Sèng-tàn-chhiū ê Lâi-le̍k
Tùi Bân-lâm Sèng-hoē-pò tiah-lio̍k Tng Iâ-so͘ chhut-sı̀ tı̄ Pek-lı̄-hêng ê sı̂, sı̀n Siōng-tè ê lâng lóng m̄-chai Sèng-tàn-chhiū sı̄ sím-mı̍h sū. Hit sı̂-chūn chhut-sı̀ ê gín-ná ba̍k-chiu ê hok-khı̀, iā bô chhin-chhiūⁿ hiān-kim ê gín-ná só͘ hióng-siū ê toā. Chhâ-khó Iâ-so͘ ê pē-bó tng-jı̍t ê chêng-kéng chin-chiàⁿ sòng-hiong. I chhut-sı̀ ê só͘-chāi m̄-sı̄ hông-kiong, chiū-sı̄ bé-tiâu. Iâ-so͘ só͘ khùn ê chhn̂g, m̄-sı̄ chhu phòng-phoē ê iô-chhn̂g; chiū-sı̄ chhiong-moá tiū-chháu ê bé-chô. Iâ-so͘ ê ke sui-jiân sı̄ chiah kan-khó͘, chiah pi-bı̂, I khiok sı̄ Siōng-tè to̍k-siⁿ ê kiáⁿ, pàng-sak thiⁿ-téng ê pó-chō, kàng-lo̍h sè-kan choè lâng, tiàm tı̄ choē-ok koàn-boán choē-jı̂n ê tiong-kan, ēng Siōng-tè ê toā thiàⁿ-thàng lâi kà-sı̄ sè-kan lâng. Tng Iâ-so͘ chhut-sı̀ hit-jı̍t, thiⁿ-téng bat ū chin-chē thiⁿ-sài cho͘-chit gı̂m-si pan, gı̂m chin-chē hó-thiaⁿ ê si, hō͘ Pek-lı̄-hêng siâⁿ ê lâng thiaⁿ; kı̂-tiong tē-it hó-thiaⁿ ê chı̍t-siú chiū-sı̄, “Tı̄ téng-bı̄n êng-kng kui Siōng-tè, tē-bı̄n hô-pêng, lâng tit-tio̍h in-tián.” Hit-sı̂ tiàm tı̄ khòng-iá kò͘-iûⁿ ê lâng, thiaⁿ-kı̀ⁿ thiⁿ-sài hoaⁿ-hí ê koa, to iā bô se̍h chı̍t châng Sèng-tàn-chhiū chē--teh khèng-chiok Sèng-tàn; in chí-ū sı̄ pàng-hē in só͘ kò͘ ê iûⁿ-kûn, koáⁿ-kín lo̍h-khı̀ Pek-lı̄-hêng chhoē chit-ūi sin chhut-sı̀ ê Ông. In chhoē-tio̍h Iâ-so͘ ê sı̂-chūn, chiū phak-teh pài I. Tı̄ hit-sı̂ to iā bô lâng siūⁿ kàu Sèng-tàn-chhiū chit ê sū. Chiàu liû-thoân Sèng-tàn chhiū sı̄ tùi sím-mı̍h sı̂ chiah ū neh? Chhâ-khó Iâ-so͘ Ki-tok kàng-seng āu 732 nı̂, tı̄ Jı̍t-jíⁿ-bān (Tek-kok) ū chı̍t ê sèng-jı̂n miâ Ui-but-lia̍t(Saint Wilfred). I chhoā chı̍t tı̄n chè-si beh khı̀ chhoē hiah-ê pài Lûi-kong ê lâng, beh kà in tio̍h ké-oāⁿ lâi sı̀n Iâ-so͘. Chiàu sú-kı̀ só͘ kóng, tng in chín-khí cheng-sı̂n tı̄ hit ê àm chhiū-nâ ê kāu seh ê lāi-bı̄n, ióng-kám chı̀n-chêng kàu tı̄ iá-bân lâng (Tiâu-tùn cho̍k) chū-hoē ê só͘-chāi, chiū sı̄ chı̍t-châng toā siông-chhiū (Lûi-kong ê kı̀-hō) ē-kha ê sı̂, tú-tú sı̄ Kiù-chú-tàn ê-hng. Hit-sı̂ ū chı̍t ê pe̍h thâu-mn̂g ê lāu-lâng, tú teh pı̄-pān chiong cho̍k-tiúⁿ ê kiáⁿ choè seng-lé hiàn-hō͘ Lûi-kong. Ui-hut-lia̍t khoàⁿ-kı̀ⁿ liáu, koáⁿ-kín cháu chı̀n-chêng khı̀ nâ i ê to, kiù chit ê kó͘-chui ê gín-ná ê sı̀ⁿ-miā. Hiah-ê iá-bân lâng in-ūi in só͘ thiàⁿ ê gín-ná tit-tio̍h kiù, lóng chin hoaⁿ-hí, koh bô loā-kú chiū lóng ké-oāⁿ lâi kui-oá Iâ-so͘. Ui Sèng-jı̂n chit-sı̂ kia̍h hit ê lāu-lâng ê pó͘-thâu, phut hit châng siông-chhiū; siông-chhiū teh beh tó--lo̍h-lâi ê sı̂, soà hō͘ lûi kòng kàu chhùi-chhùi. Hut-jiân tı̄ goân-kū ūi khoàⁿ-kı̀ⁿ chı̍t-châng chíⁿ-chíⁿ ê tō͘-siong-chhiū puh--chhut-lâi, chin chhiⁿ-chhùi koh kim-nà-sàⁿ. In chiū chiong chit-châng tō͘-siong-chhiū kng kàu cho̍k-tiúⁿ ê thiaⁿ tiong-ng chhāi-teh. Tāi-ke lóng hoaⁿ-hoaⁿ hí-hí teh se̍h chit-châng chhiū. Tiâu-tùn cho̍k ê lâng thiaⁿ-kı̀ⁿ Iâ-so͘ ê kò͘-sū kap toā ê thiàⁿ-thàng, tı̄ tia̍p-á-kú ê tiong-kan, lóng tı̄ chit-châng tō͘-siong-chhiū-kha piàn chò Ki-tok-tô͘. Che chiū-sı̄ Sèng-tàn-chhiū ê lâi-le̍k. Lán chhiat-chhiat m̄-thang boē kı̀-tit, Sèng-tàn cheh sı̄ Iâ-so͘ ê siⁿ-jı̍t. Tng lán se̍h Sèng-tàn-chhiū ûi teh chē ê sı̂, tio̍h chiong lán ê sim chò lé-mı̍h hiàn hō͘ Iâ-so͘. Iâ-so͘ kin-á-jı̍t tùi lán kóng, “Chiong lí ê sim hō͘ goá!” Nā lín khéng án-ni chò, Iâ-so͘ m̄-nā beh pò-tap lín pêng-an hoaⁿ-hí ê sim, hō͘ lín tı̄ Sèng-tàn cheh hióng-siū bē liáu, soà beh hō͘ lín chı̍t-sı̀-lâng hióng-siū bē liáu. Chit-sı̂ sı̄ lín hiàn-sin hō͘ Iâ-so͘ tē-it ha̍p ê sı̂; chit-sı̂ thiⁿ-sài koh teh gı̂m tı̄ Pek-lı̄-hêng só͘ gı̂m ê si: “Tı̄ téng-bı̄n êng-kng kui Siōng-tè; ē-bı̄n hô-pêng, lâng tit-tio̍h in-tián.” Lín ū kam-goān ūi ka-tı̄ ê iân-kò͘ kap ūi Iâ-so͘ ê iân-kò͘ án-ni chò mah?
(Tâi-oân Kàu-hoē-pò tē 501 koàn, 1926 nı̂ 12 ge̍h)