1. Sè-kan sı̍t-chāi sı̄ khó͘-hái,
M̄-bián goá kóng tāi-ke chai;
It-seng hoaⁿ-hí bô kúi pái,
Iu-būn khó͘-thàng tı̍t-tı̍t lâi.
2. Iā ū sè-chêng ê hoân-ló,
Iā ū thiⁿ kàng ê chai-hō;
Iā ū chū-kí ê só͘ chò,
Iā ū hō͘ phoah thiⁿ-thang lo̍h.
3. Taⁿ goá kán-tan lâi kóng-khí,
Ū ê seⁿ tio̍h pháiⁿ kiáⁿ-tı̄;
Ū ê chhoā tio̍h pháiⁿ chhe-jı̂,
Ok chhe gia̍t-chú bû khó tı̄.
4. Ū ê kè tio̍h pháiⁿ ang-sài,
Ū ê tú-tio̍h páiⁿ tang-sāi;
Ū ê ta-ke, ta-koaⁿ bái,
Ke-têng put-sı̂ nāu chhai-chhai.
5. Ū ê poa̍h lo̍h kiáⁿ-jı̂ kheⁿ,
Ū ê hoân-ló lóng bē seⁿ;
Ū ê chin gâu kāu phoà-pēⁿ,
He-ku tām-tū sàu kui mê.
6. Ū ê hu-hū chin saⁿ-thiàⁿ,
Bô gı̂ chı̍t ê tāi-seng kiâⁿ;
Ū ê kan-ta ko͘-toaⁿ kiáⁿ,
Lâi pàng pê-bó chò i kiâⁿ.
7. Ū ê kiáⁿ-jı̂ pháiⁿ io-chhoā,
Ū ê ke-têng bô khoàⁿ-oa̍h;
Bu̍t-chu chiok kùi beh àn-choáⁿ,
Put-sı̂ hoân-ló tı̄ sim-koaⁿ.
8. Ū ê hāu-seⁿ chı̍t toā tı̄n,
Kàu lāu kan-ta chhun toaⁿ-sin;
Iā ū ko͘-jı̂ bô siang-chhin,
Bô lâng chiàu-kò͘ chin khó-lı̂n.
9. Í-siōng só͘ kóng sı̄ tāi-khài,
Kiaⁿ-liáu choá-bı̄n tı̀n só͘-chāi;
Sè-kan sui-jiân sı̄ khó͘-hái,
Lán khò sı̀n-sim chò i lâi.
10. Chú chá tı̄ Ka-lı̄-lı̄ hái,
Hong-éng chhoe phoah tı̍t-tı̍t lâi;
Nā-sı̄ lán Chú ti hit lāi,
Ha̍k-seng lóng bô siū siong-hāi.
11.Sui-jiân ha̍k-seng ū toā kiaⁿ,
Sûi pò lán Chú tit chai-iáⁿ;
Chú chiū hoah hong-éng pêng-tiāⁿ,
Tāi-ke pêng-an chûn koh kiâⁿ.
12. Thian iú put sek ê hong-hûn,
Lâng ū chá-àm ê pháiⁿ-ūn;
Sı̀n-tô͘ iàu-kín tio̍h thun-lún,
Chú ū si-in ē koh pun.
13. Lán khoàⁿ Iok-pek chiū chai-iáⁿ,
Só͘ tú chai-hō chin thang kiaⁿ;
Iok-pek tùi Chú bô oàn siaⁿ,
Chú chiū chiok-hok têng-poē iâⁿ.
14. Put-lūn tú-tio̍h siáⁿ kéng-gū,
M̄-thang hoân-ló lâi khoà-lū;
Lán tio̍h jia̍t-sim kı̂ tó Chú,
Chú ē hoah soàⁿ lán hūn-bū.
15. Sı̀n-tô͘ tāi-ke tio̍h chai-iáⁿ,
Thian-chai tē-piàn lóng bián kiaⁿ;
In-ūi ū Chú thang hó thiàⁿ,
Chú tùi sè-kan ū khah iâⁿ.
16. Sı̀n-tô͘ ta̍k-jı̍t tio̍h hoaⁿ-hí,
Bô hō͘ khoân-kéng lâi kau-tı̂ⁿ;
Lán ū thian-tông ê hok-khı̀,
Tı̄ hia hióng-hok bān-bān nı̂.
(Tâi-oân Kàu-hoē Kong-pò, Tē 706 kı̂, 1947 nı̂ 1 goe̍h)
