Sûn-kàu-chiá ê thài-thài

Sió tê-ba̍k, sió kò͘-sū 1956 nı̂ ê 2 goe̍h 20 jı̍t hoat-hêng ê Bí-kok toā cha̍p-chı̀ “Seng-oa̍h oē-pò” ū chhut kúi tiuⁿ siōng, teh soeh-bêng 5 ê soan-kàu-su khı̀ Lâm Bí-chiu Ò-ka cho̍k (Augas) Ek-koa-tô kok thoân tō-lí. Ò-ka cho̍k san-tē ê só͘-chāi iáu sı̄ bô chhēng saⁿ, bô chhēng khò͘ ê iá-bân cho̍k, siông-siông ū thâi-lâng chò chè-sū ê cho̍k. Gō͘ ê soan-kàu-su kàu chit ê só͘-chāi soà hō͘ hiah ê chheⁿ-hoan thâi-sí, hip tı̄ siōng-nih ê chēng-hêng, sı̄ hui-ki ê thàm-hiám-tūi só͘ hip ê, iā ū sin-si phû tı̄ khe-nih, hō͘ lâng hoat-kiàn--tio̍h ê. Kàu 1957 nı̂ 8 goe̍h, bô phah-sǹg chiah ê soan-kàu-su ê chı̍t ê thài-thài kap eⁿ-á tú chhut-sı̀ chı̍t nı̂ goā ê, saⁿ-chhoā khı̀ hiah ê chheⁿ-hoan ê só͘-chāi beh khı̀ thoân-kàu. Hiah ê siau-sit kap siōng koh chhut tı̄ Seng-oa̍h oē-pò-nih, lēng-goā iā ū siū thâi-sí ê chı̍t ê soan-kàu-su ê sió-moē iā koh khı̀ hia thoân tō-lí, hit ê siōng kap siau-sit iā ū chhut tı̄ Seng-oa̍h cha̍p-chı̀--nı̍h. Kàu 1958 nı̂ ê 12 goe̍h hō ū koh chhut in ê siōng tı̄ Seng-oa̍h cha̍p-chı̀--nih. Taⁿ hiah ê siōng ū chhut 3 tiuⁿ tı̄ pún Pò, chhiáⁿ tho̍k-chiá iā khoàⁿ, iā siūⁿ, tùi hia lâi siū kà-sı̄ kap kek-lē. (Tâi-oân Kàu-hoē-kong-pò tē 843 hō, 1959 nı̂ 3 ge̍h)