1. Kiong-hí, kiong-hí, chin kiong-hí,
Kin-á-jı̍t sı̄ hó jı̍t-chí;
Khèng-chiok Iâ-so͘ lâi chhut-sı̀,
Chit ê hok-khı̀ toā bô pí.
2. Iâ-so͘ pún-lâi sı̄ Siōng-tè,
Ūi-tio̍h beh kiù lán tāi-ke;
Hoaⁿ-hí tùi thiⁿ lâi kàng-sè,
Beh kiù sè-kan múi chı̍t ê.
3. Iâ-so͘ chhut-sı̀ hit chı̍t sı̂,
Thiⁿ-sài tı̄ thiⁿ iā hoaⁿ-hí;
Poàⁿ-mı̂ lo̍h-lâi tàu gı̂m-si,
Pò lâng chai-iáⁿ I chhut-sı̀.
4. Khòng-iá bo̍k-chiá teh kò͘-iûⁿ,
Khoàⁿ-kı̀ⁿ thiⁿ-téng ū koh-iūⁿ;
Hut-jiân thiⁿ-sài chiū chhut-siaⁿ,
Kiò in an-sim m̄-bián kiaⁿ.
5. Pò lín sè-jı̂n lóng chai-iáⁿ,
Kim-jı̍t tı̄ Tāi-pı̍t ê siâⁿ;
Siōng-tè chhe-khián I Sèng-kiáⁿ,
Hō͘ lín tit-tio̍h sin oa̍h-miā.
6. Bo̍k-chiá thiaⁿ-liáu chin hoaⁿ-hí,
Sûi-sı̂ chiū khı̀ chhē-tio̍h I ;
Chhē-tio̍h kám-kak chin hok-khı̀,
Sûi-sı̂ tńg-khı̀ pò chhù-piⁿ.
7. Iâ-so͘ chhut-sı̀ chin pi-bı̂,
Bô chhù khùn tı̄ bé-chô nih;
Ūi-tio̍h beh kiù goá kap lí,
Kam-goān pı̀ⁿ choè án-ni-siⁿ.
8. Tang-hng phok-sū in iā chai,
Sè-kan í-keng ū hó-tāi;
Chiū-sı̄ Kiù-chú í-keng lâi,
Só͘-í tiau-kang beh lâi pài.
9. Lâi kàu lō͘-nih soà bê lō͘,
Kiâⁿ-lâi kiâⁿ-khı̀ bô hoat-tō͘;
Kai-chài tit-tio̍h chhiⁿ chhoā-lō͘,
Chiah ū kı̀ⁿ-tio̍h Chú Iâ-so͘.
10.Phok-sū kàu-ūi chin hoaⁿ-hí,
Sûi-sı̂ kūi-lo̍h lâi pài I;
Phah khui lé-mı̍h chin kùi-khı̀,
Hiàn hō͘ Iâ-so͘ piáu kèng-ı̀.
11.Taⁿ lán khèng-chiok Chú Sèng-tàn,
Hoaⁿ-hí Iá-so͘ lâi sè-kan;
I beh siúⁿ-sù lán pêng-an,
Thoat-lı̄ thòng-khó͘ kap hām-hāi.
12.Lán tiàm sè-kan ū lô-khó͘,
Nā beh tit-tio̍h ū oá-khò;
Goá pò lín chı̍t tiâu oa̍h-lō͘,
Chhiáⁿ lín lóng lâi sı̀n Iâ-so͘.
(Tâi-oân Kàu-hoē Kong-pò, Tē 900 kı̂, 1962 nı̂ 12 goe̍h)
