Goá Bı̂n-á-jı̍t Beh Chhē Lí
A 人物: 幕後人, 和平伯, 路人a b, 天使,老乞食, 小兒, 寡婦.
B 主題: 馬太 25: 34-40.
(和平伯 chē tı̄ tiàm-lāi teh tiam phoê-oê)
第一幕
1 幕後人: Tı̄ chit ê siâⁿ-lāi, ū chı̍t-ê A-peh-à teh siu-lí phoê-oê. I ta̍k-jı̍t lóng chē tı̄ i ê soè-soè ê tiàm-lāi teh kā lâng pó͘ phoê-oê. Chit ê A-peh-à iā-sı̄ chı̍t-ê kèng-khiân ho̍k-sāi Siōng-tè ê Ki-tok-tô͘. I thiàⁿ Chú ê sim chin-toā. I chò kang nā ià-siān ê sı̂ chiū tha̍k Sèng-keng gı̂m-si.
(和平伯 hah-hı̀, khí-lâi tha̍k Sèng-keng, Iok-hān 3:16. jiân-āu chiū gı̂m-si, 最親愛的救主, 使我心滿足,主的恩愛在我心內口舌難得說明)
Ū sı̂ chiū chhut-lâi goā-bı̄n kap lâng kóng-oē.
2 路人a: Hô-pêng-peh-à, pêng-an. Thiⁿ-khı̀ chin léng lah, chhin-chhiūⁿ beh chò toā-seh ê khoán lí kiám bô kiaⁿ koâⁿ mah?
3 和平伯: Jı̂n-ài-hiaⁿ-à, pêng-an. Siōng-tè ū hō͘ goá chı̍t-keng soè-soè ê chhù thang bih koâⁿ, m̄-chai ū goā-chē lâng bô chhù beh tı̄ chit ê toā-seh ê ke-lō͘-chiūⁿ bô i-oá lâi hō͘ toā-seh khó͘-chhó͘.
4 路人a: Hô-pêng-peh-à, lí chin ū thiàⁿ-tio̍h hiah ê bô i-oá ê pháiⁿ-miā lâng, goān Siōng-tè kàm-chhat lí ê sim.
Pêng-an. (退場)
5 路人b: Hô-pêng peh ah, pêng-an. Sèng-tàn-cheh kı̄n lah, bô kú chiū sin-nı̂ lah, lí phah-sǹg chin hoaⁿ-hí teh chún-pı̄ chiah tio̍h.
6 和平伯: Gióng-bōng hiaⁿ, pêng-an. Sè-kan ê jı̍t-chí teh koè chhin-chhiūⁿ lâu-chúi, sı̍t-chāi chin kín. Chóng-sı̄ lán lóng boē-thang ūi Chú chò sím-mı̍h.
7 路人b: Lí sı̍t-chāi ū gióng-bōng Siōng-tè ê kok, koh ū ūi Chú teh oa̍h, goān Chú si-un hō͘ lí. Pêng-an. (退場)
8 幕後人: Jiân-āu A-peh-à chiū koaiⁿ-mn̂g lâi jı̍p i ê tiàm-lāi. Í-keng chin àm lah, i kám-kak chin ko͘-toaⁿ, chiū siūⁿ beh lâi kı̂-tó.
9 和平伯: Chú Iâ-so͘ ah, goá kám-siā lí chiàu-kò͘ goá kin-á-jı̍t chı̍t-jı̍t ê lō͘. Chú ah, thiⁿ-khı̀ chin léng chhin-chhiūⁿ beh chò toā-seh ê khoán, Lí tio̍h chiàu-kò͘ hiah ê khó-lı̂n bô chhù ê lâng. Chú ah, Sèng-tàn-cheh kàu lah, Lí ūi-tio̍h goá pi-bı̂ ê lâng lâi chhut-sı̀, nā-sı̄ goá lóng bô thang hó khoán-thāi Lí, goá ê sim chin kan-khó͘. Goá chin ài pò-tap Chú lí ê thiàⁿ, kiû lí tio̍h hō͘ goá oē-thang pò-tap lí ê thiàⁿ, nā bô, goá ê it-seng chiū ko͘-hū lí, khò Chú. A-men.
10 幕後人: Āu-lâi A-peh-à chiū khùn-khı̀. Tı̄ hit-mê i ū bāng-kı̀ⁿ chı̍t ê thiⁿ-sài khiā tı̄ i ê sin-piⁿ kā i kóng oē.
(聖歌隊幕後吟聖詩193首1節, 天使出場兩手舉高順詩的調步行到阿伯的身邊)
11 天使: Hô-pêng peh-à, lí pêng-siông kèng-khiân ho̍k-sāi Siōng-tè, siông-siông gióng-bōng Chú, koh thiàⁿ Chú ê sim chin-toā, Chú í-keng kàm-chhat lí. Taⁿ Chú Iâ-so͘ chai-iáⁿ lí ê sim chin thiàⁿ I, só͘-í I tı̄ bı̂n-á-jı̍t beh lâi kàu lí ê chhù chhoē lí, chhiáⁿ lí chiah chún-pı̄ sim tán-hāu I.
12 和平伯: Chin kı̂-koài, chin kı̂-koài! Goá chiah oē bāng-kı̀ⁿ chit ê sū? Chú Iâ-so͘ tı̄ kin-á-jı̍t beh lâi chhoē goá, kiám-ū chit ê sū? Phah-sǹg sı̄ bô-iáⁿ, Chú Iâ-so͘ thái oē-thang lâi chhoē goá chit ê bı̂-soè ê lâng!? Chóng-sı̄ nā ū-iáⁿ leh! Oh, goá chiū chin ū hok-khı̀, chin thang hoaⁿ-hí! Chú Iâ-so͘ kin-á-jı̍t beh lâi chhoē goá, kóng tio̍h pı̄-pān sim tán-hāu I. Goá tio̍h kín-kín lâi piàⁿ-sàu lāi-bı̄n. (khai-sí piàⁿ-sàu)
Án-ne hó-sè, chóng-sı̄ kin-á-jı̍t chin-koâⁿ chhin-chhiūⁿ beh lo̍h toā-seh, goá tio̍h lâi khí-hoé tı̄ lô͘-nı̍h, Chú Iâ-so͘ nā lâi thang hang-hoé.
(khai-sí khí-hoé tı̄ lô͘-nı̍h)
Án-ne hó-sè, chóng-sı̄ Chú Iâ-so͘ nā lâi goá lóng bô piáⁿ thang chhiáⁿ I, I phah-sǹg oē chin iau, goá tio̍h pı̄-pān piáⁿ tı̄ chia lâi tán-hāu I. (the̍h piáⁿ kap saⁿ, chı̂ⁿ chhut-lâi)
Goá iáu-kú ū chı̍t-niá toā-saⁿ, Chú Iâ-so͘ beh tńg-khı̀ nā koâⁿ thang moa tńg-khı̀. Koh goá iā ū chek-chū tām-po̍h chı̂ⁿ, Chú Iâ-so͘ nā bô só͘-hùi thang ēng chiah ê chı̂ⁿ thang hō͘ Chú Iâ-so͘ ēng.
13 幕後人: A-peh-à, chiong i só͘ ū ê lóng the̍h chhut-lâi teh beh khoán-thāi Iâ-so͘. I ta̍uh-ta̍uh kiâⁿ kàu mn̂g-goā khı̀ khoàⁿ ū lâi á-bô, khoàⁿ bô i chiū koh jı̍p lāi-bı̄n chē tı̄ i ê ūi lâi khai-sí i múi-jı̍t ê kang-chok.
14 老乞食: Chin-koâⁿ, chin-koâⁿ! Ta̍k-keng chhù lóng koaiⁿ-koaiⁿ khí-lâi, hō͘ goá bô lō͘ thang bih koâⁿ, goá phah-sǹg oē koâⁿ sí. (khai-sí sàu hòng, hòng)
Ah, Siōng-tè ah, kiû lí lı̂n-bín goá, goá taⁿ bô khùi-la̍t thang kiâⁿ lah, goá ê choân-sin lóng léng khí-lâi lah. (tó lo̍h-khı̀)
Siōng-tè ah, kiù goá chit ê bô i-oá pháiⁿ-miā ê lāu-lâng.
15 和平伯: Sím-mı̍h lâng, goá ê Chú Iâ-so͘ lâi lah tio̍h m̀? Oh, lāu-lâng ah, lí kín-kín jı̍p lâi goá ê chhù, bô lí oē koâⁿ-sí! Lāu-lâng ah, lí chiah koâⁿ, chiah káⁿ chhut-lâi neh? Lí m̄-kiaⁿ koâⁿ-sí tio̍h bô?
16 老乞食: Kám-siā lí, kám-siā lí, Siōng-tè ū kiù goá, nā bô lí khui-mn̂g chhut-lâi goá chiū koâⁿ-sí lah. Ah, goá sı̄ chı̍t-ê bô-i bô-oá ê pháiⁿ-miā lâng, tı̄ ke-lō͘ teh kiû-khit, kin-á-jı̍t chiah koâⁿ lóng bô tit-tio̍h poàⁿ-chiam, koh tú-tio̍h chit ê toā-seh soà boē-thang tńg-khı̀, lâng nā chia̍h lāu chhin-chhiūⁿ goá án-ni sı̍t-chāi chin bô lō͘-ēng.
17 和平伯: Lāu-lâng ah, lí m̄-thang sit-chı̀ choa̍t-bāng. Lâng tı̄ sè-kan put-kò sı̄ chiām-sı̂ nā-tiāⁿ, tı̄ thiⁿ-nı̍h chiah ū chin-sı̍t ê hok-khı̀, lí tio̍h jím-siū sè-kan ê pháiⁿ kéng-gū. Taⁿ goá chia ū hoé, iā ū tām-po̍h chia̍h-mı̍h chhiáⁿ lí bô kheh-khı̀ lâi ēng.
18 老乞食: Chin to-siā, chin to-siā! Lí sı̍t-chāi chin ū thiàⁿ pháiⁿ-miā lâng ê sim, lí bô khoàⁿ-khin bô i-oá ê lâng, hoán-tńg hó khoán-thāi goá, sı̍t-chāi chin to-siā lí ê thiàⁿ.
19 和平伯: Lāu-lâng ah, lí m̄-bián án-ne kheh-khı̀, che put-kò sı̄ chı̄n goá ê pún-hūn nā-tiāⁿ. Chhiáⁿ lí the̍h khí-lâi ēng.
20 老乞食: Chin to-siā. (chia̍h) Goá chia̍h liáu chin pá lah, koh sin-thé lóng hoê-ho̍k chin sio-lō lah. Taⁿ seh iā khah tiām ê khoán, goá tio̍h kín-kín lâi khı̀.
21 和平伯: Lāu-lâng ah, lí m̄-bián hiah-nı̍h koáⁿ-kín, bān-bān-á chiah tńg-khı̀ tio̍h hó.
22 老乞食: Án-ne tio̍h hó, thàn chit-sı̂ bô lo̍h-seh, goá tio̍h kín-kín lâi-khı̀. Oh, chin-koâⁿ, chin-koâⁿ! Lâng nā chia̍h-lāu sı̍t-chāi bô lō͘-ēng.
23 和平伯: Lí hiah-nı̍h kiaⁿ koâⁿ, án-ne goá chia ū chı̍t-niá goā-saⁿ hō͘ lí moa tńg-khı̀. Chhiáⁿ lí chiah khah sió-sim leh. Goān Siōng-tè kap lí saⁿ-kap tı̄-teh.
24 幕後人: Lāu-lâng lı̄-khui liáu-āu, chit ê thiàⁿ Chú ê a-peh chiū koh koaiⁿ-mn̂g jı̍p i ê tiàm-lāi. I chhin-chhiūⁿ chin sit-bāng ko͘-toaⁿ ê khoán, in-ūi só͘ siàu-liām ê Chú bô lâi, koh só͘ ū ê piáⁿ 3 tè chhun 2 tè, hoé-chhâ iā tı̍t-tı̍t beh liáu lah, chı̍t-niá goā-saⁿ iā bô khoàⁿ-kı̀ⁿ lah. I chiū koh chē-teh lâi kè-sio̍k i ê kang-chok, sim-lāi khiok lóng teh chù-ı̀ goā-bı̄n.
25 小兒: Hoé-chhè oh, bé hoé-chhè oh! Chin koâⁿ, chin koâⁿ! khoàⁿ goá beh án-choáⁿ tio̍h hó, goá tek-khak oē koâⁿ sí. Goá kin-á-jı̍t chhut-lâi bē hoé-chhè lóng bē bô poàⁿ-lok, goá m̄-káⁿ tńg-khı̀, goá ê lāu-pē chin pháiⁿ, nā bô thàn chı̂ⁿ tńg-khı̀, i oē phah-sí goá. Ah, goá beh án-choáⁿ tio̍h hó, goá oē koâⁿ sí lah, goá oē koâⁿ sí lah!!
26 和平伯: Gín-ná, lí sı̄ án-choáⁿ chiah tó tiàm tı̄ chia, koáⁿ-kín jı̍p-lâi, koáⁿ-kín jı̍p-lâi!
27 小兒: A-peh ah, to-siā, to-siā!! Ah, chin-koâⁿ, ah, chin-koâⁿ!!
28 和平伯: Gín-ná, lí chiah-nı̍h koâⁿ tı̄ chit ê ke-lō͘ teh chò sím-mı̍h? Lí m̄-kiaⁿ koâⁿ tio̍h bô?
29 小兒: Goá sı̄ chı̍t ê pháiⁿ-miā gín-ná, teh bē hoé-chhè, kin-á-jı̍t chin koâⁿ soà bē bô poàⁿ-lok, só͘-í goá m̄-káⁿ tńg-khı̀, nā-bô thàn chı̂ⁿ tńg-khı̀, goá ê lāu-pē ē kā goá phah-sí. (háu)
30 和平伯: Gín-ná lí m̄-bián háu, hiah ê hoé-chhè goá kā lí boé, chia ū cha̍p-kho͘ lóng hō͘ lí, m̄-bián chāu-chı̂ⁿ, koh chit tè piáⁿ hō͘ lí chia̍h, lí tiàm chia hang-hoé chia̍h-piáⁿ, nā chia̍h liáu chiah tńg-khı̀ chiū hó.
31 小兒: A-peh-à, hō͘ lí chin to-siā! Lí ū kái-koat goá ê khùn-lân, chin to-siā! Goá taⁿ chin hoaⁿ-hí káⁿ tńg-khı̀ lah. (chia̍h-piáⁿ) A-peh-à, goá chia̍h liáu lah, goá beh tńg-khı̀ lah, hō͘ lí chin to-siā, chin to-siā!!
32 和平伯: Lí tio̍h kín-kín tńg-khı̀ m̄-thang khı̀ pa̍t-ūi thit-thô, tio̍h khah sió-sim leh!
33 幕後人: A-peh-à, koaiⁿ-mn̂g jı̍p lâi khoàⁿ i ê piáⁿ 3 tè chhun chı̍t-tè, chhâ iā beh bô lah, koh chı̂ⁿ iā chhun tām-po̍h, i chiū chin sit-bāng. In-ūi só͘ thiàⁿ ê Chú lóng iáu-boē khoàⁿ-tio̍h. I chiū koh chē teh lâi kè-sio̍k kang-chok.
34 寡婦: Ah, Siōng-tè ah, lí tio̍h thoè goá khui-lō͘! Goá sı̄ chı̍t ê khó-lı̂n ê koáⁿ-hū, in-ūi beh chhoē goá chı̍t ê kiáⁿ lâi kàu chit ê ı̄ⁿ-hiong ê só͘-chāi, chı̍t-koá só͘-hùi lóng ēng liáu-liáu, koh soà tú-tio̍h chit ê toā-seh, ah , goá beh án-choáⁿ tio̍h hó! Chú Iâ-so͘ ah, lí tio̍h lı̂n-bín goá chit ê siū-khó͘ ê lú-pı̄! (tó lo̍h-khı̀)
35 和平伯: Sím-mı̍h lâng?! Ah, chí-moē ah, lí sı̄ án-choáⁿ, kín-kín jı̍p-lâi, kín-kín jı̍p-lâi!!
36 寡婦: To-siā, to-siā!! Hó-sim ê hiaⁿ-tı̄ ah, hō͘ lí chin to-siā!
37 和平伯: Chí-moē ah, lí sı̄ án-choáⁿ chiah tó tı̄ chiah ê toā-seh ê ke-lō͘ nı̍h? Lí sı̄ chhut-goā lâng tio̍h bô?!
38 寡婦: Sı̄ lah, goá sı̄ chı̍t ê siū-khó͘ ê koáⁿ-hū, chá tiōng-hu chiū sí, (háu) chí-ū chı̍t ê to̍k-seⁿ kiáⁿ thang oá-khò, chóng-sı̄ bô gı̄-gō͘, goá ê kiáⁿ tióng-sêng liáu soà hòng-tōng, pàng-sak goá sı̀-koè khı̀ phiau-liû. Goá ūi-tio̍h beh chhoē goá hòng-tōng ê kiáⁿ, só͘-í lâi kàu chit ê só͘-chāi, só͘-hùi iā lóng ēng liáu-liáu, koh soà tú-tio̍h chit ê toā-seh.
39 和平伯: Siū-khó͘ ê hū-jı̂n-lâng ah, lí m̄-bián sit-chı̀, choa̍t-bāng. Lí tio̍h ūi-tio̍h lí ê kiáⁿ kı̂-tó, Siōng-tè chai lí ê kan-khó͘, tek-khak oē kái-piàn i, hō͘ i tńg-lâi tı̄ lí ka-kı̄ ê chhù, chí-ū oá-khò Chú lâi thoè i kı̂-tó chiū hó.
40 寡婦: To-siā, to-siā!! Goá taⁿ choân-sim beh oá-khò Chú, m̄ ài koh khı̀ chhoē i lah.
41 和平伯: Taⁿ chhiáⁿ lí ēng chı̍t-tè piáⁿ, lí phah-sǹg chin-iau, chia iā ū hoé, iā chia ū tām-po̍h chı̂ⁿ, sı̄ goá só͘ chek-chū ê..., hō͘ lí chò só͘-hùi thang tńg-khı̀ lí ka-kı̄ ê chhù.
42 寡婦: To-siā lí thiàⁿ koáⁿ-hū ê sim, lí bô khoàⁿ-khin goá chit ê bô i-oá ê hū-jı̂n-lâng, koh chiong lí só͘ ū ê pang-chān goá, sı̍t-chāi chin to-siā lí, goān Siōng-tè pò-tap lí ê thiàⁿ-sim. Taⁿ goá beh khı̀ lah, chin to-siā lí, goá tek-khak bô boē kı̀-tit lí ê thiàⁿ-sim. Pêng-an.
43 和平伯: Goān Siōng-tè an-ùi lí, chá chı̍t-jı̍t chhoā lí ê kiáⁿ tńg-lâi. Siōng-tè tek-khak bô pàng-sak lí ko͘-toaⁿ.Pêng-an.
44幕後人: A-peh-à tio̍h koh koaiⁿ-mn̂g jı̍p lāi-bı̄n. I khoàⁿ-kı̀ⁿ toh-téng ê mı̍h-kiāⁿ lóng liáu--lah, koh hoé iā hoa--lah, chı̂ⁿ iā bô lah, chiū sim-lāi toā siong-sim, in-ūi siūⁿ kóng Chú nā lâi lóng bô mı̍h thang khoán-thāi i--lah.
Chóng-sı̄ jı̍t í-keng lo̍h-soaⁿ, àm-mê í-keng kàu-lah. A-peh-à tio̍h phāu iu-siong sit-bāng ê sim lâi kı̂-tó beh khùn. (khùn)
(吟詩265首, 天使出現, bān-bān sūn si ê tiāu kiâⁿ kàu A-peh ê bı̄n-chêng, siang-chhiú tio̍h gia̍h-koân.)
45 天使: Thiàⁿ Chú ê A-peh ah, lí pêng-siông thiàⁿ Chú, Chú ū kı̀-liām lí ê thiàⁿ, te̍k-pia̍t kin-á-jı̍t Chú ū lâi kàu lí ê chhù tit-tio̍h lí 10 hun ê hó khoán-thāi, Chú Iâ-so͘ beh kā lí seh to-siā, chhiáⁿ lí kú-kú tn̂g-tn̂g tiàm tı̄ Chú thiàⁿ ê lāi-bı̄n hō͘ Chú ê kok kín-kín lâi kàu tı̄ toē-bı̄n chiūⁿ chhin-chhiūⁿ tı̄ thiⁿ chı̍t-iūⁿ.
(天使 pàng chhiú, oa̍t ǹg 眾人 àm-liām 馬太 25 chiuⁿ 34 chat kàu 40 chat.)
(幕)
Oân
