第四場 祝福
1 以撒：Í-sò m̄-chai sı̄ án-choáⁿ khah iáu-bē tńg-lâi. I m̄-chai ū lia̍h-liáu hó-sè á-bô? Á-sı̄ ū tú-tio̍h sím-mı̍h chai-ē á-bô? Tı̄ kin-ná-jı̍t, tı̄ chit ê hoaⁿ-hí ê jı̍t-chí nā hō͘ i tú-tio̍h sím-mı̍h put-hēng ê tāi-chı̀, goá chiū tùi Siōng-tè khoàⁿ beh án-choáⁿ kóng. Kin-ná-jı̍t sı̄ chiok-hok ê jı̍t. Nā m̄-sı̄ Siōng-tè ê ı̀-sù bô lâng ē chhiúⁿ toa̍t chit ê hok-khı̀. Í-sò sı̄ goá só͘ oá-khò ê kiáⁿ. I hō͘ goá tit-tio̍h iá-seng ê chu-bı̄, hō͘ goá ê chhùi ū hok-khı̀ thang hióng-siū san-tin. Í-sò sı̄ goá só͘ hoaⁿ-hí ê kiáⁿ, phah-sǹg i ē liâm-piⁿ tńg-lâi. Ē lia̍h lâi hō͘ goá ê sim hoaⁿ-hí thang chiok-hok i. Taⁿ goá tio̍h siáⁿ tiàm chia tó-teh tán-hāu i tńg-lâi.
(利百加,雅各出場)
2 利百加：Án-ni hó-sè, án-ni hó-sè. Lí ka khoàⁿ chiah ê bah chú kah chiah-nı̍h-á phang, khoàⁿ-tio̍h kàu lóng beh lâu noā chhut-lâi, lí ê saⁿ chhēng ū hó-sè bô? Chhiú ê phoê pa̍k ū hó-sè bô? Án-ni phah-sǹg lí ê lāu-pē iā bē jı̄n-tit lí lah. Taⁿ koáⁿ-kín khı̀. Tio̍h ài khah sè-jı̄ leh. M̄-thang siuⁿ chheⁿ-kâu. Soà lòng-phoà tāi-chı̀, a-bó iā beh tı̄ lí ê piⁿ-á.
3 雅各：Hó lah! Goá chai lah, goá chai lah.
4 雅各：A-pa, A-pa.
5 以撒：Hàⁿ? Lí sı̄ sím-mı̍h lâng.
6 雅各：Goá lah, A-pa lí ê toā-kiáⁿ Í-sò lah. Goá m̄ sı̄ Ngá-kok lah.
7 利百加：Hāi ah, m̄ bián kóng án-ni lah.
8 雅各：Goá sı̄ Í-sò lah. Chiàu a-pa ê bēng-lēng, goá ū khı̀ ti-tiâu lia̍h nn̄g-chia̍h ti-á-kiáⁿ.
9 利百加：Ái ah, m̄-sı̄ lah, m̄-sı̄ ti-tiâu lah, khı̀ soaⁿ-iá lia̍h ê lo̍k lah.
10 雅各：Ah, ū-iáⁿ to-tio̍h goá ū khı̀ soaⁿ-iá lia̍h chı̍t-chiah pûi-ê lo̍k-á-kiáⁿ iā ū kiò a-bó kā goá liāu-lí.
11 利百加：Tio̍h kóng ka-kı̄ chú ê lah.
12 雅各：Ah! Kóng m̄ tio̍h lah, goá ūi-tio̍h a-pa chú kah chin hó chia̍h, phâng-lâi tı̄ chia chhiáⁿ lí khí-lâi, in-ūi chin hó chia̍h, só͘-í lí m̄-thang chia̍h kàu ē-hoâi soà lak khí-lâi neh. Goá seng kā lí thong-ti leh.
13 以撒：Ò͘?! Lí sı̄ Í-sò tio̍h m̀, lí chiah-nı̍h khoài tò-tńg lâi tio̍h m̀.
14 雅各：Sı̄ no̍h, lán lāi-bı̄n ū khan bô-soàⁿ tiān-sı̀n lí m̄ chai-iáⁿ mah. Kin-á-jı̍t Iâ-ho-hoa ūi-tio̍h goá beh khah-kín tit-tio̍h lí ê chiok-hok ū te̍k-pia̍t siúⁿ-sù goá khah-khoài tit-tio̍h. Taⁿ A-pa ah chhiáⁿ lí chia̍h iā thang koáⁿ-kín kā goá chiok-hok.
15 以撒：Án-ni chin-hó, chin-chiàⁿ thang kám-siā. Taⁿ lí khiā-oá lâi goá ê piⁿ-á thang hō͘ goá kā lí bong, khoàⁿ lí sı̄ Í-sò á m̄-sı̄, in-ūi chiok-hok sı̄ iàu-kín ê tāi-chı̀ bē-sái lām-sám tit. Nā chiok-hok m̄-tio̍h lâng tō chin hùi-khı̀. Hǹg! Lí chhiú to sı̄ Í-sò ê chhiú to tio̍h. Chóng-sı̄ lí ê siaⁿ-im ū sió-khoá khah kò-iūⁿ.
16 雅各：He sı̄ án-ni lah, A-pa ah, thâu-tú-á goá teh chhı̀-chia̍h liāu-lí ê sı̂-chūn, chı̍t-tè kut soà khè tı̄ nâ-âu-kháu nı̍h, só͘-í kóng tio̍h oē soà kò-iūⁿ lah.
17 以撒：Án-ni lí sı̄ goá ê toā-kiáⁿ Í-sò bô m̄-tio̍h hohN.
18 雅各：Bô m̄-tio̍h lah.
19 以撒：nā-sı̄ án-ni hohN, kā goá phâng lí só͘ chú ê liāu-lí lâi. Hǹg, hǹg, ū-iáⁿ to-tio̍h chin-chiàⁿ phang.
20 雅各：Chhiáⁿ lí khoaⁿ-khoaⁿ-á ēng. Chia iā ū phô-tô-chiú goá kā lí thı̂n.
21 以撒：Ū-iáⁿ chin hó-chia̍h to-tio̍h! Chin-chiàⁿ sin-sián ê khı̀-bı̄, lí sı̄ chin hó ê kiáⁿ, iû-goân sı̄ goá ê toā-kiáⁿ, taⁿ kā lí ê A-pa chim chı̍t-ē. Án-ni hó, án-ni hó.(雅各跪落,以撒站起來,手放在雅各頭上) Lí ê a-pa sim-koaⁿ chin boán-chiok, lí phah-sǹg iā chin hoaⁿ-hí. Lí khoàⁿ lí chit ê hoaⁿ-hí sı̄ chhin-chhiūⁿ Siōng-tè só͘ chiok-hok iá-tiong ê chháu chı̍t-iūⁿ, Siōng-tè chhin-chhiūⁿ kàng-lō͘ tı̄ soaⁿ-iá ê chhiū-ba̍k kap chháu-hoe chı̍t-iūⁿ beh pó-hō͘ lí, iā beh chiong tē-kiû ê ūn-miā hō͘ lí. Chē-chē peh-sèⁿ beh chiū-kūn lí. Tı̄ lí ê bı̄n-chêng àⁿ-thâu kèng-pài lí. Siōng-tè iā beh kap lí ê tông-pau saⁿ-kap tı̄-teh. Beh hō͘ lí ê tông-pau lóng hâng-ho̍k tı̄ lí ê bı̄n-chêng. Chiù-chó͘ lí ê beh siū chiù-chó͘, chiok-hok lí ê iā beh siū chiok-hok. Taⁿ koh kā lí ê a-pa chim chı̍t-ē. Án-ni hó lah, goá taⁿ iā thang an-sim kheh-ba̍k lah.
22 雅各：A-pa ah to-siā! Ǹg-bāng lí tn̂g-tn̂g oa̍h teh. Taⁿ án-ni tō hó lah hòⁿ?
以掃突然拿料理出場。利百加,雅各恐懼退場。
23 以掃：A-pa ah!
24 以撒：Lí sı̄ sím-mı̍h lâng?
25 以掃：A-pa ê toā-kiáⁿ Í-sò lah.
26 以撒：Sím-mı̍h lí sı̄ Í-sò m̀?
27 以掃：Sı̄ lah, chiàu A-pa ê bēng-lēng goá ū khı̀ chò chin hó ê liāu-lí lâi lah. Chhiáⁿ lí chia̍h iā tı̄ Siōng-tè ê bı̄n-chêng thang kā goá chiok-hok.
28 以撒：Ou! Án-ni thâu-tú-á phâng liāu-lí lâi hō͘ goá chia̍h ê sı̄ sím-mı̍h lâng? A-pa í-keng tú-chiah chia̍h Í-sò ê liāu-lí iā kā chiok-hok liáu lah nā-tiāⁿ.
29 以掃：Chóng-sı̄ goá tú-chiah tńg lâi nā-tiāⁿ neh, chiàu A-pa ê ı̀-sù khı̀ lia̍h lo̍k-á lâi chú liāu-lí chú-liáu táⁿ-chiah phâng lâi nā-tiāⁿ. Sı̄ án-choáⁿ leh! Khah ū chit hō tāi-chı̀ án-ni?
30 以撒：Án-ni lí sı̄ Í-sò bô m̄ tio̍h neh?
31 以掃：A-pa chhiáⁿ lí bong goá ê chhiú goá kiám oē phiàn lí tio̍h m̀! (bong)
32 以撒：Ah! Lí kó-jiân sı̄ goá ê toā-kiáⁿ Í-sò bô m̄-tio̍h. Chóng-sı̄ bô hoat-tō͘ lah. Goá boē thang koh kā lí chiok-hok lah!
33 以掃：A-pa, khah oē-sái hō͘ lí kóng án-ni! Lí tio̍h ài kā goá chia̍h lah! Iā tio̍h kā goá chiok-hok lah. A-pa khak-kín leh lah! A-pa khah-kín leh lah! Lí iā tio̍h kā goá chiok-hok lah, nā bô chiok-hok goá sı̄ boē thang oa̍h tı̄ chit ê sè-kan lah, khah-kín kā goá chiok-hok lah, khah-kín kā goá chiok-hok lah!
34 以撒：Lí kóng án-ni iā sı̄ í-keng bô boat-tō͘. A-pa í-keng bô ū hit ê lêng-le̍k lah. Lí ê sió-tı̄ Ngá-kok í-keng tùi lí chhiúⁿ-toa̍t hit ê chiok-hok khı̀ lah! Taⁿ goá lóng bô hoat-tō͘ lah.
35 以掃：Boē-sái-tit lah! Boē-sái-tit lah! Lí iā tio̍h kā goá chiok-hok lah. Sió-khoá iā bô iàu-kín lah, lí soah lóng bô kā goá lâu chı̍t-sut-á tio̍h m̀?
36 以撒：Goá chiong lí ê it-chhè lóng hō͘ Ngá-kok lah, chiong lí it-chhè ê tông-pau hō͘ i chò lô͘-lē, chiong tē-chiūⁿ it-chhè ê gō͘-kak chheng-chiú lóng hō͘ i lah. Taⁿ goá lóng bô chhun sím-mı̍h lah! Í-sò͘ ah! Lí beh kiò goá kā lí chò sím-mı̍h.
37 以掃：Án-ni sı̄ koè-thâu chân-jím lah, goá bē thang hō͘ lí kóng án-ni lah. Goá sı̄ a-pa lí ê toā-kiáⁿ khah oē-tàng hō͘ lí kóng án-ni. Lí iā tio̍h kā goá chiok-hok, kā goá chiok-hok.
38 利百加：Í-sò͘, lí khah oē hiah thó͘, án-ni lí beh kā a-pa chhui sí tio̍h m̀? Ai-ioh! Lí khoàⁿ lín lāu-pē ê ba̍k-chiu soà it-tı̍t teh tńg lah. Ai-ioh! Soà chin-chiàⁿ sí khı̀ lah, ai-ioh Ì-sat-à! Ì-sat-à!
39 以掃：Chin-chiàⁿ kan-kúi chit ê Ngá-kok nā bô hō͘ sí phah-sǹg bē-sái-tit! Chū kàu-taⁿ lóng sı̄ beh kap goá chò tùi-te̍k. I ham goá tı̄ lāu-bó ê thai ê sı̂ chiū í-keng sı̄ chı̍t ê kan-chà ê lâng lah. Goá beh tāi-seng chhut-thai ê sı̂ i iā kap goá ko-ko-tı̂ⁿ, m̄ hō͘ goá tāi-seng chhut-lâi. Soà tùi goá ê kha kā goá khiú-teh, m̄ hō͘ goá chhut-lâi. Tú-á-chiah iā kiông-kiông kā goá bé toā-kiáⁿ ê koân khı̀, chit-tia̍p iā kā goá chhiúⁿ-toa̍t chiok-hok khı̀. Hó! Lí nā-sı̄ chiah-nı̍h kah hui-hoat, goá iā ū goá ê kak-ngō͘. Chà-ki, kan-kúi, goá kí thiⁿ chiù-choā, goá kin-á-jı̍t tek-khak beh hō͘ lí sí, beh hāi-sí lí ê sèⁿ-miā. (以掃呼叫退場)
40 利百加：Taⁿ hāi lah, khoàⁿ beh án-choáⁿ tio̍h hó, khah oē tú-tio̍h chiah-nı̍h kah hiau-hēng! Ah, Siōng-tè ah, kiù lâng leh oh! A-pek-liap-hán ê Siōng-tè, Í-sat ê Siōng-tè ah! Lí tio̍h kiù goá ê kiáⁿ Ngá-kok oh! Goá ê tiōng-hu soà sí-sí khı̀! Ò͘! Khoàⁿ goá beh án-choáⁿ tio̍h hó! Goá só͘ thiàⁿ ê kiáⁿ ah! Goá só͘ thiàⁿ ê kiáⁿ ah. Ngá-kok! Ngá-kok! Kín-lâi leh lah.
(呼叫。雅各出場)
41 雅各：Ài-ioh! A-pa sı̄ án-choáⁿ! Tàu-té sı̄ sím-mı̍h tāi-chı̀ leh.
42 利百加：Thiaⁿ a-bó ê oē khah-kín leh, khah-kín leh.
43 雅各：A-bó, sı̄ án-choáⁿ leh, lí khah ē chheⁿ-kâu kàu án-ne neh. Un5-ûn-á kóng lah.
44 利百加：Khah-kín leh, khah-kín leh, toā tāi-chı̀ lah, toā tāi-chı̀ lah.
45 雅各：A-bó sı̄ sím-mı̍h toā tāi-chı̀ leh, ài-ioh, ài-ioh! Soà hūn-hūn khı̀! Taⁿ che ū iáⁿ toā tāi-chı̀ to-tio̍h. Goá tio̍h kín-kín lâi khı̀ the̍h khoàⁿ ū chúi-bô.
46 利百加：M̄-bián lah, taⁿ bô iàu-kín lah. Lí tio̍h khah-kín khı̀ chún-pı̄ thang cháu lah. Nā bô khah-kín leh lí chiū bô sèⁿ-miā lah.
47 雅各：Tàu-té sı̄ sím-mı̍h tāi-chı̀ leh. A-pa sí-sí tı̄ chia lí beh kiò goá cháu khı̀ tó-ūi.
48 利百加：Cháu khı̀ Hap-lân lah. Khah-kín khı̀ leh. Tı̄ hia ū lí ê a-kū Lah-pan toà tı̄ hit só͘-chāi, lí tio̍h khah-kín khı̀ chhoē i. Nā bô, lí ê a-hiaⁿ teh beh lâi hāi-sí lí ê sèⁿ-miā. In-ūi lí tùi i chhiúⁿ-toa̍t chiok -hūn. Hiān-chāi chin-chiàⁿ hūn-khài. Só͘-í tio̍h khah-kín cháu, hó-sim leh khah-kín khı̀ lah.
49 雅各：Taⁿ ū iáⁿ sı̄ hùi-khı̀ ê tāi-chı̀ lah. Ah! Khoàⁿ goá beh án-choáⁿ. Goá tek-khak ē hō͘ i thâi-sí.
50 利百加：M̄-bián kiaⁿ lí koai-koai thiaⁿ goá ê oē, goá só͘ thiàⁿ ê kiáⁿ lí koáⁿ-kín the̍h lí ê pau-ho̍k cháu-khı̀ Hap-lân chhoē lí ê a-kū Lah-pan. Chiām-sı̂ bih tiàm hia tán-hāu lí ê a-hiaⁿ ê khı̀ khah siau leh, lí tah koh tńg-lâi. Lō͘-tiong iā tio̍h khah chù-ı̀ leh. Án-ni lí chai-iáⁿ hohN.
51 雅各：Chai lah! Chai lah! A-bó, lí ê sin-thé tio̍h khah chiàu-kò͘ leh. Goá put-sı̂ kı̂-tó Iâ-ho-hoa hō͘ lí tn̂g-tn̂g oa̍h-teh. Phah-sǹg lán bô ū ki-hoē thang koh saⁿ-kı̀ⁿ. Chóng-sı̄ lí iā m̄-bián hoân-ló. Taⁿ A-bó beh lâi-khı̀ lah. Chài-hoē, Chài-hoē.
合唱二七七首
52 利百加：Taⁿ hó, taⁿ hó. Nā bô khah-kín leh, sı̂ nā tı̂ chiū hāi. A-bó ū kā lí chún-pı̄ koá sı̍t-niû thang hō͘ lí toà-khı̀, lí lō͘-tiong tio̍h khah chù-ı̀ leh hahN. Chài-hoē, goá só͘ thiàⁿ ê kiáⁿ.
53 雅各：Chài-hoē A-bó, lí tio̍h ióng-kiāⁿ hahN, Chài-hoē, Chài-hoē.
54 利百加：Chài-hoē, goá só͘ thiàⁿ ê kiáⁿ lí taⁿ khı̀ lah tio̍h m̀. Lí lı̄-khui lí ê a-bó, chı̍t-ê khı̀ lah tio̍h m̀. (háu)
第二幕 第一場 曠野
1 雅各：Kín-ná-jı̍t cháu chı̍t-jı̍t ê lō͘ cháu kàu chin ià-siān, taⁿ phah-sǹg kàu chia an-ún lah. Sı̍t-chāi ū kàu-gia̍h lō͘-khı̀, bô-tāi bô-chı̀ iā lâi tú-tio̍h chit ê sū.
Taⁿ jı̍t-thâu í-keng lo̍h sai-soaⁿ lah, o͘-àm mê chiām-chiām kàu, goá ē-hng m̄-chai beh tiàm tó-ūi kè-mê. Só͘ khoàⁿ sı̀-ûi sı̄ chheⁿ-chhı̀n ê soaⁿ-tē, chio̍h-thâu moá-lō͘, bû-jı̂n choa̍t-iáⁿ, chhiⁿ-chhám ê kéng-kài. Goá ē-hng taⁿ tio̍h ko͘-toaⁿ tı̄ chit ê khòng-iá lâi kè-mê. Tú-hó chia ū chı̍t-tè chio̍h-thâu, chin hó-sè, goá tio̍h ēng chit tè chio̍h lâi chò chím-thâu tiàm chia lâi hioh-khùn.
Lí khoàⁿ chheⁿ-sı̂n moá-thiⁿ chhin-chhiūⁿ thiⁿ-sài kûn-chı̍p. Taⁿ goá beh kūi-lo̍h tı̄ Iâ-ho-hoa ê kha-ūi ê ē-bı̄n, goá beh khui-siaⁿ o-ló. Iâ-ho-hoa, kiû Lí sià-bián goá it-chhè ê choē-koà. Goá ū khi-phiàn goá ê lāu-pē, goá ū chhiúⁿ-toa̍t goá ê toā-hiaⁿ ê hok-hūn, kiû Lí sià-bián goá, in-ūi goá chai goá su-iàu Lí ê tông-chāi, su-iàu lí ê hû-chhı̂, nā bô Lí tı̄ goá ê sin-chiūⁿ goá it-seng sı̄ lo̍k-khong, soe-pāi.
Iâ-ho-hoa ah, kiû Lí bô pàng-sak goá, kiû lí tı̄ goá sin-chiūⁿ lâi chiàu-kò͘ pang-chān goá, hō͘ goá ê kha oē-thang khiā-chāi tı̄ lóng-chóng ê tùi-te̍k ê bı̄n-chêng, lóng-chóng ê chai-hāi ê téng-bı̄n. A-men.
(雅各入睡, khai-sí chàu-ga̍k, JVO. R. SWENEG ê “Nearer My God to Thee”. Ū saⁿ ê thiⁿ-sài chhut-hiān tı̄ 舞台, jiân-āu chiàu koa ê tiāu thiàu-bú. 二部唱 ê sı̂ 2 ê thiⁿ-sài thiàu, 1 ê thiⁿ-sài thêng, 1 pō͘ chhiùⁿ ê sı̂ 2 ê thiⁿ-sài thêng, 1 ê thiⁿ-sài thiàu, 4 pō͘ chhiùⁿ ê sı̂ 3 ê thiⁿ-sài lóng thiàu.)
Oân
Sio-hûi Sai-hū
A.Jı̂n-bu̍t: Sio-hûi sai-hū, Tê-au, Oe-á, hâm-ô͘, Pûi-kng.
B.Chú-tê: Lô-má 9：20-21,
Í-sài-a 29：16
Iâ-lı̄-bí 18：1-6
C. Pi-liok: Chiàu tê-au, oe-á, sio-hûi sai-hū, thâm-ô͘, pûi-kng ê sūn-sū pâi-lia̍t khû tı̄ tâi-téng. Pı̄-chō ê sı̀-lâng ū koà in ê tô͘-oē tı̄ heng-chêng. Jiân-āu chiàu hoat-giân ê sūn-sū khiā khí-lâi.
Sio-hûi-lâng: Goá sı̄ sio-hûi ê sai-hū, goá ta̍k-jı̍t tı̄ goá ê tiàm-lāi ēng nı̂-thô͘ lâi chò kok-chióng ê khı̀-khū. Ū hoe-kan, ū oáⁿ, ū tê-au, ū phiat-á. Goá chò chia ê lóng sı̄ ài in chiàu in ê pún-hūn khı̀ lı̄-ek lâng.
Kı̂-tiong iā ū khah chho͘-sio̍k hā-chiān, iā ū khah ko-sióng chun-kùi, khiok lóng sı̄ chin-ū lō͘-ēng, chin ū su-iàu, bô chı̍t-hāng te̍k-pia̍t khoàⁿ-khin á-sı̄ te̍k-pia̍t khoàⁿ-tāng, ta̍k-hāng lóng tio̍h chı̄n in ê pún-hūn lâi êng-kng in ê chú-lâng. (thoè-tiûⁿ)
Tê-au: Ah, chin-chhám, chin-chhám! Goá ê chú-lâng bô-tāi bô-chı̀ kā goá chō-chiâⁿ chı̍t-tè tê-au, hō͘ goá chin put-hēng, mê-jı̍t oàn-sim chheh-miā. In-ūi goá tı̄ siū-chō ê tiong-kan sı̄ chı̍t ê choè m̄-chiâⁿ mı̍h ê..., oé-oé koh pûi-pûi, chin pháiⁿ-khoàⁿ-siùⁿ. Sı̄m-chı̀ lâng-kheh nā lâi, lóng lu goá chò thâu-chêng, hō͘ goá chò lâng ê kó͘-tóng, m̄-tiāⁿ kan-taⁿ án-ni koh siông-siông ēng kún chhiâng-chhiâng ê kún-chúi kā goá thı̂n lo̍h-khı̀, hō͘ goá sio kàu poàⁿ sió-sí. Ah, goá chin pháiⁿ-miā! Goá jím-siū lóng boē-tiâu lah!
Oe-á: Tê-au hiaⁿ--ah, lí ê pháiⁿ-miā, bô goá ê pháiⁿ-miā. Chú-lâng chng-thāⁿ lí súi-súi, khǹg lí tı̄ toh-téng, lí iáu teh hoah-chhám, lí lóng m̄-chai goá ê chhám-kéng. Chú-lâng chō-chiâⁿ goá chit ê oe-á, kā goá bē kàu khit-chia̍h-ḿ ê chàu-kha. I ta̍k-jı̍t ēng chhâ-chháu kā goá hun, kā goá sio, hō͘ goá m̄-chiâⁿ iūⁿ-siùⁿ, m̄-chiâⁿ biān-bo̍k, o͘-mà-mà kàu beh chhut-chiap, bô lâng káⁿ ēng chhiú bong goá.
Ah, goá sı̍t-chāi, pháiⁿ-khoàⁿ kàu bô bı̄n thang kı̀ⁿ lâng, m̄-tiāⁿ kan-taⁿ án-ni, goá ta̍k-jı̍t tio̍h hō͘ hoé sio kàu tòng boē tiâu. Ah, goá tı̄ siū-chō ê tiong-kan sı̄ chı̍t ê choè put-hēng ê..., bô pa̍t-lâng oē pí goá khah-chhám.
Thâm-ô͘: Oe-á hiaⁿ ah, lí m̄-thang án-ni kóng! Lí ê chhám lóng boē pí goá ê chhám. Chú-lâng kā goá chō-chiâⁿ chit ê thâm-ô͘, soà bē goá kàu chı̍t ê hı̀-lô pı̄ⁿ-ı̄ⁿ khı̀, hē goá tı̄ pı̄ⁿ-pâng ê tiong-ng hō͘ lâng phùi-thâm phùi-noā, goá ta̍k-jı̍t tio̍h chia̍h kui-tō͘ ê là-sap, kui-tō͘ ê hāi-khún. Ah, goá sı̍t-chāi chhiⁿ-chhám kàu-ke̍k lah. Goá chin oàn-hūn goá ê miā-ūn, siū-chō ê tiong-kan goá sı̄ tē-it put-hēng ê.
Pûi-kng: Thâm-ô͘ hiaⁿ ah, bān-sı̄ leh! Lí ê put-hēng iā m̄ ta̍t-tio̍h goá ê put-hēng ê bān-hūn ê chı̍t-hūn. Goá sı̄ chı̍t ê ke̍k siū iàm-chiān ê pûi-kng, chhòng-chō tiong goá sı̄ tē-it hā-chiān ê. Goá ê chhiⁿ-chhám bô té kóng.
Goá ê chú-lâng kā goá bē hō͘ chò-sit ê lâng, chò-sit ê lâng kā goá thoa-kàu chhân-hn̂g ê piⁿ-kak, koh khui-khang chiong goá oa̍h-oa̍h tâi, chí-ū chhun chı̍t ê chhùi nā-tiāⁿ. Goá ê siū-khó͘ m̄-tiāⁿ án-ne tio̍h oē chún-koè, chò-sit lâng ta̍k-jı̍t khı̀ chhé-tı̂, khioh-chı̍p toā-pûi sió-pûi lâi tùi goá ê chhùi-khang piàⁿ lo̍h kàu moá-moá, hit ê khı̀-bı̄ lóng boē hiáu thang kóng khí. Goá lóng kek kàu tù boē tiâu lah! Oh, goá ê chhám sı̄ kóng boē chı̄n.
Sio-hûi lâng:(chhut tiûⁿ) Lín tāi-ke tı̄ chia teh gı̄-lūn sím-mı̍h, teh oàn-chheh sím-mı̍h! Lín m̄-thang khoàⁿ pa̍t-lâng lâi iàm-chiān ka-kı̄. Goá chhòng-chō lín ū hō͘ lín chı̍t ê sú-bēng, sı̄ ta̍k ê chiàu in ê pún-hūn lâi lı̄-ek lâng êng-kng in ê chú-lâng , m̄-sı̄ hō͘ lín hō͘-siōng saⁿ oàn- chheh tı̀-kàu choa̍t bāng. Lín khoàⁿ, lín ta̍k-lâng ê kong-chok án-choáⁿ toā lı̄-ek lâng, hō͘ lâng tit-tio̍h hēng-hok. Só͘-í lín tio̍h ūi-tio̍h lín ê chit-hūn lâi hoaⁿ-hí khoài-lo̍k, hō͘ lín ê chú-lâng iā tit-tio̍h êng-kng. Lín siū chhòng-chō ê..., put-kò tio̍h hâng-ho̍k lín ê chú-lâng ê chí-ı̀. Án-ne lín bêng-pe̍k bô?
Tê-au, Oe-á, Thâm-ô͘, Pûi-kng: Goán bêng-pe̍k lah!
Sio-hûi lâng: (Àm-liām Lô-má 9：20-21. Í-sài-a 29：16. Iâ-lı̄-bí 18：1-6)
Gı̂m-si, Thàn Lí chí-ı̀, Chú, thàn Lí chí-ı̀, Lí sı̄ hûi sai-hū, goá sı̄ nı̂-thô͘.
(Poê-lêng Si-koa tē 1 chı̍p Tē 9 siú)
