Sı̍p-jı̄-kè Ê Kau-chiàn 01
Chó-tı̂n Eng-gān tù
Tân Kim-jiân e̍k
Tâi-oân Soan-tō-siā Chhut-pán
Chhéng-an
Goá bat tı̄ Chú chı̍t ê chí-bē, chit ê chí-bē 15 nı̂ chêng tit-tio̍h Chú ê kiù-un, hit sı̂ chí-bē siū Sèng Sı̂n ê kng chiò, chai ka-kı̄ ê choē, tı̄ Siōng-tè ê bı̄n-chêng iu-siong thòng-hoé thı̂-khàu lâu ba̍k-sái, chit sı̂ hut-jiân hn̄g-hn̄g khoàⁿ-kı̀ⁿ sı̍p-jı̄-kè ê Chú, I ê hêng-siōng chin soè, chóng-sı̄ bêng-bêng sı̄ khó͘-lān ê Chú ê hêng-siōng, tùi Chú ê chhùi só͘ chhut ê siaⁿ “Kiáⁿ ah, an lí ê sim, lí ê choē sià lah.” (Má-thài 9:2) Tùi choa̍t-bāng tiong o͘-àm ê tiong-kan, bô phah-sǹg thang thiaⁿ-kı̀ⁿ Chú ê siaⁿ, ah Chú Iâ-so͘ kin-á-jı̍t iáu-kú oa̍h-oa̍h tı̄-teh, Chú sı̄ choē-jı̂n ê Kiù-chú, kin-á-jı̍t iû-goân tùi sı̍p-jı̄-kè téng teh chhut-siaⁿ, chí-bē tı̄ bô hān-liōng Siōng-tè ê thiàⁿ ê bı̄n-chêng, ha̍p siang-chhiú kám-kek lâu ba̍k-sái.
Sı̍p-jı̄-kè! Sı̍p-jı̄-kè! Éng-oán boē bia̍t-bô Kiù-chú Iâ-so͘ sı̍p-jı̄-kè ê thiàⁿ, choân jı̂n-lūi ı̂-it ê ǹg-bāng sı̍p-jı̄-kè ê oē, sı̍p-jı̄-kè ê pó-huih, ah! Hô-téng ê pó-kùi ah! Kok-kok-thaⁿ ê sı̍p-jı̄-kè kó͘-chá hiān-kim tâng chı̍t-iūⁿ ê sū-sı̍t.
“Thiⁿ toē beh hoè-bô, Goá ê oē boē hoè-bô.” (Má-khó 13:31) Sı̄! Sı̍p-jı̄-kè ê oē sı̄ éng-oán put-bia̍t Siōng-tè ê oē, chit ê chí-bē ēng sı̂n-lêng ê ba̍k-chiu gióng-bōng sı̍p-jı̄-kè, iā ēng sı̂n-lêng ê hı̄-khang thiaⁿ Chú ê siaⁿ. Goá jio̍k-thé khó͘-thàng ê jı̍t, kiû chit ê chí-bē kı̂-tó, chí-bē jia̍t-sim ūi-tio̍h goá kı̂-tó, hit sı̂ tùi Siōng-tè lâi ê oē “Goá bat kap Ki-tok tâng tèng sı̍p-jı̄-kè; goá iáu-kú teh oa̍h, m̄-sı̄ iû-goân goá, chiū-sı̄ Ki-tok tiàm tı̄ goá teh oa̍h.” (Lō͘-ka 2:20) Goá hō͘ koh-iūⁿ ê lêng-kám chhiong-moá, hoê-kò͘ goá pún-sin ê hiān-chāi kap kè-khı̀, siū tio̍h sı̍p-jı̄-kè ê kng chiò, lâi hoán-séng ka-kı̄ ê seng-gâi. Goá iā sı̄ sı̍p-jı̄-kè ê pó-huih só͘ sio̍k-hoê chı̍t ê choē-jı̂n, bô sı̍p-jı̄-kè chiū bô ǹg-bāng ê jı̂n-seng. Só͘-í Chú tùi goá tit-tio̍h kiù ê tong-chho͘, chiū ēng sı̍p-jı̄-kè ê oē ín-chhoā goá.
“Lâng nā ài tè Goá tio̍h khoàⁿ bô ka-kı̄, giâ i ê sı̍p-jı̄-kè, lâi tè Goá. In-ūi kı̀ⁿ-nā ài kiù i ê sı̀ⁿ-miā ê, beh sit-lo̍h i, kı̀ⁿ-nā ūi-tio̍h goá lâi sit-lo̍h i ê sı̀ⁿ-miā ê beh tit-tio̍h i.” (Má-thài 16:24, 25)
Pek-hāi ê sı̂, siū koáⁿ-tio̍k ê sı̂, phoà-pı̄ⁿ loán-jio̍k ê sı̂, koh tı̄ it-chhè ê hoān-lān, sòng-hiong ê tiong-kan só͘ gióng-bōng ê, chí-ū Chú Iâ-so͘ ê sı̍p-jı̄-kè. Chú pàng-sak Siōng-tè ê toē-ūi tèng tı̄ sı̍p-jı̄-kè, pàng-sak I ka-kı̄ ê sı̀ⁿ-miā. Tāng-choē ê goá oá-khò I tùi tē-ge̍k kiù chhut. Taⁿ kı̀-jiân siū kiù-chhut ê goá, giâ sı̍p-jı̄-kè tè I ê kha-pō͘ sı̄ eng-kai, chit ê sı̍p-jı̄-kè sı̄ hō͘ goá thiⁿ lâi ê biāu-io̍k, sèng-kiat ê chí-chiam.
30 nı̂ chêng goá siū chhe kàu Tâi-oân chı̍t ê chheng-liân thoân-tō-chiá, goá bô chı̂ⁿ-tē, chí-ū chı̍t pún Sèng-keng, ēng Tâi-pak tāi-ha̍k ê koaⁿ-sià choè kun-kù toē, mı̂-jı̍t chı̄n-la̍t thoân-tō, ū chı̍t-jı̍t tı̄ chū-hoē ê se̍k-siōng ià-siān, iûⁿ-àm-bı̂n tó lo̍h-khı̀, chhiáⁿ khí-lâi chı̍t khoàⁿ, hiaⁿ-ché ûi-lûi goá lóng lâu ba̍k-sái chı̄n-la̍t ūi goá kı̂-tó, goá tùi Siōng-tè tit-tio̍h khùi-la̍t, chiū khí-lâi, chú-chhı̂ chū-hoē. Āu-lâi Siáu-le̍h-goân sian-siⁿ (tiat-ha̍k kàu-siū) án-ni kiàn-chèng, “kı̂-tó ê tiong-kan, goá khoàⁿ-kı̀ⁿ sian-siⁿ ê hêng-siōng, chhēng pe̍h-saⁿ, sim-chōng lı̍h-khui, heng-pō͘ ū toā huih-jiah, lí chiū siang chhiú gia̍h koân, chiūⁿ thiⁿ khı̀, í-āu khoàⁿ-kı̀ⁿ kúi-pah, kúi-chheng chhēng pe̍h-saⁿ ê sèng-tô͘ chiūⁿ thiⁿ khı̀” goá sı̀n chit ê ı̄ⁿ-siōng oē sı̍t-hiān, sûn-kàu sı̄ Thiⁿ-pē hō͘ goá ê èng-ún, che sı̄ goá ê sı̍p-jı̄-kè.
Tn̂g-sı̂ tı̄ loē-tē, mı̂-jı̍t teh hiàn ke̍k-lia̍t ê kı̂-tó, goá thoân-tō liáu tńg-khı̀ ê sı̂, tı̄ kàu-hoē thiaⁿ-kı̀ⁿ kiàn-chèng; sı̄ tı̄ kı̂-tó tiong chı̍t ê sèng-tô͘, tùi Chú só͘ siū ê, siá tı̄ chia choè chham-khó. Koân tú thiⁿ, kiā ná piah ê soaⁿ-lō͘, chiàⁿ-pêng sı̄ hiám-iàu ê soaⁿ, tò-pêng sı̄ chheng-tn̄g ê soaⁿ-kok, ba̍k-chiu lóng ian-n̄g, soaⁿ ê poàⁿ-tô͘, chí ū chı̍t tiâu soè koh oe̍h oa̍h-miā ê sió-lō͘, lím-lím-á chı̍t ê lâng oē thang kiâⁿ nā-tiāⁿ, hut-jiân thâu-chêng ū êng-kng chhàn-lān ê Chú Ki-tok chı̀n-chêng teh kiâⁿ ê hêng-siōng, tı̄ I ê āu-bı̄n ū thí-khui siang-chhiú hoaⁿ-hí ê moá-bı̄n, chhiong-moá kám-siā, tè I teh kiâⁿ sòng-hiong ê thoân-tō-chiá Chó-tı̂n ê hêng-siōng, chiū-sı̄ bô toà chı̂ⁿ-tē, chí-ū só͘ chhēng chit seng-khu ê goá. Khak-sı̀n che sı̄ só͘ hō͘ goá sı̍p-jı̄-kè ê lō͘, só͘-í pún-su ê toê-miâ kiò choè “sı̍p-jı̄-kè ê kau-chiàn” ūi-tio̍h Chú Iâ-so͘ Ki-tok ê êng-kng, kap chí-bē hia̍p-le̍k siá pún-su.
1961 nı̂ 3 goe̍h 8 jı̍t
Chó-tı̂n Eng-gān