Súi-koe pı̀ⁿ Hông-tè

Kó͘-chá kó͘-chá ū chı̍t ê hông-tè, i ê cha-bó͘-kiáⁿ lóng chin súi, kı̂-tiong soah-bé cha-bó͘-kiáⁿ tē it súi. Kiong-siâⁿ ê hū-kūn ū chı̍t ê chin ām ê toā chhiū-nâ, chhiū-nâ-lāi ū chı̍t châng chin lāu kó͘-chhiū Phô͘-thê chhiū, chhiū-thâu hia ū chı̍t khut chúi-choâⁿ, nā thiⁿ-khı̀ joa̍h ê sı̂, chit ê soè cha-bó͘-kiáⁿ chiū khı̀ chhiū-nâ-lāi, chē tiàm chúi-choâⁿ piⁿ chhiu-chhı̀n, nā bô liâu ê sı̂, chiū the̍h ēng n̂g-kim só͘ choè hit lia̍p kiû hiat koân hiat kē lâi sı̂n, i chin ài chit khoán ê thit-thô. Ū chı̍t pái sı̂n liáu liù-chhiú, ka-la̍uh tı̄ thô͘-kha, soà lı̀n tùi chúi-khut lo̍h-khı̀, ba̍k-chiu kim-kim khoàⁿ i tı̂m lo̍h-khı̀, chúi chin chhim, té khoàⁿ boē tio̍h. Ông lú tiàm hia háu, ná háu ná toā siaⁿ,háu lóng boē soah. Hut-jiân-kan ū chı̍t ê siaⁿ tùi ông lú kóng: Sı̄ án-choàⁿ, háu kàu án-ni, liân chio̍h-thâu mā oē siong-sim? Ông lú siūⁿ chit ê siaⁿ m̄-chai tùi tó-ūi lâi? Tı̄ i ê sin-piⁿ sı̀-koè khoàⁿ, khoàⁿ tio̍h chı̍t chiah chin pûi ê súi-koe-á, pháiⁿ khoàⁿ ê thâu-khak chhun tùi chúi-bı̄n chhut-lâi. Ah! Lí tı̄ chúi-lāi teh bùn-lâi bùn-khı̀, goá n̂g-kim ê kiû ka-la̍uh tùi chúi-té lo̍h-khı̀, thái boē m̄-kam lâi háu! Súi-koe-á ı̀n i:Tiām-tiām, m̄-bián háu, goá ū hoat-tō͘, goá nā khioh khí-lâi hō͘ lí, lí beh sím-mı̍h pò-tap goá? Khoàⁿ lí ài sím-mı̍h? Goá ê saⁿ,goá ê chin-chu pó-chio̍h, goá tı̀ n̂g-kim ê bián-liû? Súi-koe-á kóng, hiah ê goá lóng bô ài, lí nā ū thiàⁿ goá, lâi kap goá choè pêng-iú, chia̍h pn̄g ê sı̂ kap lí chē choè-hoé, chin súi n̂g-kim ê phiat-á hō͘ goá chia̍h, chin súi ê poe hō͘ goá lim, koh hō͘ goá khùn tiàm lí khó ài ê bı̂n-chhn̂g, lí nā kap goá iok-sok chiah ê, goá chiū lo̍h-lâi kā lí khioh. Ông lú kóng, Hó, hó, kiû nā khioh khí lâi hō͘ goá, bô-lūn lí ài sím-mı̍h, lóng kap lí iok-sok (chhùi sı̄ án-ni ín i, sim sı̄ siūⁿ gōng súi-koe, o͘ pe̍h kóng, lí tiàm chúi-lāi, kap lí ê tâng-phoāⁿ saⁿ-kap chhiùⁿ koa oē ēng-tit, iā siūⁿ beh kap lâng choè pêng-iú). Súi-koe thiaⁿ tio̍h i hoaⁿ-hí kap i iok-sok,thâu-khak chiū bùn lo̍h chúi-té, kè bô joā-kú chiū koh phû khí-lâi, kiû kā tı̄ chhùi-nih, pûn tùi chháu-á hia khı̀. Ông lú koh khoàⁿ tio̍h hiah súi ê thit-thô-mı̍h, chiū chin hoaⁿ-hí, khioh khí-lâi; ná thiàu ná kiâⁿ thán-hoâiⁿ cháu tò khı̀. Súi-koe-á toā siaⁿ kóng, Thèng-hāu leh, thèng-hāu leh! chhoā goá choè-hoé khı̀, goá boē thang chhin-chhiūⁿ lí kiâⁿ hiah kín. Sui-jiân joā toā siaⁿ iā bô chhái-kang, i bô teh kā thiaⁿ,koáⁿ-kín tò-khı̀. Kàu chhù, súi-koe-á ê sū lóng boē kı̀-tit. Khó-lı̂n ê súi-koe bô só͘-chāi thang toà, chiū koh tò-tńg khı̀ chúi-khut-á. Keh jı̍t, ông lú, hông-tè kap ke-lāi choân-pō͘ ê lâng chē toh, ēng n̂g-kim ê phiat-á teh chia̍h ê sı̂, thiàu chı̍t-ē, thiàu chı̍t-ē, tùi tāi-lí-chio̍h ê gı̂m-á tı̍t-tı̍t thiàu khí-lâi, chiū phah mn̂g. Hông-tè ê cha-bó͘-kiáⁿ siāng soah-bé ê lâi kā goá khui mn̂g, ông lú chiū khı̀, sím-mı̍h lâng teh kiò mn̂g? Chı̍t-ē khui, khoàⁿ tio̍h hit chiah súi-koe-á lâi chē tı̄ mn̂g-kháu, mn̂g chhut toā la̍t khām lo̍h-khı̀, koh kā koaiⁿ leh, tò-tńg lâi chē tı̄ i ê toh-ūi, chin hoân-ló. Hông-tè chai i ê cha-bó͘-kiáⁿ sim-koaⁿ pho̍k-pho̍k-chhéng, chiū mn̄g, lí teh kiaⁿ sím-mı̍h, sı̄ kúi-á beh kā lí lia̍h khı̀ sı̄ bô? M̄ sı̄ , sı̄ thó-iàm ê súi-koe-á. Súi-koe-á chhē lí beh chhòng sím-mı̍h tāi-chı̀? Pa pa, cha-hng goá khı̀ chhiū-nâ-lāi, chē tı̄ chúi-choâⁿ piⁿ, goá n̂g-kim ê kiû ka-la̍uh tùi chúi-khut-á lo̍h khı̀, goá tı̄ hia teh háu, súi-koe-á khioh khí-lâi hō͘ goá, i it-tı̍t pài-thok goá tio̍h kap i choè pêng-iú,boē kham-tit i ko͘-chiâⁿ, chiū ín i, kap i iok-sok, goá siūⁿ súi-koe-á sı̄ tiàm tı̄ chúi-nih, thái oē lâi kàu chia, chit tia̍p tı̄ goā bı̄n beh jı̍p-lâi. Iū-koh phah mn̂g, toā siaⁿ kiò,“Ông ê soah-bé cha-bó͘-kiáⁿ, kā goá khui mn̂g. Lí boē kı̀-tit mah? Lí chá jı̍t kā goá kóng, tı̄ chheng-liâng ê chúi-piⁿ. Ông ê soah-bé cha-bó͘-kiáⁿ, kā goá khui.” Hông-tè thiaⁿ-kı̀ⁿ chiū kóng, Lí kap lâng iok-sok ê tāi-chı̀, bô-lūn cháiⁿ-iūⁿ, tio̍h chiàu iok-sok khı̀ khui. Mn̂g khui, súi-koe-á tè ông lú thiàu jı̍p-lâi, chē tiàm i ê í-á kha, lí kā goá lia̍h khí-lâi téng-bı̄n, ông lú teh tiû-tû. Āu-lâi hông-tè ê bēng-lēng, tùi í-á kàu tı̄ toh-téng, chē tiàm toh-téng chiū kóng, Lí n̂g-kim ê poe the̍h khah oá--lâi, lán nn̄g lâng thang choè-hoé lim, ông lú chiàu án-ni choè, ta̍k lâng lóng chai, he m̄-sı̄ ông lú só͘ hoaⁿ-hí ê. Súi-koe-á tı̍t-tı̍t chia̍h, ông lú chı̍t chhùi to thun boē lo̍h-khı̀. Súi-koe-á chiū kóng, Pak-tó͘ chia̍h pá, siān-siān, chhoā goá lâi-khı̀ lí chin súi ê pâng-keng, súi-súi kı̀n ê chhu-kun chhu teh, lán 2 lâng tiàm hia khùn kiám m̄ chin hó? Ông lú háu chhut-lâi, soà kiaⁿ, léng-léng ê súi-koe-á bong to bô ài, koh kóng beh tiàm goá chheng-khı̀ ê bı̂n-chhn̂g khùn, hit-tia̍p hông-tè siū-khı̀, kóng, Bô-lūn cháiⁿ-iūⁿ, tı̄ lí kan-khó͘ ê sı̂ pang-chān lí, āu-lâi chiū bô beh chhap lâng, kiám ū hit hō lí-khı̀. Ông lú chiong nn̄g ki chńg-thâu-á tùi súi-koe-á ni teh chiūⁿ khı̀ lâu-téng, hē tiàm piah-kak hia, ông lú ka-kı̄ tó tiàm bı̂n-chhn̂g, súi-koe-á thiàu chhut-lâi kóng, Chin siān, chin siān, goá ài chhin-chhiūⁿ lí tó tı̄ bı̂n-chhn̂g sóng-khoài, kā goá lia̍h khí-lâi, nā m̄, goá beh tùi lín lāu-pē siōng-sò͘. Ông lú thiaⁿ liáu chin siū-khı̀, súi-koe-á lia̍h khí-lâi, toā la̍t tùi piah-nih siak khı̀, Taⁿ hō͘ lí khı̀ sóng-khoài, thó-iàm ê súi-koe-á. Chı̍t-ē kā khoàⁿ, ka-la̍uh lo̍h-lâi koh m̄-sı̄ súi-koe-á, sı̄ chı̍t ê chin súi, hō͘ lâng ê ba̍k-chiu khoàⁿ tio̍h chin ı̀-ài ê hông thài-chú, chit ê thài-chú ông lú ê lāu-pē khoàⁿ liáu iā chin kah-ı̀, chit ê thài-chú sı̄ ông lú ê hó pêng-iú, iā sı̄ hông-tè ê kiáⁿ-sài. Thài-chú tùi ông lú kóng, Siūⁿ bı̂n-á-jı̍t saⁿ-kap tò-lâi khı̀ ka-kı̄ ê kok. Keh thiⁿ-kng, jı̍t-thâu kiò in khí-lâi ê sı̂, chı̍t tiuⁿ bé-chhia 8 chiah pe̍h bé, thâu-khak tı̀ pe̍h Tô-chiáu ê mn̂g, n̂g-kim ê liān-á, chhia-āu khiā chı̍t ê siàu-liân hông-tè chı̄n-tiong ê jı̂n-sı̂n. Chit ê tiong-sı̂n tùi tiān-hā pı̀ⁿ súi-koe-á ê sı̂ chin siong-sim, kiaⁿ-liáu sim-chōng piak-phoà, phah 3 ê thih-kho͘ kho͘ tiàm heng-khám, chit tiuⁿ bé-chhia sı̄ lâi ngiâ-chih siàu-liân hông-tè tò-khı̀ in pún kok, hō͘ in nn̄g lâng jı̍p-khı̀ chē lāi-bı̄n, i iû-goân khiā tı̄ chhia-āu, hông-tè hō͘ ông lú kiù chhut-lâi hoaⁿ-hí kàu tòng boē tiâu. Chhia kiâⁿ bô joā hn̄g, hut-jiân-kan thiaⁿ tio̍h chı̍t siaⁿ “khiang,” chhin-chhiūⁿ kòng-phoà sím-mı̍h mı̍h ê khoán. Thài-chú sı̀-koè khoàⁿ kóng, bé-chhia pháiⁿ-khı̀. Tiān-hā, m̄-sı̄ bé-chhia pháiⁿ, sı̄ goá heng-khám ê kho͘-á, chin toā hoân-ló ê sı̂ kho͘--ê. (Lí-chē tı̄ chúi-khut ê sı̂-chūn), tı̄ lō͘-tiong chı̍t pái koh chı̍t pái thiaⁿ-kı̀ⁿ khiang-khiang ê siaⁿ, múi chı̍t pái thài-chú chiū siūⁿ sı̄ bé-chhia pháiⁿ-khı̀, che sı̄ tiān-hā kiù chhut-lâi chin khoài-lo̍k ê jı̍t, i sim-koaⁿ chin sóng-khoài, kho͘ tı̄ heng-khám ê kho͘-á lóng pe soàⁿ-khı̀. ( Tâi-oân Kàu-hoē Kong-pò tē 984 koàn, 1966 nı̂ 6 ge̍h)