Chok-chiá Ê Oē
Tı̄ chē-chē khùn-lân ê tiong-kan Sèng-ke̍k tē-sı̀-chı̍p koh ióng-kám lâi chhut-pán, in-ūi pún-lâng sin-thé khiàm an, só͘-í keng-koè chı̍t-nı̂ kú ê léng-chông, tı̄ kin-nı̂ chiah koh hù ı̀n. Taⁿ pún-chı̍p sı̄ Sèng-keng kò͘-sū só͘ kái-phian ê, sui sı̄ thong-sio̍k iáu kú chin sêng-tōng pek-chin, tı̄ tha̍k ê sı̂ chiū hō͘ lâng kám-kak chhù-bı̄ óng-e̍k.
Keng-koè kúi-nı̂ kú ê tù-chok keng-giām, só͘-í pí-kàu chêng ê chok-phín iā sı̄ khah chhiong-sı̍t láu-liān. Chit ê ke̍k-pún m̄-nā kan-ta sek-ha̍p tı̄ lán Tâi-oân kàu-hoē lō͘-ēng, nā chò tho̍k-pún iā-sı̄ chin hó, koh kı̄n-lâi kong-pò sū-kong ê hoat-tián, nā lı̄-ēng chò kong-pò oā-ke̍k ê lō͘-ēng sı̄ chin hó. Tı̄ pún-lâng ê chok-phín tiong lóng sı̄ ū chin bêng-hián ê bo̍k-tek kap tiong-sim, chiū-sı̄ hō͘ lâng bat Iâ-so͘, chí ū bêng-khak ê chú-tê kap tiong-sim, chiah oē thang hun-bêng chong-kàu bûn-gē ê te̍k-sek, chē-chē chok-phín chhin-chhiūⁿ ū hūn-loān chit ê sū, só͘-í chin sio̍k-khı̀ bô ū giâm-siok ê khı̀-hun, ǹg-bāng lán tı̄ tâi-téng beh ián ê sı̂, iā oē thang tùi-tiōng hit ê goân chok-chiá ê cheng-sı̂n.
Ēng án-ni lâi chiok tāi-ke ū khoài-lo̍k ê Sèng-tàn.
1960.10.15 N̂g Hoâi-in tı̄ Chúi-siōng.
好的撒瑪利亞人 二幕
人物 : 撒瑪利亞人 希百、猶太人 巴拿、巴拿之父 迦米、巴拿之妻 西西拉、祭司 約西、利末人 謝拉、強盜 a、強盜 b。
第一幕
出場人物:迦米 西西拉 巴拿
場 面:一個猶太的窮家庭裡，奧後有一位患病臥床的老人，右前面一中年小婦背嬰孩正在織布。
開 幕:老人臥在床上嗽喘吟呻著，小婦人一面搖背後 的小孩一面織布。
1. 迦米 : (Ná sàu ná lı̄-hāi, chiū khí-lâi chē tı̄ chhn̂g-téng)Ai-ah,thiⁿ-khı̀ iū-koh tńg léng lah(嗽且喘),chin thó-iàm, m̄-chai beh koh koâⁿ kàu tı̄-sı̂ chiah oē chún-sǹg(嗽).
2. 西西拉: (站起來,走近老人) A-pa, lí án-ni kan-khó͘ hiah kú, bô chhiáⁿ i-seng lâi khoàⁿ pēⁿ sı̄ boē ēng-tit lah (loa̍h lāu-lâng ê背後). Thiaⁿ kóng Iâ-lō͘-sat-léng ū chı̍t-ūi chin gâu ê i-seng, kiò-choè Má-kiat, lán lâi khı̀ chhiáⁿ i lâi khoàⁿ pēⁿ m̄-chai hó bô?
3. 迦米: Mih-sái tio̍h án-ni lōng-hùi, lán ê ka-têng iā m̄ sı̄ teh hó-koè, saⁿ-tǹg to teh boē kò͘-tit, pàng chhut-chāi i khı̀.(嗽且喘).
4. 西西拉: A-pa, lí lóng sı̄ án-ni kheh-khı̀, Chú Iâ-ho-hoa tek-khak oē thoè lán khui-lō͘, bô-lūn án-choáⁿ bô chhiáⁿ i-seng lâi khoàⁿ sı̄ boē ēng-tit.
5. 迦米: Chú Iâ-ho-hoa nā si-lo̍h chû-pi, kín tiàu goá ê lêng-hûn kūi tı̄ goá ê chó͘, án-ni chiū m̄-bián ke-thiⁿ lín ê tāng-tàⁿ kap khùn-lân, hō͘ lín ū chiân-tô͘ ê ǹg-bāng(嗽且喘), goá án-ni bô sí sı̄ chin thoa-lūi tio̍h lín.
6. 西西拉: A-pa, chhiáⁿ lí m̄-thang án-ni kóng, Pa-ná kap goá lóng chin su-iàu lí, lí tùi goán ū chin toā ê pang-chān kap chí-tō, (khoàⁿ eⁿ-á) Iok-hān mā chin ài A-kong, lí ū kap goán tı̄ teh goán chiah ū khoài-lo̍k kap hēng-hok.
7. 迦米: To-siā, Se-se-la̍h, goá chai-iáⁿ Pa-ná kap lí ê hàu-sūn, che sı̄ goá tı̄ chit ê khùn-khó͘ ê jı̂n-seng tiong choè toā ê an-ùi. Goān Siōng-tè pò-tap lín, lâi sù-hok lín. Taⁿ hó, taⁿ hó, goá khah khùiⁿ-oa̍h lah, m̄-bián koh lô-hoân lí lah. (西西拉放手,老人行倚台前,西西拉扶之).
8. 西西拉 : A-pa, lí chhēng án-ni ū kàu sio bô? Lí ài lim tām-po̍h sio-tê bô?
9. 迦米: Se-se-la̍h, lí m̄-bián ūi-tio̍h goá khoà-lū sím-mı̍h, goá í-keng hō͘ lí kàu-gia̍h siū-khó͘ lah. Lí án-ni bô chı̍t-sı̂-khek ê an-hioh teh chit-pò͘, pang-chān ka-têng, sı̍t-chāi hō͘ lí kàu-gia̍h lô-khó͘, goá sı̍t-chāi chin boē koè-sim.
10.西西拉: A-pa, lí lóng sı̄ kóng hit-khoán kheh-khı̀ oē, che lóng boē thang sǹg choè sím-mı̍h lô-khó͘. Goá chin hoaⁿ-hí án-ni chò kang, ūi-tio̍h lán chit ke, ūi-tio̍h beh chhēng chit-niá saⁿ ê lâng. (回到原位,再開始織布,老人行倚小婦的機邊)
11.迦米: Chin súi, chin bí-biāu ê sek-tı̄! Ta̍k ê soàⁿ-kat lóng ū thiàⁿ kap chêng ê kı̀-hō, chhēng chiah ê saⁿ ê lâng sı̍t-chāi ū hok-khı̀.
12.西西拉: Goá chit-niá chit liáu chiū saⁿ-niá lah; chit saⁿ-niá sı̄ beh sàng hō͘ A-pa ê lé-mı̍h.
13.迦米: Lí kóng án-ni sı̄ sím-mı̍h ı̀-sù?
14.西西拉: Chiong chit saⁿ-niá saⁿ só͘ bē ê chı̂ⁿ khı̀ chhiáⁿ i-seng, the̍h io̍h, ǹg-bāng A-pa koáⁿ-kín hó khí--lâi.
15.迦米: Boē ēng-tit, goá bô ún-chún lí án-ni choè! Ēng lí ê sim-huih lâi chò goá ê io̍h-chı̂ⁿ, oh, goá lēng-khó͘ sí, iā bô ài lín ūi-tio̍h goá án-ni hi-seng, che kan-ta sı̄ hō͘ goá ê pēⁿ ná tı̂m-tāng.(嗽且喘)
16.西西拉 : A-pa, chhiáⁿ lí kín-kín khı̀ tó-leh, án-ni siuⁿ léng lah! (扶助老人到床邊,且撫他背後). A-pa, lí m̄-thang án-ni kheh-khı̀, goán khoàⁿ lí án-ni kan-khó͘ sı̄ chin siong-sim.
17.迦米: Án-ni hó lah, jı̂n-seng chóng-sı̄ lô-lo̍k khó͘-thàng, án-ni hó lah, bô iàu-kín lah.(西西拉停手). Pa-ná thái iáu boē tńg-lâi? Chiah nı̍h koâⁿ soaⁿ-iá ê pak-hong sı̄ chin léng.
18.西西拉: A-pa, lí kín tó leh, m̄-bián khoà-lū Pa-ná, i phah-sǹg liâm-piⁿ oē tńg-lâi lah.(老人臥床,小婦給他施棉被,然後回到原位,開始織布. 巴拿出場)
19.巴拿: (解他覆在頭上的布,和背後的羊皮) Chin koâⁿ, chin koâⁿ, soaⁿ-iá ê hong ná to oē koah lâng ê bah, liân iûⁿ-kûn tio̍h siūⁿ beh tńg-lâi tiâu-lāi bih sio.(去探嬰孩) Iok-hān lí oē koâⁿ boē?! Hiah nı̍h kó͘-chui teh khùn.(問西西拉) A-pa án-choáⁿ, ū khah hó sè bô?
20.西西拉: Sàu kàu chin lı̄-hāi koh chin chhoán, goá siūⁿ bô chhiáⁿ i-seng sı̄ boē ēng-tit, chit pái sı̄ pí í-chêng khah siong-tiōng ê khoán.
21.巴拿: Goá siūⁿ iā sı̄ tio̍h chhiáⁿ i-seng (沉默片刻). Chóng-sı̄ beh án-choáⁿ siat-hoat io̍h-chı̂ⁿ?! Boē lán só͘ ū ê iûⁿ, che sı̄ choa̍t-lō͘, a-pa it-tēng m̄-khéng, boē liáu bı̂n-á-jı̍t khí chiū bô ū iûⁿ-mn̂g thang bē lah.
22.西西拉: Pa-ná, lí chin sió-sı̀n, Siōng-tè kiám oē pàng-sak lán mah! (西西拉拿織布起來)Lí thang chiong chiah ê saⁿ the̍h khı̀ bē lâi oāⁿ io̍h chı̂ⁿ.
23.巴拿: Chit-pái kiám m̄ sı̄ ūi-tio̍h lán chit ke ê lâng só͘ chit ê saⁿ? Án-ni kiám oē ēng-tit, lán ê saⁿ lóng chin kū lah?!
24.西西拉: Ū sím-mı̍h boē ēng-tit, goá oē-thang koh khai-sí lâi chit, kin-nı̂ ê koâⁿ-thiⁿ bô thang chhēng, lán khah jím-siū leh, kàu mê-nı̂ chiū ū thang chhēng lah.
25.巴拿: (接衣布過來) Chit liáu chin súi, án-ni sı̄ chin hi-seng lí! Se-se-la̍h, goá chin kám-kek lí ê thiàⁿ. (吻衣服)
26.西西拉: (微笑,後來開始整理織機) Thiaⁿ kóng ū chı̍t ūi Sat-má-lı̄-a ê seng-lí lâng, kiò choè Hi-pek choan-bûn kiâⁿ-se̍h tı̄ chit ê sı̀-hng teh bé-chı̍p hū-jı̂n-lâng só͘ chit ê saⁿ, lán thang chhoē hit ê lâng lâi bē hō͘ i.
27.巴拿: Sat-má-lı̄-a lâng Hi-pek!? Án-ni sı̄ boē-ēng-tit, lí kiám m̄-chai lán ê chong-cho̍k sı̄ choa̍t-tùi bô kap Sat-má-lı̄-a lâng lâi-óng, á-sı̄ choè bé-bē, che sı̄ kiàn-siàu ê sū, bú-jio̍k lán chó͘-sian ê miâ-siaⁿ.
28.西西拉: Pa-ná, chit khoán ê siūⁿ hoat sı̄ choè khó-lı̂n ê phian-kiàn, choè gû-gōng ê koan-liām, Sat-má-lí-a lâng kiám m̄ sı̄ Siōng-tè ê kiáⁿ-lūi? Kiám m̄ sı̄ Iû-thài lâng ê kut-jio̍k?
29.巴拿: Sat-má-lı̄-a lâng sı̄ Siōng-tè só͘ khı̀-sak ê, sı̄ poē-ge̍k ê kiáⁿ. Lán ê chó͘ Tāi-pı̍t ê ông-kok chiū-sı̄ hō͘ in chhiúⁿ-toa̍t khı̀, lâi tı̀-kàu hun-lı̄, Sat-má-lı̄-a lâng sı̄ lán ê kiu-siû! Sı̄ lán ê tùi-te̍k! Bô-lūn jû-hô lán choa̍t-tùi bô kap in lâi-óng, lán iā iàm-chiān hia ê kap in lâi-óng ê lâng.
30.西西拉: Che sı̄ jı̂n-lūi pi-ke̍k choè mâu-tún, choè thang siong-sim ê chhò-gō͘, goá boē thang lí-kái chit khoán ê kiu-oan sı̄ chèng-tong ê sū. (老人由床起身)
31.迦米: Goá ǹg-bāng Chú Iâ-ho-hoa kín hō͘ goá sí, m̄-thang tı̀-kàu hō͘ goá ê kiáⁿ-sun kiâⁿ tio̍h hoān-hoat ê lō͘, goá choa̍t-tùi bô ún-chún lán khı̀ kau chhap jı̄m-hô ê Sat-má-lı̄-a lâng, in-ūi in sı̄ poē-ge̍k pāi-lō͘ ê kiáⁿ-jı̂, lán ê chó͘ í-keng siū-chı̄n liáu in ê khùn-khó͘ lah, lí chai sím-mı̍h lâng phò-hāi lán ê chó͘ tùi chhian-khó͘ bān-khó͘ só͘ kiàn-lı̍p nn̄g-chheng goā nı̂ Hi-pek-lâi ông-kok ê bı̂n-bāng?! Kiám m̄ sı̄ Sat-má-lı̄-a lâng ê chó͘-sian. Sím-mı̍h lâng liân-ha̍p put-sı̀n ê goā-pang lâi kong-kek, kiáu-jiáu lán ê chó͘ kap sèng-siâⁿ Iâ-lō͘-sat-léng!? Kiám m̄ sı̄ khó͘-ò͘ⁿ ê Sat-má-lı̄-a lâng!? Ūi sím-mı̍h iân-kò͘ Tāi-pı̍t ê ông-kok kin-á-jı̍t chiâⁿ-chò chit khoán ê pāi-lo̍h, hō͘ goā-pang lâng chò chia̍h-mı̍h, siū chı̄n in ê lêng-jio̍k kap khùn-khó͘ ah? Chiū-sı̄ Sat-má-lı̄-a lâng ê chó͘ ê poē-poān! Lán ê chó͘ chiù-choā bô beh koh kap Sat-má-lı̄-a lâng óng-lâi, chhùi-khí poê chhùi-khí, ba̍k-chiu poê ba̍k-chiu! Lán ǹg-bāng ū chı̍t jı̍t, chit ê poē-poān ê jı̂n-bı̂n oē tú-tio̍h Chú Iâ-ho-hoa ê toā siū-khı̀ lâi bia̍t-bông!
32.西西拉: A-pa, goá boē thang lí-kái, sui-jiân sı̄ án-ni, goá boē thang lí-kái tı̄ lán ê chó͘-sian só͘ chò ê tāi-chı̀, ū koan-hē tı̄ lán kap Sat-má-lı̄-a lâng Hi-pek ê sū. Lán sı̄ Siōng-tè ê kiáⁿ, chóng-sı̄ Sat-má-lı̄-a lâng iā sı̄ Siōng-tè ê soán-bı̂n, Sat-má-lı̄-a lâng nā siū khı̀-sak lâi bia̍t-bông, che kiám m̄ sı̄ lán ê pi-ai kap hoân-ló, lán sı̄ tâng chı̍t ê chó͘-sian ê kut-jio̍k, tâng chı̍t ê Siōng-tè ê soán-bı̂n, tâng miā-ūn ê tông-pau.
33.迦米: Se-se-lah, goá chóng bô siūⁿ tio̍h lí tı̄ chit chân sū hō͘ goá chiah-nı̍h siong-pi koh chò that-gāi, án-ni goá beh án-choáⁿ tùi-tit-khí goá ê chó͘-sian!! (嗽且喘)
34.巴拿: Se-se-lah, lí bô eng-kai koh giâu-gı̂, in-ūi che sı̄ thoân-thóng, sı̄ ūi-bēng, lán chí ū tio̍h kè-sio̍k lán ê chó͘ só͘ hō͘ lán ê cheng-sı̂n.(向迦米) A-pa lí só͘ kóng ê sı̄ tio̍h, goán tek-khak bô ûi-poē lí ê ı̀-sù, chhiáⁿ lí pàng-sim, iā kín-kín tò leh hioh-khùn, m̄-thang koh koâⁿ tio̍h.
35.(老人臥床,嗽且喘真利害)
36.西西拉: (對巴拿) Nā sı̄ án-ni lán iáu ū sím-mı̍h hoat-tō͘ thang tit-tio̍h chı̂ⁿ?! A-pa hiah-nı̍h kan-khó͘ bô kín-kín chhiáⁿ i-seng sı̄ boē ēng-tit.
37.巴拿: (Siūⁿ bô pān-hoat teh沉思) Kiám m̄ sı̄ iáu ū chı̍t ê Iâ-lı̄-ko lâng kiò choè Sui-lı̄ iû-goân teh siu bé chit khoán ê pò͘-kiāⁿ mah?! Lán thang chhoē i lâi bē hō͘ i!
38.西西拉: (Chhin-chhiūⁿ chin sit-bāng koh kiâⁿ-oá khı̀ beh siu-sı̍p i ê織器) Sui-lı̄ ū teh kā lâng bé, chóng-sı̄ í-keng chiâⁿ-ge̍h-jı̍t bô koh khoàⁿ i tı̄ Iâ-lō͘-sat-léng lah, m̄-chai ū sím-mı̍h piàn-tōng.
39.巴拿 : (Kat-ba̍k koh沉想) Án-ni goá toà chiah ê saⁿ lâi khı̀ Iâ-lı̄-ko chhoē i, bô án-ni chò sı̄ boē kái-koat, goá chit-tiap sûi-sı̂ chhut-hoat, án-ni kim-mê goá chiū oē thang kàu hia, tı̄ bı̂n-á-jı̍t tiong-tàu goá chiū oē-thang koh tò-tńg-lâi lah. (khai-sí koh teh chhēng phoê-saⁿ, 西西拉tio̍h-kiaⁿ).
40.西西拉: Sím-mı̍h! Lí beh khı̀ Iâ-lı̄-ko!? Pa-ná, lí kiám m̄-chai Iâ-lı̄-ko ê lō͘-chiūⁿ chin gûi-hiám,siông-siông ū kiông-tō bâi-ho̍k tı̄ soaⁿ-kan teh chhiúⁿ-kiap lâng,sat-hāi lâng! Lí kiám thang án-ni choè? Hô-hòng chit ê sı̂-chūn í-keng beh àm lah, Pa-ná lí ūi-tio̍h goán ê iân-kò͘ m̄-thang án-ni choè!
41.巴拿: Che sı̄ ūi-tio̍h a-pa choè-āu ê chı̍t-tiâu lō͘, goá ǹg-bāng Chú Iâ-ho-hoa bô pàng-sak lán, lán ê chó͘ kı̀-jiân chiù-choā bô beh kap Sat-má-lı̄-a lâng óng-lâi, lán tio̍h tām-po̍h chia̍h-khó͘ iā koat-toàn m̄-thang ū só͘ ûi-poē sian-jı̂n ê cheng-sı̂n. (chhēng hó-sè koh pa̍k thâu-kin)
42.西西拉: Pa-ná, lán kiám bô ū pa̍t ê hoat-tō͘? Lí beh khı̀ Iâ-lı̄-ko goá ê sim chin boē thang pàng-sim, koh bô it-tēng lí chhoē oē tio̍h Sui-lı̄, kiám-chhái lí chhoē oē tio̍h i, chóng-sı̄ i í-keng kái-gia̍p oāⁿ-chit lah, Pa-ná lí koh siūⁿ-khoàⁿ án-ni thài gûi-hiám, lán kiám bô pa̍t ê hoat-tō͘?
43.巴拿: Se-se-la̍h, lí kiám boē kı̀-tit Chú Iâ-ho-hoa sı̄ lán tı̄ hoān-lān tiong kip-sı̂ ê pang-chān? Nā ū chhut sū, Siōng-tè tek-khak oē kiâⁿ kı̂-sū sı̂n-jiah lâi chín-kiù, lí tio̍h pàng-sim, goá bı̂n-á-jı̍t chiū oē tńg-lâi lah, nā chhoē bô Sui-lı̄ lán chiah koh phah-sǹg pa̍t ê hoat-tō͘.
44.西西拉: Goá iû-goân chin boē hiáu lí-kái! Siōng-tè kiám ài I ê kiáⁿ-jı̂ in-ūi hō͘-siong phāu-oàn lâi chia̍h bô eng-kai chia̍h ê khó͘, che sı̄ gû-gōng kàu-ke̍k, chin-lí kiám sı̄ seⁿ chò án-ni?!
45.巴拿: Lí iū sı̄ chit ê khoán-sit! Lán iàm-chiān Sat-má-lí-a lâng, che sı̄ kin-pún ê cheng-sı̂n! Lán iàm-chiān in, m̄-kiaⁿ sím-mı̍h sún-sit kap hi-seng! Goá tek-khak tio̍h khı̀ Iâ-lı̄-ko, che bô thang koh khó-lū, Se-se-la̍h, lí tùi goán thài hó chhiáⁿ lí m̄ thang koh ū sím-mı̍h giâu-gı̂, chhiáⁿ lí an-sim lâi tán-hāu goá, hó-hó chiàu-kò͘ a-pa, goá beh lâi--khı̀ lah!
46.西西拉: Goá í-keng chai-iáⁿ goá bô hoat-tō͘ thang chó͘-tòng lí, goá chí ū chiong lí kau-thok tı̄ Siōng-tè ê chhiú, goá tek-khak thong-mê ūi lí kı̂-tó tı̍t-kàu koh khoàⁿ lí ê bı̄n, ǹg-bāng Siōng-tè toà-niá lí, pó-siú lí chı̍t-lō͘ pêng-an. Pa-ná chhiáⁿ lí tio̍h khah sió-sim leh! (Pa-ná chim eⁿ-á, khoàⁿ 西西拉chiū退場,西西拉心情恐懼不安sàng i tı̄ 門口, āu-lâi kūi teh kı̂-tó).
-幕-
第二幕
出場人物: 巴拿 強盜a 強盜b 祭司約西 利未人謝拉 撒瑪利亞人希百
場 面 : 耶利哥的山路
開 幕 : 黑夜淒然的山林中, (用佈景,電光,音樂表示)
1.巴拿: Jı̍t-thâu í-keng lo̍h-soaⁿ lah, o͘-àm pau-ûi sı̀-kéng, chheⁿ-chhı̀n ê soaⁿ-iá, sı̀-bı̄n lóng sı̄ chhiū-nâ, cha̍p-chháu, hân-léng ê pak-hong siū-siū háu, thâu-chêng it-bōng bû-chè ê o͘-àm, soaⁿ-lō͘ hiám-iàu, che chiū-sı̄ chhut-miâ Sı̂n-but kúi chhut ê Iâ-lı̄-ko soaⁿ-téng, lō͘ iáu chin hn̄g, í-keng cháu kàu chin ià-siān lah, chóng-sı̄ m̄-káⁿ thêng kha, ná kiâⁿ sim-lāi ná tio̍h-kip kiaⁿ-hiâⁿ, goān Chú Iâ-ho-hoa ê lı̂n-bín chhoā goá pêng-an thoat-lı̄ chit ê gûi-hiám ê só͘-chāi, hō͘ goá ê lāu-pē goá ê bó͘-kiáⁿ m̄-bián tú-tio̍h pi-chhám ê kéng-gū.(強盜二人出現在前面)
2.強盜: Hiaⁿ-tı̄ ah, beh khı̀ tó-ūi? Ū sím-mı̍h toā-sū, hiah-nı̍h thang kín-kip.
3.巴拿: He! Lín, lín sı̄ sím-mı̍h lâng? ū sím-mı̍h tāi-chı̀?
4.強盜b : Lí kiám m̄-chai goán sı̄ sím-mı̍h lâng! Goán sı̄ chit ê soaⁿ ê chú-lâng, kı̀ⁿ-nā keng-koè chit ê soaⁿ ê lâng eng-kai tio̍h ài bat goán.
5.巴拿: Khó-ò͘ⁿ ê kiông-tō!!
6.強盜a : Lí ê chhiú só͘ the̍h ê mı̍h-kiāⁿ kap lí ê sin-khu só͘ ū ê chı̂ⁿ lóng kau chhut-lâi hō͘ goán!
7.巴拿: Goá lóng bô toà chı̂ⁿ tı̄ sin-khu, lín khoàⁿ chhò lah! Goá ūi-tio̍h iàu-kín ê sū-chêng tek-khak tio̍h ài kàu Iâ-lı̄-ko, chhiáⁿ lín bo̍h-tit kiáu-jiáu goá.
8.強盜b: Goán tek-khak boē kiáu-jiáu lí, siat-sú lí nā hoaⁿ-hí ho̍k-chiông, chiong só͘ ū ê pàng tı̄ goán ê kha-ē.
9.巴拿: Goá kí Iâ-ho-hoa chiù-choā, goá choa̍t-tùi boē thang án-ni chò!
10.強盜a : Gōng-lâng ah, lí chai-iáⁿ Iâ-ho-hoa chá chiū tiāⁿ tio̍h lí tio̍h jı̍p tı̄ goán ê chhiú-lāi, lí lóng m̄-chai! Lí nā bô ài miā chiah lâi chhı̀ khoàⁿ lí ê tám-liōng!
11.巴拿: Hiaⁿ-tı̄ ah, lín tio̍h siūⁿ khoàⁿ māi leh, Siōng-tè ê lô͘-po̍k Tāi-pı̍t ê ke án-choáⁿ lûn-bông kàu chit khoán ê tē-pō͘, kok-pāi bı̂n-bông, chhù-chhù sı̄ kiông-pō kap siong-sat ê kong-kéng, sı̀n-sim pāi lo̍h, liông-sim bâ-pı̀, thiàⁿ-sim léng-tām, chiâⁿ-chò ke̍k-toan ê lı̄-kí chú-gı̄! Chhiáⁿ siūⁿ khoàⁿ che kiám m̄ sı̄ Í-sek-lia̍t ê boa̍t-boé mah!!
12.強盜b : Sím-mı̍h, hó toā-táⁿ ê sió-khoe! Káⁿ piān-po̍k, thâi lí! (開始角鬥,巴拿被打倒在地上,東西被奪掠去)
13.巴拿: (Haiⁿ-chhan, moá sin tāng-siong, kiông pê khí-lâi khiā teh) Sím-mı̍h lâng siūⁿ oē kàu A-pek-la̍h-hán ê kiáⁿ-sun, Tāi-pı̍t ê hō͘-è kin-á-jı̍t chiâⁿ-chò saⁿ siong-sat ê tùi-te̍k. Ah, ah, Chú Iâ-ho-hoa, Lí tio̍h khó-lı̂n goá, tio̍h chín-kiù goá. Oh, moá-sin lóng sı̄ to-siong, goá káⁿ oē sí tı̄ chit ê soaⁿ-téng. (koh tó lo̍h khı̀. 祭司約西出場).
14.約西: Chú Iâ-ho-hoa sı̄ hoān-lān ê sı̂ ê pı̄-lān-só͘, sı̄ kiaⁿ-hiâⁿ ê sı̂ ê koân-tâi, sı̄ gûi-kip ê sı̂ ê kian-kò͘ chio̍h-poâⁿ! Iâ-ho-hoa nā kap goá tı̄ teh sím-mı̍h lâng káⁿ tùi-te̍k goá! A-men, A-men! Chit ê soaⁿ-téng sı̄ chhut-miâ ê chha̍t-siū, sı̀-bı̄n bô-lâng, o͘-thiⁿ tē-àm, kiaⁿ-hiâⁿ lia̍h-tiâu tı̄ goá ê sı̀n. Siōng-tè ah, lí tio̍h khó-lı̂n goá, in-ūi goá sı̄ Lí só͘ chhe-ēng ê lô͘-po̍k, Lí só͘ lı̍p ê chè-si, kiû Lí hō͘ goá bô hām-lo̍h tı̄ pháiⁿ lâng ê chhiú-tiong!
15.巴拿: Oh, oh, lı̂n-bín goá, kiù goá!
16.約西: He! He sı̄ sím-mı̍h? Lâng ê siaⁿ, á-sı̄ kúi ê siaⁿ!? (發見 tio̍h 巴拿). Oh, lí sı̄ sím-mı̍h, goá kap lí ū sím-mı̍h koan-hē!? Chhiáⁿ lí m̄-thang lâi hāi goá!
17.巴拿: Siōng-tè ê chè-si Iok-se ah, Iok-se ah, goá lah! Khó-lı̂n siū-siong ê kiáⁿ Pa-ná lah! Chhiáⁿ lí khó-lı̂n goá tú-tio̍h chit ê chai-hāi, lâi toà goá tńg-khı̀ Iâ-lō͘-sat-léng, goá ê pē ê ke.
18.約西 : Lí sı̄ Ka-bí ê kiáⁿ Pa-ná tio̍h bô?! Lí án-choáⁿ tú-tio̍h chit-khoán thang kiaⁿ ê sū!(Oá-khı̀) Oh, moá-sin lóng sı̄ huih! A-men, A-men!!
19.巴拿: Khó͘-ò͘ⁿ ê kiông-tō chiong goá siong-hāi, soà chhiúⁿ-toa̍t goá só͘ ū ê mı̍h. Kám-siā Chú, ka-chài lí ū tùi chia keng-koè, nā bô goá chiū oē sí tı̄ chit ê chhiⁿ-chhı̀n ê só͘-chāi.
20.約西:Oh, kiông-tō! Ou-àm thang kiaⁿ ê sè-kài! Goān Siōng-tè lı̂n-bín Í-sek-lia̍t. A-men, A-men!! Goá, goá beh kín lâi khı̀, goá bô hoat-tō͘ thang ūi lí chò sím-mı̍h, goá kiaⁿ-kàu sı̂n-hûn lóng beh soàⁿ khı̀ lah, goá tio̍h kín lâi khı̀, nā bô liân goá iā cháu boē chhut kiông-tō ê chhiú.
21.巴拿: (Pê 起身 khí--lâi)Siōng-tè ê chè-si Iok-se! Chhiáⁿ lí lı̂n-bín goá, m̄-thang kóng hit khoán choa̍t-chêng ê oē. Chhiáⁿ lí toà goá tńg-khı̀ kı̀ⁿ goá lāu-pē ê bı̄n.
22.約西: Ná oē ēng-tit án-ni choè? Goá ū sím-mı̍h khùi-la̍t thang toà lí tńg--khı̀! che sı̄ gû-gōng ê só͘ choè, kiaⁿ liáu goá iā tô boē chhut pháiⁿ lâng ê to̍k-hāi. Goān Siōng-tè kap lí tı̄ teh! Goá boē ēng-tit koh iân-chhiân, goá oē thong-ti hō͘ lí ê lāu-pē chai, in oē kiò lâng lâi kng lí tńg-khı̀, pêng-an! A-men,a-men!!(退場)
23.巴拿: (Pê khí-lâi, khiā teh) Siōng-tè ê chè-si Iok-se ah, sı̂n-jı̂n Iok-se ah, ūi-tio̍h Iâ-ho-hoa ê miâ, chhiáⁿ lí, chhiáⁿ lí lâi khó-lı̂n goá..., chhiáⁿ lí.... Ah, cháu kàu bô khoàⁿ-kı̀ⁿ lah, choa̍t-chêng o͘-àm ê sè-tāi, goá ê chín-kiù beh tùi tó-ūi lâi, liân Siōng-tè ê lô͘-po̍k iā tô-pı̄ goá, taⁿ ū sím-mı̍h lâng thang koh kiù goá. Oh, moá-sin thàng thiàⁿ, goá ê thâu-khak chhin-chhiūⁿ hoé teh sio! ( tó lo̍h-khı̀, 利未人謝拉出場).
24.謝拉: Ná kiâⁿ soà ná àm, an-chēng, kàu oē chhiⁿ-chhı̀n, ǹg-bāng tı̄ iáu boē jı̍p kiⁿ ê sı̂ oē thang kín-kín kiâⁿ chhut chit ê hiám-iàu ê soaⁿ-téng. Siōng-tè ah, chı̀ toā ê Iâ-ho-hoa, goá sı̄ Lí sèng ê peh-sı̀ⁿ, sı̄ Lí ēng thiàⁿ te̍k-pia̍t tùi Í-sek-lia̍t ke só͘ hun-pia̍t chhut--lâi, beh chò Lí ê sèng-kang ê kiáⁿ-lūi, kiû Lí chiàu-kò͘ goá, hō͘ goá bô tú-tio̍h gûi-hiám chai-hō, kiû Lí poah-khui it-chhè pháiⁿ lâng ê kè-bô͘.
25.巴拿: Hiaⁿ-tı̄ ah, kiù-miā leh, kiù-miā leh!
26.謝拉: Oh, he sı̄ sím-mı̍h!? Sím-mı̍h lâng teh kiò?
27.巴拿: Goá lah, goá sı̄ siū tāng siong teh beh sí ê Iâ-lō͘-sat-léng lâng, In-ūi tú-tio̍h kiông-tō siū chhiúⁿ-kiap, soà moá-sin ê tāng-siong.
28.謝拉: He!! Lí sı̄ siū chai-lān ê Iâ-lō͘-sat-léng lâng?! (kiâⁿ oá khı̀) Lí kiám m̄ sı̄ Ka-bí ê kiáⁿ Pa-ná?!
29.巴拿: Oh, Lı̄-bı̄ lâng Siā-la̍h! Án-ni chin tú hó, kám-siā Siōng-tè! Siā-la̍h a-peh, chhiáⁿ lí pang-chān goá tńg-khı̀ Iâ-lō͘-sat-léng, goá oē chin kám-kek lí.
30.謝拉: Goá ū tāi-chı̀ beh khı̀ Iâ-lı̄-ko chhoē lâng, chin sit-lé, goá bô hoat-tō͘ thang koh toà lí tò-tńg khı̀ Iâ-lō͘-sat-léng, goá tio̍h koáⁿ-kín goá ê lō͘, goá ū chin iàu-kín ê tāi-chı̀.
31.巴拿: Siā-la̍h a-peh, lí kiám jím-sim khoàⁿ goá bô pang-chān lâi sí tı̄ chit ê choa̍t-kéng ê soaⁿ-téng? Goá ai-kiû lí, chhiáⁿ in-ūi Siōng-tè ê miâ, lí m̄-thang pàng-sak goá, goá nā sí tı̄ chia goá ê lāu-pē kap bó͘-kiáⁿ chiū hām-lo̍h choa̍t-kéng, in ê pi-chhám oē chin toā.
32.謝拉 : (Kiâⁿ lı̄-khui, hut-jiân koh khiā tiām, bı̄n ǹg i ê lō͘) Goá chin ài pang-chān lí, chóng-sı̄ che sı̄ goá choè boē tit kàu ê sū, hoán-tńg goá nā án-ni tı̄ chia iân-chhiân, kiaⁿ liáu goá iā oē siū liân-lūi lâi tú-tio̍h chhám-hāi. Lí chhiáⁿ, goá oē kı̂-tó Siōng-tè pó-siú lí pêng-an.(退場).
33.巴拿: (起身) Siā-la̍h a-peh ah, goá ê hiaⁿ-tı̄, goá ê kut-jio̍k; Siōng-tè sèng ê peh-sı̀ⁿ ah! Chhiáⁿ lí khui lí ê chû-sim....., chhiáⁿ lí lı̂n-bín goá,.....ah, khı̀ lah, bô ǹg-bāng lah, goá káⁿ tio̍h sí tı̄ chia. Ah, chin chhùi-ta, ài lim-chúi! sim-chōng pho̍k-pho̍k-chhéng, kui sin-khu lóng bô la̍t lah. Ah,ah!(gia̍h chhiú ǹg thiⁿ). Siōng-tè ah, kiû Lí chiàu-kò͘ goá khó-lı̂n ê lāu-pē, kap Lí só͘ siúⁿ-sù hō͘ goá ê hū-jı̄n-lâng siū-khó͘ ê Se-se-la̍h,(háu) Se-se-la̍h chhiáⁿ lí sià-bián goá! goá hō͘ lí ê sim phoà-chhùi! Goá chhin-chhiūⁿ ū khoàⁿ-kı̀ⁿ lí lâu ba̍k-sái ê bı̄n, ū thiaⁿ-kı̀ⁿ lí kı̂-tó ê siaⁿ, Se-se-la̍h, lí ūi-tio̍h Í-sek-lia̍t put-hēng ê cho-gū, ūi-tio̍h peh-sı̀ⁿ ê poē-ge̍k lâu loā chē ba̍k-sái, chóng-sı̄ tı̄ lí chhám-kiò ê bı̄n-chêng Í-sek-lia̍t ke í-keng chiām-chiām tı̂m lo̍h-khı̀. Goá ê sı̀ⁿ-miā iā kap chit ê Í-sek-lia̍t tâng chı̍t-iūⁿ ê miā-ūn, beh siau-bia̍t khı̀ lah. (tó-lo̍h khı̀, 撒瑪利亞人希百出場).
34.希百: (Ná kiâⁿ ná kóng)Siōng-tè kiám chin-chiàⁿ oē pàng-sak I ê peh-sı̀ⁿ, tùi Ai-kı̍p chhoā chhut-lâi, tı̄ khòng-iá hùn-liān sı̀-cha̍p nı̂, āu-lâi chhoā-jı̍p Ka-lâm, kiàn-chō êng-kng chhàn-lān ê Hi-pek-lâi ông-kok, chiong chit ê sı̀-chheng nı̂ ê le̍k-sú ê Í-sek-lia̍t bı̂n-cho̍k lâi pàng-sak tı̄ goā-pang hiông-ok, khó͘-ò͘ⁿ ê chhiú-tiong!? Siōng-tè kiám kam-sim khoàⁿ I ê peh-sı̀ⁿ ê tı̂m-lûn kap bia̍t-bông?! Tek-khak bô chit ê sū, Siōng-tè kı̀-jiân tùi Pa-pí-lûn ê chhiú koh hoê-ho̍k lû-thài ke, kiám oē tı̄ Lô-má lâng ê chhiú lâi bia̍t-bông i mah?! Siōng-tè tek-khak oē chín-kiù, oē kiâⁿ sı̂n-jiah, choè-kı̄n tı̄ Iû-thài kap Sat-má-lı̄-a toē-hng só͘ teh hong-siaⁿ ê kı̂-ı̄ⁿ ê jı̂n-bu̍t Iâ-so͘ kiám m̄ sı̄ hián-jiân ê tiāu-thâu?! Bô ū sian-ti chhin-chhiūⁿ I ê koân-pèng, I bat chek-pı̄ hong kap hái, kiò sí-lâng koh-oa̍h, hō͘ pái-kha, piàn-sūi ê khí-lâi kiâⁿ, chheⁿ-mê ê tit khoàⁿ-kı̀ⁿ, ta̍k só͘-chāi thoân kóng thian-kok kūn-lah, tio̍h hoé-kái, che sı̍t-chāi sı̄ Bí-sài-a ê chhut-hiān, sı̄ Í-sek-lia̍t ê ǹg-bāng!
35.巴拿: (Haiⁿ-chhan) O! o! o!
36.希百: Oh! Sı̄ sím-mı̍h??? (hoat-kiàn tio̍h, kín cháu oá-khı̀) Ū lâng tio̍h-siong tó tı̄ chia!? (khû lo̍h-khı̀ beh kā i hû) Oh, moá-sin sı̄ huih! Iáu-kú ū oa̍h ê ǹg-bāng ê khoán, goá tio̍h kín-kín lâi kiù i. (tùi i ê sin-khu tò chúi lâi chhit i ê siong, thiah phoà i ê goā-saⁿ lâi pau i ê sin-khu).
37.巴拿: (Koh haiⁿ-chhan) Oh! o! o!
38.希百: Hiaⁿ-tı̄ ah, lí cheng-sı̂n khí-lâi lah tio̍h bô?
39.巴拿: Lí sı̄ sím-mı̍h lâng? Lí sı̄ Iok-se? Á-sı̄ Siā-la̍h?
40.希百: (Kè-sio̍k teh ka pau-siong) Hiaⁿ-tı̄ ah, goá lóng m̄ sı̄ lí só͘ kóng ê lâng.
41.巴拿: Lí sı̄ Iâ-lō͘-sat-léng lâng tio̍h bô? Lí sı̄ Iû-thài lâng ê cho̍k-chhin tio̍h bô?
42.希百: Khó-lı̂n ê hiaⁿ-tı̄ ah, goá lóng bô sio̍k lí só͘ kóng ê.
43.巴拿: Goá lóng m̄-bat lí, lí sı̄ sím-mı̍h lâng?
44.希百: Goá sı̄ Sat-má-lı̄-a ê seng-lí lâng kiò choè Hi-pek, beh khı̀ Iâ-lı̄-ko choè seng-lí, chhàu-khám tùi chia keng-koè.
45.巴拿: Hâⁿ, Sat-má-lı̄-a lâng Hi-pek!?
46.希百: Hiaⁿ-tı̄ ah, lí án-choáⁿ tio̍h-kiaⁿ? (沉默) Taⁿ phah-sǹg bô iàu-kín lah, nā ū koáⁿ-kín tı̄-liâu liâm-piⁿ oē hoê-ho̍k chiah tio̍h.
47.巴拿: (起身) Lí....,lí chai goá sı̄ sím-mı̍h lâng bô? Goá sı̄ Iû-thài lâng! sı̄ Bí-ka ê kiáⁿ Pa-ná!
48.希百: (Chhiò-chhiò) Goá bô koán lí sı̄ sím-mı̍h lâng, goá chí-ū chai-iáⁿ lí su-iàu goá ê pang-chān, só͘-í goá ū gı̄-bū ài pang-chān lí, bô-lūn lí sı̄ Iû-thài lâng á-sı̄ Sat-má-lı̄-a lâng lóng sı̄ sio-siâng.
49.巴拿: Lí kiám m̄-chai Iû-thài lâng kap Sat-má-lı̄-a lâng sı̄ choa̍t-tùi bô lâi-óng ê koan-hē? Lí án-choáⁿ beh kiù goá, goá í-keng tùi lí kóng, goá sı̄ Iû-thài lâng, lí án-choáⁿ bô pàng-sak goá choè lí khı̀.
50.希百: Khó-lı̂n ê hiaⁿ-tı̄ ah, chit khoán ê phāu-oàn kiù-hun sı̄ chin thang siong-sim ê chhò-gō͘, Iû-thài kap Sat-má-lı̄-a kiám m̄ sı̄ lóng sio̍k tı̄ A-pek-la̍h-hán ê kiáⁿ-sun mah?! Kiám m̄ sı̄ lóng sio̍k Siōng-tè ê soán-bı̂n mah? Chit khoán ê phian-kiàn nā bô kái-siau, Tāi-pı̍t ê ông-kok tek-khak boē-tit koh ho̍k-heng, put-hēng kap pi-chhám tek-khak éng-oán toè tı̄ chit nn̄g ê peh-sı̀ⁿ ê téng-bı̄n.
51.巴拿: Ai-iò! ai-iò! chin thiàⁿ, chin thiàⁿ!!
52.希百: Sè-kiáⁿ ah, lí ê siong chin siong-tiōng, lí tio̍h ài khah thun-lún leh, hō͘ goá thang kā lí boah io̍h. (kā i kè-sio̍k boah io̍h)
53.巴拿: Lí chiong lí ê chiú ēng chı̄n tı̄ goá ê sin-khu, chiong lí ê io̍h lóng boah tı̄ goá ê siong-hûn, chiong lí ê saⁿ thiah-phoà lâi pau goá ê sin-thé, lí tàu-té ū sím-mı̍h ı̀-sù, goá boē thang lí-kái!
54.希百: Sè-kiáⁿ ah, chhiáⁿ lí pàng-sim hō͘ goá pang-chān lí, nā bô kiaⁿ-liáu lí ê siong oē tı̀-kàu sí, goá bô ū sím-mı̍h ı̀-sù, chí ū sı̄ lí su-iàu goá kā lí án-ni choè, āu-lâi goá oē hû-chhı̂ lí kàu Iâ-lı̄-ko ê lú-koán khı̀, lí thang tı̄ hia kè-sio̍k tı̄-liâu, kàu oân-choân hoê-ho̍k, goá oē khı̀ chhiáⁿ khah ū chhut-miâ ê i-seng lâi thoè lí i pı̄ⁿ, hia ê hùi-ēng goá oē siat-hoat lí m̄-bián khoà-ı̀. Goá iáu ū tām-po̍h sū-chêng tı̄ Iâ-lı̄-ko ê siâⁿ-goā, só͘-í goá oē chiong lí kau-thok tı̄ lú-koán ê chú-lâng kap i-seng, āu-lâi goá tùi siâⁿ-goā ê kok chng-siā tńg-lâi ê sı̂ goá oē toà lí tńg-khı̀ Iâ-lō͘-sat-léng.
55.巴拿: Lí án-choáⁿ bô chhin-chhiūⁿ tú chiah tùi chia koè hit ê chè-si kap hit ê Lı̄-bı̄ lâng lâi pàng hē goá choè lí khı̀, in-ūi lí nā án-ni choè chiah sı̄ eng-kai ê, chóng-sı̄ lí hoán-tńg ēng chit khoán lâi tùi-thāi goá, goá boē thang lí-kái!
56.希百: Ū sím-mı̍h thang hō͘ lí boē thang lí-kái? Sè-kiáⁿ ah, lí kiám bô ài sı̀ⁿ-miā mah?! Lí kiám ài án-ni bô lâng pang-chān lâi sí tı̄ chit ê chhiⁿ-chhı̀n ê só͘-chāi mah? Lí kiám bô pē-bó hiaⁿ-tı̄ mah? Lí kiám bô bó͘-kiáⁿ mah? Nā ū lí chai in án-choáⁿ teh su-liām lí, teh khoà-lū lí. Bô-lūn ū sím-mı̍h chè-si á-sı̄ Lı̄-bı̄ lâng án-choáⁿ khoàⁿ-thāi lí, goá chóng-sı̄ boē thang bô pang-chān lí, che sı̄ Siōng-tè ê chí-ı̀, sı̄ lâng-lâng ê gı̄-bū.
57.巴拿: Kám-siā lí ê hó-ı̀, To-siā lí ê pang-chān, che sı̄ tı̄ Í-sek-lia̍t ê chı̍t-kiāⁿ kı̂-sū, iā sı̄ Sat-má-lí-a lâng tiong thâu chı̍t ê iô-tāng goá ê sim-liām ê lâng.
58.希百: Lí kóng án-ni iā sı̄ tio̍h, chóng-sı̄ lí eng-kai chai-iáⁿ Í-sek-lia̍t ê tē-it kiāⁿ kı̂-sū sı̄ tùi Ná-sat-le̍k lâng Iâ-so͘ ê só͘-choè lâi khai-sí ê, khiok iô-tāng lí ê sim ê sǹg m̄ sı̄ sio̍k tı̄ Sat-má-lı̄-a lâng, eng-kai sı̄ Iû-thài lâng Iâ-so͘, in-ūi Iâ-so͘ bat ēng I ê thiàⁿ kap chin-lí, ēng I ê sí kap siū-khó͘ lâi kám-tōng goá, kám-tōng chē-chē Í-sek-lia̍t peh-sı̀ⁿ, beh hō͘ in thang koh tò-tńg kàu tı̄ khí-chho͘ ê thiàⁿ-sim.
59.巴拿: Lí só͘ kóng hit ūi Iâ-so͘ kiám m̄ sı̄ ba̍k-kang Iok-sek ê kiáⁿ?
60.希百: Sı̄! Chóng-sı̄ I khak-sı̍t sı̄ Siōng-tè só͘ èng-ún ê kiù-sè Chú Bí-sài-a! In-ūi tùi I kı̂-biāu ê koh-oa̍h thang chai....., án-ni hó, chhiáⁿ lí tó tı̄ goá ê keng-thâu, í-keng chin àm lah, lán tio̍h koáⁿ-kín chhut chit ê hiám-iàu ê soaⁿ-lāi. (hû-chhah i khí-lâi, phāiⁿ i tı̄ kha-chiah téng)
61.巴拿: Ai-iò! ai-iò! goá bô hoat-tō͘ thang tín-tāng lah, kui sin-khu lóng chin thàng-thiàⁿ.
62.希百: Chhiáⁿ lí jím-nāi, liâm-piⁿ oē kàu ūi, ēng lí ê chhiú pan tı̄ goá ê ām-kún, án-ni tio̍h, án-ni tio̍h! (kiâⁿ kúi pō͘)
63.巴拿: Sat-má-lı̄-a lâng Hi-pek, lí nā chai lí só͘ kiù, só͘ pang-chān ê lâng tùi lí só͘ phāu ê siû-oàn, m̄-chai lí oē chiàu án-ni pang-chān i, āiⁿ i tı̄ lí ê kha-chiah téng á-boē?
64.希百: Iâ-so͘ kóng lí tio̍h thiàⁿ chhù-piⁿ chhin-chhiūⁿ ka-kı̄, iā tio̍h thiàⁿ lí ê tùi-te̍k, sím-mı̍h chêng-hêng tio̍h boē thang kái-piàn goá ê sim.
65.巴拿: Sat-má-lı̄-a lâng Hi-pek, chhiáⁿ lí tāi-seng hō͘ goá chē tı̄ chit ê só͘-chāi, goá ū oē ài beh tùi lí kóng bêng.
66.希百: Lí ū sím-mı̍h tāi-chı̀ beh kóng? (pàng-lo̍h i tı̄ piⁿ kak ê chı̍t-tè chio̍h téng hō͘ i chē tı̄ hia)
67.巴拿: Goá ê sim chin kan-khó͘, goá chin chhàm-hoé goá sı̄ án-choáⁿ ê gû-gōng chhò-gō͘, chit ê chhò-gō͘ nā m̄-sı̄ tı̄ chit ê hoān-lān siū-siong ê Iâ-lı̄-ko soaⁿ-téng chhàu-khám ū tú-tio̍h lí, chiū éng-oán sı̄ bô hoat-tō͘ thang siu-sı̍p, thang kái-siau. Goá tùi-put-khí lí, chhiáⁿ lí sià-bián goá! (kūi lo̍h khı̀ pho͘ i ê kha), goá í-chêng oàn-hūn it-chhè ê Sat-má-lı̄-a lâng, chun-chiàu chó͘-sian ê cheng-sı̂n, choa̍t-tùi bô beh kap Sat-má-lı̄-a lâng kau-óng, chit ê kiù-hun iā chò chiâⁿ kin-á-jı̍t chit téng-hō ê chai-lān! Chóng-sı̄ lí hoán-tńg piáu-bêng lí ê thiàⁿ lâi pang-chān chín-kiù goá, tng goá só͘ kèng-thiàⁿ só͘ chun-tiōng ê chè-si kap Lı̄-bı̄ lâng lóng pàng-sak goá tı̄ sí toē, bô lı̂n-bín goá ê sı̂, to̍k-to̍k goá tı̄ sim-lāi só͘ iàm-chiān só͘ oàn-hūn ê, lí soà lâi kiù goá, lí m̄ nā kiù goá, lí iā ū kiù goá ê choân-ke, goá beh án-choáⁿ lâi tùi lí poê choē? Goá chin kiàn-siàu, goá chin tùi-put-khí lí, chhiáⁿ lí sià-bián goá. (háu)
68.希百: Kám-siā Chú ū kiò chhíⁿ lí ê sim, Kiù-sè Chú Iâ-so͘, ēng I ê thiàⁿ kap I ê sí lâi beh kái-piàn chit ê hú-pāi tò-hūn ê sè-kài. Tı̄ Iâ-so͘ thiàⁿ ê lāi-bı̄n bô ū kiù-hun, bô ū keh-mo̍͘h, beh hō͘ Í-sek-lia̍t ho̍k-heng, tek-khak tio̍h ū chiap-siū Iâ-so͘ ê thiàⁿ sı̄ tùi lán khai-sí, āu-lâi kàu tı̄ choân-kok, sı̄m-chı̀ kàu choân sè-kài, Iâ-so͘ ê thiàⁿ bat kám-tōng goá iô-tāng goá kái-piàn goá, chhin-chhiūⁿ án-ni lí nā chiap-siū Iâ-so͘, lí iā beh tit-tio̍h hit ê thiàⁿ ê kám-kek, iô-tāng kap kái-piàn, ǹg-bāng chit ê thiàⁿ bô kú oē cheng-ho̍k choân-kok, cheng-ho̍k choân sè-kài, hō͘ Siōng-tè ê kok kín-kín thang lı̂m-kàu tı̄ chit ê tē-chiūⁿ.
69.巴拿: Goá chin hoaⁿ-hí chiap-siū Iâ-so͘ tı̄ goá ê sim-lāi, goá iā beh hó táⁿ tùi goá ê ka-têng lâi kan-chèng chit ê thiàⁿ ê siau-sit.
70.希百: Kám-siā Chú, o-ló Chú!! Che sı̄ kı̂-biāu ê an-pâi, taⁿ hó í-keng jı̍p kiⁿ lah, lán tio̍h kín-kín chı̀n lán ê lō͘. (Hi-pek hû-chhı̂ i kiâⁿ se̍h, liáu-āu thè tiûⁿ)
-幕-
