1
Koâⁿ-thiⁿ thàu-chá -----
Siū khı̀-sak ê hái-piⁿ,
Soa-po͘-téng pùn-sò kui-tui.
Toā-éng chhiong tùi khò-hoāⁿ ê chûn,
Chhin-chhiūⁿ iau-gō ê lông,
Chhiúⁿ-chia̍h tuh-bı̂n ê iûⁿ-á-kiáⁿ.
Ko͘-toaⁿ ê goe̍h-sek
Chiò boē-bêng phah-phú ê thiⁿ-sek.
Hn̄g-hn̄g hı̂-chûn tı̄ hái-bı̄n tiám-teng,
Chhiong-phoà am-ba̍t ê bū, siu bāng tò-tńg.
Tı̄ soa-po͘-téng chhiah-kha cháu bô-thêng,
Gō͘-hoè ê goá teh cháu-chhoē sím-mı̍h?
Ta̍uh-ta̍uh hō͘ pùn-sò poāⁿ-tó, koh peh-khí,
Hái-éng chhiong--lâi,
Kha-āu-tiⁿ tàng kàu léng-ki-ki,
Seng-khu-āu N̄g-pâi chéng-chê ê kha-jiah
Chek-sı̂ hō͘ éng chhiong-soàⁿ, Bô lâu poàⁿ-jiah.
Hái tiong-ng chhut-hiān chı̍t-ê bí-jı̂n,
I ê saⁿ pe̍h-sih-sih,
Iâⁿ-koè toā-tiâⁿ --nih pha̍k-jı̍t ê iâm.
I ū N̄g-ki sı̍t, thí-khui teh ia̍t,
Chhin-chhiūⁿ beh chhı̂ⁿ-hong poe--khı̀.
I ǹg goá ia̍t-chhiú, chhiú--nih gı̄m chı̍t-lia̍p chhiⁿ,
Chhàn-lān ná tiong-tàu ê jı̍t.
Goá ǹg i cháu--khı̀,
Boē kò͘-tit o͘-lô ê hái-chúi im-koè chhùi-kı̂ⁿ.
Goá ê khùi-la̍t iōng-chı̄n, teh-beh choa̍t-khùi,
Hut-jiân chı̍t-ê le̍k-liōng tùi hái ê ē-bı̄n,
Kā goá koân-koân gia̍h-khí.
2
Khiàm hō͘-chúi ê joa̍h-thiⁿ -----
Tı̄ Chicago, Michigan ô͘-piⁿ,
Ē-po͘-sı̂
Jı̍t-kng chhin-chhiūⁿ phoê-piⁿ,
Sut tı̄ bak-chúi thǹg-pak-theh ê jio̍k-thé.
Bô-kāng chéng-cho̍k chı̍p-oá tı̄ kāng ê to͘-chhı̄:
Saⁿ toā-ô͘ kau-chiap ê só͘-chāi,
Chiu kap chiu ēng chúi kau-kài.
Phiau-lōng kàu chı̍t-poàⁿ,
Goá tı̄ chia chiām-toà,
Thang chhiau-chhoē gín-á-sı̂ kò͘-hiong ê iáⁿ-jiah:
Thiaⁿ-kóng chia iā ū Ńg-Ńg phú-sek ê soa,
Tùi ô͘ ê chit-pêng khoàⁿ boē-tio̍h keh-hoāⁿ,
Ô͘ chhin-chhiūⁿ hái hiah khui-khoah.
Soa-po͘ sio-thǹg-thǹg,
Chhin-chhiūⁿ tú-tn̄g sio-koè ê thoàⁿ-iù-á.
Pùn-sò iā-moá sı̀-koè,
Chit-ê kok-chè chhut-miâ ê toā to͘-hoē,
Kap kò͘-hiong pı̂ⁿ-pı̂ⁿ ù-oè.
Oē-gí boē-thong ê cho̍k-kûn,
Tı̄ chia pha̍k kāng-lia̍p jı̍t,
Chı̀m kāng-khut lô-lô ê ô͘-chúi.
Ô͘ kūn-oá bı̄n-chêng,
Goá chhùi-ta, nâ-âu teh-beh pit--khui,
Khiok chhoē bô thang lim ê chúi.
Ô͘-éng khí-khí lo̍h-lo̍h, chiūⁿ--lâi koh khı̀,
Chhin-chhiūⁿ soa-bô͘ ê hoàn-iáⁿ,
Jiáu-loān phı̂-lô ê sı̄-soàⁿ.
Ô͘-éng chı̍t-soaⁿ soà-chiap chı̍t-soaⁿ,
Hō͘ hoan-thâu ê chûn,
Khoàⁿ boē-tio̍h khò-hoāⁿ ê ǹg-bāng.
Goá ê ba̍k-chiu bū,
Toā-éng chhiong--lâi, kha iā khiā boē chāi.
Hut-jiân thiaⁿ lâng teh hoah:
Chı̍t-ê gín-á hō͘ chúi chhiong--khı̀,
Tng pe̍h-chhang-chhang ê sin-si kng-chiūⁿ-hoāⁿ,
Ou-kim ê thâu-mn̂g iáu teh tih-chúi.
Goá cháu chı̀n-chêng khoàⁿ,
Sí-chiá chiū-sı̄ chá-chêng ê ka-kı̄.
Goá ê kha Ńg, seng-khu phak--lo̍h,
Iû-chāi o͘-àm kā goá thun-ba̍t.
3
Chho͘-chhiu ê hông-hun -----
Hong-thai-hō͘ soé chheng-khı̀ ê hái-piⁿ,
Jı̍t tú-tú chhut,
Goá khan gín-á ê chhiú,
Sàn-pō͘ kàu kò͘-hiong ê káng-piⁿ,
Khoàⁿ lia̍h-hı̂-lâng piàⁿ hong-éng ê siu-sêng,
Tú-chiah tùi hı̂-chûn pàng-lo̍h,
Tek-khah--nih oa̍h-thiàu-thiàu,
Té in moá-pak ê sim-sng kap êng-iāu.
Kha-pō͘-siaⁿ chı̍p-oá tı̄ hı̂-á-chhı̄,
Chhàu-sng-koāⁿ-bı̄ lām hái-sán ê chhiⁿ-tiⁿ,
Tı̄ kiâm-kiâm ê hái-hong --nih thoàⁿ-khui.
Hoah-boē ê hái-kháu-khiuⁿ thoa-tn̂g--khı̀,
Kiò-chhíⁿ gín-á-sı̂ hn̄g-hn̄g ê kı̀-tı̂.
Hı̂-chûn pha-tı̄ káng-lāi, chēng-chēng khùn--khı̀.
Keng-koè chı̍t-mı̂ kap hong-éng kau-chiàn,
In áⁿ tı̄ un-jiû ê jı̍t-kng--nih,
Chhin-chhiūⁿ eⁿ-á khı̂ⁿ tı̄ lāu-bú sin-piⁿ,
Boán-chiok khùn--khı̀.
Soa-po͘ chhun-tián kàu soaⁿ-kha,
Chhin-chhiūⁿ kāu-kāu ê kha-chiah-phiaⁿ,
Tó tı̄ téng-bı̄n khoàⁿ-thiⁿ,
Ū bô-hān ê an-ún kap khòng-khoah.
Goá kap gín-á tı̄ soa-po͘ pàng hong-chhoe,
Nn̄g-pâi chham-chhi ê kha-jiah ı̀n tı̄ soa-téng.
Gín-á ê chhiò-siaⁿ hoê-hióng tı̄ hong--nih,
Thàng kàu koân-koân ê pe̍h-hûn--nih.
“Chia ū chı̍t-tè lâm-sek ê lê-á-khak neh!”
I ná pò goá khoàⁿ, ná ǹg teng-thah cháu--khı̀.
Chı̍t-ê a-pô chē tı̄ teng-thah thâu-chêng,
I ná hoāⁿ hı̂-bāng, ná haiⁿ thoa-tn̂g ê koa-tiāu.
Hn̄g-hn̄g khoàⁿ-tio̍h goán chiū hoah:
“Hit-pêng ū siáu-káu-éng, m̄-thang koè--khı̀ o͘h!”
Gín-á kap goá kiâⁿ-oá I seng-khu-pin,
Khoàⁿ I ēng jiâu-jiâu, toā-ki-kut ê chńg-thâu-á,
Chı̍t-chiam chı̍t-chiam, pó͘ bāng-á ê phoà-khang.
Gı̂n-sek ê thâu-chang siám-sih jı̍t-lo̍h ê hún-âng,
Chhin-chhiūⁿ ū thiⁿ-sài ê kng-khoân.
Goá mn̄g i, “A-pô lí kúi-hoè? Toà tı̄ toh-ūi?”
“Goá kin-nı̂ chhit-cha̍p lah.
Toà tı̄ hoāⁿ-piah āu-bı̄n ê kē chhù-liâu-á.”
I toà tāng-tāng ê hái-kháu-khiuⁿ,
Thêng ba̍k-nih-kú koh kóng,
“Thè lâng kò͘ teng-thah,
Ke-kiám pó͘ hı̂-bāng-á tō͘-oa̍h.
Choè che sit-thâu--ê í-keng bô choē.
Siàu-liân--ê m̄ o̍h.
Taⁿ goá to choè chı̍t-sı̀-lâng lah.”
“A-pô, lí ū kúi-ê kiáⁿ?”
I oa̍t-thâu khoàⁿ-hái, chiah bān-bān hoê-tap,
“Goá kan-ta chı̍t-ê sun, í-keng bô kiáⁿ.
Goá ê ko͘-kiáⁿ kap i chá-koè-sin ê lāu-pē,
Lóng sı̄ thó-hái chı̍t-khı̀ bô tò--tńg-lâi.
Cha̍p-nı̂-chêng goá ê hāu-siⁿ kap sin-pū choè-tı̄n chhut-hái,
Liân sin-si iā chhoē bô-tio̍h.
Kan-ta pàng chı̍t-ê sun, chiah N̄g-hoè goā,
Hō͘ goá thoa-boâ kàu-taⁿ.
Chóng-sı̄ iā kap goá choè-phoāⁿ.
Í-keng teh tha̍k chho͘-tiong lah.”
“A-pô, sit-lé. Bô eng-kai kā lí mn̄g che.”
“Bô iàu-kín lah. Siōng kan-khó͘ ê sı̂,
Hoâiⁿ-tı̍t í-keng koè lah.
Jı̂n-seng chiū-sı̄ án-ni,
Chhin-chhiūⁿ hái-éng khí-khí lo̍h-lo̍h, lóng bô tiāⁿ-tio̍h.
Ū khoài-lo̍k, iā ū pi-siong,
Ū sit--khı̀-ê, iā ū tit--tio̍h-ê.
Goá chhù--nih thó-hái kúi-nā-tāi,
Chı̍t-sı̀-lâng toà tı̄ hái-piⁿ,
Khoàⁿ-tio̍h ū-ê hō͘ hái thó--khı̀,
Iā ū-ê thàn toā-chı̂ⁿ, khui kong-si.
Thó-hái-lâng khò hái lim-chia̍h,
Ū-sı̂ soah iā hō͘ hái thun-chia̍h.
Chóng-sı̄ goá m̄-ài oàn-thàn,
Iā m̄ hō͘ pháiⁿ khoân-kéng ke-thiⁿ khó͘-lān.
Goá iáu tio̍h chhiâⁿ chı̍t-ê sun,
Sui-jiân thàn-chia̍h kan-lân,
Iáu-kú ū tām-po̍h ǹg-bāng.
Goá ê kiáⁿ kap sin-pū phah-bô--khı̀ hit-chām,
Nā m̄-sı̄ ūi-tio̍h sun,
Kiám-chhái boē oa̍h kàu chit-chūn.
Sı̄ lah, i sı̄ goá ê tàⁿ, iā sı̄ goá só͘ kià-bāng.
Goá beh thèng-hāu kàu i toā-hàn.”
A-pô khiā--khí-lâi, siu-sı̍p hı̂-bāng kap ke-si.
“Thiⁿ teh-beh àm, Goá beh tò--khı̀,
Chú-pn̄g hō͘ pó͘-sı̍p tò--lâi ê sun-á chia̍h.
Lín iā thang tò--tńg-khı̀.
mı̂-sı̂ ê hong chin léng.”
Goá khoàⁿ i ǹg hoāⁿ-piah kiâⁿ--khı̀.
Ba̍k-kia̍h ê siaⁿ, khà tı̄ âng-mn̂g-thô͘-téng.
Bān koh kian-tēng.
Gín-á beh khioh chı̍t-lia̍p lâm-sek ê lê-á-khak.
M̄-kú tı̄ soa-po͘ piàn-chhoē bô-tio̍h.
Soa-téng ū N̄g-ki chiam chhe-á,
Iā ū kúi-ê sok-ka lok-á.
Gín-á kā in hiat-jı̍p pùn-sò-tháng --nih.
I kóng “Án-ni pa̍t-lâng chiū boē chhoaⁿ--tio̍h.
Soa-po͘ iā oē piàn koh khá súi.”
Kiâⁿ tı̄ âng-chng-lō͘, gín-á chhiùⁿ-koa,
Khoàⁿ ka-kı̄ ê iáⁿ, hō͘ goe̍h-niû thoa tn̂g-tn̂g.
I iû-goân khoà-ı̀ chá-chêng chhoē bô-tio̍h ê lê-á-khak.
“Chiū hō͘ i lâu tı̄ hái-piⁿ,
Kap súi-súi ê soa-á choè chhù-piⁿ,
Hō͘ pa̍t-lâng iā oē tit thang khoàⁿ i.”
Goá án-ni kā i an-ùi.
Bùn-jı̍p pōng-khang,
Goán thiaⁿ-tio̍h hái-éng ê hoê-im,
Tı̄ hn̄g-hn̄g ê chhut-kháu,
Chûn-lê-siaⁿ tng teh hiáng.
“Lán kiám oē-sái koh lâi hái-kı̂ⁿ-á?”
Gín-á mn̄g goá.
Chih-chiap i jia̍t-chhiat ê ba̍k-sek,
Goá ǹg i tı̀m-thâu.
“Tong-jiân oē-sái koh lâi,
Lán beh tiāⁿ-tiāⁿ lâi chia,
Chit-ê toā to͘-chhı̄ pian-iân ê hái-piⁿ.”
Bô-lūn koâⁿ á-sı̄ joa̍h,
Àm-mı̂ á-sı̄ thiⁿ-kng,
Hián-bêng ta̍k-iūⁿ ê ò-biāu.
Hián-bêng ta̍k-iūⁿ ê àu-miāu.
