Súi a-má

A-kong tē-jı̄-ê bó͘ tō-sı̄ súi a-má, súi a-má sı̄ āu-bú, tùi goán a-pà kap goán a-ko͘ lóng chin pháiⁿ koh toā-sè-sim, tùi sun-á-poē mā kāng-khoán pun kah chiok chheng-chhó͘--ê. Chū sè-hàn goá tō chai-iáⁿ súi a-má kan-taⁿ tùi i ê chhin sun-á hó, sè-hàn tı̄ toā ka-têng--nih, goá put-sı̂ to khoàⁿ súi a-má kap sin-pū bē ha̍h, tiāⁿ-tiāⁿ mā teh oan-ke. A-kong kap súi a-má mā tiāⁿ-tiāⁿ oan-ke sio-phah, chhù-lāi hoāⁿ-ke--ê sı̄ súi a-má, m̄-koh i toā-sè-sim, a-kong khoàⁿ bē lo̍h--khı̀, nn̄g-ê lâng tō ē oan-ke, ta̍k-pái oan-ke, súi a-má tō beh lı̄-ka chhut-cháu, koh hoah beh chū-sat, sı̀-koè tâu hō͘ chhù-piⁿ thâu-boé thiaⁿ, jı̍t-chí kú--lâi, a-kong tō boài chhap--i, hō͘ a-má ka-tı̄ 1-ê pı̀ⁿ bô-lián. Sè-hàn, piān-nā khoàⁿ tio̍h súi a-má koāⁿ pau-hok-á beh lı̄-ka chhut-cháu, keh-piah a-peh a-chím tō ē lâi chó͘-tòng, a-má tō jú khàu jú toā-siaⁿ, goá khiā tı̄ piⁿ--á, chin liáu-kái soà--lo̍h ê kio̍k-pún ē án-choáⁿ koh poaⁿ--lo̍h-khı̀...... A-kong koè-sin chı̀n-chêng nn̄g-nı̂, hit-chūn i 85 hoè--a, koh kap a-má sio-phah, chit-pái sı̄ in nn̄g-ê jı̂n-seng choè-āu chı̍t-pái oan-ke sio-phah. A-má chiàu-siông khoán pau-hok-á lı̄-ka chhut-cháu khı̀ Tâi-pak, a-kong iû-goân lāu-sı̂n chāi-chāi, tòng-chò bô hoat-seng siáⁿ-mih tāi-chı̀, ka-tı̄ sé-saⁿ chú-pn̄g. M̄-koh, nn̄g goe̍h-jı̍t liáu-āu, a-kong ūi-chhut-hoeh toà-ı̄ⁿ, a-pà thong-ti tı̄ Tâi-pak ê a-má tńg-lâi khoàⁿ a-kong. Hit-kang, lûn-tio̍h goá chiàu-kò͘ a-kong, a-má ùi Tâi-pak koáⁿ--tńg-lâi, tiām-tiām kiâⁿ jı̍p-lâi pēⁿ-pâng, nn̄g-ê lāu-lâng, nı̂-hoè ka--khí-lâi chhiau-koè kò poàⁿ sè-kí, ba̍k-chiu sio-tùi-siòng, siáⁿ-lâng mā boài seng kóng-oē......, goá chhāi tı̄ piⁿ--á, sim-koaⁿ-thâu hiông-hiông sng--khı̀. Súi a-má iáu-boē kè lâi goán tau chı̀n-chêng, ū seⁿ chı̍t-ê hāu-seⁿ, lı̄-iân liáu-āu, in ang hit-pêng kā chit-ê hāu-seⁿ lâu--lo̍h-lâi, kiò-chò “A-chhong--á”. A-chhong--á sı̄ bí-tiàm thâu-ke ê hāu-seⁿ, ka-kéng bē-bái, sè-hàn tō m̄ thiaⁿ-oē. Goán a-pà piān-nā kóng-tio̍h chit-ê kap i bô kāng pē-bú ê sió-tı̄, chóng--sı̄ it-tı̍t hàiⁿ-thâu. A-chhong--á siàu-liân-sı̂ sı̀-koè chhit-thô jiá tāi-chı̀, in chhù--nih kāng pē kò͘-bú ê hiaⁿ-tı̄ lóng khoàⁿ i bô. I chò-peng chò bē liáu, put-sı̂ lóng hông lia̍h-khı̀ koaiⁿ, chin chē nı̂ liáu-āu chiah thè-ngó͘. I mā tiāⁿ-tiāⁿ tı̄ kaⁿ-ga̍k chhut-chhut jı̍p-jı̍p, bô-chı̂ⁿ ê sı̂, ē cháu-lâi chhoē súi a-má, kiò a-má hō͘ i chı̂ⁿ, i ē kóng chin chē pe̍h-chha̍t-oē, pian kò͘-sū kā a-má phiàn-chı̂ⁿ, chı̂ⁿ sa--tio̍h tō koh cháu--khı̀, chin kú liáu-āu chiah ē koh chhut-hiān. A-pà kóng i chia̍h-to̍k, kéng-chhat put-sı̂ to ē beh chhoē--i, chóng kóng chı̍t-kù, i tı̄ kaⁿ-ga̍k ê sı̂-kan, pí tı̄ goā-kháu ê sı̂-kan khah chē. A-kong koè-sin liáu-āu, A-chhong--á koh tı̄ goán tau kū-chhù chhut-hiān, chia̍h-to̍k liáu-āu, ū-sı̂-á cheng-sı̂n bô chheng-chhó͘, o͘-pe̍h siak mı̍h-kiāⁿ, o͘-pe̍h mā--lâng, súi a-má chin kiaⁿ, cháu khı̀ Tâi-pak bih. A-chhong--á boé--á toà jı̍p-khı̀ goán kū-chhù, a-pà chóng--sı̄ khó-liân i phiau-lōng bô I-oá, bô kā koáⁿ--cháu. A-chhong--á kè-sio̍k toà--lo̍h, chit-pái i lâu siōng kú, thâu-boé kàu beh poàⁿ-nı̂. Ū chı̍t-kang thàu-chá, a-pà tı̄ kū-chhù kong-thiaⁿ teh sio-hiuⁿ, pài-pài liáu, kiâⁿ-koè chhâ-pâng, khoàⁿ-tio̍h A-chhong--á tn̄g-khùi tó tı̄ thô͘-kha, goân-lâi sı̄ chia̍h-to̍k koè-liōng tiòng-to̍k sí--khı̀. Súi a-má ùi Tâi-pak tńg--lâi, sè-sè-siaⁿ tı̄ sí-thé piⁿ--á háu nn̄g-siaⁿ, bı̄n--nih bô siáⁿ piáu-chêng, tō koh oa̍t-thâu tńg-khı̀ Tâi-pak--loh. “Bú-á-kiáⁿ sio khiàm-chè.” A-pà án-ne kóng. (TGB Thong-sı̀n tē 40 kı̂, 2003 nı̂ 1 goe̍h)