Khoàⁿ--khí-lâi sı̄ pē-á-kiáⁿ hiaⁿ-tı̄,
Kāng-khoán sàn kah kúi beh thoa--khı̀,
Koah nâ-âu ê oan-siû,
Ó͘ ba̍k-chiu-jı̂n ê chheh-hūn,
Ùi tiâng-sı̂ khai-sí ?
Soa-bô͘ ta-soaⁿ sı̄ Ah-hu-gán (Afganistan) ê sèng-tē,
Ta̍k-jı̍t kūi--lo̍h-khı̀ pài-sı̂n ngō͘ piàn,
Ki-tó hoé-sio-chhù ê chheh-hūn
Kiông-kan cha-bó͘ ê oan-siû,
Lú pài lú chē.
Sı̂n tı̄ in tiong-kan oē chı̍t-tiâu thih-soàⁿ,
Lâng bē-tàng lâi-óng kiâⁿ--koè,
Kan-na chhèng-chí toāⁿ bē-soah,
Kap toā-phàu pōng hō͘ in lóng-chóng sí.
Sí--khı̀-ê khoàⁿ--khí-lâi mā chin-sêng
In pē-á-kiáⁿ hiaⁿ-tı̄,
Seng pak hit-siang ê,
Kiāu hit-ki kim chhùi-khí,
Chheng-sǹg oan-siû ê khiàm-chè.
Phoà-pò͘ pau ê sin-si
Hō͘ Ah-hu-gán ê soa-hong chhoe ta--khı̀,
Chiok-chē tēng-khok-khok un tı̄ hia,
Chhin-chhiūⁿ chò-hoé teh pài Ah-lah ê sı̂n :
Sı̂n bē bē kı̀--tit,
Lâng lóng bô iàu-kín.
（Tâi-bûn-tong-sı̀n Tē 101 kı̂, 2002 nı̂ 7 goe̍h)
