı̍t-châng chhiū-boé téng, ū-iáⁿ sı̄ tán kah pı̀ⁿ-chò hoà-chio̍h mā bô-lâng ē lâi-khı̀ tı̀-kak--tio̍h; hit-châng chhiū-á tēng-kin tı̄ soaⁿ-piah, lia̍h-hoâiⁿ chhun--chhut-khı̀, A-tek ê saⁿ tùi āu-bı̄n khı̀ kau tı̄ chhiū-oe téng-koân, kui-ê lâng poàⁿ-lâm-hâⁿ, hit sı̂-chūn i sim-lāi ū-iáⁿ chin choa̍t-bōng. Hit nn̄g-ê lâng-koân hàn-toā ê cha-po͘-lâng tùi po͘-thâu jiok tò chhut--lâi ê tāi-chı̀ tàu-té ū-iáⁿ bô-iáⁿ, A-tek iáu ē kı̀-tit hit-kang ē-po͘ teh piàn-thiⁿ, hō͘-chhiu-á kā sı̀-koè phùn kah tâm-sip koh ku̍t-liu, tō tú-hó chhin-chhiūⁿ chē hoé-chhia chiūⁿ-soaⁿ ê hit-kang kāng-khoán, “Nā m̄-sı̄ án-ne, goá hiah han-bān cháu, kióng-kiaⁿ chá tō hông kiat-kó tàn-sak--ah.” A-tek sim-lāi án-ne teh siūⁿ, “Hit-tang-chūn bô-tiuⁿ-tı̂ chhu tùi soaⁿ-khut lo̍h--khı̀, in tiāⁿ-tio̍h sı̄ pān-phoe goá ún-sí--ê, chiah bô chim-chiok lâi sûn.” I ná siūⁿ ê sı̂, siūⁿ-tio̍h Milagros, i bô-iân ê ài-jı̂n-á, ū-iáⁿ put-chí-á sim-būn, ba̍k-thâu kat kui-oân. Hit-kang thiⁿ-khı̀ siat-thái hoán-joa̍h, khùn-tàu khùn kah hó-hó, Milagros soah chông-lâi lòng-mn̂g, jı̍t-thâu sio-ho sio-ho, ùi soaⁿ--nı̍h ê chhiū-nâ-á chhoe--chhut-lâi ê hong cháu túi thang-á-mn̂g jı̍p--lâi, lòng-mn̂g ê siaⁿ “phòng, phòng, phòng”, ná-chhiūⁿ bāng-tiong teh chò lāu-jia̍t hit-tı̄n kó͘-tūi teh phah-kó͘ ê pán-liâu, hō͘ lâng lú khùn lú jı̍p-bı̂n, tán A-tek hiông-hiông cheng-sı̂n--koè-lâi, cháu-khı̀ khui-mn̂g, mn̂g chı̍t-ê khui--khui, Milagros í-keng tó tı̄ thô͘ kha--ā. A-tek khû--lo̍h, tùi âm-kún kā tháⁿ--khí-lâi, chhiú-ǹg kô kah lóng sı̄ hoeh. “Lí kín-cháu...kín-cháu...” Milagros kan-taⁿ tı̍t-tı̍t tùi i hoah. “Mí, sı̄ siáⁿ-lâng kā lí siong kah án-ne?” A-tek chhut-la̍t kā lám--leh, sim-lāi chin m̄-kam, tûi-sim tah-liú, ba̍k-sái bē-su khe-chúi pang-hoāⁿ lâu kah kui-bı̄n lóng sı̄. “Tek, bô sı̂-kan kái-soeh hiah chē--ah, lí kín-cháu, m̄-thang hoan-thâu.” “Mí, lí sı̄ teh kóng siáⁿ, lí lâng siong kah chiah siong-tiōng, goá beh án-choáⁿ chò goá--lâi.” A-tek kóng ê sı̂, kā Milagros phō-koân, bı̄n ù tı̄ i ê bı̄n. “Tek, lín tang-hong ê lâng kóng che hō-chò ‘bô-iân’--lah, goá ē-tàng se̍k-sāi--lí, í-keng chiok hēng-hok--ah!” Milagros lú kóng lú sè-siaⁿ, ba̍k-chiu khoeh--lo̍h, A-tek iáu bē-hù thang siūⁿ siuⁿ chē, tō thiaⁿ-tio̍h chı̍t-tı̄n lâng hiông-kông tùi chia cháu--koè-lâi ê kha-pō͘ siaⁿ, ùi keh-piah ê hāng-á thoân--koè-lâi. Puigcerda Noevo, tō chhin-chhiūⁿ chē-chē tı̄ soaⁿ-lāi tau ê po͘-thâu sio-siâng, kui-ê chng-lāi lóng sı̄ tiong-kó͘ sı̂-tāi lâu--lo̍h-lâi ê kē-chhù, ûi tı̄ tiong-ng--ê, sı̄ khí kah koân-koân, bē-su ke-kûn to̍k ho̍h ê kàu-tn̂g kap cheng-thah, chhù kap chhù tiong-ng ê lō͘ lóng sè-sè-tiâu-á, pho͘ chho͘-hoe ê chio̍h-kak, nā-sı̄ tı̄ mê-chhim iā-chēng ê sı̂-chūn kiâⁿ tı̄ lō͘--nı̍h, ta̍k kha-pō͘ ta̍h--lo̍h lóng ū ūn-siaⁿ. A-tek kā bı̄n oá tı̄ Milagros ê phı̄ⁿ-á thâu-chêng, chhiú bong tı̄ i ê âm-á-kún piⁿ, khak-tēng i í-keng choa̍t-khùi--ah, chiah khin-khin-á kā i hē--lo̍h, chit-ê sı̂-chūn, nn̄g-ê cha-po͘-lâng í-keng lâi-kàu i ê bı̄n-thâu-chêng. “Chino! Chino!” Kı̂-tiong chı̍t-ê lâng khoàⁿ-tio̍h A-tek sûi toā-siaⁿ teh hiu. A-tek thiaⁿ-liáu chin bô hoaⁿ-hí, ēng in ê oē ı̀n tò--tńg--khı̀, “Goá Tâi-oân-lâng, m̄-sı̄ Chi-ná-lâng--lah!” Chóng--sı̄ chit nn̄g-ê lâng bô teh thiaⁿ i ê kái-soeh, chò in ùi nn̄g-ê hong-hiòng lú kiâⁿ lú oá, A-tek khoàⁿ m̄-sı̄ sè-thâu, hoan-thâu khí-kha tio̍h lōng, iáu bē cháu-chhut po͘-thâu, soah khai-sí piàn-thiⁿ, hō͘ bô kóng chiâⁿ toā, m̄-koh hō͘-chhiu ba̍t-ba̍t-sı̄, bı̄n-thâu-chêng bē-su ū chı̍t-niá koh chı̍t-niá pe̍h-sek ê nı̂-á hō͘ hong chhoe kah iô-lâi iô-khı̀, i thiaⁿ-tio̍h chhèng-siaⁿ, kiaⁿ kah kiōng-beh phoà-táⁿ, bô-tiuⁿ-tı̂ kha chhu--chı̍t-ê, kui-ê lâng choaⁿ-á siak tùi soaⁿ-kheⁿ lo̍h--khı̀. Chhu tùi soaⁿ-kheⁿ lo̍h--khı̀ ê sı̂, A-tek bē-su khoàⁿ-tio̍h i lâi Puigcerda Noevo chı̀n-chêng hit chı̍t-toāⁿ chı̍t-toāⁿ ê lō͘-têng, chhin-chhiūⁿ iáⁿ-teng kāng-khoán chin kín it-tı̍t sih--koè. Beh kàu Puigcerda chı̀n-chêng ê poàⁿ-tiám-cheng, thih-ki-lō͘ piⁿ tō í-keng sı̄ iap-thiap ê hong-soaⁿ khòng-iá--ah, he sı̄ A-tek tiàm Espana ê tē-chhit kang, goân-té ta̍k-kang thiⁿ-téng bô-hûn ê hó-hong-jı̍t, ùi hit ē-po͘ khai-sí teh piàn-thiⁿ. Hoé-chhia oá tı̄ soaⁿ-piⁿ teh kiâⁿ, sı̀-kak lı̀n-tńg ê soaⁿ-thâu lóng koân kah chhah jı̍p-khı̀ hûn--nı̍h, soaⁿ-phiâⁿ--nı̍h, ū om̄-om̄-om̄ ê som-lı̂m; soaⁿ-kheⁿ té, ū chhoah-lâu ê khe-kau-á, tùi chhia-thang khoàⁿ--chhut-khı̀, piⁿ--á ū sı̂-chūn sı̄ kng-khu̍t-khu̍t ê chio̍h-piah, ū-sı̂ sı̄ chhun-lâi kah thih-ki-lō͘ chhiⁿ-lèng-lèng chhiū-oe, chóng--sı̄ só͘-ū ê kéng-tı̀, lóng hō͘ lo̍h bô-thêng ê hō͘-chhiu tah-tiâu--leh, àm-tām ê kong-iáⁿ, hām hit-niá hō͘-chhiu hóng--khí-lâi phú-sek ê bāng-se, hō͘ chit-ê hong-soaⁿ khòng-iá koh ke chin hi-bı̂, “Tō chún-kóng koh khah sim-sek-hèng beh chhit-thô ê lâng mā khai-sí kám-kak bô-bı̄ bô-sò͘.” A-tek án-ne siūⁿ. Hō͘ lo̍h kui-àm, it-tı̍t kah keh-tńg-kang peh-tiám goāchiah pa-lang, A-tek chiàu goân-té ê kè-oē, chún-pı̄ beh ēng siōng-boé saⁿ-kang ê sı̂-kan, khoaⁿ-khoaⁿ-á tı̄ Andorra kap Francekau-kài hū-kı̄n ê soaⁿ--nı̍h se̍h-se̍h khoàⁿ-khoàⁿ--leh. Che mā sı̄ ūi-sím-mı̍h i bô tùi Barcelona chē thàu-choā chhia khı̀ Andorra ê goân-in. Cháu soaⁿ-soàⁿ ê pah-suh peh-tiám goā tı̄ Puigcerda ê chhia-thâu piⁿ khui-chhia, thiⁿ-khı̀ iū-koh kap chı̀n-chêng hit kúi-kang kāng-khoán, thiⁿ-sek chheng-chheng-chheng, chhiò-sek ê thiⁿ-téng bô chı̍t-sut-á hûn, A-tek chē tı̄ chhia-lāi, tùi chhia-thang goā khoàⁿ-tio̍h hiah-ê phò͘-sı̍t ê hiuⁿ-siā, kap ēng chio̍h-kak khōng--khí-lâi ê kó͘-chhù, kám-kak bē-su sı̄ chē-chiūⁿ sı̂-kan ki-khı̀, tiám-siaⁿ tò-thè kúi-ā-pah tang. (Tâi-bûn Bóng-pò tē 100~102 kı̂, 2005 nı̂ 1~3 goe̍h)