Puigcerda Noevo 03

Saⁿ Chhia chē bô joā kú, A-tek kám-kak soaⁿ--nı̍h kı̂-sı̍t ū chin chē po͘-thâu, jı̂-chhiáⁿ lóng lı̄ bô joā hn̄g, thiⁿ-khı̀ koh bē-bái, i m̄-chiah siūⁿ-kóng beh lo̍h-lâi kiâⁿ-kiâⁿ--leh, khoàⁿ kàu-sı̂-chūn sı̄ beh tı̄ koh-lâi ê chng-thâu chiūⁿ-chhia, ia̍h sı̄ beh kéng chı̍t-ê chng-thâu hioh-àm mā chin sim-sek. Kiâⁿ chha-put-to beh chı̍t tiám-cheng liáu-āu, lú lâi lú kám-kak hi-bı̂, lō͘ mā ná lâi ná sè-tiâu, i lú siūⁿ lú m̄-tio̍h, kám ē sı̄ tú-chiah hit-ê lō͘-kháu, bô tı̀-sim khoàⁿ lō͘-phiau, choâⁿ sit-kak-chhat oat m̄-tio̍h khı̀. M̄-koh i ū-iáⁿ chin pháiⁿ-ūn teh giâ siang-liân-kê, ba̍k-chı̍t-nih niā-tiāⁿ, soah o͘-hûn tah moá-thiⁿ, lûi-kong sih-nà phı̀-phè-kiò, hō͘ sûi phoah tùi thiⁿ-téng lo̍h-lâi, A-tek kin-pún iáu bē-hù siūⁿ beh án-choáⁿ kiâⁿ tò-tńg--khı̀, kan-taⁿ kín beh chhoē só͘-chāi thang hó bih-hō͘. I gia̍h-thâu khoàⁿ-tio̍h thâu-chêng saⁿ-sı̀ pah kong-chhioh hia ū chı̍t-keng kē-chhù, koáⁿ-kín ēng cháu--ê, lâi kàu-ūi, chiah chai chit-keng chhù í-keng chiok kú lóng bô lâng teh toà--ah, liân mn̂g lóng bô, sı̀-phı̀ⁿ piah kan-taⁿ chhun saⁿ-phı̀ⁿ, ka-chài chhù-téng iáu tı̄ teh, beh cha̍h-hō͘ iáu ē ēng-tit. Hō͘ lo̍h beh cha̍p hun-cheng chiah soah, sui-jiân jı̍t-thâu chı̍t-sı̂-á tō koh tùi hûn--nı̍h nǹg--chhut-lâi, chóng--sı̄ soaⁿ--nı̍h khı̀-un khah kē, A-tek ê saⁿ-khò͘ tâm-tâm, kám-kak ē koâⁿ, koh-lâi sı̂-kan mā beh ē-po͘ gō͘-tiám--ah, i tio̍h kín chhoē só͘-chāi thang hioh-àm. Tng teh hoân-ló ê sı̂, soah khoàⁿ-tio̍h chiàⁿ-chhiú-pêng soaⁿ-phiâⁿ ê chhiū-nâ, bông-bū bān-bān-á soàⁿ--khı̀, ū chı̍t-ê cheng-thah, chhun chhut-lâi tı̄ chhiū-nâ-á téng-koân. “Bô-liōng-kóng chiah-nı̍h iap-thiap ê soaⁿ--nı̍h koh ū po͘-thâu.” A-tek sim-lāi chin hoaⁿ-hí, siūⁿ-kóng kui-khı̀ lâi hia koè-mê, mı̂n-á-chài chiah koh phah-sǹg. Ｉ iân hit-tiâu sè-sè-tiâu-á ê lō͘ tı̍t-tı̍t khí--lih, kiâⁿ beh poàⁿ-tiám-cheng chiah khoàⁿ-tio̍h chı̍t-ê kó͘-hoe kó͘-khoán ê po͘-thâu, nā chiàu i tùi Au-chiu kiàn-tio̍k ê liáu-kái, chit-ê khoán-sek pí i tı̄chhia--nı̍h khoàⁿ--tio̍h iân-lō͘ hiah-ê po͘-thâu, lóng iáu koh-khah chá beh chı̍t-nn̄g pah tang, m̄-koh khoàⁿ--khí-lâi bô pha-hng, koh ū thiaⁿ-tio̍h káu teh pūi, chng-lāi mā ū khoàⁿ-tio̍h teh chhut hoé-hun. I kiâⁿ tùi lāi-té jı̍p--khı̀, kiâⁿ bô joā kú, tú-hó ū chı̍t-ê cha-bó͘-gín-á tùi chhù--nı̍h chhut--lâi, kap i sio-tú-thâu, cha-bó͘-gín-á chı̍t-ê khoàⁿ-tio̍h i, chhoah-chı̍t-tiô. Tùi in lâi kóng, A-tek m̄-nā sı̄ chheⁿ-hūn-lâng, jı̂-chhiáⁿ koh sı̄ chin hiáⁿ-ba̍k, o͘ thâu-mn̂g, n̂g phoê-hu ê chhe-hūn-lâng. “Àm-an.” A-tek seng kā mn̄g. “Àm-an, lí sı̄ sím-mı̍h lâng, sı̄ án-choáⁿ ē lâi tı̄ chia?” Cha-bó͘-gín-á kā mn̄g, chit-ê cha-bó͘-gín-á ū o͘ koh kim-ku̍t ê tn̂g-thâu-chang, phoê-hu hō͘ jı̍t-thâu pha̍k chò be̍h-á ê sek-chúi, o͘-jı̂n ê ba̍k-chiu toā-toā-lúi, chı̍t-ē khoàⁿ tō-si phiau-chún ê Latin súi ko͘-niû-á. “Hó ka-chài!” “Hó ka-chài--siáⁿ?” “Hó ka-chài lín kóng ê oē kap soaⁿ-kha kāng-khoán, lín mā sı̄ kóng Castilian kap Catalan--ho͘hⁿ.” A-tek kóng-kóng--leh choaⁿ-á chhiò chhut-siaⁿ, cha-bó͘-gín-á m̄-chai beh án-choáⁿ kā ı̀n. “Goá siūⁿ-kóng lín chia chiah-nı̍h-á chhim-soaⁿ nâ-lāi, lín ê chhù koh khí kah chiah-nı̍h kó͘-hong kó͘-phài, bô tek-khak lín kóng--ê, sı̄ bó͘ chı̍t-chióng í-keng sit-lo̍h ê gí-giân--leh.” Nn̄g-ê lâng lóng tiû-tû chı̍t-khùn, A-tek chiah kóng: “Goá kiò-choè A-tek, kū-nı̂ chiah tùi Tâi-oân ê Chèng-tı̄ Tāi-ha̍k Se-pan-gâ-gí-hē pı̍t-gia̍p, sı̄ lâi chiah chhit-thô--ê, bô tú-hó sit-lō͘ chiah ē lâi kah chia, siūⁿ-kóng ū-ūi thang hō͘ goá koè-mê--bô.” Cha-bó͘-gín-á ba̍k-chiu kim-kim kā A-tek siòng chiok kú, chiah ı̀n: “Goá kiò Milagros, lí nā m̄-sı̄ pháiⁿ-lâng, gún tau iáu ū chı̍t-ê pâng-keng bô-lâng toà, lí ē-tàng tı̄ chia hioh chı̍t-mê, m̄-koh goá ài seng mn̄g gún ko--ko ê ı̀-kiàn, gún a-pah kap a-bú lóng í-keng koè-sin--ah, a-hiaⁿ téng lé-pài tńg--lâi, chhù--nı̍h ê tāi-chı̀ i teh chú-ı̀.” Kiâⁿ lâi-kàu Milagros in tau, nn̄g-ê lâng kiâⁿ jı̍p-mn̂g, chı̍t-ê cha-po͘-lâng tùi pâng-keng kiâⁿ tò chhut--lâi. “Joan, che sı̄ A-tek. A-tek, che sı̄ gún ko--ko Joan.” Milagros kā in siàu-kài. “Joan Lorca, lí hó.” Joan chhun-chhiú kap A-tek ak-chhiú. “Joan, A-tek sı̄ tùi...tùi Tâi-oân lâi chia chhit-thô--ê, in-ūi sit-lō͘, siūⁿ beh tı̄ lán chia koè-mê, kám ē-sái?” Milagros tùi Tâi-oân chit-ê miâ iáu kı̀ bô siáⁿ ē khí--lâi, kóng ê sı̂ koh oa̍t-thâu teh kā A-tek khak-tēng. “Tâi-oân?” M̄-koh Joan chı̍t-ê thiaⁿ-tio̍h Tâi-oân, soah ū sió-khoá gōng-gia̍h, chóng--sı̄ i bô ke chò kái-soeh, sûi koh kóng: “Kah-nā sı̄ án-ne, hoan-gêng--ah, lí nā kah-ı̀, toà--kúi-kò-goe̍h ah mā bô iáu-kín.” Àm-tǹg chia̍h-pá, Joan chhiáⁿ Milagros tı̄ chhù--nı̍h kā beh hō͘ A-tek khùn ê pâng-keng khoán-khoán--leh, kóng i beh kap A-tek chhut-khı̀ kiâⁿ-kiâⁿ--leh, kā A-tek siàu-kài chia ê khoân-kéng. In nn̄g-ê lâng kiâⁿ tı̄ pho͘ chho͘-hoe chio̍h-kak sè-sè-tiâu ê lō͘--nı̍h, tú-tio̍h chin chē toà tı̄ chia ê lâng, Joan lóng kā in kap A-tek hō͘-siong siàu-kài. “Chiah-ê lâng lóng chin liông-siān, goá káⁿ kóng, sı̄ chit-ê sè-kan siōng-kài liông-siān ê chı̍t-tı̄n lâng, lí ē-tàng sı̀n-iōng--in,” Joan ná kiâⁿ ná kóng, “goá āu--jı̍t tō beh koh lo̍h-soaⁿ, lí nā beh toà kah hit-ê sı̂-chūn, goá khó-lêng bô hoat-tō͘ kā lí khoàⁿ-thâu khoàⁿ-boé, m̄-koh lí nā ū sím-mı̍h tāi-chı̀ su-iàu tàu-saⁿ-kāng--ê, chò li kóng, gún chia ê lâng lóng ē chin jia̍t-sèng kā lí tàu-kha-chhiú.” “Joan, goá lâi poàⁿ-po͘--ah, iáu m̄-chai chit-ê tē-thâu hō-chò siáⁿ-miâ.” A-tek kā mn̄g. “Chia hō-chò Puigcerda Noevo.” “Puigcerda Noevo? Puigcerda goá chai, goá tō-sı̄ tùi hia ê chhia-thâu chiūⁿ pah-suh--ê, só͘-í lín chia sǹg sı̄ ‘sin ê Puigcerda’--loh?” A-tek kin-kù noevo tı̄ Se-pan-gâ-bûn ê ı̀-sù án-ne kóng, “M̄-koh, kóng sı̍t-chāi--ê, lín chit-ê po͘-thâu, tùi kiàn-tio̍k khoàⁿ--khí-lâi, koh-khah kó͘-chá khoán--neh? Nā beh lūn-chin kóng, lín èng-kai khah sêng sı̄ ‘kū ê Puigcerda’.” “A-tek, che tō-sı̄ goá beh chhoē lí kóng--ê tāi-chı̀, chit-ê po͘-thâu ê le̍k-sú, kap i ê pı̀-bı̍t.” “Chū-té chiah-ê tāi-chı̀ sı̄ bô-ài lâng chai--ê, m̄-koh chit-má pān-sè bô kāng-khoán--ah, m̄-chai sím-mı̍h sı̂-chūn chia lóng ē hō͘ lâng châu-bia̍t lu-pêⁿ.” Joan thó͘ chı̍t-kháu-khùi liáu-āu án-ne kóng. Hit-àm goe̍h-niû kng-kng-kng, A-tek toè tı̄ Joan ê tò-chhiú-pêng, khoàⁿ-tio̍h i ām-á-kún āu-piah ū hō͘ pô-ché chò kı̀-hō, bē-su chı̍t-chiah boé-ia̍h-á hioh tı̄ hia. (Tâi-bûn Bóng-pò tē 100~102 kı̂, 2005 nı̂ 1~3 goe̍h)