Pyuma kàu-hoē kūn-hóng
Tâi-tang hū-kūn só͘ ūi Pyuma (彪馬) cho̍k ū hun-soàⁿ tı̄ 8 ê hiuⁿ-siā teh khiā-khí. Phó͘-thong teh kóng ‘Poeh-siā’ chiū sı̄ teh chí Pyuma cho̍k ê ı̀-sù teh kóng. m̄-kú goân-lâi Pyuma sı̄ chí-khí Lâm-ông hit cho̍k nā-tiāⁿ, í-goā iáu ū Ti-pún, Siā-má-kan, Lı̄-ka, Thài-pêng-chhoan, Siōng Pı̂n-nn̂g, Hā Pı̂n-nn̂g kap Chho͘-lo̍k (Lêng-kè-me̍h chāi-lāi ) chiah ê hiuⁿ-siā. Só͘-í tû-khı̀ Lâm-ông í-goā, kı̂-thaⁿ ê hiuⁿ-siā ê lâng khah bô ài hō͘ lâng kiò-choè Pyuma. Chóng kóng, in tāi-ke khah ài ēng ‘Poeh-siā’ chit ê bêng-chheng, sui-bóng sı̄ án-ni, ēng ‘Pyuma’ lâi tāi-piáu Poeh-siā iā m̄-sı̄ put-kai. In-ūi chá tùi Pyuma chit chhoan ū chhut in Poeh-siā ê ông, kiò-choè Pi-lâm ông, teh tı̄-lí Pi-lâm hiong hū-kūn Poeh-siā cho̍k. Hiān-chāi tang Tâi-oân ê san-toē, pı̂ⁿ-toē san-pau kè-kiōng ū Ami, Bunun, Drukai, Paiwan, Pyuma, Taroko, kap Yami chiah ê 7 cho̍k. Kı̂-tiong chin chá chiū chhut gâu lâng khah choē ê, chiū-sı̄ Pyuma cho̍k. Tùi in ê lāi-bı̄n í-kı̍p in ê hō͘-è ū chhut Séng chèng-hú úi-oân, i-seng, koān-tiúⁿ, gı̄-oân, kéng-chhat só͘-tiúⁿ, kok-hāu hāu-tiúⁿ, im-ga̍k-ka chin-choē ê lē. Án-ni Pyuma cho̍k khiok sı̄ iu-siù ê bı̂n-cho̍k, sui-bóng in ê lâng-gia̍h ha̍p-oá bô ta̍t chı̍t bān lâng, chóng-sı̄ chá-chêng in ū Ami cho̍k choè in ê lô͘-lē ê sú-sı̍t. Chá Pyuma cho̍k bat cheng-ho̍k Ami cho̍k, tı̀-kàu Ami cho̍k sio̍k in tı̄-lí, choè in ê lô͘-lē . Só͘-í kàu hiān-chāi Ami cho̍k chheng Pyuma cho̍k choè Aldaalda (ı̀-sù sı̄ tùi-te̍k alda ê ho̍k-sò͘). Tı̄ kè-khı̀ Pyuma cho̍k sui-bóng ū bı̂n-cho̍k-siōng put-chí thang khoa-kháu ê hui-hông ê le̍k-sú. Chóng-sı̄ in ê lêng-sèng-siōng sı̄ lı̄ Ki-tok ê kiù-un chin hn̄g. Tùi 10 goā nı̂ chêng, kı̀-chiá chiū kám-kak iáu ū tiâu-goā khó-lı̂n ê iûⁿ, bô lâi ín-chhoā in boē an-sim, (in-ūi pún-lâng ê kang-chok toā-pō͘-hūn sı̄ tùi Ami cho̍k ê thoân-kàu), chiū tùi Lâm-ông khai sí, āu lâi kàu Lı̄-ka, Ti-pún téng hong-bı̄n choè kang, chóng-sı̄ hāu-kó chin bān. Sui-bóng kè-khı̀ iā siông-siông chio Tân Chı̀n-chong Koān-tiúⁿ tàu èng-oān choè-tı̄n khı̀ in ê hiuⁿ-siā, á-sı̄ tı̄ koān-tiúⁿ ê kong-koán lı̄-iōng te̍k-pia̍t ê chū-hoē tùi in thoân hok-im, in ê hoán-èng chin bān. Lı̄-ka ê hiuⁿ-siā iā bat tı̄ chin kú ê tiong-kan, múi lé-pài ê pài sı̀ àm óng-hoê chē kha-ta̍h-chhia nn̄g tiám goā cheng soà-chiap choè kang, tit tio̍h Loē-tē-hoē ê Kí Kùi-pêng Ko͘-niû (Miss Giebel) kap Ai Ko͘-niû (Miss Ashby) téng choè-tı̄n pang-bâng, hāu-kó iā sı̄ chin iú-hān. In-ūi Thian-chú-kàu lâi Tâi-tang hong-bı̄n khai-sí choè kang, choē-choē lâng ūi-tio̍h in teh pun ê kiù-chè-phín lâi siū bê-he̍k. Chı̍t pêng ēng bu̍t-chit; chı̍t pêng ēng Sèng-keng; kám-siā Siōng-tè, sı̄ I ê Sèng Sı̂n ū choè kang ; hō͘ hiah ê thâu-náu pí-kàu-tek kán-tan ê Pyuma ê tông-pau, ná tı̍t-tı̍t khùn chhíⁿ khí-lâi. Te̍k-pia̍t choè-kūn chit nn̄g nı̂ lâi, ū ke-thiⁿ kúi-nā ê put-chí iú-le̍k ê chí-tō kai-kip ê lâng, tùi in kóng khí Sèng-keng ê chin-lí-Siōng-tè ê Oē hō͘ in thiaⁿ ê sı̂, in kèng-jiân koat-sim jı̄n Chú Iâ-so͘ Ki-tok choè in ê Kiù-chú. In put-chí ū An-tek-liat, Hui-le̍k kap Pó-lô ê cheng-sı̂n, hiān-chāi iáu put-chí phah-piàⁿ ūi Chú choè kiàn-chèng, teh ín-chhoā kok siā iú-le̍k ê thâu-lâng lâi kui Chú. Choè-kūn iā ū tı̍t-tio̍h chı̍t ê tùi chin chá chiū teh ín-chhoā ê iú-le̍k-chiá Má Tı̀-lé koat-sim saⁿ-kap tı̄ Chú ê bı̄n-chêng hōng-hiàn koat-sim ê kı̂-tó. I sı̄ tiàm Chho͘-lo̍k, koh sı̄ Pyuma cho̍k í-goā kı̂-thaⁿ kok cho̍k só͘ kong-jı̄n ê san-toē ê chóng thâu-ba̍k. Kūn-lâi sin-thé khah lám, iā ū khı̀ Hoa-liân M.C.C. Pı̄ⁿ-ı̄ⁿ jı̍p-ı̄ⁿ tı̄-liâu. Sı̀ ge̍h bé tng Oán-tong kui Chú só͘ phài lâi ê Rev.H.B.Williams tı̄ Tâi-tang hong-bı̄n kā lán hia̍p-chō͘ thoân-kàu ê kı̂-kan tiong, pún-lâng ū chhoā i khı̀ thàm Má Tı̀-lé. Williams Bo̍k-su ēng Chú ê tō-lí khoàn-bián i, i iā kap i saⁿ kap kı̂-tó. I piáu sı̄ goān-ı̀ chiap-la̍p Iâ-so͘ choè Kiù-chú, iā hoaⁿ-hí tàu kó͘-bú hiah ê siông-siông lâi chhē i ê san-toē tāi-piáu lâi tui-kiû Chú ê chin-lí. In-ūi i sı̄ choè hū-kı̄n kok cho̍k ê hó ê kò͘-būn. Kong-ho̍k āu siū chèng-hú ko-kip koaⁿ-oân ín-kiàn ê san-toē tāi-piáu chiū-sı̄ i. Hiān-chāi Poeh-siā cho̍k tû Chho͘-lo̍k, Ti-pún í-goā, lóng ū khí lé-pài-tn̂g. Thoân-kàu-chiá Sèng-keng ha̍k-ı̄ⁿ pit-gia̍p ê ū nn̄g ê teh choè kang, í-goā iáu ū nn̄g ê chı̀-goān ê soān-tō-su teh chí-tō. Kang-chok jı̂n-oân iáu chin khiàm, goán ū chı̄n-liōng teh chai-poê hoaⁿ-hí tàu heng-khí hok-im ê kang-lâng, hō͘ in hū-chek chí-tō bû bo̍k ê kàu- hoē. Kám-siā Siōng-tè, Lı̄-ka kàu-hoē ê Tân Siông-lı̂m Tiúⁿ-ló tùi jı̍p sı̀n liáu-āu, tàu phun-cháu kok siā, ke̍k-le̍k teh ín-chhoā hit toē-hng ê iú-le̍k-chiá, iā ū teh cho͘-chit Se-pō͘ kàu-hoē hóng-būn-thoân, hō͘ hiah ê iú-le̍k ê tāi-piáu thàm lán choè a-hiaⁿ ê kàu-hoē kap kı̂-thaⁿ ê ki-koan, chiū-sı̄ pı̄ⁿ-ı̄ⁿ, ha̍k-hāu téng, liáu-āu iā teh kı̂-thāi oē thang tit-tio̍h chham-ka tı̄ té-kı̂ ê chı̀n-siu-pan siū hùn, hō͘ in tit-tio̍h sio̍k lêng ê chai-bat, liáu-āu thang tı̄ in ê cho̍k tiong ūi Chú hoat kng. Chhiáⁿ khoàⁿ Pò ê hiaⁿ-chí, ūi-tio̍h chiah ê Poeh-siā cho̍k ê lêng-hûn ê tit-kiù kap chiah ê chí-tō-chiá kı̂-tó, ǹg-bāng Chú ê Sı̂n beh toā-toā choè kang tı̄ in ê tiong-kan. Só͘-í “ Lán chiah ê oē ê lâng èng-kai tio̍h tam-tài boē ê lâng ê loán-jio̍k” ( Lô-má 15:1,2). Chhiáⁿ tāi-ke ūi-tio̍h Tâi-oân San-toē kok cho̍k tiong, tē it bān siⁿ ê ké-chí Pyuma cho̍k ê tit-kiù lâi koan-sim. (San-tē Kàu-hoē,1963 nı̂)