Súi ê bı̄n

Ū chı̍t ê 6 hè gín-ná miâ kiò A-tin, ū chı̍t jı̍t i the̍h chı̍t ê kiàⁿ tı̄ i ê pâng-keng teh chiò bı̄n ê sı̂, i ê ma-ma tú-hó tùi goā-bı̄n jı̍p-lâi, i chiū kā i ê ma-ma kóng, “Ma-ma, keh-piah A-bí ê bı̄n thái oē hiah súi, lí khoàⁿ, goá ê bı̄n hiah-nih pháiⁿ khoàⁿ.” Ma-ma thiaⁿ liáu, chiū kóng chı̍t ê kò͘-sū hō͘ i thiaⁿ: Ū chı̍t ê gín-ná, i ta̍k jı̍t teh chiò kiàⁿ, ta̍k pái chiò kiàⁿ liáu lóng chiong só͘ chiò hit tè kiàⁿ siak hō͘ i phoà, koh chin siū-khı̀ kóng, goá ê bı̄n thái oē hiah pháiⁿ khoàⁿ. Ū chı̍t ê-hng, i teh khùn ê sı̂, ū chı̍t ê thiⁿ-sài lâi kā i kóng, Sió pêng-iú, sió pêng-iú, lí nā beh hō͘ lí ê bı̄n súi, lí tio̍h khı̀ chı̍t ê chin chheng ê chúi-tı̂ hia, hit ê chúi-tı̂ sı̄ tùi chia khı̀, tı̍t-tı̍t kiâⁿ, koh oat chiàⁿ-chhiú pêng kiâⁿ, iā koh tı̍t-tı̍t kiâⁿ, chiū oē khoàⁿ-tio̍h. Lí kàu chheng chúi-tı̂ ê sı̂ tio̍h thiàu-lo̍h chúi-tı̂ lāi, jiân-āu koh peh khí-lâi, án-ni lí ê bı̄n chiū oē chin súi. Keh chá-khí hit ê gín-ná chiū chiàu thiⁿ-sài ê oē khı̀ chhē hit ê chheng chúi-tı̂, i kiâⁿ chin hn̄g ê lō͘ chiah chhē-tio̍h, chiū beh khai-sí chiàu thiⁿ-sài ê oē thiàu lo̍h-khı̀, tng i beh thiàu lo̍h ê sı̂, thiⁿ-sài koh chhut-hiān kā i kóng, “Chhiáⁿ tán chı̍t-ē, lí m̄-thang thiàu lo̍h-khı̀, lí tò-khı̀ lí ê chhù, chı̍t lé-pài āu chiah koh lâi, koh tı̄ chit lé-pài lāi, lí lóng m̄-thang siū-khı̀, bı̄n tio̍h siông-siông chhiò-chhiò, tio̍h siông-siông chhiùⁿ-koa, thiaⁿ pa-pa ma-ma ê oē, koh lâi ê sı̂ chiah thiàu lo̍h-khı̀, án-ni, lí ê bı̄n chiū oē pı̀ⁿ-chiâⁿ chin súi.” Chit ê gín-ná thiaⁿ liáu chin bô hoaⁿ-hí, chiū tò-khı̀ i ê chhù, chı̍t-ē jı̍p i ê chhù, khoàⁿ tio̍h i ê sió-tı̄ the̍h i ê mı̍h teh thit-thô, i chiū chin siū-khı̀ phah i ê sió-tı̄. Jı̍t-chí tı̍t-tı̍t kè, i lóng boē kı̀-tit thiⁿ-sài tùi i kóng ê oē.” Kàu chı̍t lé-pài āu, i koh khı̀ hit ê chheng chúi-tı̂ hia, kàu ūi chiū beh thiàu lo̍h-khı̀, chóng-sı̄ thiⁿ-sài koh chhut-hiān tùi i kóng, ‘Chhiáⁿ tán chı̍t-ē, lí m̄-thang thiàu, lí tio̍h tò-khı̀ lí ê chhù tán nn̄g lé-pài āu chiah koh lâi, tı̄ chit nn̄g lé-pài lāi, lí tio̍h m̄-thang siū-khı̀, tio̍h thiàⁿ-sioh lí ê sió-tı̄, thiaⁿ pa-pa ma-ma ê oē, bı̄n tio̍h siông-siông chhiò-chhiò, siông-siông gı̂m-si, án-ni, lí nn̄g lé-pài āu lâi ê sı̂ chiah thiàu lo̍h-khı̀, lí ê bı̄n chiū oē chin súi.” Chit ê gín-ná thiaⁿ liáu chin bô hoaⁿ-hí, chiū tò-khı̀, tng i tò-lâi ê sı̂, tú-hó i ê ma-ma teh chú chhài, ma-ma khoàⁿ tio̍h i chiū kā i kóng, “Goá chhiú chin bô êng, chhiáⁿ lí the̍h chı̍t ki thng-sı̂ lâi hō͘ goá.” Chit ê gín-ná chiū bô hoaⁿ-hí kóng, ‘Goá beh khı̀ thit-thô, goá m̄ the̍h hō͘ lí.’” Jı̍t-chí kè chin kín, chı̍t jı̍t, nn̄g jı̍t, chı̍t lé-pài, nn̄g lé-pài, chit ê gín-ná lóng boē kı̀-tit thiⁿ-sài kóng ê oē, ta̍k jı̍t lóng bô thiaⁿ pa-pa ma-ma ê oē, phah sió-tı̄, koh gâu siū-khı̀. Nn̄g lé-pài kè liáu, i chiū koh khı̀ hit ê chheng chúi-tı̂ hia, tng i beh koh thiàu ê sı̂, thiⁿ-sài koh chhut-hiān kā i kóng, ‘Chhiáⁿ tán chı̍t-ē, lí koh tò-khı̀ chhù-nih, tı̄ saⁿ lé-pài lāi lí lóng m̄-thang siū-khı̀, tio̍h choè koai ê gín-ná, saⁿ lé-pài āu lí chiah koh lâi, jiân-āu lí chiū oē pı̀ⁿ-chiâⁿ chı̍t ê chin súi ê gín-ná.” Chit ê gín-ná thiaⁿ liáu chiū siūⁿ, kiám ū iáⁿ? Nā án-ni, goá chit saⁿ lé-pài beh chiàu thiⁿ-sài ê oē choè koai ê gín-ná. Tng i tò-khı̀ chhù-nih liáu-āu, chiū chiàu thiⁿ-sài ê oē, ta̍k jı̍t bı̄n chhiò-chhiò, koh lóng bô hoat siū-khı̀, iā thiaⁿ pa-pa ma-ma ê oē, thiàⁿ sió-tı̄, i ê pa-pa ma-ma khoàⁿ-kı̀ⁿ án-ni chin kı̂-koài, sı̄ cháiⁿ-iūⁿ i pı̀ⁿ chiah koai, chiah iú-hàu? Chı̍t jı̍t, nn̄g jı̍t, saⁿ jı̍t, chı̍t lé-pài, nn̄g lé-pài,......kàu saⁿ lé-pài, chit ê gín-ná chiū koh kàu chheng chúi-tı̂ hia, i kàu ê sı̂ chiū khai-sí beh thiàu lo̍h-khı̀, hut-jiân khoàⁿ-kı̀ⁿ chúi-lāi ū chı̍t ê chin súi ê gín-ná, i khoàⁿ hit ê gín-ná hiah-nih súi, sim-lāi chin him-siān koh chin kı̂-koài, thái ū chiah súi ê gín-ná, tng i teh kı̂-koài ê sı̂, thiⁿ-sài lâi kā i kóng, ‘Sió pêng-iú, chúi-lāi hit ê súi ê gín-ná chiū-sı̄ lí pún-sin neh.” Chit ê gín-ná thiaⁿ liáu kiaⁿ chı̍t tiô, chóng-sı̄ sim-lāi hui-siông hoaⁿ-hí, chiū koáⁿ-kín cháu tò-khı̀ in chhù, the̍h kiàⁿ tı̍t-tı̍t chiò, tı̍t-tı̍t khoàⁿ, ū iáⁿ! I ê bı̄n sı̄ hiah-nih súi, jú khoàⁿ jú súi, i hoaⁿ-hí kàu thiàu khí-lâi, in-ūi i sı̄ chı̍t ê chin súi ê gín-ná. Tùi hit jı̍t khí, hit ê gín-ná siông-siông kı̀-tit thiⁿ-sài ê oē, choè chin koai ê gín-ná, ta̍k lâng lóng o-ló i sı̄ chı̍t ê chin koai koh chin súi ê kó͘-chui gín-ná.” A-tin thiaⁿ ma-ma kóng soah chit ê gín-ná ê kò͘-sū, chiū chai nā beh ū súi ê bı̄n, tio̍h ài siông-siông bı̄n chhiò-chhiò, bô hoat siū-khı̀, thiaⁿ pa-pa ma-ma ê oē, choè chin koai ê gín-ná, án-ni bı̄n chiū oē chin súi. （Lú-soan Ge̍h-khan Tē 77 kı̂, 1966 nı̂ 5 ge̍h)