Sêng-kong ê Pı̀-koat

Bob Jones káng tiah-e̍k Sím-mı̍h kiò choè sêng-kong? Sêng-kong pèng m̄ sı̄ tit-tio̍h kim-chı̂ⁿ, tı̄ sêng-kong ê sı̂ lí khó-lêng tit-tio̍h kim-chı̂ⁿ, chóng-sı̄ tit-tio̍h kim-chı̂ⁿ pèng bô it-tēng sı̄ sêng-kong. Lí khó-lêng sêng-kong, chóng-sı̄ khiok chin sòng-hiong lâi sí. Lí khó-lêng sit-pāi, chóng-sı̄ khiok chin hù-chiok lâi sí. Sè-kài ū ê lâng khak-sı̍t hù-chiok, chóng-sı̄ in khiok sı̄ sit-pāi! Ū chı̍t ê hù-chiok ê hū-jı̂n-lâng, ūi-tio̍h i hit ê chiú-chùi ê kiáⁿ lâu ba̍k-sái tùi goá kóng, goá ǹg-bāng goán tò-tńg khı̀ chiông-chêng ê kéng-hóng, goá ǹg-bāng goán koh chài toà tı̄ hit keng soè-keng chhù-á,iā ǹg-bāng goá ê tiōng-hu khı̀ tı̄ siâⁿ-lāi hit keng soè keng tiàm choè kang. x x x Sím-mı̍h kiò choè sêng-kong? Sêng-kong chiū-sı̄ tio̍h chhē chhut Sı̂n ài lí choè ê sı̄ sím-mı̍h sū, koh tio̍h khı̀ choè. Sı̂n tùi lí ê seng-bēng sı̄ ū chı̍t ê chí-ı̀ tı̄-teh. I ǹg-bāng lín tiong-kan ū ê sı̄ khı̀ choè thoân-tō, ū ê choè goā-kok soan-kàu-su. Ū ê, I ǹg-bāng lín choè ha̍k-hāu kàu-oân á-sı̄ pı̀-su ê chit. I iā khó-lêng ǹg-bāng lín tiong-kan ū lâng choè kok-hoē ê gı̄-oân. I iā khó-lêng ǹg-bāng ū lâng khı̀ kàu tı̄ ke̍k bı̂-soè ko͘-toaⁿ phian-phiah ê só͘-chāi, tı̄ hit ê só͘-chāi Sı̂n ài lí chēng-chēng bô siaⁿ lâi koè-sin. x x x Chiàu Sèng-keng ê oē, Siōng-tè ū kè-sǹg lán thâu-mn̂g ê sò͘-bo̍k, chhù-chiáu-á poa̍h-lo̍h toē, I iā ū teh sǹg. Só͘-í tùi tı̄ lán ê oa̍h-miā í-kı̍p kap lán ê oa̍h-miā ū koan-hē ê ta̍k khoán tāi-chı̀, lóng ū hit ê bí-hó ê chí-ı̀ tı̄-teh. Sêng-kong chiū-sı̄ tio̍h chhē chhut Sı̂n tı̄ lí oa̍h-miā tiong ê chí-ı̀ sı̄ sím-mı̍h, koh hō͘ hit ê chí-ı̀ tı̄ lí ê oa̍h-miā tiong chiong-hián chhut lâi. x x x Ū chı̍t pái chı̍t ê koáⁿ-hū ê gín-ná, sı̄ chit ê sòng-hiong hùn-tò͘ chhut-lâi ê hó gín-ná, khı̂ⁿ tio̍h chiu ê lı̍p-hoat ki-koan, iā chham-ka chèng-tı̄. Í-āu koh siū kéng choè hit chiu ê Chiu-tiúⁿ. Ū chı̍t ê lāu lâng mn̄g i kóng: “Lí cháiⁿ-iūⁿ oē ta̍t kàu kin-á-jı̍t ê tē-ūi?” I kóng: “Goá oē ta̍t kàu kin-á-jı̍t ê tē-ūi, sı̄ tùi goá choè gín-ná ê sı̂-kı̂ chiū í-keng khai-sí lah.” x x x Chheng-liân lâng kiâⁿ Sı̂n ê chí-ı̀, m̄-tàn-nā sı̄ sêng-kong ê pı̀-koat, iā sı̄ hēng-hok ê pı̀-koat. Ta̍k hāng tāi-chı̀ chiàu Sı̂n ê ı̀-sù khı̀ choè chiū-sı̄ hēng-hok. Lí nā chù-ı̀ soè chiah hı̂ teh siám-pı̄ toā hı̂ ê sı̂, lí oē hoat-hiān-tio̍h soè-chiah hı̂ iā ū khùn-lân ê sı̂-kı̂. Chóng-sı̄ chiàu goá khoàⁿ lâi, in iû-goân sı̄ siông-siông hióng-siū khoài-lo̍k. Lí bat khoàⁿ-kı̀ⁿ chı̍t chiah chiáu-á khiā tı̄ chhiū-ki téng teh gı̂m chı̍t siú hēng-hok ê koa á m̄-bat? Siat-sú lí khiā tı̄ chı̍t ki teh beh hō͘ hong chhe tn̄g ê chhiū-ki téng, lí boē gı̂m hó-sè Chóng-sı̄ chiáu-á khiok kóng: “Hō͘ chhiū-ki tn̄g ah, in-ūi goá thang pe!” Lí chai-iáⁿ ūi sím-mı̍h chiáu-á oē khiā tı̄ chhiū-ki téng gı̂m si nı̍h? I ê gı̂m-si sı̄ in-ūi i kiâⁿ Sı̂n ài i só͘ kiâⁿ ê sū. Siat-sú chiong chiáu-á hē tı̄ chúi-lāi i chiū ē sí, chiong hı̂ hē tı̄ khong-tiong, i chiū boē siû, iā oē sí khı̀. Sı̂n chō hı̂ tı̄ chúi tiong, chō chiáu tı̄ khong-tiong, Sı̂n iā chiong lí an-tı̀ tı̄ chı̍t ê kò͘-tēng ê só͘-chāi. x x x Lín kiám chai tùi mô͘-kúi ê sin-chiūⁿ iā ū hó-tiám thang o̍h mah? Goá tùi i ê sin-chiūⁿ o̍h chin choē tāi-chı̀. Thiaⁿ kóng ū chı̍t ê lāu hū-jı̂n-lâng, i lóng m̄ bat phoe-phêng jı̄m-hô ê sè-kan lâng, chiū sı̄ chiong siā-hoē siōng tē-it pháiⁿ ê lâng chí chhut lâi, i iā choa̍t-tùi boē kóng hit ê lâng ê pháiⁿ-oē, āu-lâi ū lâng kóng: “Hō͘ goá lâi kóng mô͘-kúi, khoàⁿ i oē kóng sím-mı̍h? Tùi án-ni in chiū tâm-lūn kàu mô͘-kúi, koh tùi hit ê lāu hū-jı̂n-lâng kóng: “Lí tùi mô͘-kúi ū sím-mı̍h kiàn-kái?” I kóng:“Goá siūⁿ, i sı̄ chı̍t ê chin un-khûn ê kong-chok-chiá!” I só͘ kóng ê sı̄ tio̍h, tùi Mô͘-kúi ê sin-chiūⁿ lí thang o̍h koá tāi-chı̀. Mô͘-kúi sı̄ chı̍t ê kong-chok bô thêng ê oa̍h-tāng-chiá. Iâ-so͘ kóng: “Chit sè-kan ê lâng ūi-tio̍h sè-chêng lâi tô͘-bô͘, pí kng-bêng ê lâng khah ū tı̀-sek”. Iâ-so͘ khoàⁿ tio̍h tng-sı̂ ê chong-kàu ka, sı̍t-gia̍p kài í-kı̍p chèng-kài ê lâng hiah-nih kéng-séng teh kong-chok ê chêng-hêng, só͘-í I kóng chit sè-kan ê lâng pí lín khah ū tı̀-sek. x x x Sat-kai oē kı̀ⁿ-tio̍h Iâ-so͘, sı̄ in-ūi i ū chún-sı̂ kàu koe-lō͘-------, goá káⁿ kóng i ka-têng ê àm-tǹg iā sı̄ chún-sı̂ pâi chhut lâi. Siat-sú i ū chı̍t ê bô chiàu sı̂-kan pı̄-pān pn̄g-tǹg ê hū-jı̂n-lâng, Sat-kai it-tēng boē hoaⁿ-hí i, goá iā káⁿ kóng i ê ka-têng chéng-tùn kàu chin hó. Lí chai cháiⁿ-iūⁿ Sat-kai ê miâ-jı̄ siū kı̀-chài tı̄ Sèng-keng ê lāi-bı̄n, in-ūi i chún-sı̂ kàu hit ê só͘-chāi, siat-sú i tı̂-tò 20 hun-cheng, lí chiū choa̍t-tùi boē thiaⁿ-tio̍h i ê miâ-jı̄, siat-sú lín nā m̄ ha̍k-sı̍p chún-sı̂ khı̀ èng-kai khı̀ ê só͘-chāi, lí ê miâ-jı̄ chiū boē thang siū kı̀-chài tı̄ sêng-kong ê chheh téng. Sèng-keng pèng bô kı̀-chài kóng Sat-kai sı̄ chı̍t ê hián-tù ê jı̂n-bu̍t, iā bô kóng i sı̄ chı̍t ê tāi-ha̍k pit-gia̍p seng, iā bô kóng i bat o̍h im-ga̍k. Siat-sú i ū o̍h, i it-tēng toâⁿ khı̂m toâⁿ kàu chin hó. Sèng-keng iā bô kā lán kóng, i bat o̍h Hi-lia̍p bûn, Hi-pek-lâi bûn, Lia̍p-teng bûn, Tek-bûn á-sı̄ Hoat-bûn. I chí ū kā lán kóng i peh chiūⁿ chı̍t châng chhiū, iā lâng khiok bô ài i án-ni choè. Sat-kai tek-khak chún-sı̂ hù lé-pài, siat-sú i ê miâ-jı̄ nā siū kı̀ tı̄ chhut-se̍k-phō͘ kā i tiám-miâ, i it-tēng oē kóng: “Táu!” (Oa̍h-miā ê Bí-niû tē 34 kı̂, 1957 nı̂ 3 ge̍h)