Chhi-tiong Hoe
棘中花 三幕
人物：老婆、清香(小女)、秀蘭、金鳳、結祥、清雲、警官a、警官b。
第一幕
出場人物：老婆、清香、秀蘭、金鳳、結祥
場 面：一個鄉村的家庭裡面
開 幕：老婆在打掃室內，清香在擦桌子
1.老婆：Lín jı̄-só chiah oàⁿ iáu boē oē-thang tńg-lâi chia̍h moê, sı̍t-chāi hō͘ i chin lô-khó͘.
2.清香：Goán jı̄-hiaⁿ tō hō͘ Jı̍t-kun tiàu khı̀ chò peng, soà lóng bô tńg-lâi, tı̀-kàu hō͘ i tio̍h án-ne siū-khó͘.
3.老婆: Nā bô i chı̍t-lâng lán káⁿ tio̍h iau-sí. Lín toā-hiaⁿ kap toā-só lóng toà tı̄ Tâi-pak chhia-hoa ê só͘-chāi, só͘ thàn ê chı̂ⁿ ka-kı̄ tō ēng bô kàu.
4.清香：A-bú, toā-hiaⁿ kap toā-só ū thiaⁿ kóng beh tńg-lâi chhù-nı̍h, phah-sǹg tı̄ hia bô-thang hó ê khoán.
5.老婆：Káⁿ-sı̄ án-ne, nā bô, in tek-khak bô tńg-lâi. Chim-má ê siàu-liân lâng lóng sı̄ án-ne........(沈默) Goá nā siūⁿ-tio̍h lín jı̄-hiaⁿ sim-lāi chiū chin kan-khó͘.
6.清香：A-bú, lí m̄-thang koh siūⁿ chit ê sū, í-keng hiah kú bô tńg-lâi, lán tio̍h àn-sǹg sí lâi khoàⁿ-phoà.
7.老婆：Sı̍t-chāi sı̄ chı̍t ê khó-chhú ê chheng-liân.(chhit ba̍k-sái)Goá sı̄ bô iàu-kín, lín jı̄-só khah khó-lı̂n.
(秀蘭出場)
8.秀蘭：A-bú, goá tńg-lâi lah, hō͘ lín tán chin kú chin sit-lé, taⁿ goá kín-kín lâi khı̀ phâng moê chhut-lâi chia̍h.
9.老婆：Siù-lân, hō͘ lí ta̍k-jı̍t án-ne lô-khó͘ goá sı̍t-chāi chin boē koè-sim.
10.秀蘭：A-bú, lí m̄-thang kóng hit-khoán kheh-khı̀ oē, Siōng-tè hō͘ goá chiah-nı̍h ióng-kiāⁿ, só͘-í chò kang sı̄ eng-kai ê sū.
11.清香：A-só, Sèng-tàn-cheh beh kàu lah, thiaⁿ kóng kàu-hoē ū beh ián ke̍k neh!
12.秀蘭：Án-ne! Jı̍t-chí teh koè sı̍t-chāi chin kín. Lín jı̄-hiaⁿ tú-tú 9 nı̂ chêng ê Sèng-tàn-cheh lı̄-khui lán ê ka-têng.
13.老婆：Siù-lân, goá siūⁿ kin-nı̂ nā bô tńg-lâi lí chiū thang phah-sǹg ka-kı̄ ê lō͘, chiah boē gō͘-tio̍h lí ê it-seng.
14.秀蘭：Goá siong-sı̀n Siōng-tè oē thiaⁿ goá ê kı̂-tó pó-siú清雲 tńg-lâi, goá bô lı̄-khui chit ê ka-têng.
15.清香：Jı̄-só, goá iā siong-sı̀n Siōng-tè oē thiaⁿ lí ê kı̂-tó.
16.老婆：Chiàu thàm-thiaⁿ ê chêng-hêng sı̄ sí khah toā-bı̄n, án-ne gōng-gōng teh tán sı̄ bô lı̄-ek.
17.秀蘭：Lán m̄-bián koh siūⁿ hiah ê sū, 清香lán chún-pı̄ thang lâi chia̍h moê.(退場)
(結祥、金鳳盛裝出場, chhiú ū hêng-lí)
18.結祥：A-bú goán tńg-lâi lah.
19.老婆：Kiat-siông, Kim-hōng lín chiah chá tō kàu-ūi!? Káⁿ iáu-boē chia̍h chá-tǹg, soà lâi chia̍h.
20.金鳳：Cha-àm tùi Tâi-pak chē夜行的快車chē chı̍t mê chin ià-siān, koáⁿ-kín chia̍h koá moê thang lâi khı̀ khùn.
(秀蘭，清香phâng-moê出場)
21.清香：A-hiaⁿ, a-só lín thái oē hut-jiân-kan tńg-lâi?
22.秀蘭:A-hiaⁿ, a-só lín tńg-lâi lah tio̍h bô! Chiah ê hêng-lí goá koāⁿ jı̍p lâi khı̀.
23.金鳳：M̄-bián, goá ê mı̍h-kiāⁿ lín lóng m̄-thang kā goá bong tio̍h. Chhiáⁿ lí phâng chúi lâi hō͘ goán sé bı̄n.
24.秀蘭：Án-ne goá lâi khı̀ phâng.(退場)
25.金鳳：Chit-khoán chháu-tē só͘-chāi, ta̍k-hāng khoàⁿ liáu chin boē koàn-sı̀. Chhin-chhiūⁿ chit-khoán phoà-chhù beh kiò goá án-choáⁿ toà.
26.結祥：Chhiáⁿ lí tio̍h jím-nāi, che sı̄ chiām-sı̂ kú nā-tiāⁿ, nā ū ki-hoē lán chiū oē koh chhut-khı̀都會.
27.金鳳：Taⁿ lín 2 lâng m̄-thang tiām-tiām hia khiā,tio̍h kín-kín khı̀ phâng moê chhut-lâi hō͘ goán chia̍h; lóng sı̄ chháu-tē sông, m̄-chai poàⁿ-hāng.
28.老婆：清香,lí khı̀ phâng-moê, goá lâi pâi-oáⁿ.
29. 金鳳：Chit-khoán chháu-tē, koh chit-khoán ka-têng, chit-khoán jı̂n-bu̍t, khoàⁿ goá beh án-choáⁿ jím-siū oē tiâu.
(秀蘭出場)
30.秀蘭：A-só, chhiáⁿ lí sé bı̄n.
31.金鳳：Lí the̍h chit tiâu o͘-o͘ chhàu-chhàu ê bı̄n-kin beh kiò goá án-choáⁿ sè?
32.秀蘭：A-só, lán chhù-nı̍h chí-ū chı̍t-tiâu nā-tiāⁿ.
(清香phâng moê chhut-lâi pâi tı̄桌上)
33.清香：A-hiaⁿ a-só chhiáⁿ lâi chia̍h moê.
(Ta̍k lâng chē toh, Kim-hōng khai-sí beh chia̍h)
34.秀蘭：A-só, khah sit-lé, goán beh chia̍h-pn̄g ê sı̂ tio̍h ài kı̂-tó, kám-siā Siōng-tè, só͘-í chit-tia̍p lán seng lâi kı̂-tó.
Thiⁿ-pē Siōng-tè goán kám-siā Lí, chiàu-kò͘ goán chı̍t-ke pêng-an, koh siúⁿ-sù goán kim chá-khí ê chia̍h-mı̍h, chin to-siā, khò Chú ê miâ. A-men.
Án-ne hó, a-hiaⁿ a-só chhiáⁿ lín ēng.
35.金鳳：Siù-lân, lí sı̄ àn-sǹg beh hō͘ chit ê ka-têng lóng chiâⁿ-chò jı̍p-kàu ê tio̍h bô? A-bú , lí thái oē iông-ún Siù-lân án-ne chò?! Lán ê chong-cho̍k á-sı̄ pêng-iú lóng bô lâng teh sı̀n, che sı̄ thang kiàn-siàu ê sū.
36.結祥：Siù-lân, lí sı̍t-chāi bô eng-kai chhoā goán kap lí kiâⁿ siāng-khoán ê lō͘, in-ūi jı̍p-kàu ê lâng chhin-chhiūⁿ chı̍t-chióng ê chai-hō, tı̀-kàu清雲chiah tio̍h chòng-sin tı̄ hái-té.
37.老婆：Kiat-siông, lí ū thiaⁿ-tio̍h sím-mı̍h siau-sit tio̍h bô?!
38.結祥：Sı̄ lah, goá ū tú-tio̍h清雲ê chı̍t-ūi pêng-iú teh kóng i bêng-bêng ū khoàⁿ-tio̍h清雲só͘ chē ê chûn tı̂m lo̍h-khı̀.
39.老婆：Ah,清雲goá ê kiáⁿ, lí taⁿ bô ǹg-bāng thang tńg-lâi saⁿ-kı̀ⁿ lah (háu, 秀蘭也起身退場beh khı̀ háu)
40.金鳳：A-bú lâi lè!(khan老婆到台前)Lí tio̍h m̄-thang hō͘ hit-khoán thiaⁿ tō-lí ê lâng teh kā lí chú-ı̀, thiaⁿ tō-lí sı̄ lâng-lâng só͘ iàm-ò͘ⁿ ê sū, koh lí nā sí liáu oē khı̀ hō͘ i kā lí ó͘ ba̍k-chiu khí-lâi. Lí nā bô chhoā tio̍h hit-khoán thiaⁿ tō-lí ê lâng 清雲mā boē sí. Taⁿ kó-jiân kiáⁿ sí lah, hit-khoán jı̍p-kàu lâng tio̍h m̄-thang koh hō͘ i tiàm chhù,tio̍h kā koáⁿ chhut-khı̀, nā bô, tek-khak oē hāi-tio̍h lán ê ka-têng.
41.老婆：Goân-lâi sı̄ án-ne, goá lóng m̄ chai-iáⁿ, goá siūⁿ kóng Siù-lân tio̍h hiah-nı̍h kut-la̍t gâu pang-chān ka-têng, só͘-í ta̍k-hāng lóng sûi-chāi i.
42.金鳳：Hit khoán lâng chiah lı̄-hāi, taⁿ tio̍h kín-kín kā koáⁿ chhut-khı̀, lán iā bô eng-kai koh lâu i tı̄ chhù lāi.
43.老婆：Chóng-sı̄ Siù-lân nā chhut-khı̀ goá kap清香beh án-choáⁿ seng-oa̍h?
44.金鳳：A-bú, goán kiám oē hō͘ lí iau sí mah? Lí m̄-bián kiaⁿ bô thang chia̍h lah, lí nā kā i koáⁿ chhut-khı̀, lí m̄-bián kiaⁿ bô chı̂ⁿ lah, taⁿ chiah ê chı̂ⁿ hō͘ lí.
─幕─
第二幕
出場人物：秀蘭、清香、老婆、金鳳
場 面：和第一幕同樣
開 幕：秀蘭teh chheng-sàu sek-lāi, sàu-kàu 清雲ê像片ê só͘-chāi, chiū khiā tiāⁿ tı̄ hia teh khoàⁿ,悲傷hut-jiân chhèng-chhut tı̄ i ê sim.
1.秀蘭:Chheng-hûn, lí tàu-té sı̄ sí á-sı̄ oa̍h lah! Lí pàng goá chı̍t-lâng beh kiò goá án-choáⁿ tio̍h hó lah. (hàu) Siōng-tè ah, Lí tio̍h thoè goá khui lō͘, goá nā-sı̄ tio̍h lı̄-khui chit ê ka-têng, goá iā hoaⁿ-hí lâi lı̄-khui, goá í-keng bô hoat-tō͘ thang jím-siū chit ê ka-têng ê kan-khó͘.(清香出場)
2.清香：Jı̄-só, lí sı̄ án-choáⁿ?
3.秀蘭：Bô lah......., hut-jiân khoàⁿ-tio̍h Chheng-hûn ê siōng.....(koh háu).
4.清香：Jı̄-só, goá chai-iáⁿ lí ê kan-khó͘, te̍k-pia̍t sı̄ tùi toā-só tńg-lâi chhù liáu-āu lí ta̍k-jı̍t lóng tio̍h ba̍k-sái chún pn̄g thun......, chóng-sı̄ A-só, lí tio̍h koh jím-siū chı̍t-sı̂-á-kú, Siōng-tè tek-khak bô pàng-sak lí, lí m̄-thang lı̄-khui goán khı̀.
5.秀蘭：Lín jı̄-hiaⁿ sı̄ í-keng bô miā thang koh tńg-lâi ê lâng, goá tiàm chia lâi tán-hāu mā bô bo̍k-te̍k, hoán-tńg sı̄ chò chit ê ka-têng ê that-gāi................(háu)
Nā m̄-sı̄ ūi-tio̍h sió-sió nı̂-kí ê lí kap nı̂-lāu loán-jio̍k ê A-bú, goá í-keng bô koh tiàm-tı̄ chit ê ka-têng. Chóng-sı̄ goá nā siūⁿ-tio̍h A-bú choè-kı̄n ê thāi-tō͘ goá ê sim chhin-chhiūⁿ beh piak-lı̍h ê kan-khó͘.
6.清香：Jı̄-só, chhiáⁿ lí m̄-thang khioh-oàn A-bú, in-ūi lóng sı̄ hō͘ toā-só bé-siu khı̀ lah!(老婆出場)
7.老婆：清香lí sı̄ tı̄ hia teh kóng sím-mı̍h?! Kā lí kóng kúi cha̍p-pái lí iā boē-hiáu thiaⁿ, chhàu lâng, bô chı̀ bô khı̀, jı̍p-khı̀ lāi-bı̄n!!
(Kā i khiú-lâi piⁿ-thâu)
Kā lí kóng hit hō thiaⁿ tō-lí ê cha-bó͘ lâng sı̄ pháiⁿ-mı̍h m̄-thang oá-khı̀, lí lóng bô teh thiaⁿ! Hit-khoán pháiⁿ-mı̍h chhut-sı̀ tio̍h toà to chhiuⁿ,jı̍p mn̂g chiū hāi-sí ang-sài, jiân-āu chiū beh kā lán phoà liáu-liáu lah.
(二人退場)
8.秀蘭：Chú ah, goá ū sím-mı̍h khùi-la̍t thang tam-tng chiah toā ê chek-jı̄m!
Siōng-tè ah, Lí tio̍h thoè goá khui-lō͘, chí-sı̄ goá eng-kai kiâⁿ ê lō͘(金鳳出場，秀蘭kín-kín kè-sio̍k phoah chúi, 金鳳khoàⁿ i chin thó-iàm, i tı̍t-tı̍t teh chiò kiàⁿ so-bı̄n, kiâⁿ lâi 中央soà hō͘ chúi chhū tó.)
9.金鳳：Ai-io, lí chit ê jı̍p-kàu cha-bó͘, goá kap lí ū sím-mı̍h oan-siû, lí ēng chit-khoán kè-bô͘ beh hāi sí goá! Oh, goá chit-niá pó-poè ê Hiong-káng saⁿ lóng là-sap khı̀, khoàⁿ lí beh kap goá án-choáⁿ sǹg-siàu lah!
10.秀蘭：A-só, chhiáⁿ lí sià-bián goá, (chin tio̍h-kip,ēng toh-pò͘ beh kā chhit saⁿ, 金鳳chiong i oe tó)
11.金鳳：Lí àn-sǹg beh kā goá pı̀ⁿ hō͘ pháiⁿ tio̍h bô?! Ēng hit ê là-sap pò͘ teh chhit sím-mı̍h! Beh hō͘ lí poê lah(金鳳khı̀ thoa 老婆chhut-lâi)A-bú khoàⁿ lí beh án-choáⁿ siat-hoat, chit-niá saⁿ kā goá hāi kàu là-sap khı̀ lah, chit-niá sı̄ ū chı̂ⁿ bô tàng boé ê saⁿ, khoàⁿ i beh kap goá án-choáⁿ sǹg lah!
12.老婆:Ai-ià, lí chit ê chin-chiàⁿ sı̄ hāi-thâng, lóng sı̄ hō͘ lí hāi kàu chhiⁿ-chhám kàu ke̍k, goá tō kā lí kóng hiān-chāi goán bô khiàm-ēng lí, lí tio̍h chhut-chhut-khı̀, khah koáⁿ lí iā sı̄ beh toà chia. Lí chit-khoán pháiⁿ-mı̍h kín cháu, goán sı̄ kín chhut-thâu-thiⁿ, lí chit-tia̍p tio̍h chhut-khı̀, m̄-thang koh kap goán kô-kô tı̂ⁿ. Kim-hōng, lí chiong i ê pau-hok-á kā khoán chhut-lâi.
13.秀蘭：A-bú, lí tio̍h toà-liām lí ê kiáⁿ Chheng-hûn,iông-ún goá koh tán-hāu chı̍t-sı̂-á-kú.
14.老婆:M̄-bián kóng, Chheng-hûn chiū-sı̄ hō͘ lí hāi-sí ê lah, m̄-bián koh tán-hāu lah.
(金鳳chiong pau-hok-á the̍h hō͘老婆,老婆chiū hiat hō͘秀蘭 )Taⁿ lí kín-kín chhut-khı̀, hō͘ goán khah ū pêng-an.(幕後奏)
15.秀蘭：A-bú, lí nā-sı̄ ài goá chhut-khı̀ goá iā m̄-káⁿ hoán-tùi lí.(háu) A-bú, kú-kú tit-tio̍h lí ê chiàu-kò͘ chin to-siā, nā sı̄ goá chò bô kàu ê só͘-chāi lí tio̍h sià-bián goá, goá iā siông-siông beh kiû Siōng-tè hō͘ lí ū ióng-kiāⁿ pêng-an.
16.老婆:M̄-bián lí ló͘-la̍t, beh chhut-khı̀ tio̍h kín chhut-khı̀.(秀蘭kiâⁿ kàu門外，清香出場)
17.清香: Jı̄-só, jı̄-só, lí m̄-thang khı̀ lah, m̄-thang pàng-sak goán lah!( 清香khı̀ kā i lám-tiâu)
18.秀蘭:Oh,清香! Beh lı̄-khui chit ê ka-têng goá ê sim sı̄ chin kan-khó͘ kàu ke̍k, chóng-sı̄ goá bô lı̄-khui iā-sı̄ boē ēng-tit. Chhiáⁿ lí tio̍h koai-koai gâu thiaⁿ a-bú, toā-só ê oē, iā tio̍h siông-siông thoè goá kap lí ê jı̄-hiaⁿ kı̂-tó, nā ū Siōng-tè ê lı̂n-bín lán chiū oē-thang koh chò-hoé lah.
19.清香:Jı̄-só, lí m̄-thang khı̀ lah, m̄-thang khı̀ lah.
20.老婆:清香, lí teh kóng sím-mı̍h? Lí chit ê cha-bó͘ gín-ná chin hoan-thái, kín jı̍p-lâi, kín jı̍p-lâi.(老婆chiong清香kiông-kiông thoa khui, 秀蘭chiah退場，清香toā háu)
--幕--
第三幕
出場人物：老婆、清香、金鳳、結祥、警官a、警官b、清雲、秀蘭
場 面：和第一、二幕一樣
開 幕：老婆teh sé-saⁿ, ná sé ná tûi keng-thâu
1.老婆:清香m̄ chai án-choáⁿ iáu boē tńg-lâi. Khó-lı̂n ê kiáⁿ ta̍k-jı̍t lóng tio̍h chhut-khı̀ kā lâng sé-saⁿ thàn chı̂ⁿ. Ah, goán bú-kiáⁿ ná lâi ná pháiⁿ-miā. (Chhit ba̍k-sái soà tûi keng-thâu. 清香出場)
2.清香:A-bú, lí thái teh sé saⁿ lah, lí lóng bô siūⁿ lí ê sin-thé hiah-nı̍h loán-jio̍k, khǹg teh goá chiah sé chiū hó lah.
3.老婆:A-bú nā siūⁿ-tio̍h lí ê lô-khó͘ goá beh án-choáⁿ bô chhut-la̍t lah.
4.清香:A-bú, boē-ēng-tit án-ne chò, siat-sú nā ū sím-mı̍h put-hēng ê sū, lí beh pàng goá chı̍t-lâng,goá beh án-choáⁿ!?(老婆站起來,tûi keng-thâu)
5.老婆: Lí án-ne kóng, chóng-sı̄ bô chò tio̍h boē ēng-tit, chêng lín jı̄-só tı̄ chhù-nı̍h i lóng oē thoè lán chò, taⁿ i chhut-khı̀ lán bô chò sı̄ boē ēng-tit. Ah, lán bú-kiáⁿ ê miā-ūn ná chhám lah!(háu)
(金鳳出場)
6.金鳳:Lín bú-kiáⁿ tı̄ hia teh chhòng sím-mı̍h? Iáu boē oàⁿ tio̍h bô? Tāi-chı̀ bô chiàu khí-kang chò, beh án-choáⁿ chiàu khí-kang chia̍h-pn̄g leh! Ló-ló chhó-chhó, sé chit-khoán saⁿ beh án-choáⁿ chhēng!(chiong sé hó ê saⁿ koh hiat tı̄ sé-phûn lāi,退場，幕後奏)
7.老婆: Goá chit ê lāu-miā bô hō͘ i hāi-sí sı̄ boē ēng-tit. Oh, Siōng-tè ah. Lí tio̍h ū lêng ū siàⁿ thang kiù goán bú-kiáⁿ thoat-lı̄ chit ê khùn-khó͘ ê ka-têng.
8.清香:A-bú, lí m̄-bián án-ne kek-sim, bô iàu-kín,goá chiah sé lah, Thiⁿ-pē thiàⁿ gōng lâng, i hāi lán boē sí lah.
9.老婆: Goá nā siūⁿ-tio̍h lí ê jı̄-só, goá ê sim chiū chin kan-khó͘, goá sı̍t-chāi chin gû-gōng, goá ê choē chin tāng, kin-á-jı̍t chiah oē án-ne siū-khó͘.
10.清香:A-bú, goá chá-khí tı̄ pài-tn̂g ū gū-tio̍h jı̄-só neh! I kóng tı̄ sı̀n-tô͘ ê chhù teh pang-chān. I ū teh mn̄g a-bú ê sū, iā ū 10 kho͘ gûn hō͘ goá.
11.老婆:Khó-lı̂n, pháiⁿ-miā ê sim-pū, sı̍t-chāi sı̄ chı̍t ê hán-tit-ū khó-chhú ê cha-bó͘ gín-ná, hō͘ mô͘-kúi hāi kàu tio̍h lâi saⁿ-lı̄.
12.清香:A-bú, toā-hiaⁿ í-keng chiâⁿ ge̍h-jı̍t bô tńg-lâi lah, m̄-chai sı̄ án-choáⁿ, choè-kı̄n ê thài-tō͘ chin kı̂-koài.
13.老婆:Hō͘ hit-khoán pháiⁿ bó͘ liân-lūi kàu bô hó tē-pō͘(結祥出場)Kiat-siông! Lí sı̄ khı̀ tó-ūi chiah-nı̍h kú lóng bô tńg-lâi sı̄ teh chò sím-mı̍h sū lah.
14.結祥:Goá teh kap lâng chò sū-gia̍p, chin bô êng,só͘-í chiah boē-thang tńg-lâi.(金鳳出場)
15.金鳳:Lí ū sím-mı̍h bı̄n thang koh tńg-lâi? Lí lóng m̄-bián tńg-lâi hó lah, goá ka-kı̄ ū hoat-tō͘ thang kap lí phah-sǹg lah. Ta-po͘-kiáⁿ bô thang chhı̄ chı̍t-ke, ū sím-mı̍h bı̄n teh chò lâng.
16.結祥:金鳳, lí m̄-bián siū-khı̀, goá choè-kı̄n kap pêng-iú teh chò chı̍t-kiāⁿ toā sū-gia̍p, bô kú chiū oē thàn toā chı̂ⁿ, lí tio̍h liōng-kái.
17.金鳳:Lí lóng sı̄ ēng hit-khoán oē beh lâi moâ-phiàn goá, goá taⁿ hō͘ lí boē phiàn-tit, kin-á-jı̍t khoàⁿ sı̄ beh sí lí á-sı̄ sí goá, nā bô lâi kái-koat boē ēng-tit. (Gia̍h thûi-á beh phah i).
18.結祥: 金鳳bān-sı̄ lè, bān-sı̄ lè! goá chı̂ⁿ hō͘ lí, chı̂ⁿ lah, chı̂ⁿ lah.
19.金鳳:(thêng-chhiú) The̍h lâi, goá nā bô pı̀ⁿ-bı̄n lí lóng m̄-kiaⁿ, án-ne hó, iáu ū bô(chhiau tē-á lāi)
20.結祥:Bô lah, bô lah(tùi tē-á lāi chhiau tio̍h chin chē chı̂ⁿ).
21.金鳳:Lí thái ū chiah-nı̍h chē ê chı̂ⁿ?! Sı̄ tùi tá-lo̍h lâi ê?
22.結祥:Che sı̄ goá chò sū-gia̍p thàn ê chı̂ⁿ lah, m̄-thang hō͘ lâng chai-iáⁿ.(警官a,b出場)
23.警官a:Ông Kiat-siông ū tı̄-teh bô?
24.結祥: Hāi lah, kéng-chhat lâi lah, khoàⁿ goá beh án-choáⁿ?
25.警官b: Lí taⁿ bô hoat-tō͘ thang tô-thoat, lâi, pa̍k khí-lâi.
26.老婆:Tāi-jı̂n ah, lín sı̄ pa̍k i án-choáⁿ, i sı̄ chò sím-mı̍h sū?
27.警官a:Ông Kiat-siông ká-mō͘ sı̄ chı̍t ê toā siong-jı̂n, tı̄ Tâi-pak ê só͘-chāi chà-khi hoâiⁿ lâng ê châi.
28.老婆:Kiat-siông ah, lí goân-lâi chiū-sı̄ teh chò chit-khoán toā sū-gia̍p ò͘.
29.警官b:A-pô, lí ê kiáⁿ bô ū chèng-gia̍p, ta̍k só͘-chāi khi-phiàn lâng ê chı̂ⁿ lâi iàn-lo̍k chhia-hoa hòng-tōng, só͘-í goá beh lia̍h i lâi khı̀ koaiⁿ-kaⁿ.
30.金鳳:Kiat-siông, chhin-chhiūⁿ lí chit-khoán ê lâng goá chin thó-iàm, goá beh kap lí lı̄-hun, í-āu lán sı̄ bô kan-sia̍p lah.
31.結祥:Kim-hōng, goá kin-á-jı̍t oē chò chit-khoán ê sū kiám m̄-sı̄ lóng ūi-tio̍h lí mah, lí bô lı̂n-bín goá, hoán-tńg tı̄ chit ê chai-lān ê sı̂ chiū beh kap goá lı̄-hun, án-ne sı̍t-chāi thài chân-jím lah.
32.金鳳:Chhin-chhiūⁿ lí chit-khoán bô lō͘-ēng ê ta-po͘ lâng, goá lóng bô ū sím-mı̍h thang liû-chêng, goá beh kap lí lı̄-hun.
33.結祥:Kim-hōng, nā m̄-sı̄ lí mê-jı̍t tùi goá chhá chı̂ⁿ, goá chiū bô chò chit-khoán ê sū, goá ê siu-jı̍p bô hoat-tō͘ thang èng-hù lí ê chhia-hoa ê seng-oa̍h, it-chhè lóng sı̄ ūi lí, lí lóng bô liông-sim.
34.警官a:Án-ne lí sı̄ pang-chān lí ê ta-po͘ lâng hoān-hoat ê, chiàu lu̍t-hoat lí iā tio̍h eng-kai siū tāng-choē, lâi pa̍k khí-lâi.
35.金鳳:Tāi-jı̂n lí pa̍k goá beh án-choáⁿ, goá ê tiōng-hu hoān ê choē kap goá ū sím-mı̍h kan-sia̍p.
36.警官b:Ū, chhin-chhiūⁿ lí chit-khoán ê cha-bó͘-lâng, mê-jı̍t chhia-hoa thit-thô sı̄ bô ha̍p tı̄ kok-ka chóng-tōng-oân ê hoat-chek, tı̀-kàu liân-lūi tiōng-hu seng-oa̍h-siōng ê hū-tam lâi hoān-choē,lí chit-khoán lâng tio̍h giâm-giâm chhú-hoa̍t. Lâi,lóng pa̍k khí-lâi!!
37.金鳳:Tāi-jı̂n ah, sià-bián goá lah!( 清雲koāⁿ hêng-lí tńg-lâi)
38.清雲:Oh, A-bú, A-bú goá tńg-lâi lah!
39.老婆:Lí sı̄ sím-mı̍h lâng, lí sı̄ Chheng-hûn tio̍h bô!? Oh, Chheng-hûn, goá ê Chheng-hûn!(saⁿ lám-oá)
40.清雲:A-bú, lí ná oē hiah nih lāu lah, lí ê thâu-mn̂g lóng pe̍h khı̀, lí ê seng-khu lóng sı̄ kut-thâu, A-bú, hō͘ lí kú-kú lô-khó͘, sı̍t-chāi goá sı̄ chin put-hàu, goá ê sim iā hoaⁿ-hí iā kan-khó͘.
41.老婆:Chheng-hûn, lí sı̄ chin-chiàⁿ tńg-lâi lah tio̍h bô? Á-sı̄ goá teh chò bāng leh? Ài ah, ok-bāng kap hó-bāng thái oē kau-chiap tı̄ goá ê sin-chiūⁿ.
42.清雲:A-bú, lán lóng m̄-sı̄ teh chò bāng, koh in-ūi hó-bāng lâi kàu, só͘-í it-chhè ê pháiⁿ-bāng tek-khak oē siau-soàⁿ khı̀.
43.老婆:Chheng-hûn, lí kiám bô khoàⁿ tio̍h lín a-hiaⁿ kap a-só.
44.清雲:Sı̄ án-choáⁿ, in sı̄ hoān tio̍h sím-mı̍h sū?
45.清香:Jı̄-hiaⁿ, toā-hiaⁿ ū chà lâng ê chı̂ⁿ tó lâng ê chè, só͘-í hō͘ lâng beh lia̍h khı̀ koaiⁿ lah.
46.清雲:Sím-mı̍h! Toā-hiaⁿ, lí thái oē chò hit-khoán put-gı̄ ê sū? Tāi-jı̂n ah, m̄ chai goá ê toā-hiaⁿ só͘ khiàm lâng ê hū-chè ū loā-chē?
47.警官a:Chha-put-to ū 8 bān gûn.
48.清雲:Tāi-jı̂n, goá hoaⁿ-hí chi-chhut hit-tiâu chı̂ⁿ,m̄-chai lín oē-thang pàng in á-boē?
49.警官b:Chı̂ⁿ nā ū kap chè-chú chheng-chhó chū-jiân tı̄ hoat-lu̍t-siōng chiū bô choē, goá iā oē pàng in khı̀.
50.清雲:Án-ne chhiáⁿ lín pàng in, goá tı̄ chia sûi-sı̂ siá 8 bān gûn ê chi-phiò hō͘ lín khı̀ gûn-hâng niá chı̂ⁿ.
51.警官b:Án-ne hó, taⁿ Ông Kiat-siông, goá pàng lí khı̀, lí sı̍t-chāi chin ū hok-khı̀, nā bô tú-tn̄g lí ê sió-tı̄ tńg-lâi lín phah-sǹg bô hoat-tō͘ thang cháu-siám hoat-lu̍t ê chè-chhâi.(二人退場)
52.結祥:Chheng-hûn, chin to-siā, lí ê a-hiaⁿ sı̍t-chāi put-phoè lí chit-khoán ê thiàⁿ-thàng.
53.清雲:A-hiaⁿ, che lóng sı̄ Siōng-tè ê thiàⁿ, lán eng-kai tio̍h kám-siā Siōng-tè.
54.老婆:Goán lóng àn-sǹg lí í-keng sí lah, kin-á-jı̍t tı̄ chit ê chai-lān ê sı̂ lí oē-thang tńg-lâi soà kiù chı̍t-ke thoat-lı̄ kan-lân, che lóng sı̄ Siōng-thian ê pí-iū, phah-sǹg goá tio̍h lâi sio-hiuⁿ pài-pu̍t.
55.清雲:A-bú, lán tio̍h tùi thiⁿ-téng ê Siōng-tè lâi kám-siā. In-ūi Siōng-tè chiah sı̄ oē pang-chān lâng chin ê sı̂n, lán ê seⁿ-sí lóng tı̄ I ê chhiú-lāi.
56.老婆:Hit ê Siōng-tè sı̄ Iâ-so͘ kàu só͘ teh ho̍k-sāi ê Siōng-tè tio̍h bô?
57.清雲:Sı̄ lah, Iâ-so͘-kàu ê Siōng-tè chiah sı̄ lâng eng-kai tio̍h kám-siā ho̍k-sāi ê Siōng-tè. Nā bô chit-ūi úi-tāi ê Siōng-tè, goá í-keng sí tı̄ hái-té,ka-chài Siōng-tè ê koân-lêng hō͘ goá 4 mê 4 jı̍t phiau-liû tı̄ hái-bı̄n, kàu boé hō͘ Bí-kok chûn kiù tio̍h, āu-lâi kàu Sin-ka-pho, tı̄ hia goá ū ho̍k-bū tı̄ chı̍t-keng石油公司, hit ê láu-pán sı̄ chı̍t-ūi khiân-sêng jia̍t-sim ê Ki-tok-tô͘, i ū ín-chhoā goá bat Siōng-tè, soà khan-sêng goá tı̄ hia kiàn-lı̍p sū-gia̍p. Siōng-tè ū toā-toā chiok-hok goá hō͘ goá tı̄ hia chin hoat-ta̍t, koh goá iā ūi-tio̍h kàu-hoē chò kang lâi pò-tap Siōng-tè ê thiàⁿ. A-bú, goá tńg-lâi choè iàu-kín chiū-sı̄ beh hō͘ lán ê ka-têng lóng oē thang sı̀n chit-ūi Siōng-tè.
58.老婆:Án-ne sı̀n Iâ-so͘ pài Siōng-tè sı̄ chin hó ê sū, goán lóng m̄ chai-iáⁿ, taⁿ sı̍t-chāi tio̍h kám-siā Siōng-tè, o-ló Iâ-so͘, nā bô I, goán chı̍t-ke chiū chhám.
59.清雲:A-bú, Siù-lân thái oē lóng bô khoàⁿ-tio̍h? sı̄ khı̀ tó-ūi?(Tāi-ke àⁿ-thâu m̄-káⁿ ı̀n)
60.清香:Jı̄-hiaⁿ, jı̄-só í-keng kú-kú chiū bô tı̄ chhù-nı̍h lah.
61.清雲: Siù-lân sı̄ án-choáⁿ, goá siong-sı̀n i tek-khak bô pàng-sak lán, in-ūi i sı̄ chı̍t ê khó-chhú ê Ki-tok-tô͘.
62.老婆:Chheng-hûn, chhiáⁿ lí sià-bián goá, goá ū chiong Siù-lân koáⁿ chhut-khı̀.(háu) I sı̍t-chāi sı̄ chı̍t ê khó-chhú chı̄n-tiong ê sim-pū, goá nā siūⁿ-tio̍h i sim chiū thàng-thiàⁿ.(清香退場)
63.金鳳:(Cháu kàu Chheng-hûn ê bı̄n-chêng kūi teh) Chheng-hûn, che lóng sı̄ goá ê choē. Goá sı̄ chı̍t ê oàn-hūn thiaⁿ tō-lí ê lâng, tùi thiaⁿ tio̍h lí sí-khı̀ ê siau-sit, goá chiū tı̍t-tı̍t oàn-chheh Siù-lân, kap i chò tùi-te̍k, hō͘ i kàu tı̄ ko͘-put-chiong tio̍h lı̄-khui ka-têng, che lóng sı̄ goá ê m̄-tio̍h,chhiáⁿ lí sià-bián goá. Taⁿ goá kin-á-jı̍t bêng-pe̍k thiaⁿ tō-lí ê lâng sı̄ chin ū jím-nāi, ū thiàⁿ-sim koh khoan-iông, goá iā koat-sim beh lâi sı̀n Iâ-so͘ pài Siōng-tè lâi kái-piàn goá ê seng-oa̍h.
64.結祥:Chheng-hûn, goá iā bêng-pe̍k thiⁿ-téng ū chı̍t-ūi chin Sı̂n, sı̍t-chāi oē sù hok-khı̀ hō͘ kèng-ùi I ê lâng, goá taⁿ hoaⁿ-hí lı̄-khui goá koè-khı̀ it-chhè pháiⁿ ê só͘-kiâⁿ lâi sı̀n-khò Siōng-tè, hō͘ choân-ke lóng oē tâng chı̍t-tiâu lō͘.
65.清雲:Kám-siā Chú, o-ló Chú! Goá bô siūⁿ lán ê choân-ke hiah-nı̍h kín oē-thang lâi pài Siōng-tè,che sı̍t-chāi sı̄ Siōng-tè ê koân-lêng kap lı̂n-bín.
(清香chhoā秀蘭出場)
66.清香: Jı̄-hiaⁿ, goá ū chhoā jı̄-só tńg-lâi--lah.
67.清雲:Siù-lân, goá tńg-lâi lah, kú-kú hō͘ lí chin siū-khó͘, chin put-chū.
68.秀蘭:Chheng-hûn, goá oē-thang koh khoàⁿ lí ê bı̄n, goá chin hoaⁿ-hí, it-chhè ê kan-khó͘ lóng thoè kàu thiⁿ-piⁿ hái-kak. Ou-àm-mê koè-khı̀ lah,taⁿ kng-bêng hoaⁿ-hí ê chá-khí sı̂ kàu lah. Sı̍t-chāi kı̀ⁿ-nā chhoē Siōng-tè ê, tek-khak bô tú-tio̍h kiàn-siàu. I sı̄ hō͘ sí-lâng koh oa̍h, hō͘ sit-lo̍h ê koh chhoē tio̍h ê ....... Kám-siā Chú, o-ló Chú!
69.老婆:Siù-lân, chhiáⁿ lí tio̍h sià-bián goán, lí tùi goán án-choáⁿ chı̄n-tiong, chóng-sı̄ goá soà ēng pháiⁿ lâi pò lí ê hó.
70.金鳳:Siù-lân, it-chhè lóng sı̄ goá ê m̄-tio̍h, goá sı̍t-chāi chin kiàn-siàu, chhiáⁿ lí tio̍h sià-bián goá.
71.秀蘭:A-bú, A-só, chhiáⁿ lín m̄-thang ūi-tio̍h chit ê sū lâi kan-lân, che lóng sı̄ Siōng-tè ê hó ı̀-sù beh kiù lán chı̍t-ke, lán eng-kai tio̍h hoaⁿ-hí kám-siā Chú.
72.清雲:Sı̄, kim-mê tú-tú sı̄ Kiù-chú Sèng-tàn, choân sè-kài ta̍k pang-kok ke-ke hō͘-hō͘ lóng teh hoaⁿ-hí khèng-chiok Sèng-tàn, lán iā saⁿ-kap gı̂m-si lâi hoaⁿ-hí Sèng-tàn.
(吟聖誕的詩)
幕 終
