Sèng-tàn lāu-lâng
Sèng Ní-kó͘-la̍h (Santa Claus) ê kò͘-sū Ní-kó͘-la̍h sı̄ chı̍t ê hó-gia̍h lâng, chóng-sı̄ i ài ēng i só͘ ū ê chı̂ⁿ lâi pang-chān pa̍t lâng. I m̄ ài tit-tio̍h lâng ê kám-siā, iā m̄ ài hō͘ sòng-hiong lâng kak-tit kiàn-siàu, só͘-í siông-siông ēng àm-chı̄ⁿ ê hoat-tō͘ lâi sàng chı̂ⁿ. Tit-tio̍h chı̂ⁿ ê lâng soà m̄-chai tio̍h kám-siā chı̄-chūi. Tı̄ siâⁿ-chhı̄-lāi ū chı̍t ê chin sòng-hiong ê lâng kap i saⁿ ê cha-bó͘-kiáⁿ. Chit ê lâng chin khó-lı̂n, in-ūi i bô chı̂ⁿ thang hō͘ i saⁿ ê cha-bó͘-kiáⁿ choè-kheh. Ní-kó͘-la̍h koat-sim beh pang-chān chit-ê lâng. I siūⁿ-lâi siūⁿ-khı̀, chiū kàu lō͘-bé siūⁿ-chhut chı̍t ê chin hó ê hoat-tō͘. Ní-kó͘-la̍h thèng-hāu kàu àm, chiū ēng o͘-saⁿ lâi moa, koáⁿ-kín kiâⁿ kàu tı̄ hit ê lâng ê chhù. Sı̄-chin oh chhē, in-ūi hit só͘-chāi ê siâⁿ-chhı̄ chin cha̍t, koh chit ê lâng ê chhù sı̄ chin soè keng. Ní-kó͘-la̍h kiâⁿ kàu tı̄ hia ê sı̂, chiū sı̀-koè khoàⁿ, khoàⁿ bô lâng, koáⁿ-kín tùi i ê saⁿ the̍h-chhut chı̍t ê toé moá kim ê tē-á. Ū chı̍t ê thang-á-mn̂g khui-teh, só͘-í Ní-kó͘-la̍h bô chhut siaⁿ, ēng hit tē-á chı̂ⁿ hē tı̄ lāi-bı̄n, chiū liâm-kha lı̄-khui khı̀, tńg-khı̀ i ka-kı̄ ê chhù. Keh-jı̍t, hit ê sòng-hiong lâng khoàⁿ-tio̍h hit ê chı̂ⁿ ê sı̂, chiū moá-sim hoaⁿ-hí, chóng-sı̄ lóng m̄-chai hit ê chı̂ⁿ sı̄ tùi tá-lo̍h lâi. I chiū liâm-pı̂ⁿ siat-hoat hō͘ i toā-hàn ê cha-bó͘-kiáⁿ choè-kheh. Lóng bô lâng oē thang kā i kóng hit ê chı̂ⁿ sı̄ tùi tá-lo̍h lâi. Ní-kó͘-la̍h thèng-hāu kúi-jı̍t, chiū tı̄ ê-hng-sı̂ koh chı̍t pái ēng o͘-saⁿ lâi moa, koh bô hō͘ lâng chai, chiū kiâⁿ kàu tı̄ hit ê sòng-hiong lâng ê chhù, chiàu-kū ēng hit tē-á kim lok tı̄ thang-á-lāi, chiū liâm-kha koáⁿ-kín lı̄-khui khı̀. Keh-jı̍t hit ê sòng-hiong lâng koh chı̍t pái chhē-tio̍h chı̍t tē-á kim tı̄ i ê chhù-lāi, chiū chin kı̂-koài, koh chin hoaⁿ-hí, siūⁿ tio̍h “taⁿ goá ê tē-jı̄ cha-bó͘-kiáⁿ oē choè-kheh.” I sı̀-koè mn̄g lâng, bô lâng oē kā i kóng sı̄ chı̄-chūi án-ni teh hō͘ i chı̂ⁿ. I chiū koat-toàn beh tiau-cha chhut-lâi. Tùi án-ni, ta̍k mı̂ m̄-káⁿ khùn, siông-siông teh thèng-hāu khoàⁿ hit ê sàng-chı̂ⁿ ê lâng oē lâi á boē. Koh kè kúi-nā mı̂, chiū Ní-kó͘-la̍h chiàu chêng nn̄g pái moa o͘-saⁿ the̍h chı̍t tē-á kim, àm-chı̄ⁿ kiâⁿ kàu tı̄ hit ê sòng-hiong lâng ê chhù. I chin-chiàⁿ soè-jı̄, kiaⁿ-liáu lâng oē chai. I bô chhut chı̍t tiám-á siaⁿ, chóng-sı̄ tng i tú-tú chiong chı̂ⁿ hē lo̍h-khı̀ ê sı̂, Ní-kó͘-la̍h ê bı̄n hō͘ teng-hoé ê kng chiò-tio̍h. Hit ê lâng chiū chai, sı̄ chit ê chin ū thiàⁿ-sim ê kàm-tok teh pang-chān i. I chiū cháu chhut-mn̂g khı̀, kūi-lo̍h-khı̀ tı̄ Ní-kó͘-la̍h ê kha, it-tı̍t kā i kám-siā. Keh-jı̍t chiū hit ê tē-saⁿ ê cha-bó͘-kiáⁿ iā hō͘ lâng chhoā choè-kheh. Ní-kó͘-la̍h m̄-nā thiàⁿ sòng-hiong lâng, i iā thiàⁿ soè-hàn gín-ná, siông-siông ū thit-thô mı̍h beh sàng hō͘ in. Kàu i choè chin lāu-lâng ê sı̂, i iáu-kú sı̄ án-ni. Gín-ná lóng-chóng ài khoàⁿ i chhiò-iông ê bı̄n. Tı̄ Ní-kó͘-la̍h kè-óng ê sı̂, lâm-hū ló-iù lóng siàu-liām i, koh kiò i choè “Sèng Ní-kó͘-la̍h.” Hoan-e̍k choè Hô-lân kok ê oē, chiū-sı̄ “Santa Claus.” Ū chin-choē liû-thoân teh kóng-khí Santa Claus ê sū. Chit ê chiū-sı̄ kóng ta̍k nı̂ Sèng-tàn 24 ê-hng, chiū Santa Claus lâi kàu tı̄ ta̍k ê soè-hàn gín-ná ê chhù sàng thit-thô mı̍h hō͘ in. Eng-kok ê gín-ná kiò i choè “Father Christmas, ” koh lán Tâi-oân ê gín-ná iā siàu-liām i. Chit ê hó ê lāu-lâng, sı̍t-chāi bat oa̍h tı̄ chit sè-kan, koh sı̄ chin ū thiàⁿ Chú ê lâng, tùi án-ni lán hiān-sı̂ iáu teh siàu-liām i. (Tâi-oân Kàu-hoē-kong-pò tē 768 hō, 1952 nı̂ 12 ge̍h)