Sái-chûn

 Jı̂n-seng sı̄ chı̍t-chia̍h chhut-phâng ê sió-chûn, 
  Tı̄ sè-sū ê toā-hái kiâⁿ m̄-chai ê chúi-lō͘, 
  Chài kám-chêng ê tāng-hoè sái khí-lō ê pho-lōng, 
  Hó-thiⁿ pháiⁿ-thiⁿ, chhut-jı̍t lo̍h -hō͘. 
 Keng-koè sí-bông ê káng-kháu, 
  M̄-sı̄ lán beh khı̀ ê bo̍k-te̍k-tē, 
  Sı̂n ê hái-koan it-lu̍t kiám-cha: 
  Ài, hūn, sit-bōng, kı̂-thāi…
  Hoaⁿ-hí, thòng-khó͘, su-liām, m̄-kam… 
 Chhiⁿ ê sán-phín bē-sái chı̀n-khó͘, 
  Lóng-chóng bok-siu, 
  Mā put-chún hoê-hâng. 

(Tâi-bûn Thong-sı̀n tē 87 kı̂, 2001 nı̂ 5 goe̍h)