Sı̂n-bêng ê Kı̂-bûn

Tè-kun kap I ê tâng-phoāⁿ hō͘ hé sio-sí Tı̄ Ta-khoe ū chı̍t-sian ê Tè-kun la̍k-pah-goā nı̂ kú,peh-sı̀ⁿ chin sı̀n-gióng--ê. Ta̍k-nı̂ chiaⁿ-goe̍h 13 jı̍t ū chiong toā-ku teh kā i choè siⁿ-jı̍t . Chiaⁿ-goe̍h 8 jı̍t ū hō͘ Thâu-siâⁿ ê lâng chhiáⁿ khı̀ siā-sı̂n . In-ūi la̍h-chek-hé tó lo̍h-lâi , sio-tio̍h Tè-kun ê saⁿ , soà sio seng-khu, lóng-chóng ū sio 5 sian khı̀ ,Ū-ê pı̀ⁿ hé-hu, ū-ê sio chı̍t-poàⁿ , ū-ê sio chhiú kap bı̄n, Chhù lóng bô sio-tio̍h. kàu thiⁿ-kng khí-lâi chiah chai,hit ê lâng chin kiaⁿ,kín lâi kā Ta-khoe ê lâng kóng. Ta-khoe ê lâng m̄ pàng i soah,hit ê lâng tiāⁿ-tiāⁿ kù-chāi lâng phah, kóng, “Lí nā kā goá phah-sí, goá ia̍h bô thang chhòng hêng lín, che sı̄ ko͘-put-chiong ê.” Chit ê lâng chhiáⁿ-sı̂n beh kiû hok-khı̀ , hoán-tńg tú-tio̍h chai-ē . Koh Tè-kun tú-tio̍h hé ia̍h boē chí-sı̄ i, ia̍h boē cháu; sı̄ chhâ ê mı̍h, oá-tio̍h hé chū-jiân oē sio-khı̀. Hiān-sı̂ chng-nı̍h ê lâng chin iu-būn, kóng, phah-sǹg kin-nı̂ oē chin pháiⁿ-nı̂ tang , só͘-í chiah oē án-ni . Thian-su beh Kàng-lı̂m Tı̄ kū-nı̂ kū-le̍k 7 ge̍h Gı̂-lân ū chı̍t ê hê-siūⁿ, iâu-giân kóng Tiuⁿ Thian-su beh kàng-lı̂m , ū lâi kā i thok-bāng , kóng 7 , 9 ge̍h 2 ge̍h-jı̍t ê tiong-kan , thiⁿ-ē ê lâng beh sí chı̍t-poàⁿ , ū ı̀n kóng-kò, sı̀-koè pò lâng chai . Hit-tiuⁿ kóng-kò goá pún-sin ū khoàⁿ-kı̀ⁿ, chiū-sı̄ kóng, nā-sı̄ khoàⁿ-kı̀ⁿ chit-tiuⁿ ê siān-sū, á-sı̄ hó-sim ê lâng tio̍h kín-kín siá 7 tiuⁿ pò lâng chai , koh tio̍h chia̍h chı̍t-thiap ê io̍h-á. Chit ê io̍h-hng tı̄ kóng-kò-toaⁿ-lāi ū siá-bêng , nā bô án-ni kiâⁿ ê lâng oē thò͘ chhiⁿ-huih , poàⁿ-tiám-cheng chiū oē sí . Khoàⁿ-kı̀ⁿ ê lâng chin kiaⁿ ; ū-ê kín khı̀ thiah io̍h-á ;ū-ê kín siá kóng-kò pò lâng chai . Āu-lâi hit ê iâu-giân ê hê-siūⁿ ū hō͘ kéng-koaⁿ lia̍h-khı̀ koán-á-lāi khu-liû , hit ê sū chiah soah . Káu-ông-kong Thoè-sı̂n

Tı̄ nn̄g nı̂ chêng Lô-tong ê Bú-láu-khiⁿ ū nn̄g-ê chhı̄ gû gín-ná choè chı̍t-sian ê thô͘ ang-á , khiâ chı̍t-chiah-ê thô͘-gû, chiū kā i pài , āu-lâi lâng chiū hong-siaⁿ kóng , chit ê thô͘ ang-á oē kā i khoàⁿ gû, ia̍h oē lia̍h hı̂ hō͘ i , kóng nā ū pak-tó͘-thiàⁿ , mn̄g i sûi-sı̂ hó . Ū lâng kóng , oē hō͘ khiau-ku oē tı̍t , chiū kā i liap-hō “Káu-ông-kong .” Hut-jiân-kan chı̍t jı̍t kúi-nā chheng lâng khı̀ hêng-hiuⁿ hia , khı̀ hia sio-kim ê lâng , ū the̍h sı̀-hāng tńg-khı̀ i-pı̄ⁿ :--

1.Iúⁿ khoe-chúi tńg-khı̀ lim . 2.The̍h chio̍h-thâu tńg-khı̀ choaⁿ-tê , choaⁿ hó hiat tı̄ lō͘-piⁿ ; lâng koh khioh khı̀ choaⁿ , chia̍h-tio̍h phoà-pı̄ⁿ iáu oē hó . 3.Khau chháu-á tńg-khı̀ choaⁿ-tê, hit ūi ê chháu-á khau kàu bô poàⁿ-ki . 4.The̍h kim-hu kap hiuⁿ-hu choè lô͘-tan . Hit-ūi bô poàⁿ-hāng mı̍h tı̄-teh, kan-ta nn̄g , saⁿ tè toā chio̍h-thâu tı̄-hia nā-tiāⁿ . Āu-lâi ū kéng-chhat-koaⁿ khı̀ hia kò͘, m̄-hō͘ lâng pài , iā soà khan chháu-soh-á . Ū lâng khoàⁿ kéng-chhat-koaⁿ tı̄-hia , m̄-káⁿ oá-khı̀ pài ,hn̄g-hn̄g hiòng Káu-ông-kong ê só͘-chāi pài-pài-teh chiū kín cháu . Goán ia̍h ū khı̀ hia pò͘-tō , chin-choē lâng thiaⁿ-tio̍h chin gông-ngia̍h,tı̄ goá sin-piⁿ ū chı̍t-ê tio̍h koâⁿ-jia̍t , koâⁿ kàu khı̄-khı̄-chhoah . Goá mn̄g i kóng , Lí ū mn̄g Káu-ông-kong á-bô? I kóng, Chı̍t jı̍t pài saⁿ pái , m̄-chai i ê sı̂n bô koán kàu chia á m̄-sı̄ . Taⁿ chiah kú lóng bô lâng ài khı̀ pài i ; lâng chiū kóng sı̄ thoè sı̂n-khı̀ . In-ūi sı̄ liap-chō ké ê sı̂n , só͘-í heng boē kú . (Tâi-oân Kàu-hoē-pò tē 469 koàn,1924 nı̂ 4 ge̍h)