Sèng-ke̍k tē 4 chı̍p 02

Ùi Wiki Tô·-su-kóan
 吝嗇的財主 一幕 
 人物 : 王富來(財主)、福來(雇工)、劉牧師、金葉(女婢)、老婆、乞食、老病婦、死神、匠夫。 
 場面 : 財主華麗莊美的接客廳 
 開幕 : 財主坐在他的辦事棹邊正在打算盤且用指頭算著 
 1. 財主: Saⁿ-bān kin ê chhek-á, iok sin Tâi-pè saⁿ-bān gı̂n, gō͘-bān kin ê hân-chı̂, iok sin Tâi-pè saⁿ-bān gı̂n, iûⁿ-moâ ū nn̄g-bān kin, kam-chià ū peh- bān kin...... Ai-ah kin-nı̂ sı̄ te̍k-pia̍t ê hong-siu, kám-siā Siōng-tè! Sı̍t-chāi Siōng-tè chin gâu thiàⁿ goá, hō͘ goá ta̍k-hāng lóng sūn-sū hêng-thong. (僕人福來出場) 
 2. 福來: Thâu-ke ah, hiah ê chhek-á lóng bô só͘-chāi thang hē lah, chhek-chhng lóng moá-moá lah, hiah ê hân-chı̂ lóng tı̄ goā-bı̄n teh chhoe-hong pha̍k-jı̍t, nā bô kín siat-hoat só͘-chāi lâi siu khí-lâi, kiaⁿ-liáu oē chhàu-khı̀. 
 3. 財主: Sím-mı̍h!? (bı̄n kat-kat teh siūⁿ) Ai-ah, lí chin gōng, chin pn̄g-tháng! soà Boē hiáu-tit chiong hiah ê kū chhâi-liāu the̍h lâi, ka-kı̄ tà-tà tèng-tèng leh, gōng kàu án-ni, soà Boē-hiáu phah-sǹg, ā thang chiong hiah ê pó-poè ê siu-sêng kā hē teh hō͘ pháiⁿ. 
 4. 福來: Thâu-ke ah, lí hiah-nı̍h gâu phah-sǹg, chóng-sı̄ lí oē-hiáu sǹg Boē-hiáu tı̂, hiah ê kū chhâi-liāu lóng pháiⁿ lah, koh goá iā m̄ sı̄ ba̍k- kang sai-hū, thái oē-hiáu kā lí chò cha̍p-chhe koh kiam khí-chhù, nā sı̄ khí liáu bô kian-kò͘, lâi hō͘ chha̍t ū khang-phāng lâi thau-the̍h, kiám m̄ sı̄ koh khah bô chhái. Só͘-í lí m̄-thang beh séng tò sńg pún, tio̍h khı̀ chhiáⁿ khí-chhù sai-hū, lâi hō͘ i kā lí khí chı̍t-chō chng-chō koh kian-kò͘ ê chhng-khò͘, iā hit ê kū ê chhng-khò͘ í-keng siuⁿ oe̍h koh phoà lah, tio̍h soà thiah-thiah khí-lâi lóng khí sin ê. 
 5. 財主: Sím-mı̍h, liân hit ê kū ê iā beh thiah khí-lâi!? Hit ê iáu kú oē ēng-tit, kah phah-sńg, siàu-liân lâng siūⁿ hiah ê lóng m̄ sı̄ sū, goá Boē-thang án-ni chò. 
 6. 福來: Thâu-ke ah, lí m̄ án-ni chò goá iā bô koán lí, mı̍h sı̄ lí ê, lí nā m̄-kiaⁿ sún-sit chiū bô oē kóng, chóng-sı̄ lí eng-kai chai-iáⁿ lán keh-piah Sím sian-siⁿ in ê chhek-á, tı̄ chı̍t-mı̂ ê tiong-kan hō͘ chha̍t put liáu-liáu, tı̀-kàu hiān-chāi Sím sian-siⁿ iā teh khí chı̍t-chō chng-chō ê chhng-khò͘, soà siat chı̍t ê thih-mn̂g kap toā-só, lâi beh hông-chí chha̍t-thau. 
 7. 財主: Ū iáⁿ ū chit-khoán tāi-chı̀!? (koh àⁿ-thâu teh siūⁿ) Nā sı̄ án-ni sui-jiân chin phah-sńg chóng-sı̄ bô án-ni chò iā-sı̄ chin bô ún-tàng. Taⁿ hó, taⁿ hó, lí thang kín-kín khı̀ ka kiò thô͘-chúi sai-hū lâi, koáⁿ-kín thang tāng-kang, ā thang khǹg kàu hō͘ chha̍t lâi chiap siu khı̀. 
 8. 福來: Án-ni goá lâi khı̀ kiò sai-hū lâi kap lí kè-oē it-chhè ê kang-sū.(福來siūⁿ beh 退場). 
 9. 財主: Bān-sı̄ leh! bān-sı̄ leh! Lí khı̀ tio̍h m̄ thang hō͘ chai-iáⁿ sı̄ goá chit ê hó-gia̍h lâng beh khí ê, tio̍h ka kóng sı̄ lí beh khí ê, koh lí tio̍h hō͘ chai lí sı̄ sàn-chhiah lâng, thang chhú i ê kang-chı̂ⁿ, m̄-thang hō͘ i thàn siuⁿ chē khı̀, oē hiáu-tit Boē? 
 10.福來: (Bı̄n kat-kat) Oē lah! Goá chai-iáⁿ thâu-ke lí sı̄ chin gâu phah sǹg-poâⁿ ê lâng, ū moá-tō͘ ê chhiú-toāⁿ, ài sio̍k koh ū gia̍h, toāⁿ-oáⁿ koh moá- kı̂ⁿ ê lâng. 
 11.財主: Gōng-lâng! Chı̂ⁿ pháiⁿ thàn, bô án-ni liâm-piⁿ mā phò-sán. 
 12.福來: Thâu-ke ah, lí hiah ū chı̂ⁿ, án-ni gâu phah-sǹg sı̄ beh hō͘ hó-gia̍h kàu tú thiⁿ tio̍h bô? Lí ê chı̍t-kho͘ sı̄ pí hiah ê sàn-hiong lâng ê cha̍p-kho͘ koh khah pó-poè, án-ni án-choáⁿ oē phò-sán, chhiáⁿ lí bián hoân-ló oē phò-sán lah, iau pa̍t-lâng oē tio̍h, iau lí sı̄ Boē tio̍h lah. 
 13.財主: Ke kóng oē!! Hó toā táⁿ! Lí bô siūⁿ lí ê pn̄g-oáⁿ sı̄ tı̄ goá ê chhiú-lāi, lí káⁿ phoe-phêng goá sím-mı̍h! Lí àn-sǹg beh tńg-khı̀ chia̍h ka-kı̄ sı̄ bô? 
 14.福來: Thâu-ke ah, chhin-chhiūⁿ lí chit-khoán khiû koh tàng, iau-kúi koh chāu-liām, kiaⁿ lâng phiⁿ, kiaⁿ lâng thàn siuⁿ chē, án-ni hō͘ lâng boâ kui-mê kui-jı̍t, chı̍t ge̍h-jı̍t chiah thàn 300 gı̂n, khah ke mā bô lâng kap lí toà oē tiâu, tńg-lâi chia̍h ka-kı̄ chiū tńg-lâi khı̀, ū sím-mı̍h thang him-soān! (bı̄n oa̍t piⁿ-á khı̀) 
 15.財主: Hok-lâi ah, lí teh siū-khı̀ lah tio̍h bô? (khiā khí-lâi, kiâⁿ oá i) Goá m̄-bat chhiàⁿ-tio̍h chhin-chhiūⁿ lí án-ni hiah pháiⁿ sèng-tē, lô͘-po̍k teh pháiⁿ thâu-ke, taⁿ hó lah, lí nā kè-sio̍k kā goá jı̄n-chin choè, goá mê-nı̂ chiah kā lí seng 50 gı̂n hō͘ lí, lí nā ài chı̂ⁿ tio̍h kóng, tio̍h m̄-thang ēng án-ni teh sái-phiah. Taⁿ lí koáⁿ-kín khı̀, m̄-thang phah-sńg sı̂-kan. 
 16.福來: Lí lóng sı̄ án-ni ū chē-chē chhiú-oán, iā beh suh lâng ê huih, iā beh phùi hō͘ lâng chia̍h, ūi-tio̍h lı̄-ek iā káⁿ kūi lâng, iā káⁿ pài lâng, bô lâng teh ài lí ê chı̂ⁿ, ài lí ê chı̂ⁿ khah su lâi khı̀ kā khit-chia̍h pê kha-chiah. Goá lâi-khı̀, goá liâm-piⁿ oē tńg-lâi, hō͘ lí ê sı̂-kan bô phah-sńg. (退場) 
 17.財主: (The̍h toh-téng ê mı̍h khí-lâi siak) Hńg, chhiàⁿ-tio̍h chit khoán siàu-liân lâng chin pháiⁿ phı̂-khı̀, tán-hāu nā koh chhiàⁿ ū tú-hó ê lâng, tio̍h lâi ka bián-chit, bô hō͘ i sió-khoá chia̍h-khó͘ chı̍t-ē, lóng Boē ēng-tit, choan-choan mê-kak, bô ka boâ hō͘ kim-ku̍t sı̄ Boē ēng-tit. (koh chē teh sǹg-siàu) Beh koh khí chı̍t-keng chhng-khò͘ choè-chió hān-tō͘ mā-tio̍h khai 5 bān gı̂n, sı̍t-chāi chin bô chhái, hit keng kū ê beh thiah pháiⁿ sı̄ chin phah-sńg, chóng-sı̄ í-goā tio̍h iā bô hoat-tō͘. Taⁿ phah-sǹg chit keng chhng-khò͘ nā khí hó-sè tio̍h m̄-bián koh khai sím-mı̍h chı̂ⁿ lah, án-ni ta̍uh-ta̍uh teh khai ēng chı̂ⁿ sı̄ Boē ēng-tit, kū-nı̂ chiah khí hó chit-chō toā-lâu, chı̍t-koá chı̂ⁿ lóng khai liáu-liáu, tùi taⁿ liáu-āu bô sió-khoá chek-chū khí-lâi chheng-êng hù-kùi ê seng-oa̍h sı̄ Boē ēng-tit, jı̂n-seng lóng-sı̄ ū chı̂ⁿ hióng chheng hok, bô chı̂ⁿ chiū hō͘ lâng khoàⁿ-khin.(牧師出場) 
 18.牧師: Ông sian-siⁿ pêng-an. 
 19.財主: Oh, Lâu bo̍k-su, pêng-an! Lí chin hán kiâⁿ, ū sím-mı̍h kùi-sū?! 
 20.牧師 : Bô sím-mı̍h sū, m̄-chai oē kiáu-jiáu lí á-Boē? 
 21.財主: Boē lah, Boē lah, chhiáⁿ hia chē, hia chē! (牧師 chē í) 
 22.牧師: Goá to siūⁿ kóng lí phah-sǹg sı̄ chin bô êng, thài oē hiah kú lóng bô lâi chò lé-pài, ài beh lâi kā lí thàm-an. 
 23.財主: Sı̄ lah, sı̄ lah, goá tio̍h in-ūi khí chit chō lâu soà chin bô êng, liân lé-pài-jı̍t mā lóng Boē kı̀-tit, chin sit-lé, chin sit-lé. 
 24.牧師: Hò͘, khí kàu chiah súi (koan-khoàⁿ sek-lāi) Káⁿ tio̍h khai chin chē chı̂ⁿ leh? 
 25.財主: Eng-kai tio̍h ài 70 bān chiah khí oē khí-lâi, chóng-sı̄ goá chí ū ēng 50 bān chiū ka khí khí-lâi. Ka-kı̄ kè-oē, ka-kı̄ kàm-kang, soà ka-kı̄ chò sió-kang, nā bô án-ni gâu phah-sǹg sı̄ khí Boē khí-lâi, hiah ê sai-hū chin bô hoaⁿ-hí, chóng-sı̄ lán ê chı̂ⁿ nā oē séng, mā bô kiaⁿ khı̀ tek-choē in lah! Che sı̄ kim-chı̂ⁿ ê sè-kài, m̄ sı̄ teh thàn jı̂n-chêng ê sı̂-tāi. 
 26.牧師: Ông sian-siⁿ, lí sı̍t-chāi chin chhong-bêng, lí ta̍k-hāng lóng oē, lí ê thâu-khak sı̄ te̍k-pia̍t iu-siù. 
 27.財主: Sı̄ lah, chò lâng nā bô khah khiáu, khah-sek leh, lóng mā oē khı̀ hō͘ lâng phiⁿ-khàm khı̀. Chit-má ê siā-hoē, lí mā chai-iáⁿ, nā bô put-sı̂ teh kè-kàu, put-sı̂ teh tı̄-hông, gâu ēng thâu-náu chiah Boē khı̀ hō͘ lâng chia̍h sông khı̀. 
 28.牧師: Ū iáⁿ, ū iáⁿ, lí kóng án-ni chin ū lí! Boē bián-tit Ông sian-siⁿ sı̄ chit ê toē-hng choè ū chı̂ⁿ, ū sè ê toā jı̂n-bu̍t, goán lóng chin khim-phoē lí. 
 29.財主 : Khí-kám, Khí-kám! Lí koè-thâu po-chiáng goá! 
 30.牧師: Taⁿ Ông sian-siⁿ, Siōng-tè án-ni chiok-hok lí, hō͘ lí só͘ him-bō͘ ê chhù-the̍h iā kiàn-siat liáu, m̄-chai lí oē thang lâi khı̀ chò lé-pài á Boē? 
 31.財主: Ai-ah chin khó-sioh, goá sı̄ chin bô êng chiah bô khı̀ lé-pài. Koh goá hiān-chāi teh beh koh kè-oē kiàn-tio̍k chı̍t-tòng ê chhng-khò͘, lí mā chai, bô goá chı̍t lâng sı̄ bô hoat-tō͘ thang khí ê, koh chhân-hn̂g ê sū, cheng-siⁿ ê koán-lí, lóng sı̄ chin Boē thang pàng-sim, chhiàⁿ-kang-lâng kiù-kèng sı̄ chhiàⁿ-kang-lâng, hō͘ lán sı̄ Boē thang koè-thâu sı̀n-jı̄m-tit. Goá oē lah, nā ū tú-hó ê ki-hoē goá chiū oē khı̀ chò lé-pài lah, goá sui-jiân bô teh chò lé-pài, goá mā sı̄ lóng ū teh kı̂-tó, goá nā beh khùn lóng kı̂-tó kóng, "Siōng-tè ah, kiû Lí tio̍h sù-hok tı̄ goá ê ka-têng, hō͘ goá só͘ choè ê lóng oē toā hêng-thong, hō͘ goá ê ke-hoé châi-sán lóng oē thang pêng-an, kiû Lí iā chek-hoat hiah ê pháiⁿ-lūi, ok-tóng." Goá sı̄ choa̍t-tùi Boē pàng-sak Siōng-tè lah. 
 32.牧師: Khiok lí án-ni sı̄ chin hó, chóng-sı̄.....taⁿ ke-oē mài kóng, goá lâi iáu ū chı̍t ê bo̍k-tek, chiū-sı̄ lán ê kàu-tn̂g í-keng chin kū-siùⁿ, koh bô ha̍h ēng, só͘-í koat-tēng beh koh têng khí, ūi-tio̍h án-ni ǹg-bāng sı̀n-tô͘ toā-toā chhut-la̍t, m̄-chai Ông sian-siⁿ lí oē-thang tàu hia̍p-chō͘ á-Boē? Lí sǹg sı̄ kàu-hoē lāi choè hó-gia̍h ê lâng, Siōng-tè iā án-ni chiok-hok lí, hō͘ lí ê toā-kiáⁿ iā í-keng teh beh pit-gia̍p i-choan, lí sǹg sı̄ lóng bô sím-mı̍h thoā-lūi, koh múi-nı̂ ê siu-sêng sı̄ hiah-nı̍h hong-sēng, chhiáⁿ lí chit pái tio̍h ūi-tio̍h beh pò-tap Siōng-tè, ūi-tio̍h thiàⁿ kàu-hoē lâi toā-toā chhut-la̍t. 
 33.財主: Oh, sı̄ án-ni! Goá.....goá.....goá bô, goá ê hó-gia̍h sı̄ oē khoàⁿ-tit, chóng-sı̄ Boē chia̍h-tit, chí ū goā-bı̄n teh hó khoàⁿ nā-tiāⁿ, só͘-í goá.....goá káⁿ bô hoat-tō͘ thang chò sím-mı̍h. 
 34.牧師 : Ông sian-siⁿ, che sı̄ hó sū, chhiáⁿ lí m̄-thang án-ni kóng, nā bô hiān-kim to bô iàu-kín, lí oē thang seng siá hit ê sò͘-gia̍h tı̄ chheh-nı̍h, āu-lâi nā ū piān chiah lâi ta̍uh-ta̍uh-á kiáu-la̍p chiū hó.(tùi phoê-pau-á the̍h chı̍t-pún chheh chhut-lâi) Taⁿ tı̄ chia, chhiáⁿ lí siá chı̍t-ē hó bô? 
 35.財主: Goá chit-má to khai chı̂ⁿ khai kàu lóng khang-khang lah, thái ū hoat-tō͘ thang koh kā lín chò sím-mı̍h! 
 36.牧師: Ông sian-siⁿ, che m̄ sı̄ ūi-tio̍h lâng ê só͘ choè, che sı̄ ūi-tio̍h Siōng-tè, Siōng-tè oē kı̀-liām lí ūi-tio̍h I ê só͘-choè, chit khoán ê hōng-hiàn pèng m̄ sı̄ liáu-khı̀, á sı̄ phah-sńg, sı̄ chûn tı̄ thiⁿ nı̍h, chē-chió to bô iàu-kín, chhiáⁿ lí m̄-thang the-sı̂. Siōng-tè hō͘ lí ê, kiám m̄ sı̄ Boē sǹg-tit, siat-sú Siōng-tè nā bô hoaⁿ-hí, lâi siu-hoê I ê un-tián, chiong lí ê châi-sán lóng chhian-soá hō͘ pa̍t-lâng, án-ni kiám m̄ sı̄ iáu khah khui-sún. 
 37.財主: Kiám ū chit khoán tāi-chı̀! (gông-ngia̍h, the̍h chheh lâi bı̄n-chêng, tha̍k hiah ê chhiam-miâ ê lâng kap chı̂ⁿ-gia̍h) A-hó chek-à 5000 kho͘, Hoé-lô͘ hiaⁿ 8000 kho͘, Chúi-gû-á só 10000 kho͘, (tio̍h-kiaⁿ) chit ê Chúi-gû-á só kiám m̄ sı̄ hit ê tı̄ lō͘-piⁿ teh Boē kam-chià ê koáⁿ-hū mah? I sı̄ tiòng tio̍h chiáng-kǹg tio̍h bô, á-sı̄ khioh-tio̍h ke-hoé? 
 38.牧師: Ông sian-siⁿ, lí siūⁿ chhò khı̀, chı̍t ê jia̍t-sim ê Ki-tok-tô͘ sı̄ bô bé chiáng-kǹg, iā bô tham pa̍t lâng ê chı̂ⁿ-châi. A-hó chek, Hoé-lô͘ hiaⁿ, Chúi-gû-á só lóng sı̄ chin sàn-hiong ê lâng, in lóng bô ū sím-mı̍h châi-sán, chóng-sı̄ in chin gâu thiàⁿ Chú, kap thiàⁿ Chú ê kàu-hoē, só͘-í in tı̄ bô ê tiong-kan iā hoaⁿ-hí khı̂n-khı̂n khiām-khiām lâi tàu hia̍p-le̍k tı̄ chit ê kang-chok. 
 39.財主: Khah sit-lé, goá...goá bô hoat-tō͘ thang siá, goá sûi-sı̂ the̍h hiān-kim  hō͘ lí. 
 40.牧師: Án-ni iáu khah hó. 
 41.財主: (Khı̀ khui chı̂ⁿ khò͘, the̍h chı̂ⁿ hō͘ 牧師) Goá án-ni tām-po̍h kā lín tàu kha-chhiú chiū hó, iā goá ê miâ m̄-bián kā goá pò chhut-lâi bô iàu-kín. 
 42.牧師: Chin to-siā! (chiap chı̂ⁿ lâi sǹg) 100 kho͘!! Án-ni chin to-siā, goān Siōng-tè pò-tap lí ê thiàⁿ-sim. Taⁿ chin sit-lé, goá kiáu-jián lí, goá beh lâi khı̀ lah, goān Siōng-tè kap lí saⁿ-kap tı̄-teh, pêng-an!! (牧師退場) 
 43.財主: (Toā siū-khı̀, the̍h-mı̍h khí-lâi siak) Kin-á-jı̍t sı̄ soe ê jı̍t-chí, tı̄ bô gı̂-gō͘ ê tiong-kan koh liáu 100 kho͘. Kim-hio̍h ah lâi leh! (女婢金葉出場) 
 44.金葉: Thâu-ke ah, beh án-choáⁿ? 
 45.財主: Goá tio̍h kā lí kóng kúi pah pái lah, nā ū lâng beh lâi chhoē goá, tio̍h seng ka mn̄g khoàⁿ beh án-choáⁿ, m̄-thang sûi-piān hō͘ i jı̍p lâi, lí sı̄ lóng bô teh thiaⁿ tio̍h bô!? 
 46.金葉: Thâu-ke ah, lí kóng án-ni, goá chı̍t ê lâng kiám oē thiah chò nn̄g-sin sı̄ bô? Goá iā beh chú-pn̄g, sé-saⁿ, piàⁿ-sàu lāi-bı̄n, chhı̄ cheng-siⁿ, sı̄ beh án-choáⁿ ū hoat-tō͘ thang koh khı̀ chiap-thāi múi chı̍t ê lâng-kheh? To teh bô êng kàu bô chı̍t ê sı̂-kan thang chhoán-khùi, lí mā tio̍h thé-thiap goán choè kang-lâng ê kan-khó͘. 
 47.財主: Sím-mı̍h?! Lí chò lâng ê lú-pı̄ teh kiaⁿ sím-mı̍h kan-khó͘? Tio̍h koh thé-thiap lí sím-mı̍h? Lí nā beh êng tio̍h tńg-khı̀ siâng êng, bô lâng oē chhe-ēng lí! Chóng-sı̄ lí kó-jiân beh thàn goá ê chı̂ⁿ, tio̍h siú goá ê kui-kú. Lí chai, goá in-ūi lín ê koè-sit tio̍h liáu goā chē chı̂ⁿ bô?! Chhin-chhiūⁿ án-ni chı̍t-táu-kú-á, goá í-keng liáu 100 kho͘ khı̀ lah! 
 48.金葉 : He chin kı̂! Lí liáu chı̂ⁿ kap goá ū sím-mı̍h kan-sia̍p? Hó sū lóng bô goán ê hūn, nā ū sím-mı̍h pháiⁿ-sū lóng khan-thoa goán chia lâi, hó- gia̍h lâng kúi chiam-chı̂ⁿ hō͘ lâng thàn, tio̍h hiah gâu chau-that lâng! (退場) 
 49.財主: Chin khó͘-ò͘ⁿ! chhiàⁿ-chhiàⁿ chiah ê lóng sı̄ án-ni káu-koài, gâu piān-po̍k, lóng bô beh thiaⁿ chhùi, nā ū khah hó tio̍h ka sı̂-sı̂ tiāu. (沉默片刻, āu-lâi kiâⁿ kàu 金庫, tùi 金庫 the̍h chı̍t-siuⁿ ê chı̂ⁿ chhut-lâi) Chiah ê chı̂ⁿ ná khoàⁿ ná hoaⁿ-hí, í-keng beh 10 bān lah.(chı̍t-tha̍h chı̍t-tha̍h ê chı̂ⁿ the̍h teh khoàⁿ) Chóng-sı̄ chiah ê chı̂ⁿ nā beh ka siu tı̄ chhù-lāi sı̄ kiaⁿ liáu tio̍h chha̍t-thau, koh hiān-chāi bu̍t-kè hiah-nı̍h pho-tōng, kiaⁿ liáu chiong-lâi káⁿ bé bô chı̍t-siuⁿ piáⁿ, iáu-kú nā beh ka chioh lâng lâi thàn lı̄-sek, sı̄ kiaⁿ liáu khı̀ hō͘ lâng tó khı̀, koh siā-hoē ê lâng nā oē chai-iáⁿ goá ū chek chiah chē ê chı̂ⁿ, soà lâi beh kiau-so goá mā sı̄ Boē ēng-tit, pàng khı̀ sı̄ kiaⁿ poe-khı̀, gı̄m teh sı̄ kiaⁿ liáu tēⁿ sí, siūⁿ lâi siūⁿ khı̀ lóng bô tú-hó ê hoat-tō͘ thang siat-hoat. (thiaⁿ-tio̍h ū lâng lâi, koáⁿ-kín chiong chı̂ⁿ pau hó-sè, koh siu tı̄ 金庫 ê lāi-bı̄n. 老婆出場) 
 50.老婆: Chek-à m̄-chai ū tı̄ teh bô? 
 51.財主: Sím-mı̍h lâng? Beh chhòng sím-mı̍h? 
 52.老婆: Goá lah, lín toā-só lah. 
 53.財主: (Bı̄n kat-kat) Goân-lâi sı̄ lí, ū sím-mı̍h tāi-chı̀? 
 54.老婆: Chin sit-lé, hut-jiân lâi kiáu-jiáu lí, goá ū tām-po̍h sū-chêng ài lâi pài-thok saⁿ-chek-à, lí tàu pang-bâng. 
 55.財主: Ài goá tàu pang-bâng?! Lí kiám m̄ chai-iáⁿ goá sı̄ chin bô êng! 
 56.老婆: Goá chai, goá pún-lâi sı̄ m̄-káⁿ lâi kiáu-jiáu lí, siūⁿ kóng goá chiah sàn, lâi mā hō͘ lí kiaⁿ. Chóng-sı̄ sū-chêng pek kàu, sı̀-bı̄n bô lō͘, soà Boē2 bô án-ni hó-táⁿ lâi chhoē lí sı̄ bô piàn-pō͘ lah. 
 57.財主: Taⁿ lí sı̄ ài goá kā lí chò sím-mı̍h, koáⁿ-kín kóng, m̄-bián lô͘-so. 
 58.老婆: In-ūi lín toā-hiaⁿ í-keng sí hiah kú lah, ka-têng ná lâi ná chhi-chhám, koh lín sun-á Chhiu-kùi choè-kı̄n iā tài-pēⁿ, soà Boē thang koh khı̀ thàn chı̂ⁿ, só͘-í ka-têng sı̄ hui-siông chhi-chhám, liân saⁿ-tǹg to teh Boē kò͘-tit, chū-jiân bô hoat-tō͘ thang i-tı̄ Chhiu-kùi ê sin-miā, chóng-sı̄ goán só͘ oá-khò ê sı̄ chí ū Chhiu-kùi chı̍t-lâng, i nā lâi sí, khoàⁿ goán nn̄g-ê cha-bó͘-lâng beh án-choáⁿ lâi iúⁿ-chhı̄ hit toā tı̄n ê sun-á. (háu) Saⁿ-chek-à, chhiáⁿ lí tài-liām kut-jio̍k ê chhin, the̍h 500 gı̂n lâi chioh goán, thang i-tı̄ Chhiu-kùi ê pēⁿ, goán tek-khak oē hêng-lí, soà kap lí sǹg hit ê lı̄-sek, chhiáⁿ lí khui lí ê chû-sim. 
 59.財主: Lín chit khoán sàn-kúi lâi lóng sı̄ bô hó tāi-chı̀! Goá khoàⁿ-tio̍h lí ê bı̄n goá chiū chai-iáⁿ lí sı̄ beh ài goá ê chı̂ⁿ, chóng-sı̄ goá kā lí kóng, goá bô chı̂ⁿ! ká sûi-piān, beh ài chiū oē thang ū. 
 60.老婆: Saⁿ-chek-à, goá m̄ sı̄ beh kiû lí ê siá-sı̀, sı̄ beh kā lí chioh ēng, goán tek-khak oē hêng lí, soà kap lí sǹg lı̄-sek, goán bô ı̀-sù beh khek-khui lí. 
 61.財主: Goá í-keng kā lí kóng bô chı̂ⁿ, lí sı̄ bē-hiáu thiaⁿ?! Bô lūn beh thó, á sı̄ beh chioh, nā ká bô chı̂ⁿ sı̄ ū sím-mı̍h pān-hoat? 
 62.老婆: Saⁿ-chek-à, lí cha-jı̍t kiám m̄ sı̄ chı̍t-bān gı̂n chioh jı̄-chek-à mah? In-ūi goá tú-chiah khı̀ i hia, i chiah teh kóng khí, i iā kiò goá tùi chia lâi. 
 63.財主: Jı̄-chek-à sı̄ jı̄-chek-à, lí sı̄ lí, Boē ēng-tit tâng chı̍t ê kóng-tit!! Jı̄-chek-à i ū chhân-hn̂g chhù-the̍h, goá bô kiaⁿ i, chóng-sı̄ lí ū sím-mı̍h?! Lí nā the̍h chhù-khè á-sı̄ chhân-khè lâi, khoàⁿ beh 1 bān á 10 bān, lóng mā sûi-sı̂ oē-thang èng lí ê lı̄-piān. 
 64.老婆: Saⁿ-chek-à, lí kiám m̄-chai goá chiū-sı̄ bô poàⁿ-hāng, só͘-í chiah tio̍h án-ni lâi teh kā lí kiû chêng, nā ū goán chiū m̄-bián lâi mâ-hoân lí, iā m̄-bián chiah-nı̍h chhi-chhám.(háu) Chhiáⁿ lí tài-liām lí ê toā-hiaⁿ, lâi khui lí ê chû-sim, hō͘ goán m̄-bián hām-lo̍h tı̄ choa̍t-kéng sí-lō͘. 
 65.財主: Chit-má ê siā-hoē, bô koh ū lâng teh tùi-tiōng chhin-lâng-chêng lah, ká-sı̄ chai goá ū tām-po̍h chı̂ⁿ, lín chiah ū lâi teh saⁿ-chek-á tn̂g, saⁿ-chek-á té, nā bô kiaⁿ-liáu liân sio pōng-thâu iā soà m̄-bat lán, chóng-kóng jı̍t-thâu chhiah-iāⁿ-iāⁿ, sûi lâng kò͘ sèⁿ-miā. Goá iā bô sı̂-kan thang koh kap lí tı̄ chia teh gı̄-lūn, chhiáⁿ lí kín-kín tńg-khı̀, goá chin bô êng. 
 66.老婆: Lí chiaⁿ-sı̍t choa̍t-chêng kàu án-ni, hû khí bô hû tó, chin sit-lé, kiáu-jiáu lí! (退場) 
 67.財主: Khó ò͘ⁿ kàu-ke̍k, ba̍k-chiu mn̂g sa bô khí! Khoàⁿ goá sı̄ chiah-nı̍h ká hó choán-chia̍h ê lâng tio̍h bô?! Chhut-chhut hit khoán pāi-lūi teh oè-soè sı̀-hng, soe-bái kàu-ke̍k. (koh chı̍t-pái khı̀ 開金庫, the̍h chhut chı̂ⁿ-siuⁿ khí lâi koh khoàⁿ) Ai-ah, chit-tiâu saⁿ-bān gı̂n ê chi-phiò í-keng kàu jı̍t lah, kin-á-jı̍t nā bô the̍h lâi chheng-chhó, bı̂n-á-jı̍t thang kiò Hok-lâi khı̀ ka thó. (金葉 the̍h pau-ho̍k 出場, 財主 kín siu-sı̍p chı̂ⁿ) 
 68.金葉: Thâu-ke ah, goá beh tńg-khı̀ lah, chhiáⁿ lí chiong goá ê kang-chu sǹg hō͘ goá, goá í-keng bô hoat-tō͘ thang koh toà tı̄ lín chit khoán ê chhù- lāi. 
 69.財主: Hâⁿ, lí beh tńg-khı̀!? Lí toà bô chı̍t ge̍h-jı̍t chiū beh tńg-khı̀, goá Boē thang chı̂ⁿ hō͘ lí. 
 70.金葉: Lí chit khoán bô thiàⁿ-sim ê chú-lâng, khoàⁿ chı̂ⁿ ná sı̀ⁿ-miā leh, khoàⁿ pa̍t-lâng chò gû-bé cheng-siⁿ teh khoán-thāi, goá bô hoat-tō͘ thang tam-tng, beh tńg-khı̀ kiám Boē ēng-tit? 
 71.財主: Goá bô koán lí tńg khı̀, chóng-sı̄ goá chhiàⁿ lí sı̄ chiàu ge̍h sǹg ê, lí toà bô kàu chı̍t ge̍h-jı̍t, goá Boē-thang chı̂ⁿ hō͘ lí! 
 72.金葉: Lí án-ni le̍k-sek lâng, pak-siap lâng, phiⁿ-khàm lâng teh hó-gia̍h ū sím-mı̍h lō͘-ēng, chhin-chhiūⁿ lí chit khoán chı̂ⁿ-lô͘ ê chı̂ⁿ, goá iā m̄ ài tı̍h, siá-si lí, bô iàu-kín, hō͘ lí chek hō͘ chē-chē, thang seⁿ thâng. (退場) 
 73.財主: Chiān-pi, hó toā-táⁿ, káⁿ hiah-nı̍h bô lé-sò͘! (沉默) Gōng-lâng, nā koh kap goá kè-kàu chı̍t-ē, goá chiū àn-sǹg beh the̍h tām-po̍h hō͘ i, hō͘ goá tı̄ bô gı̂-gō͘ ê tiong-kan koh séng tām-po̍h chı̂ⁿ khí lâi. Chóng-sı̄ taⁿ beh án-choáⁿ phah-sǹg? Kim-mê hng ê pn̄g sím-mı̍h lâng beh chú ah? Sı̍t-chāi ū hùi-khı̀ lah!(福來出場) 
 74.福來: Thâu-ke ah, hit ūi sai-hū kim-mı̂ chiah beh lâi kap lí chham-siông kang-sū. 
 75.財主: Hâⁿ, lí gōng kàu án-ni, chiaⁿ-sı̍t tiau-tı̍t kàu án-ni! Goá tio̍h kā lí hoan-hù kóng m̄-thang hō͘ chai-iáⁿ sı̄ goá beh khí ê, án-choáⁿ lí beh hō͘ i lâi chia kap goá chham-siông! Nā bô, káⁿ siūⁿ kóng goá hiah hó-gia̍h, beh lâi siàu-siūⁿ goá ê chı̂ⁿ. Ai-ah, lí chit ê gōng-lâng, goá oē hō͘ lí khı̀-sí, lí án- choáⁿ bô kóng sı̄ lí beh khí ê, hō͘ i kàu lín tau khı̀ chham-siông? 
 76.福來: Thâu-ke ah, lí m̄-thang siūⁿ kóng tāi-ke lóng sı̄ kap lí siāng-khoán, Boē lah, bô lâng teh siàu-siūⁿ lí ê chı̂ⁿ lah, lí m̄-bián hiah-nı̍h kiaⁿ-sim lah. Lí hiah-nı̍h hó-gia̍h, sió-khoá hō͘ lâng phiⁿ, mā bô sím-mı̍h iàu-kín, lâng ū ê to teh chín-chè sòng-hiong lâng leh, lí m̄-thang hiah-nı̍h kiaⁿ-sim lah. 
 77.財主: Sı̄, goá chin kiaⁿ-sim, goá nā bô án-ni teh lô-sim khó͘-chiat kè-kàu chiah ê châi-sán, goá nā chia̍h-lāu beh án-choáⁿ? Goá ê kiáⁿ-sun nā put-hàu beh koh oá-khò sím-mı̍h? Lâng chiū-sı̄ ū chı̂ⁿ chiah ū chun-kùi, ū chı̂ⁿ kóng, sái-kúi mā oē e-bō͘, hoah-chúi kóng mā oē kian-tàng, nā bô chı̂ⁿ tio̍h hō͘ kiáⁿ-sun khoàⁿ-khin, hō͘ lâng iàm-chiān, nā ū chı̂ⁿ, kiáⁿ-sun tio̍h ho̍k-chiông lán, goā-lâng mā m̄-káⁿ khoàⁿ-khin lán, ū chı̂ⁿ chiah oē-thang tı̄ chit ê sè-kan, tı̄ lâng ê tiong-kan chiàm pan-gı̂ ê ūi. Koh sū-sı̍t-siōng ū chı̂ⁿ chiah oē thang chheng-êng, hióng-lo̍k chit ê sè-kan, lí gōng-gōng lóng m̄-chai chı̂ⁿ ê pó-poè! 
 78.福來: Thâu-ke ah, lí chí ū chai-iáⁿ kim-chı̂ⁿ ê pó-poè, chóng-sı̄ m̄ chai-iáⁿ chêng-gı̄ ê kè-ta̍t. Lí hiah ū chı̂ⁿ chóng-sı̄ Boē-hiáu beh án-choáⁿ choè lâng, chiū ko͘-hū lí ê pù-ū, lâng tı̄ chit sè-kan, nā pa̍t-lâng lóng sí liáu-liáu, kan-taⁿ lí oa̍h-teh iā tek-khak chin bô chhù-bı̄. Lâng eng-kai saⁿ-thiàⁿ lâi tô͘-bô͘ jı̂n-lūi ê hēng-hok, ū chı̂ⁿ ê lâng sı̄ choè ū ki-hoē, hō͘ i thang khı̀ piáu-bêng i ê thiàⁿ-sim. Lán lâng tı̄ sè-kan, put-kò sı̄ chiām-sı̂, hô-khó͘ tio̍h hiah gâu kè-kàu, hiah gâu khoà-lū chiong-lâi ê sū, tı̀-kàu hō͘ chē-chē lâng ūi-tio̍h lán lâi siū khek-khui? Khiáu--ê chia̍h gōng--ê, ū--ê chia̍h bô--ê, tùi án-ni hō͘ chit ê jı̂n-lūi siā-hoē put-sı̂ tio̍h chhiong-moá put-hēng kap pi-chhám, lán ê sı̀ⁿ-miā kó-jiân bô goā-kú, lán mā tio̍h sí hō͘ lâng ū só͘ thang siàu-liām lán, m̄-thang sí hō͘ lâng hoaⁿ-hí phah-chhiú, chhàu-miâ lâu kàu bān-kó͘. Siat-sú Siōng-tè nā tiàu lán ê lêng-hûn, lán ê chhù-the̍h, ke-gia̍p, chı̂ⁿ-châi kiám m̄ sı̄ lóng tio̍h pàng-lı̄ tı̄ chit ê sè-kan, kui-sio̍k tı̄ pa̍t-lâng ê chhiú? 
 79.財主 : Lí teh kóng sím-mı̍h!? Lí sı̄ teh tùi goá soat-kàu tio̍h bô? Lí kā goá kóng-khí hit khoán pháiⁿ chhái-thâu ê oē! Hó, goá tek-khak beh hō͘ lí tńg khı̀ chia̍h ka-kı̄! Kā goá cháu-khui! (福來退場,財主 chin iu-ut, tı̄ hia teh徘徊) Goá ê chı̂ⁿ kiám oē lı̄-khui goá, khı̀ lo̍h tı̄ pa̍t-lâng ê chhiú mah?! (koáⁿ-kín koh cháu-khı̀ the̍h chı̂ⁿ-siuⁿ lâi phō teh) Siat-sú Siōng-tè nā tiàu goá ê lêng-hûn, chiah ê chhù-the̍h, ke-gia̍p, châi-sán, kiám iáu oē tit thang pó-siú tı̄ teh mah? Chí ū goá chı̍t lâng nā lı̄-khui chit ê sè-kan, it-chhè tek-khak lóng oē hun-soàⁿ khı̀. Nā sı̄ án-ni goá ê ló͘-le̍k, goá ê kè-kàu lóng kui tı̄ khang-khang. (koh 徘徊) Khó-phàⁿ ê sí! Goá ēng chı̂ⁿ ê koân-le̍k kiám Boē thang cheng-ho̍k sí mah? Boē! Boē! Choa̍t-bāng, oân-choân ê choa̍t-bāng! Goá bô hoat-tō͘ thang koh siūⁿ chit ê sū, goá ài chı̂ⁿ, che sı̄ choa̍t-tùi ê goân-chek, (lám chı̂ⁿ teh 徘徊)bô lūn sí,lí kim-mê beh kàu tı̄ goá, goá iā sı̄ bô pàng-sak goá ê chı̂ⁿ-châi. (Koh kiâⁿ se̍h, liáu-āu bong i ê sim-thâu) Goá kám-kak sim-thâu chin bô sóng-khoài, thâu-khak iā chin kò-iūⁿ, (koh khı̀ chē teh) Hok-lâi ah, Hok-lâi ah!! (福來出場) 
 80.福來: Thâu-ke ah, ū sím-mı̍h tāi-chı̀? 
 81.財主: Lí khı̀ io̍h-kio̍k kā goá the̍h tām-po̍h tı̀n-chēng ê io̍h lâi hō͘ goá, soà phâng chı̍t-poe chúi lâi. 
 82.福來: Hó, goá lâi-khı̀.(退場) 
 83.財主: Sí kiám chin-chiàⁿ oē lı̂m-kàu tı̄ goá mah? Chóng-sı̄ iáu ū sím mı̍h pa̍t ê sū-sı̍t pí sí, khah khak-sı̍t oē kàu tı̄ goá! Khó-lı̂n ê Ông Pù-lâi! Lí ê lô-khó͘, lí ê kè-kàu beh kui tı̄ khang-khang. (福來出場) 
 84.福來: Thâu-ke ah, io̍h kap chúi the̍h lâi lah, thâu-ke ah, lí án-choáⁿ bı̄n-sek hiah-nı̍h chhiⁿ-pe̍h? 
 85.財主: Lí kā goá cháu-siám, goá í-keng hō͘ lín liân-lūi kàu chin thiám lah, goá beh tām-po̍h hioh-khùn.(福來退場,財主服藥liáu-āu,phak tı̄ toh- téng teh khùn). (消電,用音樂表明淒暗幽靜,照青綠色的色燈在財主身上,場上已有一個形容醜陋可怕的老乞食站在財主身邊.) 
 86.乞食: Ông Pù-lâi, chhiáⁿ lí khui lí ê chû-sim, lâi khó-lı̂n siá-sı̀ tām-po̍h hō͘ goá. 
 87.財主: (醒起了,吃大驚,緊抱他的錢箱)Lí sı̄ sím-mı̍h lâng? Án-choáⁿ jı̍p lâi goá chia? 
 88.乞食: Goá sı̄ chı̍t ê pi-chhám kàu-ke̍k, sı̀-bı̄n choa̍t-lō͘ ê khit-chia̍h, chhiáⁿ lí lı̂n-bín lâi siá-sı̀ goá! 
 89.財主: Sím-mı̍h, siá-sı̀ lí? Lí sı̄ ài goá ê chı̂ⁿ tio̍h bô? (吃驚抱錢箱退後) 
 90.乞食: Sı̄ lah, goá chin ài lí ê chı̂ⁿ, goá su-iàu lí ê chı̂ⁿ, chí ū lí ê chı̂ⁿ chiah oē thang lâi kái-koat goá ê pi-chhám! 
 91.財主: Lí teh siàu-siūⁿ goá ê chı̂ⁿ, goá Boē tàng hō͘ lí, chiah ê chı̂ⁿ sı̄ goá ê, lí kā goá cháu-khui! 
 92.乞食: Goá Boē thang cháu! Goá beh phoê-miā kap lí cheng-chhú, in-ūi hiah ê chı̂ⁿ sı̄ koan-hē tı̄ goá ê oa̍h-mı̍h, hiah ê chı̂ⁿ sı̄ goá ê, hiah ê chı̂ⁿ sı̄ goá ê! Lí suh lâng ê huih chia̍h lâng ê bah! 
 93.財主: (一直退後,乞食伸手迫近之) Lí chit ê pháiⁿ-lūi, chha̍t-thâu! Goá ê chı̂ⁿ Boē tàng hō͘ lí! 
 94.乞食: Lí chiah sı̄ chha̍t-thâu, chèng-lâng ê tùi-te̍k, siā-hoē ê hāi-thâng, Siōng-tè ê chiù-chó͘ lı̂m kàu tı̄ lí lah! (財主恐懼被乞食迫而退場,2人完全退場) 
 95.財主: (在幕後)Lí sı̄ sím-mı̍h lâng? Lí chhoē goá beh chhòng sím-mı̍h. (財主再被一個白髮形容可怕的老病婦人壓迫出場) 
 96.老婦人: Ông Pù-lâi, chhiáⁿ lí khó-lı̂n goá chit ê pi-chhám kàu-ke̍k ê lāu hū-jı̂n-lâng, goá sin-thé tài tāng-pı̄ⁿ, bô hoat-tō͘ thang siū i-tı̄. 
 97.財主:Lí ê pēⁿ-thiàⁿ, lí ê pi-chhám kap goá ū sím-mı̍h kan-sia̍p? (退後,老婦人伸手迫之) 
 98.老婦人: Ū, goá ê pi-chhám chí ū lí oē thang kā goá kái-koat, lí ê chı̂ⁿ khǹg teh seⁿ thâng, seⁿ sian, chóng-sı̄ lí kiám bô lı̂n-bín goá! Chhiáⁿ lí ê chı̂ⁿ pun hō͘ goá! 
 99.財主: Boē ēng-tit, goá ê chı̂ⁿ Boē ēng-tit hō͘ lí, lí kā goá cháu khui, kā goá chhut-khı̀! 
 100.老婦人: (威脅他說)Lí kiám bô thiaⁿ Sèng-keng án-ni kóng, Pù-lâng beh jı̍p thian-tông sı̄ pí lo̍k-tô beh chhng-koè chiam-phı̄ⁿ koh-khah oh-tit. Iā kóng, lín pù-lâng tio̍h ūi-tio̍h beh kàu tı̄ lín ê khó͘-lān lâi thı̂-khàu âu-kiò. Lín ê chı̂ⁿ-châi í-keng pāi-hoāi, lín ê i-chiûⁿ tio̍h chiù-thâng. Lín ê kim-gı̂n siⁿ sian, hit ê sian beh choè kan-chèng lâi kong-kek lín, iā beh chia̍h lín ê bah chhin-chhiūⁿ hé sio. (財主被迫再由一端退場老婦人隨而退之) 
 101.財主: (在幕後) Lí...., lí sı̄ sím-mı̍h lâng!? Sı̄..., sı̄ sím-mı̍h iau-koài, sı̄ sím-mı̍h pháiⁿ-mı̍h?! Goá..., goá kap lí ū sím-mı̍h kan-sia̍p!! (財主再被一個黑束裝,被黑大衣,覆黑頭布,面部愴白可怕,腰束草帶的死神壓迫而出場) 
 102.死神: (壯重的聲音)Goá chiū-sı̄ sí-sı̂n, hōng Siōng-tè ê bēng-lēng beh lâi chhoā lí kàu tı̄ sí-bia̍t ê chhim-kheⁿ. 
 103.財主: Sím-mı̍h? Sí-sı̂n! Oh, thang kiaⁿ ê hêng-iông! Oh, goá m̄-káⁿ khoàⁿ lí, goá ê gó͘-thé lóng chín-tōng, goá ê sı̂n-hûn in-ūi kiaⁿ-hiâⁿ beh siau- soàⁿ khı̀, chhiáⁿ lí m̄-thang oá-kūn goá! Lí sı̄ bān-put-hēng ê put-hēng, sı̄ pi-chhám tiong ê pi-chhám. Lí sı̄ choè toā ê phò-hāi chiá! 
 104.死神: Ông Pù-lâi, lí siūⁿ beh tô-siám goá mah? Bô lâng oē thang tô-siám goá, bān-put-hēng ê put-hēng, pi-chhám tiong ê pi-chhám tek-khak put-sı̂ tio̍h tı̄ lâng ê mn̂g-kháu teh tán-hāu. Tng lâng teh tek-ı̀, lâng ūi ka-kı̄ pı̄-pān chē-chē seng-chûn ê tiâu-kiāⁿ ê sı̂, goá iā oē hut-jiân kàu i hia, i ê thòng-khó͘ kap choa̍t-bāng beh pí hiah ê lóng bô ūi ka-kı̄ pı̄-pān sím-mı̍h seng-chûn ê tiâu-kiāⁿ ê lâng koh khah toā. Só͘-í Sèng-keng kóng, lâng nā tit-tio̍h choân sè-kài lâi sit-lo̍h i ê sı̀ⁿ-miā ū sím-mı̍h lı̄-ek. Ông Pù-lâi, lí ài sè-kan ê chı̂ⁿ-châi iâⁿ-koè lí ê sı̀ⁿ-miā mah? 
 105.財主: Bô, bô, goá iā ài goá ê sı̀ⁿ-miā, ūi-tio̍h goá ê sı̀ⁿ-miā ê hēng-hok, goá chiah ài sè-kan ê chı̂ⁿ-châi. 
 106.死神: Lí kiám bô thiaⁿ-kı̀ⁿ kóng, bô lâng oē ho̍k-sāi nn̄g ê chú-lâng, in-ūi i oē oàn-hūn chit ê, thiàⁿ hit ê; lín Boē oē ho̍k-sāi Siōng-tè soà ho̍k-sāi chı̂ⁿ-châi. Ông Pù-lâi, lí kı̀-jiân tham-ài sè-kan ê chı̂ⁿ-châi bu̍t-chit, chí ū kò͘ lí ka-kı̄, ngē lí ê sim khek-po̍k pa̍t-lâng, lí bô hoat-tō͘ thang tô-pı̄ Siōng-tè ê sím-phoàⁿ lah. Lí beh tı̄ éng-oán ê bia̍t-bông tiong lâi thòng-khó͘ pi-chhám. 
 107.財主: Chhiáⁿ lí bān sı̄ lâi leh! Án-ni goá Ông Pù-lâi kiám m̄ sı̄ thài khó-lı̂n, goá iáu Boē hióng-siū sím-mı̍h hù-kùi ê hoaⁿ-hí, chí ū tùi taⁿ khí chiah siūⁿ beh sió-khoá lâi hióng-hok chı̍t-ē, khiok bô gı̂-gō͘ Siōng-tè hiah kín chiū beh tiàu goá lêng-hûn, án-ni kiám m̄ sı̄ thài khó-lı̂n, thài chân-jím. 
 108.死神: Lí kiám bô tha̍k-tio̍h Sèng-keng án-ni kóng "In-ūi lâng ê oa̍h-miā put-chāi i só͘ chek-chū ê hong-sēng", koh kóng "Lâng ē oa̍h, m̄-nā oá-khò piáⁿ, chiū-sı̄ oá-khò tùi Siōng-tè ê chhùi só͘ chhut lóng-chóng ê oē." Sí put-sı̂ tio̍h tı̄ lâng ê mn̂g-kháu teh tán-hāu. 
 109.財主: Oh, khó-lı̂n ê Ông Pù-lâi, lí it-seng lô-khó͘,tio̍h-boâ, khı̂n-khiām, kè-kàu, taⁿ hiah ê lô-khó͘ lóng beh kui tı̄ khang-khang. Chhiáⁿ lí, chhiáⁿ lí khó-lı̂n goá chit ê Ông Pù-lâi, ū lô-lo̍k, chóng-sı̄ lóng iáu Boē hióng-siū leh, mā tio̍h iông-ún goá koh oa̍h kúi cha̍p-nı̂-à, chhiáⁿ lí lı̂n-bín goá, m̄-thang oá-kı̄n goá! 
 110.死神: Gōng lâng, lí siūⁿ Siōng-tè nā siu-hoê I ê un-tián, lí ū hoat-tō͘ thang ke oa̍h chı̍t sı̂ khek mah? 
 111.財主: Goá ê chı̂ⁿ hō͘ lí, goá ēng goá pó-poè ê chı̂ⁿ lóng hō͘ lí, chhiáⁿ lí lâu goá ê oa̍h-miā! 
 112.死神: Lí ēng lí ê chı̂ⁿ kiám-chhái oē thang bé-siu lâng ê sim, oē thang khı̀ koán-lí sè-kài ê chē-chē-lâng, oē-thang chò chē-chē tāi-chı̀, chóng-sı̄ tùi tı̄ Siōng-tè kok hiah ê put-kò sı̄ tı̂n-ai, chē-tái. Lí ēng lí ê chı̂ⁿ iā bô hoat-tō͘ thang bé lí ê sı̀ⁿ-miā, lí ê chı̂ⁿ Boē thang kiù lí! 
 113.財主: Chhiáⁿ lí thêng chhiú,m̄-thang lâi lia̍h goá! Goá chin kiaⁿ sí! goá m̄-káⁿ khı̀,(錢箱 lóng 拋在地上) Oh, sím-mı̍h oē thang kiù goá ê sı̀ⁿ-miā!? 
 114.死神: Siōng-tè án-choáⁿ hó khoán-thāi lí, sù-hok tı̄ lí, sı̄ ài lí ēng chit ê ki-hoē khı̀ lı̂n-bín lâng,pang-chān lâng, êng-kng Siōng-tè, bô phah-sǹg lí chiong Siōng-tè ê un-sù lâi khàm-ba̍t khí-lâi, hoán-tńg le̍k-sek lâng, pak-siap lâng, phiⁿ-khàm lâng, suh hiah ê sòng-hiong lâng ê huih-koāⁿ lâi teh boán-chiok lí ê su-io̍k, taⁿ Siōng-tè tek-khak beh siàu-liām lí it-chhè bô thiàⁿ-sim ê seng-oa̍h lâi hêng-hoa̍t lí. 
 115.財主: Ai-ah, goá chin kiaⁿ, goá bô ài sí lah! Kiù lâng leh ò͘! Kiù lâng leh ò͘! (照光消滅,而後死神退場,電光復元時,財主如長臥在棹上,在他身邊匠夫站立著) 
 116.匠夫: (財主還在夢中叫救命)Thâu-ke ah, lí sı̄ án-choáⁿ leh? kui-sin tāng-koāⁿ, teh kiò kiù-miā, sı̄ teh chò bāng tio̍h bô? 
 117.財主: (醒起來 chin kiaⁿ, chin chhoán)Oh, goá bô sí tio̍h bô?! Goá, goá sı̄ teh chò bāng tio̍h bô? Á-sı̄ Siōng-tè ū lı̂n-bín goá, koh lâu goá ê oa̍h-miā leh?! Lí sı̄ sím-mı̍h lâng? Lí sı̄ sí ê chhe-sài tio̍h bô? 
 118.匠夫: Thâu-ke ah, lí sı̄ teh kóng sím-mı̍h? Goá sı̄ khí chhù ê sai-hū lah, lí kiám m̄ sı̄ kóng beh khí chhng-khò͘ mah? 
 119.財主: Oh, lí sı̄ Sai-hū tio̍h bô, lí lâi chin tú-hó! Kám-siā Siōng-tè, hó ka-chài lí ū lâi chia, nā bô goá chı̍t-miā káⁿ tio̍h o͘-o͘ ai-chài, Taⁿ chhiáⁿ lí kā goá thı̂n chı̍t-poe léng-chúi lâi hō͘ goá. (匠夫khı̀ tò chúi, phâng lâi hō͘ i, 財主lim i) 
 120.匠夫: Thâu-ke ah, lí chit pái kóng beh khí chhng-khò͘, Hok-lâi ah, khı̀ teh kiò goá, goá goân-lâi sı̄ bô ài ín lí ê khang-khoè, in-ūi lâng-lâng lóng chai-iáⁿ lí sı̄ tē-it hó gia̍h, khiok iā sı̄ tē-it tàng-sng koh sı̄ chin lo-so, só͘-í goá seng ài lâi kap lí kóng tiâu-kiāⁿ, chiū-sı̄ tû-khı̀ lí ū siong-tong ê kè-chı̂ⁿ hō͘ goán thàn, koh m̄-thang tı̄ hiān-tiûⁿ lo-so, goá chiah beh tap-èng lí. In-ūi sòng-hiong lâng sı̄ thàn-chia̍h thàn-chia̍h hō͘ lí án-ni kā goán lo-so, liân thàn chúi lim to bô! 
 121.財主: Sai-hū ah, lí chò lí kā goá khí, m̄-bián koh khoà-lū it-chhè ê sū, goá tek-khak oē chiàu lí só͘ kóng ê khı̀ kiâⁿ. 
 122.匠夫: Thâu-ke--ah, goá chai-iáⁿ lí ê lâng chin khiáu koh chiàm pân-gı̂, só͘-í ēng kóng ê Boē an-sim, chhiáⁿ lí tio̍h kap goá siá tı̄ choá siōng. 
 123.財主: Sai-hū ah, hô-khó͘ tio̍h án-ni mâ-hoân.....chóng-sı̄ hó, lí nā Boē an-sim iā oē-thang chiàu lí án-ni choè. 
 124.匠夫: Thâu-ke ah, lí piàn chin hó chham-siông, goá kám-kak lâi ū ta̍t bo̍k-tek. 
 125.財主: (Kiò 福來) Hok-lâi ah, Hok-lâi ah! (福來出場) 
 126.福來: Thâu-ke ah, lí kiò goá beh án-choáⁿ? 
 127.財主: Goá ū tāi-chı̀ ài lí koáⁿ-kín kā goá chò, (到金庫拿錢出來), lí chiong chit bān gı̂n ê 支票 the̍h khı̀ hō͘ bo̍k-su, kóng sı̄ beh chò kiàn-tn̂g ê lō͘- ēng, soà kóng goá āu-lâi oē koh phah-sǹg, koh chiong chit chheng kho͘ the̍h khı̀ hō͘ goá ê toā-só, kā i kóng m̄-bián hêng, nā khiàm-ēng chiah koh lâi. Koh chit saⁿ-pah kho͘ the̍h khı̀ hō͘ Kim-hio̍h, ka kóng sı̄ i ê ge̍h-hōng, soà kā i kóng, thâu-ke beh tùi i chhē put-chū, ǹg-bāng i oē-thang koh lâi choè kang. 
 128.福來: (Chin gōng-gia̍h)! 
 129.財主: Koh lí nā khı̀ bo̍k-su hia ê sı̂ soà ka kóng, goá tùi chit lé-pài khí, tek-khak oē thang khı̀ chò lé-pài, án-ni hó chhiáⁿ lí khı̀. 
 130.福來: Thâu-ke ah, lí sı̄ án-choáⁿ?! Lí ū chhéⁿ khí-lâi á-bô? Lí án-ni choè ū thò-tòng á-bô? In-ūi goán chóng m̄-bat khoàⁿ-kı̀ⁿ lí ū chit khoán ê tō͘-liōng. 
 131.財主: Hok-lâi ah, goá ū chhéⁿ, goá khak-sı̍t tú chiah chiah chhéⁿ khí-lâi. Í-chêng goá sı̄ chin ài chı̂ⁿ, in-ūi goá chin ài goá ka-kı̄, goá it-chhè ê cheng-sı̂n kap kong-im lóng sı̄ ūi-tio̍h sè-kan ê chı̂ⁿ-châi lâi bô êng, taⁿ goá chai-iáⁿ lâng nā ná ài ka-kı̄, ná kò͘ i ka-kı̄ ê sı̀ⁿ-miā, hoán-tńg sı̄ oē sit-lo̍h i, koh lâng ê oa̍h m̄ sı̄ oá-khò bu̍t-chit, sı̄ oá-khò Siōng-tè ê oē, goá chai-iáⁿ chit ê jı̂n-seng tû-khı̀ chiong-lâi ê tit-kiù, sı̄ chin khang-hi bô kè-ta̍t. Goá in-ūi koè-khı̀ kiâⁿ tio̍h chhò lō͘, só͘-í Boē thang tit-tio̍h lâng ê hoaⁿ-hí, lâng-lâng lóng chiù-mē goá, tùi goá phùi chhùi-noā, goá lóng chai-iáⁿ, chóng-sı̄ goá ǹg-bāng tùi chit-tia̍p khí goá oē-thang chò chı̍t ê tit jı̂n-hô, iā sı̍t-chāi ū thiàⁿ-sim ê seng-oa̍h. In-ūi ūi ka-kı̄ ê tio̍h-boâ lóng beh kui tı̄ khang-khang. To̍k-to̍k thiàⁿ-sim ê seng-oa̍h kap hāu-kó lóng Boē bô khı̀, beh éng-oán chiâⁿ chò súi ê bián-liû tı̀ tı̄ lán ê thâu-khak téng lâi hoat-kng. 
 132.福來: Thâu-ke ah, goá pún-lâi àn-sǹg bı̂n-á-jı̍t chiū beh lâi sı̂ chit lah, taⁿ, taⁿ goá chin hoaⁿ-hí koh toà tı̄ chia, goá iā koat-tēng beh koh khah chı̄n sim, chı̄n la̍t lâi hōng-sū tı̄ lí ê ke. 
 133.匠夫: Thâu-ke ah, taⁿ chhiáⁿ lí m̄-bián siá sím-mı̍h bô iàu-kín lah, goá í-keng bêng-pe̍k oē-thang sı̀n-jı̄m lí lah, goá iā oē chı̄n pún-hūn khı̀ thoè lí chò kang, chhiáⁿ lí thang kau-tāi goá. 
 134.財主: Lâng nā hoé-kái liáu-āu choân sè-kài oē pı̀ⁿ-chiâⁿ chı̍t-khoán súi koh sio-lō ê só͘-chāi! Thiàⁿ ê kng í-keng chiò tı̄ lán ê sim-lāi, hō͘ goá seⁿ-chhut chin toā ê hoaⁿ-hí kap kám-kek.(向眾人) 
 Lia̍t-ūi hiaⁿ-ché, Siōng-tè sı̄ thiàⁿ, Siōng-tè sı̄ jı̂n-chû, I án-choáⁿ siông-siông teh koan-sim hiah ê loán-jio̍k bô oá-khò ê lâng, choân Sèng- keng ê lāi-bı̄n ū goā chē kà-sı̄, sı̄ teh kiò lâng tio̍h tùi thiàⁿ lâng lâi piáu-bêng thiàⁿ Siōng-tè, chí ū thiàⁿ ê só͘ choè oē-tit thang toè lán jı̍p tı̄ Siōng-tè ê kok, kı̂-thaⁿ bô chı̍t-hāng oē-thang toè lán kàu éng-seng ê só͘-chāi. It-chhè lóng tio̍h pàng hē tı̄ chit ê sè-kan. Chhiáⁿ lán tāi-ke koh khah chhut-la̍t tı̄ thiàⁿ Siōng-tè kap thiàⁿ lâng ê seng-oa̍h. (三人輪唱 "Hō͘ lâng ê pí the̍h ê khah ū hok-khı̀" 吟二四) 
 -完幕-