Boē Koân
2幕6場：
1幕 1場 賣權
2場 父與子
3場 母與子
4場 祝福
5場 逃走
2 幕 1場 曠野
A.人物：1.雅各、2.以掃、3.以撒、4.利百加、5.天使a、6.天使b、7.天使c。
B. 主題歌：1. Jno. R. Sweneg;“Nearer My God to Thee”
2. 聖詩277 首。
第一幕 第一場 賣權
場所 屋內
Ngá-kok tı̄ bú-tâi chiàⁿ-pêng chia̍h tāu-á-thng. Í-sò tùi tò-pêng chhut-tiûⁿ, chhiú ū the̍h phah-la̍h ê khı̀-khū.
1 雅各：Oh! Chin hó-chia̍h, chin hó-chia̍h. Chia̍h-tio̍h pı̂-thó͘ khui, ba̍k-chiu koh ē kim.
2 以掃：Ngá-kok, lí teh chia̍h sím-mı̍h?
3 雅各：Án-choáⁿ lah, goá teh chia̍h sím-mı̍h kap lí ū sím-mı̍h kan-sia̍p lah.
4 以掃：Bô-lah, goá kin-ná-jı̍t hohN, pháu khòng-iá pháu chı̍t jı̍t siūⁿ kóng beh lia̍h khoàⁿ ū sím-mı̍h cheng-seⁿ thang lâi chú chheⁿ-chhau chhiáⁿ lí, koh soah chin pháiⁿ-ūn lia̍h lóng bô poàⁿ-hāng.
5 雅各：Oh-ah, kin-á-jı̍t a-hiaⁿ lí sı̄ hō͘ sím-mı̍h kā lí kám-tōng tio̍h thah chiah-nı̍h chhin-chhiat leh, chēng kàu-taⁿ goá nā lâu chhùi-khí-noā teh khoàⁿ lí chia̍h ê sı̂-chūn lí liān chı̍t-tè kut-á to m̄-bat phah-ka-la̍uh. Taⁿ lí sı̄ beh ài goá kā lí choè sím-mı̍h?
6 以掃：Bô lah, goá to ūi-tio̍h án-ni pháu kui-jı̍t, pháu kah nńg-siô-siô pak-tó͘ chin-chiàⁿ iau lah.
7 雅各：Án-ni sı̄ án-choáⁿ? Lí sı̄ kiò goá beh kā lí chhòng sím-mı̍h hoè. Lí pak-tó͘ iau kap goá ū sím-mı̍h koan-hē.
8 以掃：Hó-sim leh lah, Ngá-kok, a-hiaⁿ pak-tó͘ hui-siông ê iau lah. Chhin-chhiūⁿ teh beh sí-khı̀, pài-thok leh lah, hō͘ goá chia̍h chı̍t-ē hó bô?
9 雅各：Bô lah, goá bô teh chia̍h sím-mı̍h hoè lah. A-hiaⁿ lí chin kaⁿ-siû ê khoán. Ah! Chin hó-chia̍h, chin hó-chia̍h. Chit ê thng khı̀-bı̄ hui-siông ê hó. Chia̍h tio̍h liān chı̍h ia̍h giōng beh lak khí-lâi.
10 以掃：Sím-mı̍h hoè lah? Hō͘ goá chia̍h chı̍t-chhùi khoàⁿ-māi-á hó m̄?
11 雅各：Bē-tàng lah, hō͘ lí chia̍h chı̍t-chhùi soah liáu toā-chı̂ⁿ.
12 以掃：Bô, khoàⁿ chı̍t-oáⁿ beh bē goā-chē goá kā lí bé lah.
13 雅各：Goá m̄ bē lah.
14 以掃：Liān goā-chē lí ia̍h m̄ bē tio̍h m̄?
15 雅各：Tong-jiân ê no̍h.
16 以掃：Goá iōng chı̍t-ki chhâi-lông ê kha kā lí bé lah hó m̄? Bı̂n-á-chài goá nā lia̍h-tio̍h khah kā lí la̍p.
17 雅各：Hńg! Tàng-sng-kâu, chiong soaⁿ-nı̍h lóng-chóng ê chhâi-lông kā goá bé goá mā bô-ài.
18 以掃：Lí ū iáⁿ bô ài tio̍h m̄, hó án-ni goá beh kā lí phah, beh kā lí iōng chhiúⁿ ê. Goá sı̄ lí ê hiaⁿ-ko lí m̄-chai tio̍h m̄? Sı̄ Siōng-tè só͘ chiok-hok ê toā-kiáⁿ, nā bô beh thiaⁿ goá ê chhùi goá sı̄ ū koân-lı̄ thang kā lí phah sí oh.
19 雅各：Hó lah, bān-chiah leh lah, Tú-tio̍h lí chit ê thó͘-lâng bô hoat-tō͘.
20 以掃：Án-ni taⁿ iōng chhâi-lông kha chı̍t-ki beh bē goá hòⁿ.
21 雅各：Bô no̍h, he sı̄ bē tàng no̍h, ā-ū hiah-nı̍h sio̍k ê.
22 以掃：Bô tio̍h iōng sím-mı̍h hoè tah beh bē goá neh, khah-kín leh lah, goá iau kah toā-tn̂g teh kò sió-tn̂g lí m̄ chai hohN.
23 雅各：Án-ni lah hohN, lí nā-sı̄ kam-goān chiong lí chím-má só͘ kóng hit ê toā-hiaⁿ ê koân lâi kā goá bé, goá chiah beh kam-goān bē lí.
24 以掃：Lí kóng sím-mı̍h hoè! Iōng toā-hiaⁿ ê koân kā lí bé hohN. Hǹg! Che ū kàu-gia̍h kı̂-koài ê bé-bē. Tı̄ chit ê sı̂-tāi iā ū lâng teh iōng miâ-hūn chò seng-lí. Chóng-sı̄ bô iàu-kín lah, pak-tó͘ nā kah iau kàu-té lah, iōng sı̀ⁿ-miā mā tio̍h kā lí bé. Kiat-kio̍k iā sı̄ bô sím-mı̍h sún-hāi lah. Taⁿ khah-kín phâng-lâi leh, beh iōng toā-hiaⁿ ê koân kā lí bé lah.
25 雅各：Saⁿ bān-chiah leh goá nā bē lí, lí tùi kin-á-jı̍t khí tio̍h kiò goá a-hiaⁿ hohN, iā bô koân-lı̄ thang phah goá lah hohN. Lí í-āu chiū m̄-sı̄ Siōng-tè só͘ chiok-hok ê toā-kiáⁿ lah hohN. Án-ni lí iā kam-goān tio̍h m̄.
26 以掃：Hǹg! Bô thò-tòng, bô thò-tòng. Chóng-sı̄ bô iàu-kín lah, kā lí bé lo̍h-khı̀ ah. Iau kah poàⁿ-sió-sí teh ham lí ko ko tı̂ⁿ.
27 雅各：Hòⁿ! Án-ni hohN, bô lâi chhı̀ kiò khoàⁿ māi koh, kiò goá a-hiaⁿ khoàⁿ-māi-á.
28 以掃：Hǹg lí chit ê ū-iáⁿ cha̍p-hun ū káu-koài. Pak-tó͘ iau kàu teh, hō͘ lí khah pheⁿ teh bô iàu-kín. Taⁿ beh kiò, lí tio̍h thiaⁿ hō͘ chim-chiok hohN. “A-hiaⁿ.” Án-ni hó lah hohN taⁿ khah-kín phâng-lâi.
29 雅各：Án-ni hó, chin sóng-khoài, chin sóng-khoài. Thiⁿ-tē khai-chó͘ m̄-bat ū ê sóng-khoài, taⁿ phâng-khı̀ chia̍h, phâng-khı̀ chia̍h, goá chit ê sió-tı̄-á ê bı̄n thái-ē seⁿ-choh chiah m̄ khah gōng koh khám leh.
30 以掃：Sím-mı̍h hoè ah! Hó-hó lí tio̍h kā goá kı̀ leh hohN. Khah-thêng-á tah koh hō͘ lí kiò kiù lâng. Ū-iáⁿ chin hó-chia̍h to-tio̍h, goân-lâi chiū-sı̄ âng-tāu-á thng, lóng hō͘ lí phiàn-phiàn khı̀. Pak-tó͘ iau sı̍t-chāi sı̄ ū kàu kan-khó͘. Só͘-í chiah-tio̍h hō͘ lí chhiáⁿ kah pá koh chùi. Taⁿ lí tio̍h kā goá kı̀ leh hohN. (以掃退場)
31 雅各：Hńg! Chin sóng-khoài, chin sóng-khoài. Bô sió-khoá kā kà-sı̄ leh lóng bē sài-tit. Tiāⁿ kóng i sı̄ toā-kiáⁿ iā iōng toā-kiáⁿ ê koân lâi beh khi-hū goá, bô sió-khoá kà-sı̄ chı̍t-ē lóng bē sài-tit. Chóng-sı̄ m̄-thang hō͘ i koè-thâu siū-khı̀. Nā hō͘ i khí thó͘-phiah khí-lâi chiū hùi-khı̀. Taⁿ goá tio̍h lâi-khı̀ pang-chān goá ê a-bó ê kang.
(退場)
第二場 父與子
場所同樣 以撒出場
1 以撒：Lâng nā chia̍h lāu sı̍t-chāi sı̄ pháiⁿ koè-jı̍t. Nn̄g, saⁿ pah nı̂ chá-chèng goá siàu-liân ê sı̂-chūn, kap goá ê lāu-pē A-pek-lia̍p-hán phiau-liû chı̍t-kok koè chı̍t-kok kàu kin-ná-jı̍t í-keng chiâⁿ-chò chı̍t-ê lāu-lâng. Lāu kah bē chhoán-khùi. Ba̍k-chiu iā bô khoàⁿ-kı̀ⁿ. Chia̍h kah chiah-nı̍h-á chē hoè ia̍h sı̄ kan-khó͘. Taⁿ chí-ū sı̄ kan-taⁿ tán-hāu sí, Siōng-tè tiàu goá tńg-khı̀ kı̀ⁿ goá ê chó͘-sian nā-tiāⁿ. Sè-hàn ê sı̂-chūn goá ê lāu-pē A-pek-lia̍p-hán iōng chhâ hō͘ goá phāiⁿ tı̄ kha-chiah-phiaⁿ chhoā goá kàu tı̄ Mô͘-lı̄-a ê soaⁿ hit ê tāi-chı̀ chhin-chhiūⁿ chā-hng ê sū iáu-kú tı̄ ba̍k-chiu chêng hō͘ goá bô bē kı̀-tit. Sı̍t-chāi jı̍t-chí teh koè sı̄ chin-kín. Tı̄ hit-sı̂ èng-kai tio̍h sí ê, siū Siōng-tè ê un-hūi ū oa̍h kàu kin-ná-jı̍t, chóng-sı̄ kiat-kio̍k ia̍h sı̄ tio̍h sí. Bô sí ia̍h bē soah tit. Chí-ū sı̄ lōng-hùi lâng ê khùi-la̍t nā-tiāⁿ, sı̍t-chāi jı̂n-seng sı̄ khang-hi, sı̄ lia̍h-iáⁿ, kai-chài tùi thiⁿ ū siúⁿ-sù, Í-sò͘ kap Ngá-kok thang chò hō͘-sû hō͘ goá tām-po̍h an-sim. Taⁿ chóng-sı̄ goán ê sı̂-tāi sı̄ í-keng koè-khı̀ lah. Goá hó thang kā Í-sò͘ chiok-hok, ia̍h thang lâi khı̀ chhoē goá ê bōng, éng-oán thang hioh-khùn. Taⁿ Í-sò kin-ná-jı̍t sı̄ án-choáⁿ kah iáu-boē tò-lâi, m̄-chai ū tú-tio̍h sím-mı̍h tāi-chı̀ á-bô. Goá tio̍h lâi kā i kiò khoàⁿ-māi-á. “Í-sò-à, Í-sò-à.”
(以掃出場)
2 以掃：A-pa sím-mı̍h tāi-chı̀ lah, hiah-nı̍h-á toā-siaⁿ sı̄ án-choáⁿ lah? Lí sin-thé kan-khó͘ á-bô? Á-sı̄ lí ài chia̍h sím-mı̍h sı̄ bô?
3 以撒：Í-sò-à! Lí khoàⁿ a-pa chiah-nı̍h-á lāu, kin-ná-jı̍t beh sí, bı̂n-ná-jı̍t beh sí mā m̄ chai-iáⁿ, só͘-í goá siūⁿ kóng kin-á jı̍t ài tı̄ Siōng-tè ê bı̄n-thâu-chêng kā lí chiok-hok, nā bô mā sı̄ bē an-sim. Taⁿ lí khı̀ gia̍h lí ê chhiuⁿ kap lí ê bú-khı̀, iā khı̀ soaⁿ-iá, kā goá lia̍h chı̍t-chiah pûi-pûi ê lo̍k-káng lâi chú-chú leh phâng lâi hō͘ lí ê a-pa chia̍h. Hō͘ goá ê sim-sı̂n chia̍h hō͘ sóng-khoài thang chiok-hok lí ê chiân-tô͘. Taⁿ khah-kín khı̀ thang khah-kín tò-lâi.
4 以掃：A-pa kiám ū-iáⁿ, ah chin hoaⁿ-hí, A-peh-lia̍p-hán ê Siōng-tè, Í-sat ê Siōng-tè taⁿ beh chiâⁿ-chò goá só͘ to̍k-chiàm ê Siōng-tè lah hòⁿ. Ah! Goá ê Siōng-tè, í-āu sè-kan lâng iā beh kiò Í-sò ê Siōng-tè lah hohN.
5 以撒：M̄-thang kín-kip, tio̍h ài chū-chāi sı̂ sı̄ iáu-bē kàu lah. Kàu a-pa beh kā lí chiok-hok ê sı̂-chūn lí tio̍h ài kín-sı̄n. M̄-thang án-ni hòng-hòng, taⁿ khah kín khı̀.
(利百加出場)
6 以掃：Ah! Chin hoaⁿ-hí, taⁿ goá chiâⁿ-chò chı̍t ê lâng lah. Beh chiâⁿ-chò chē-chē kok-bı̂n ê pē, beh chò chē-chē peh-sèⁿ ê Ông lah. Goá ê kiáⁿ-sun beh chhin-chhiūⁿ hái ê soa, ia̍h beh chhin-chhiūⁿ kiông-chhong ê chheⁿ bû-sò͘ put-chí. Taⁿ goá khah-kín lâi khı̀ thang khah-kín tò-lâi siū chiok-hok.
(以掃與以撒退場)
第三場 母與子
1 利百加：Ngá-kok ah! Ngá-kok ah! Chit ê gín-ná m̄-chai tı̄ tó-ūi teh chok-gia̍t. Sı̍t-chāi sı̄ chin-chiàⁿ bô hoat-tō͘. Ngá-kok ah! Ngá-kok ah!
2 雅各：Sím-mı̍h leh a-bú, chhut kah hit hō chhâ-pê siaⁿ beh hō͘ lâng kiaⁿ sí sı̄ bô. Sı̄ sím-mı̍h tāi-chı̀ tio̍h m̀? A-pa teh kan-khó͘ tio̍h m̀?
3 利百加：Lí chit ê gín-ná ū-iáⁿ chin bô lō͘-ēng. Toā tāi-chı̀ lah lí chai m̀. Lí iáu-kú gōng-gōng.
4 雅各：Sím-mı̍h hoè, toā tāi-chı̀ hohN. Tı̄ lán chit ê goân-sí sı̂-tāi toā tāi-chı̀ sı̄ chin hán-tit, nā sı̄ toà tı̄ hit ê 20 sè-kí ê sı̂-chūn ū sè-kài tāi-chiàn á-sı̄ goân-chú-tân beh tùi thâu-khak téng kā lí poa̍h lo̍h-lâi, che phah-sǹg sı̄ toā tāi-chı̀. Chóng-sı̄ tı̄ lán chit ê sı̂-tāi sı̄ ē-tàng an-sim koè-jı̍t chiah tio̍h. Sı̄ tùi thiⁿ-nı̍h lo̍h hoé lo̍h-lâi tio̍h m̀ neh. Á-sı̄ tē-bı̄n piak-khui nı̍h?
5 利百加：Lí chit ê gín-á sı̄ teh kóng sím-mı̍h hoè. Lí tiām-tiām thiaⁿ a-bó ê oē, tú-chiah goá ū thiaⁿ-kı̀ⁿ lí ê a-pa kiò Í-sò tio̍h chú hó-chia̍h ê liāu-lí phâng-lâi hō͘ i chia̍h. I beh thang kā chiok-hok. Tı̄ Siōng-tè ê bı̄n-thâu-chêng ê chiok-hok sı̄ chı̍t ê thang-kiaⁿ ê toā tāi-chı̀, lí chai-iáⁿ bô. Só͘-í lí ê a-pa tı̄ i boē sí ê í-chêng ài beh kín-kín kā Í-sò chiok-hok.
6 雅各：Án-ni sı̄ án-choáⁿ neh, a-bó lí sı̄ chin-chiàⁿ kip-sèng lí kóng toā tāi-chı̀ hō͘ goá lia̍h chún sı̄ tùi thiⁿ lo̍h hoé á-sı̄ thian-kun lo̍h-lâi leh. Goân-lâi chiū-sı̄ ūi-tio̍h chit ê tāi-chı̀ hohN. Hāi goá kiaⁿ chı̍t-tiô.
7 利百加：Lí chiū-sı̄ chit-khoán ê, só͘-í bān-sı̀ to bē chhut-thoat. Taⁿ tiām-tiām thiaⁿ goá kā lí kóng, a-bó sı̄ khah thiàⁿ lí, só͘-í chiah beh ūi-tio̍h lí án-ni lâi khoà-lū. Nā sı̄ Í-sò hit khoán ê iá-sèng goá chiū kiaⁿ, só͘-í goá chhian-bān ài lí tı̄ Siōng-tè ê bı̄n-chêng tit-tio̍h chiok-hok.
8 雅各：Tı̄ Siōng-tè ê bı̄n-chêng, tit-tio̍h chiok-hok sı̄ ū sím-mı̍h lı̄-ek leh, kiám oē éng-kiú bē sí tio̍h m̀.
9 利百加：Lí chit ê gín-ná chin-chiàⁿ ló͘. Tı̄ Siōng-tè ê bı̄n-chêng tit-tio̍h chiok-hok sı̄ chhin-chhiūⁿ tit-tio̍h Siōng-tè chı̍t-iūⁿ. A-pek-lia̍p-hán a-kong ê Siōng-tè, Í-sat a-pa ê Siōng-tè, chím-má chiū chiâⁿ-chò lí ê Siōng-tè lah, Siōng-tè nā ū kap lí tı̄-teh, lí ê seng-gâi oē-thang tit-tio̍h I ê chiok-hok kap pò-siúⁿ.
10 雅各：Ū-iáⁿ to tio̍h, án-ni bē bái.
11 利百加：Siōng-tè kàu tó-ūi to beh kap lí tı̄-teh. Beh pó-hō͘ lí thoat-lı̄ gûi-hiám kap chai-ē. Beh hō͘ lí chiâⁿ-chò sè-kài ê ông. Hō͘ lí chiâⁿ-chò jı̂n-lūi ê pē.
12 雅各：Án-ni goá bêng-pe̍k lah, A-bó taⁿ lán tio̍h án-choáⁿ chò khah-hó?
13 利百加：Lí tio̍h thiaⁿ goá ê chhùi kín-kín khı̀ ti-tiâu kā goá lia̍h nn̄g-chiah pûi ê ti-á lâi hō͘ goá. A-bó beh thang liāu-lí kàu chin hó-chia̍h, hō͘ lí thang phâng-khı̀ hō͘ lí ê a-pa chia̍h thang tùi Í-sò lâi chhiúⁿ-toa̍t i ê chiok-hok.
14 雅各：Chóng-sı̄ A-bó sui-bóng a-pa ba̍k-chiu bô khoàⁿ-kı̀ⁿ, chóng-sı̄ i ē ēng bong ê, Í-sò sı̄ chin-chē mn̂g, goá lóng bô mn̂g, só͘-í nā hō͘ a-pa khoàⁿ-phoà ê sı̂-chūn, goá chiū m̄-sı̄ beh siū chiok-hok, soah hō͘ chiù-chó͘ chı̍t-ê éng-oán bē chhiau-thian, soe kah lak thâu-mn̂g toh hùi-khı̀. Khoàⁿ nā hō͘ a-pa chiù-chó͘ tio̍h goá chiū hùi-khı̀.
15 利百加：M̄-bián kiaⁿ lah, lí nā siū chiù-chó͘ a-bó tah kā lí tam-tng, put-jı̄-kò͘ lí tiām-tiām thiaⁿ goá só͘ kā lí kóng ê khı̀ chò.
16 雅各：Lí nā-sı̄ kóng án-ni goá lâi khı̀.
17 利百加：Khah-kín lâi leh hohN, phah-sǹg Í-sò ia̍h liam-piⁿ teh beh tò-lâi lah.
18 雅各：Chin bô thò-tòng, Í-sò nā chai-iáⁿ chit ê tāi-chı̀ m̄-chai beh kàu goā-nı̍h siū-khı̀, nn̄g-pêng chhùi-phoé tio̍h hō͘ i siàn kah chéng-chéng khí-lâi, hit ê mn̂g sian-seⁿ goá sı̄ chin-chiàⁿ kiaⁿ. Taⁿ goá lâi khı̀. A-bó lí kín-kín pı̄-pān hō͘ hó-sè.
19 利百加：Hó lah, khah-kín leh, khah-kín leh. (雅各退場,利百加準備起火,雅各出場)
20 雅各：A-bó ah, chit nn̄g-chiah ū iu-siù bô, che sı̄ Tiong-kok te̍k-sán ê hó-chéng.
21 利百加：Khah-kín kā goá lia̍h jı̍p-khı̀ chàu-kha m̄-thang cháu, thang kap goá tàu kha-chhiú.
