1. Sûn-hoê Thoân-tō
“Goá chiū-sı̄ lō͘, sı̄ chin-lí, sı̄ oa̍h-miā, nā bô tùi Goá, chiū bô lâng chiū-kūn Pē.” (Iok-hān 14:6) Sı̍t-chāi nā m̄ sı̄ chú ê sèng-chhiú ín-chhoā bē thang ta̍t-tò chiong-kio̍k ê bo̍k-tek, chı̍t-pō͘ chı̍t-pō͘ ná kı̂-tó tit Chú ê ín-chhoā lâi kiâⁿ chiah oē an-choân. Kı̀m-chia̍h liáu-āu tit-tio̍h ín-chhoā ēng 1 jı̍t chia̍h 1 tǹg lâi sûn-hoê thoân-tō. Tı̄ Ki-tok sin-bûn ēng “Sı̂n-jú” ê toê ta̍k goe̍h-jı̍t kóng-kò “Phoà-siùⁿ ê lâng tio̍h lâi, lân-pı̄ⁿ ê lâng tio̍h lâi.” Chhē chhut khó͘-lān ê pêng-iú, tùi chı̄n-lâm kàu chı̄n-pak choân kok ê sûn-hoê ê thoân-tō. Lâng bô iông-ı̄ⁿ sı̀n, mn̂g-hō͘ khai-hòng sı̄ lân-sū. Thoân-kàu-su hoán-tùi, kàu-hoē ê mn̂g bô khui, chí-ū i-seng iā khoàⁿ-phoà, chia̍h-io̍h iā bô hāu, khó͘-lān ê pêng-iú lâi kiû kiù.
Chai ha̍k-ı̄ⁿ khah siông sı̄ thong lé-pài ta̍k-jı̍t téng-po͘ khui Sı̂n-jú-hoē, èng lâng ê iau-kiû iā chhut-khı̀ sûn-hoê, só͘-í ta̍k-jı̍t to ū kang-chok, koh in-ūi iau, jio̍k-thé kám-kak hui-siông ià-siān. Siū chhiáⁿ khı̀ ê só͘-chāi toā pō͘-hūn sı̄ ka-têng, khah siông sı̄ kúi ê lâng chū-chı̍p ê kı̂-tó, ū-sı̂ sı̄ 20, 30 lâng sió kui-bô͘ ê thoân-tō, goá nā chē lo̍h hé-chhia chiū hian Sèng-keng ná tha̍k ná kı̂-tó kàu beh khı̀ ê tē-tiám, só͘-í chı̍t nı̂ kú Sin Kū-iok Sèng-keng ū tha̍k cha̍p-goā piàn, thong-kè Mô͘-se ê ngó͘-keng, hoat-hiān Siōng-tè sı̄ sèng-kiat ê Siōng-tè, sı̍p-jı̄-kè sı̄ sèng-kiat ê chúi-choâⁿ, Ki-tok-kàu sı̄ sèng-kiat ê chong-kàu.
“Goá sı̄ hō͘ lín chiâⁿ-sèng ê Iâ-hô-hoa.” (Lı̄-bı̄-kı̀ 22:32) Hiàn cheng-siⁿ ê kèng-pài lóng kiat-liân tı̄ sı̍p-jı̄-kè ê pó-huih, sı̍t-chāi Ki-tok ê oa̍h-miā sı̄ chāi tı̄ ka-sı̄ sèng-kiat, iā tio̍h án-ni thoân, án-ni kı̂-tó. Goá ê soat-kàu chhin-chhiūⁿ peng-to hiah-lāi, in-ūi hiáⁿ-ba̍k Sı̂n-jú ê sı̂n-jiah saⁿ-soà hián-hiān, put-ti put-kak chū-ko sím-toàn lâng, chiâⁿ-choè kiau-ngō͘ ê chē-tiām. Hām-lo̍h mô͘-kúi ê oa̍h-tauh, āu-lâi chiah chai tı̄ sı̀n-gióng seng-oa̍h, kiau-ngō͘ sı̄ choè thang kiaⁿ ê choē, Chiong só͘ tit-tio̍h lú-hùi chhut-khı̀ thoân-tō, sûn-hoê kàu Kiú-chiu tńg-lâi ê sı̂, só͘ tit-tio̍h ê hiàn-kim pí só͘ khai ê lú-hùi khah choē, chiah ê iú-he̍k sı̄ beh choè sím-mı̍h ê kà-sı̄.
“Lí sı̄ khoàⁿ-kı̀ⁿ ta̍k hāng ê Siōng-tè.” (Chhòng-sè-kı̀ 16:13)
2. Khioh Be̍h-sūi
Tùi Hok-kong-koān kam-bo̍k kok lı̍p liâu-ióng-só͘ sı̀n-gióng ê pêng-iú hia ū “kè-lâi Má-ki-tùn pang-chān goán” ê siaⁿ sı̄ hō͘ hı̀-lô khó͘-chhó͘ sı̀n-gióng ê pêng-iú ê kiû kiù. Goá sûn-hoê Tiong-kok toē-hng lâi Hok-kong, siū ín-chhoā jı̍p kūn liâu-ióng-só͘ chı̍t keng lú-koán, hioh 1 mı̂, mı̂-sı̂ chiūⁿ bı̂n-chhn̂g siūⁿ beh khùn, thiaⁿ-kı̀ⁿ ē-bı̄n ê pâng-keng ū lim-chiú, chhiùⁿ-koa, thiàu-bú ê siaⁿ, thèng-hāu 2 tiám-cheng kú m̄ nā iáu boē soah, hoán-tńg ná lı̄-hāi, ki-lú thiàu-bú-khek (Waltg) tē-ge̍k ê koa khó͘-chhó͘ goá ê sim-sı̂n. Lim chit-hō tē-ge̍k ê chhàu-chiú, bı̂n-á-chài ê chū-hoē it-tēng toā sit-pāi, chiū peh khí-lâi kı̂-tó. Ná kı̂-tó, phah-chhiú chhiùⁿ-koa mô͘-kúi ê nāu-tōng ná lı̄-hāi, goá m̄ jı̄n su iā chhut-siaⁿ kı̂-tó, m̄ goān hō͘ ki-lú kap lim-chiú ù-oè ê koa-siaⁿ khah-iâⁿ, ū-sı̂ khiā khí-lâi ū-sı̂ chē lo̍h-khı̀, phah-chhiú kı̂-tó. Chiām-chiām sau-siaⁿ, ià-siān, kı̂-tó soah kúi-nā pái teh beh tn̄g-chām, hit sı̂ chai-iáⁿ goá toà chı̍t keng 10 thiap ê pâng-keng ū toā-choâ khûn kúi-nā têng, kám-kak toā-choâ giâ-lân ê siaⁿ, chiū choâ-to̍k chhim-jı̍p goá ê seng-khu, chiū-sı̄ thang kiaⁿ tē-ge̍k ê lāu-choâ sat-tàn ê kong-kek, kàu thiⁿ-kng kı̂-tó kàu choân-sin nńg kô-kô, thiⁿ-kng siūⁿ tio̍h goá ê sim-sı̂n bô khùi-la̍t chhin-chhiūⁿ sí-si, chiū thó͘-khùi kin-á-jı̍t ê chū-hoē it-tēng oē sit-pāi.
Tit-tio̍h pı̄ⁿ-ı̄ⁿ ún-chún tı̄ kái-phò-sek chū-hoē. Tio̍h chı̍t-kiaⁿ, tài hı̀-lô sí ê lâng sí-thé kái-phò ê kiat-kó, tùi hı̀ the̍h chhut chhàu-chho chhàu-chho chhin-chhiūⁿ phín-phóng kiû chin-choē pâi tı̄ hia, boē bián-tit siūⁿ khí pêng-iú hiah ê jı̍t ê khó͘-thàng, chit sı̂ Sèng Sı̂n ê koân-lêng tùi téng-bı̄n kàng-lo̍h, siūⁿ kóng “sı̄ lah, kong-táⁿ sat-tàn soat-jio̍k chiàn tek-khak tio̍h khah-iâⁿ” oá 30 ê tâng-pı̄ⁿ tâng-sı̀n ê pêng-iú, bı̄n chhiⁿ-chhiⁿ, ū lâng koà chhùi-tà, siān-siān chē teh, goá kóng khí Iâ-so͘ Ki-tok sı̍p-jı̄-kè ê thiàⁿ kap koh-oa̍h ê oa̍h-miā, kiàn-chèng hiān-chāi só͘ ū choē-choē Sù-tô͘ hêng-toān-tek ê i-tı̄. Tı̄ chia tı̄ hia khai-sí nâ-âu kńg tı̄ⁿ ê siaⁿ, chiū choân hoē-chiòng kám-siū Sèng Sı̂n ê thiàⁿ, chhut-siaⁿ khàu khí-lâi.
Choè-āu ūi-tio̍h múi chı̍t lâng i-tı̄ ê kı̂-tó, chū-hoē soah choè-āu ê khó͘-khǹg. “Lia̍t-ūi! Lín kin-á-jı̍t sêng-siū Ki-tok sı̍p-jı̄-kè ê pó-huih, Sèng Sı̂n ê chhiong-moá, ū hūn koh-oa̍h ê oa̍h-miā, só͘-í chá-khí, tiong-tàu, ê-hng, 3 pái ūi-tio̍h chit ê sū chı̄n-sim kám-siā kı̂-tó. Chit ê kı̂-tó beh tû-khı̀ lín ê pı̄ⁿ” chài-hoē! Goá chiū cháu-khı̀ chhia-chām, khı̀ Kiú-liû-bí chē hé-chhia, se̍h Lo̍k-jı̂-tó, chhut-lâi Kiong-kiā, kè-sio̍k sûn-hoê thoân-tō, keh 1 nı̂ koh-chài hóng-būn kam-bo̍k ê sı̂, Giâm-pán hiaⁿ kap Tiong-iá hiaⁿ 2 lâng chhoā goá jı̍p chām-chêng ê lú-koán, kiàn-chèng kóng hit keng lú-koán sı̄ chiú-ka, m̄ chai-iáⁿ, hō͘ sian-siⁿ hioh tı̄ hia chin put-chū, chiah chai hit keng lú-koán thang kiaⁿ ê sat-jı̂n kap siong-hāi sū-kiāⁿ, goá thiaⁿ-tio̍h án-ni chiū chai in ê sı̀ⁿ-miā sı̄ sí tı̄ hit bé thang kiaⁿ tē-ge̍k lāu-choâ ê chhiú.
Tiong-iá hiaⁿ chiap-soà koh kóng; “Sian-siⁿ! Goá m̄ sı̄ sı̀n-tô͘, ta̍k-jı̍t khak-huih teh keng-kè choa̍t-bāng ê seng-oa̍h, pêng-iú lâi hù chū-hoē, chiah khı̀ khoàⁿ-māi, chóng-sı̄ hō͘ chhiong-moá chhù-lāi put-su-gı̄ ê lêng-le̍k ap-tó, bû-ı̀-tiong sı̀n Ki-tok, kám-kek lâu ba̍k-sái, tùi hit jı̍t khí 1 jı̍t 3 pái kám-siā kı̂-tó, phùi-huih thêng-chí, jia̍t-thè. Taⁿ chhin-chhiūⁿ hó-hó lah! Thè-ı̄ⁿ lah, chiū kín-kín tńg-khı̀ chhù-nı̍h, beh chiong chit ê hoaⁿ-hí pò lāu-bú chai, hit sı̂ hoat-seng chı̍t hāng toā sū-kiāⁿ, ū chı̍t jı̍t pêng-iú hut-jiân lâi thàm goá, tâm-lūn ê tiong-kan tùi lak-tē-á the̍h to̍k-io̍h ê khang-ap-á hō͘ goá khoàⁿ, chit ê pêng-iú in-ūi sit-loân chia̍h to̍k-io̍h teh beh sí, goá kā i kóng “Lí chin gōng lah, m̄ bián sí mah......” teh kóng ê tiong-kan chit ê lâng tó-lo̍h-khı̀, koáⁿ-kín chhiáⁿ i-seng lâi kā i kiù-hō͘, bô chhái-kang, in-ūi chia̍h siuⁿ choē, koh sı̂-kan keng-kè kú, i-seng kóng “bı̂n-á-chài chiah lâi the̍h sí-bông chín-toàn-su......” chiū tńg-khı̀, Tiong-iá bú-kiáⁿ kūi tı̄ chit ê pêng-iú ê sin-piⁿ, khai-sí piàⁿ-miā ê kı̂-tó.
“Chú Iâ-so͘ ah! Lí ū kiâⁿ i-hó ê sı̂n-jiah, chit ê pêng-iú chiàu lâng khoàⁿ sı̄ choa̍t-bāng, khún-kiû Lí chín-kiù i-hó i.” Lāu-bú thè hāu-siⁿ kı̂-tó 2 tiám cheng kú, keng-kè kúi hun-cheng, pêng-iú thò͘-chhut só͘ chia̍h ê to̍k, hoê-hûn, tùi Ki-tok ê sèng-chhiú tit-tio̍h i-hó. “Sian-siⁿ lí sûn-hoê choân-kok ê sı̂, ūi-tio̍h goá kap chit ê pêng-iú choè kiàn-chèng.” Tiong-iá hiaⁿ-tı̄ án-ni kám-siā kiàn-chèng.
Tùi piàⁿ-miā ê sûn-hoê thoân-tō, ta̍k só͘-chāi hián-chhut sı̂n-jiah, hoat-khí ho̍k-heng ê hé.
3. Tiān-tâi Ê Pò-sàng
Kı̀m-chia̍h kı̂-tó tiong-kan ê chı̍t hāng sı̄ pò-sàng, kok só͘-chāi siū i-tı̄ tâng-sı̀n ê pêng-iú ūi-tio̍h ho̍k-heng chhut-chhut hia̍p-le̍k ê chhiú, jı̍t-kı̂ moá, khai-sí Sı̂n-hō͘ pò-sàng. Jia̍t-sim hóng-būn pı̄ⁿ-iú, hia̍p-le̍k sı̂n-jú thoân-tō Chó-tı̂n Khí-ioh sian-siⁿ chin gâu chí-tō im-ga̍k, hit sı̂ te̍k-pia̍t kı̀m-chia̍h kı̂-tó, chiū tit-tio̍h sı̂n-jú ê koa.
(Hô “Bê-lō͘ ê lâng tio̍h kiâⁿ tò-tńg” sèng-si 169 siú ê tiāu.)
1. Kı̀ⁿ-nā pı̄ⁿ-thiàⁿ tó-chhn̂g ê lâng,
Chú ū un-tián thiàⁿ-thàng,
Chhiáⁿ thiaⁿ tùi thiⁿ só͘ thoân siau-sit,
Hoaⁿ-hí hó thiaⁿ tiⁿ-bı̍t,
Tùi sí koh-oa̍h êng-kng ê Chú,
Chin-sı̍t bô ké ê Sı̂n,
Kı̂-ı̄ⁿ Sı̂n-jú un-tián bô hān,
Taⁿ tio̍h chiap-la̍p sêng-siū.
2. Lán ê choē-koà iu-būn pı̄ⁿ-thiàⁿ,
I lóng kā lán chām-tn̄g;
Sı̍p-jı̄ pó-kè só͘ lâu ê huih,
Hō͘ lán kap choē choa̍t-tn̄g;
Kiù Chú Iâ-so͘ Sèng-thé siū siong,
Lí goá chiâⁿ choè kian-kiông;
Kia̍h thâu khoàⁿ I siang-kha siang-chhiú,
Goá sim bô koh iu-chhiû.
3. Taⁿ lán tāi-ke hó-táⁿ chı̀n-chêng,
Khò Chú sı̀n-gióng kian-tēng,
Kiù Chú kı̂-biāu sı̂n-jú hong-sēng,
Jı̍t-jı̍t hióng-siū bô thêng;
Moá-sim hoaⁿ-hí kám-siā chhiùⁿ koa,
O-ló Chú Ia-hô-hoa;
Tı̄ I êng-kng pó-chō bı̄n-chêng,
Sı̂-sı̂ o-ló bô thêng.
4. Chhiⁿ-mı̂ oē khoàⁿ chhàu-hı̄ oē thiaⁿ,
Phoà-siùⁿ pái-kha oē kiâⁿ;
Iu-būn hoân-ló pi-siong lóng bô,
Hoaⁿ-hí gı̂m-si o-ló;
Ha-le-lu-iah chı̀-toā Siōng-tè,
Êng-kng moá-moá Thiⁿ Pē;
Kian-kò͘ khiā-chāi chı̀n-chêng bô kiaⁿ,
Khò Chú ún-tàng khah iâⁿ.
Choè pò-sàng ê tê-ba̍k, iā siông-siông choè Sı̂n-jú-hoē, sèng-hoē ê sèng-koa, pò-sàng ê jı̍t sı̄ kui-jı̍t koaiⁿ tı̄ pâng-keng kı̀m-chia̍h kı̂-tó, tùi Má-thài hok-im-toān khí kóng-bêng Sèng-keng, kóng khí Iâ-so͘ Ki-tok ê seng-gâi, chiap-soà ū 2-3 ê i-pı̄ⁿ ê kiàn-chèng, choè āu ū sı̂n-jú ê kı̂-tó.
“Lia̍t-ūi thiaⁿ chiòng pêng-iú, nā ū lâng ūi-tio̍h lân-pı̄ⁿ, phoà-siùⁿ teh khó͘-thàng ê lâng, chhiáⁿ hoāⁿ-chhiú tı̄ siu-im-ki, tè goá kı̂-tó.” Kóng liáu chiū tı̄ Iâ-so͘ Ki-tok ê miâ chek-pı̄ pı̄ⁿ-mô͘, chiap soà kı̂-tó i-pı̄ⁿ. Chit khoán kı̂-tó, kóng-pò tiān-tâi bô hoaⁿ-hí, khò-tiúⁿ kiò goá khı̀. “Lí khoàⁿ su-siat pò-sàng kui-iok, ū kı̀m-chí ēng sı̀n-gióng i-pı̄ⁿ, só͘-í chhiáⁿ lí thêng-chí” thiaⁿ-tio̍h án-ni sim-chōng giōng beh tiām-khı̀, chit khoán sū hoán-hok kúi nā pái. Chiū thêng-chí hoāⁿ chhiú tı̄ siu-im-ki ê kı̂-tó, goá pek-chhiat kiû Siōng-tè, chiū khoàⁿ-kı̀ⁿ Sèng Sı̂n thong-koè pò-sàng ê tiān-pho lâu-chhut ê ı̄ⁿ-siōng.
Chú kóng sui-jiân bô hoāⁿ-chhiú nā ū kı̂-tó Siōng-tè ê koân-lêng thong-koè tiān-pho kàu tı̄ thiaⁿ-chiòng. Chiū khai-sí bô hoāⁿ-chhiú i-pı̄ⁿ ê kı̂-tó, chóng-sı̄ lân-tê saⁿ-soà lâi. “To m̄ sı̄ siu-hēng chong-kàu, chhiáⁿ tiong-chí Siōng-tè i-pı̄ⁿ ê pò-sàng” chit-khoán tān-su tı̍t-tı̍t-kàu. Tang tùi Chēng-kong, sai kàu Hok-kong ū sò͘ 10 bān ê thiaⁿ-chiòng. Chóng-sı̄ hoán-tùi ê siaⁿ chin kiông kóng-pò tiān-tâi ê thāi-tō͘ ài goán thêng-chí Sı̂n-jú ê pò-sàng, múi-ge̍h ê pò-sàng-liāu 24,000 kho͘, iā tio̍h thun-lún chit-hō ê hoân-būn. Chit khoán pò-sàng kè-sio̍k 4 nı̂-kú. Ē-bı̄n kí 1, 2 ê kiàn-chèng lâi saⁿ-kap chheng-chàn koh-oa̍h ê koân-lêng.
1) Tùi Peng-khò͘ koān hā ê lông-chhoan chı̍t ê hū-jı̂n-lâng lâi ha̍k-ı̄ⁿ, beh kám-siā tit-tio̍h i-tı̄. Chho͘ kı̀ⁿ-bı̄n ê chí-bē án-ni kóng, “Cha-bó͘ lâng chı̍t siang chhiú teh chai si-koe, tùi lông-io̍h ê tiòng-to̍k tı̀-kàu tó-chhn̂g peh boē khí-lâi, chhiáⁿ loā choē i-seng lâi i lóng bô chhái-kang, ū chı̍t-jı̍t chin bô liâu, chiū chhun chhiú choān siu-im-ki, tú-tú teh pò-sàng “Kı̀ⁿ-nā pı̄ⁿ-thiàⁿ tó-chhn̂g ê lâng......” Goá kiám m̄ sı̄ tı̄ pı̄ⁿ-chhn̂g teh khó͘-thàng mah? Chhim-sı̀n che chiàⁿ sı̄ Siōng-tè ê chín-kiù, chiū jia̍t-sim tı̀-ı̀ thiaⁿ, choè āu iā tè i kı̂-tó, tùi hit sı̂ kı̂-biāu Siōng-tè ê koân-lêng lı̂m-kàu, ta̍k-jı̍t o̍h kúi-kù ê kı̂-tó, pek-chhiat teh thèng-hāu koh-lâi ê pò-sàng, oân-choân chiap-siū Ki-tok ê oē, chı̄n-sim kı̂-tó. Thiaⁿ tē 3 pái ê pò-sàng ê sı̂ chiū oē khí-lâi kiâⁿ chiah toā ê hoaⁿ-hí, só͘-í mn̄g-lō͘ lâi ha̍k-ı̄ⁿ kám-siā, hit ê-hng iā khı̀ Bêng-se̍k jı̂n-oân kàu-hoē choè kiàn-chèng.
2) Tùi Khóng-tó lâi ê kiàn-chèng, sı̄ koaⁿ tēng(肝硬化) siū soan-kò sí ê lâng sèng-lı̄ ê kiàn-chèng. Chū-jiân ū siū i-io̍h cha̍p-hun ê tiau-tı̂ chóng-sı̄ bô siáⁿ kong-hāu, choân-ke chin iu-chhiû, siū pêng-iú khó͘-khǹg thiaⁿ Sı̂n-hō͘ pò-sàng chı̍t-ke choân-oân tâng-sim kı̂-tó, tùi Siōng-tè sêng-siū sı̀n-gióng ê toā un-hūi koh-oa̍h ê koân-lêng chhim-jı̍p choân-sin, āu-lâi lâi Sı̂n-hō͘ kiû kı̂-tó, chóng-sı̄ goá bô kā i kı̂-tó, in-ūi i pún-lâng í-keng ū sı̀n, Chú ê sèng-chhiú si-lo̍h tı̄ i, Chú tùi chit lâng kóng “Lí ê sı̀n ū kiù lí, an-sim khı̀, pı̄ⁿ hó ióng-kiāⁿ lah” i-hó 12 nı̂ hiat-lāu ê hū-jı̂n-lâng ê Chú, hō͘ chit lâng khí-lâi.
Thiaⁿ pò-sàng kiû Sı̂n-jú ê lâng chiām-chiām choē, ha̍k-ı̄ⁿ ná bô êng. Chóng-sı̄ tiān-tâi put-sı̂ thiau-lân, siông-siông oāⁿ-khí bái ê sı̂-kan, oân-liáu moá 4 nı̂ ê pò-sàng, chiām-sı̂ hioh-khùn, āu-pái koh chhut-hoat ê sı̂, thang ēng pò-sàng (Raclio) kap tiān-sı̄ (Television) ê ho̍k-heng chiàn, tı̄ sı̀n án-ni gióng-bōng Siōng-tè.
4. Sèng-hoē
Ūi-tio̍h thoân-tō ū hoat-hêng Phêng siá-pán in ê goe̍h-khan cha̍p-chı̀ “i-tı̄ ê tn̂g-lâu”, pò-kò thoân-tō siông-sè ê chêng-hêng, nā-sı̄ sèng-hoē ê kóng-kò sı̄ lı̄-iōng Ki-tok-kàu sin-bûn, á-sı̄ pò-sàng, khí-chho͘ sı̄ sûn-hoê choân-kok hóng-būn ta̍k ê siū-khó͘ ê pêng-iú, nā-sı̄ tit-tio̍h i-tı̄ ê lâng siàu-gia̍h ná ke-thiⁿ, chiām-chiām siū jı̄n-tēng, kàu-hoē iā chhiau kàu-phài tek khai-hòng mn̂g-hō͘, sı̂-ki sêng-se̍k chiū khai-sí ha̍k-ı̄ⁿ sèng-hoē, ı̀n choē-choē soan-thoân toaⁿ gia̍p-tiàm sin-bûn lâi pun, á-sı̄ sı̀-koè tah kóng-kò choá, chóng-sı̄ bô siáⁿ kong-hāu. Tē-it ū hāu-kó sı̄ tit-tio̍h i-tı̄ ê un-hūi ê lâng ín-chhoā siū-khó͘ ê pêng-iú ê kò-jı̂n thoân-tō. Ha̍k-ı̄ⁿ ê sèng-hoē chı̍t nı̂ khui 3 pái sı̄ tı̄ sin-nı̂, 5 ge̍h 8 ge̍h, hn̄g tùi Lo̍k-jı̂-tó koān, San-hêng koān lâi hù-hoē, ū lêng-le̍k ê chū-hoē, un-hūi ê sèng-hoē, kok kàu-phài ū un-hūi ê thoân-kàu-su pang-chān soat-kàu, chı̍t jı̍t chı̍t pái ê Sı̂n-jú hoē sı̄ goá tam-jı̄m. Lòng toā-kó͘ phah chhiú ê chàn-bí, tùi chá-khí kàu ê-hng kı̂-tó ê siaⁿ chhin-chhiūⁿ iô-choah ê chhèng khí, hū-kı̄n chhù-piⁿ lóng chin chù-ba̍k, kè-lō͘ lâng tùi ha̍k-ı̄ⁿ piⁿ keng-kè, ū ê ná kiâⁿ ná teh léng-chhiò teh liām Ha-le-lu-iah A-men.
Ta̍k ê chū-hoē to ū phoà-siùⁿ ê kap lân-pı̄ⁿ ê lâng lâi hù, kí 1, 2 ê lē: Tùi Kiong-kiā koān Tiông-chhâ hiaⁿ-tı̄ chhoā chı̍t ê é-káu ê cha-bó͘ gín-ná siông-pún lâi. Chı̍t ê hiaⁿ-tı̄ chhin-chhiat, jia̍t-sim chin chiu-chı̀, soat-kàu ê sı̂ ēng chhiú pí lâi thoân hō͘ cha-bó͘ gín-ná, in-ūi Siōng-tè ê oē bô cha̍p-hun jı̍p, iáu bē ū sı̀n-gióng, só͘-í thâu chı̍t pái ê kı̂-tó hı̄-khang bô khui, tē 2 pái kı̂-tó ê sı̂ hı̄-khang khui ū thiaⁿ-kı̀ⁿ, hiaⁿ-tı̄ tı̍t-tı̍t kà i kóng oē, chiū oē hiáu kóng kúi-kù oē, keng-kè 3 jı̍t pún lâng iā hián-chhut hui-siông ê hoaⁿ-hí, hù chó-thian kı̂-tó hoē, thiaⁿ-kı̀ⁿ chèng-lâng kı̂-tó ê siaⁿ, pún-sin iā chı̄n-la̍t beh kı̂-tó, in-ūi m̄ bat oē chiū oà-oà kiò, chē tı̄ keh-piah ê hiaⁿ-tı̄ kiàn-chèng kóng bē su tōng-bu̍t teh háu lè. Chit-sı̂ Siōng-tè toā-toā kàng-ho̍k, ū lâng khoàⁿ-kı̀ⁿ chı̍t ê thiⁿ-sài tı̄ ha̍k-ı̄ⁿ tiâⁿ teh kiâⁿ.
Kiong-kiā chhı̄ ko-téng ha̍k-hāu ê sian-siⁿ Hông-tiân hiaⁿ-tı̄ chhoā Tióng-iú siàu-liân lâi, chit ê hiaⁿ-tı̄ sı̄ hóng-būn pı̄ⁿ-lâng thoân hok-im Chú chı̄n-tiong ê lô͘-po̍k. I só͘ chù-bo̍k chit ê siàu-liân sı̄ náu-sèng siáu-jı̂ bâ-pı̀ kha phoat chhiú pat phoà-siùⁿ, bô lāu-pē, lāu-bú sàn-chhiah. Hông-tiân hiaⁿ-tı̄ kā i chhut lú-hùi hū-chek chhoā i lâi hù sèng-hoē, joa̍h hip-hip ê 8 ge̍h thiⁿ tú kàu ha̍k-ı̄ⁿ chı̍t sı̂-á, siàu-liân háu chhut-lâi lah! “Ma-ma oē hoân-ló lah, beh tńg-lâi lah.” Hông-tiân hiaⁿ-tı̄ tı̍t-tı̍t kā i ko͘-chiâⁿ, iā boé piáⁿ lâi hō͘ i, lóng m̄ thiaⁿ, chhù-lāi iā kā i po-lô-so chóng-sı̄ kan-ta khàu bı̄-sı̄, kàu-hoē chhù-lāi kóng; “Tióng-iú sàng, ma-ma mā chai-iáⁿ lí tiâu-kang tùi Kiú-chiu lâi, lí chit ê pı̄ⁿ nā bô hó chı̍t-sı̀-lâng sı̄ phoà-siùⁿ, chhin-chhiūⁿ lí chiah káu-koài Iâ-so͘ boē thang kā lí i-tı̄, koh nā sí tio̍h lo̍h tē-ge̍k” siàu-liân chiū ēng i ê bái-chhiú ná chhit ba̍k-chiu ná kóng:
“Sí-āu ê tāi-chı̀ chhı̀n-chhái hó lah, ma-ma teh thèng-hāu goá, beh tńg-lâi khı̀ khah hó” chiū thè-āu khı̀, iā bat thau cháu chhut-khı̀, chiah koh chhoā tò-tńg-lâi, choè-āu goá khı̀ ûn-ûn-á hoāⁿ-chhiú kā i kı̂-tó, hit ê loân-hiong pı̄ⁿ (Homesick) ê kúi chiah thoè, siàu-liân chiah lâi hù Sèng-hoē, ē-po͘ ê Sı̂n-jú-hoē chiap-siū kı̂-tó, chóng-sı̄ bô hián-chhut i-tı̄ ê koân-lêng, keh jı̍t koh kı̂-tó chiū khoàⁿ-kı̀ⁿ Siōng-tè ê sı̂n-jiah, siàu-liân moá-bı̄n chhiò-iông, tı̄ hoē-chiòng ê bı̄n-chêng kiàn-chèng “Lín khoàⁿ! Kha chiah-nı̍h tı̍t lah, chhiú iā oē kia̍h khí-lâi lah.” Tāi-tin ê Sêng-tó chí-bē kiàn-chèng i beh lâi hù sèng-hoē tı̄ chhia-lāi kı̂-tó ê tiong-kan khoàⁿ-kı̀ⁿ ı̄ⁿ-siōng, êng-kng chhàn-lān ê Chú Iâ-so͘ khiā tı̄ ha̍k-ı̄ⁿ chêng, o͘-o͘ ê mô͘-kúi phak pài tı̄ I ê bı̄n-chêng teh kı̂-kiû. Che sı̄ teh kóng tē-ge̍k ê mn̂g taⁿ siū phah-phoà. Sı̂n-jú ê un-hūi ê kiàn-chèng siá boē liáu, put-kò ài lín chai chı̍t hāng, chiū-sı̄ chún-pı̄ kı̂-tó, bô chún-pı̄ ê kı̂-tó Siōng-tè bô choè kang.
“Lí khí-lâi, hō͘ peh-sı̀ⁿ chheng-khı̀, kā in kóng, Lín tio̍h ka-kı̄ chheng-khı̀ pı̄-pān bı̂n-á-chài; Iâ-hô-hoa Í-sek-lia̍t ê Siōng-tè án-ni kóng......” (Iok-su-a 7:13) Chú thong-kè Iok-su-a án-ni bēng-lēng choân kun. Bô kı̀m-chia̍h kı̂-tó boē hoat-khí ho̍k-heng. Tı̄ goán ê tı̄n-iâⁿ iā tio̍h lóng-chóng tâng-sim, chı̄n-la̍t kı̀m-chia̍h á-sı̄ thiu-chia̍h kı̂-tó. Goá sı̀n só͘ thang oá-khò ê to̍k-to̍k sı̄ Chú, só͘-í sèng-hoē chêng it-tēng jı̍p ba̍k-pâng kı̀m-chia̍h.
5. Khı̀ Am-bí Toā-tó
Goá siū Chú ê bēng-lēng kàu Jı̍t-pún ê chı̄n-lâm Am-bí toā-tó thoân-tō, tı̄ choē-choē sûn-hoê thoân-tō ê tiong-kan, chit hāng tio̍h te̍k-pia̍t thê khí-ê. Kúi-nā pái chiap-tio̍h khiam-sùn ê Kiam-san Bo̍k-su ê phoe, teh kiò “Kè-lâi Má-ki-tùn pang-chān goán.” Tng-sı̂ toā-tó kûn-tó tú-chiah tùi Chhiong-sêng hun-lı̄, ho̍k-kui chó͘-kok, tùi Kiam-san Bo̍k-su ê phoe thang-chai tı̄ hia teh lêng-chiàn Sèng kàu-hoē ê lāu bo̍k-su ê khó͘-chiàn, chóng-sı̄ koh lāi ê iau-kiû choē, bô iông-ı̄ⁿ ū ióng-khı̀ khı̀ hiah-hn̄g ê só͘-chāi. Chóng-sı̄ Siōng-tè ê sèng-chhiú teh ūn-hêng lah. Lāu bo̍k-su 10 jı̍t kú ê kı̀m-chia̍h kı̂-tó, bêng-bêng thiaⁿ-kı̀ⁿ Chú ê siaⁿ.
“Goá í-keng êng-hián, beh koh chài êng-hián i.” (Iok-hān 12:28) Siá-phoe soà kià lú-hùi lâi, chit-sı̂ goá kiong-kèng khiam-pi tı̄ Siōng-tè ê bı̄n-chêng, chiap-siū Chú ê tiàu-bēng. Tùi Sı̂n-hō͘ chē Ná-tı̀-oân kià káng Lo̍k-jı̂-tó, keng-kè Toā-tó pún-tó ê Bêng-nāi oāⁿ hoat-tōng-ki ê sió-chûn kàu pêng-hô ê pia̍t thian-toē ê Hí-kài-tó, sı̄ 9 goe̍h tiong-sûn. Kiam-san Bo̍k-su chhoā kàu-hoē ê tiúⁿ-ló kap chheng-liân ê chō͘-chhiú lâi kàu Hoa-liông-tı̄ káng gêng-chiap, hit-sı̂ goá siūⁿ khí Pó-lô kàu Í-tāi-lı̄ tng-sı̂ ê sū. In lóng chhēng chháu-oê gia̍h tek-koáiⁿ, hit khoán ê phok-sò͘ sı̄ loē-toē lâng siūⁿ boē kàu ê, bô chhia thang chē, chioh chē tı̄ lâng hè-mı̍h ê piⁿ-á, chài kàu Sèng kàu-hoē.
In-ūi sı̄ hong-thai ê bêng-só͘, ta̍k keng chhù ê chiu-ûi thia̍p ló͘-kó͘-chio̍h, lóng sı̄ khàm hm̂-chháu, gín-ná lóng thǹg chhiah-kha khı̀ ha̍k-hāu, piān-tong chí ū ēng chhiú-kin-á pau kúi-tè han-chû, bô mı̍h-phoè, ke-ke hō͘-hō͘ lóng sı̄ chia̍h hân-chû, chia̍h bí chin hi-hán, sàn-gia̍p soe-pāi, chheng-liân lóng chhut-lâi Tāi-pán, Sı̂n-hō͘ chiū-chit, só͘ chhun-ê sı̄ gín-ná kap lāu-lâng, koh-khah lı̄-hāi sı̄ choân-ke lóng poaⁿ khı̀ khah hó thàn-chia̍h ê loē-toē, á-sı̄ Chhiong-sêng, só͘-í chin choē khang-chhù, chóng-sı̄ poâⁿ-kè chiah ê hiān-chōng, ū Siōng-tè só͘ sù Sèng Lêng ê pûi-tē. Loē-toē ê to͘-chhı̄ bûn-hoà si-siat kè-thâu choē, it-chhè ê lâng siū iú-he̍k, kèng-pài Siōng-tè lóng pàng-sang khı̀.
“Lín siáⁿ-sū khai-hùi chı̂ⁿ, boé hit ê boē chia̍h-tit ê mı̍h? Siáⁿ-sū tio̍h-boâ, tı̄ hit ê boē hō͘ lâng chia̍h-pá ê ah? Lín tio̍h liû-sim thiaⁿ Goá, chiū oē chia̍h hit ê hó mı̍h, tit-tio̍h hióng-siū iû-jı̄, hō͘ sim hoaⁿ-hí.” (Í-sài-a 55:2)
Chit-tiám phian-phiah ê tó-sū, ū Siōng-tè ê sù-hok. Tùi Kiam-san bo̍k-su kú-kú kı̂-tó ê chún-pı̄, tı̄ chū-hoē ū Siōng-tè ê koân-lêng chhin-chhiūⁿ toā éng ek-lâi, tùi khí-thâu chiū hián-chhut chióng-chióng ê sı̂n-jiah, lâng-lâng lóng poah-kang lâi hù chū-hoē, soè-keng lé-pài-tn̂g, lâng moá kàu tiâⁿ-bé, bô tiān-teng sı̄ ēng tiān-thô͘ teng, báng choē koh toā chiah, iā bô báng-á chúi. Chèng-lâng chhiong-moá Siōng-tè ê un-hūi, khàu khí-lâi lah, ū chı̍t ê siàu-liân chhiⁿ-mı̂, lāu-bú chhoā i lâi hù-hoē, ū chı̍t jı̍t hut-jiân lı̄-khui chū-hoē, in-ūi pêng-iú hı̀-lāng i “Hiān-tāi kho-ha̍k ê sè-kài, lí iā bê-sı̀n Siōng-tè oē i-pı̄ⁿ ah”, só͘-í toà pâng-lāi teh khàu. Lāu-bú chı̄n-la̍t khó͘-khǹg bô hāu, pài-thok sió-tı̄ kā ko͘-chiâⁿ. Lāu-bú kóng “chit ê gín-ná sı̄ goá tı̄ Tâi-lâm ê sı̂ seⁿ ê, ba̍k-chiu bái, hō͘ i-seng khoàⁿ boē hó, chiah chhoā lâi Tâi-pak hō͘ choan-bûn i khoàⁿ, kóng sı̄ tiâu-tı̄ chhò-gō͘, taⁿ bô hoat-tō͘ lah, thong ke ê lâng lóng ūi-tio̍h án-ni thı̂-khàu, chóng-sı̄ goá khǹg chı̍t ê ǹg-bāng; boē bat ê Siōng-tè beh pang-chān goá, lâi ka-kı̄ an-ùi, taⁿ chit pái thiaⁿ-kı̀ⁿ hit ê boē bat ê Siōng-tè lâi lán ke-nih, chiah lâi kiû-kiù, sian-siⁿ goá cha-mı̂ khı̀ chhân-nı̍h phoà chúi, iā chē tı̄ chhân-hoāⁿ kı̂-tó, goá ūi-tio̍h goá ê kiáⁿ kı̀m-chia̍h, jı̍t-sı̂ khı̀ chhân-nı̍h choè kang iā bô kám-kak kan-khó͘.”
Chit téng-hō Hap-ná ê kı̂-tó, Siōng-tè thiaⁿ-kı̀ⁿ, siàu-liân ê ba̍k-chiu chin kim lah! “Khoàⁿ-kı̀ⁿ lah, khoàⁿ-kı̀ⁿ lah, hia ū hoe, chia ū chhiⁿ.” Lāu-bú hui-siông ê hoaⁿ-hí, chı̍t lé-pài kú ê chū-hoē liáu, Kiam-san bo̍k-su chhoā goá khı̀ Oan khui chū-hoē, bo̍k-su tùi ho̍k-heng ê hoaⁿ-hí tùi goá kóng: “Chit ê tó-sū sı̍t-chāi ū chin choē phoà-siùⁿ ê kap lân-pı̄ⁿ ê lâng chóng-sı̄ goá teh thoân-tō lâng lóng m̄ thiaⁿ, sı̄ kóng kàu-hoē nā bô tit-tio̍h i-tı̄ in m̄-sı̀n.” “Lí ê Siōng-tè tı̄ tá-lo̍h ké chò m̄ chai ê khoán.” Oan ê chū-hoē iā sı̄ un-hūi moá-moá sèng-lı̄ ê liân-sio̍k. Bô tiān-khı̀, ū kong-hoē-tn̂g bô í, chhu chháu-chhio̍h ê chū-hoē, ū 300 goā lâng lâi hù hoē, ū chı̍t ê chí-bē hoān-tio̍h iûⁿ-hı̂n chèng 30 goā nı̂, ná cheng-siⁿ, toà chhù-lāi tāi-sió-piān, nā-sı̄ Chú ê sèng-chhiú i-hó i, liâm-piⁿ khiā tı̄ chèng-lâng ê bı̄n-chêng ūi-tio̍h pı̄ⁿ hó choè kiàn-chèng, koh ū 2 ê chí-bē á lóng chhàu-hı̄-lâng, toā-chí 34 hè, sió-bē 27 hè, lóng bô thiaⁿ-kı̀ⁿ, 2 lâng lóng tit-tio̍h i-hó, tùi hit jı̍t khí chiah chhin-chhiūⁿ sè-hàn gín-ná tùi lāu-bú o̍h kóng-oē.
Í-goā iáu ū loā choē lâng tit-tio̍h un-hūi, tit-tio̍h i-tı̄, hit sı̂ it-seng thâu chı̍t pái tú-tio̍h thang kiaⁿ ê hong-thai, chhiū tó, chhù tó, kam-chià tó kui phiàn, chûn bô iông-ı̄ⁿ jı̍p káng, koaiⁿ kúi-nā jı̍t, 1 lé-pài āu chiah ū soè-chiah chûn beh jı̍p-lâi, tùi chá-khí hō͘ tāi-ke sàng khı̀ thèng-hāu chûn, kàu ē-po͘ chûn chiah jı̍p lâi, chûn bô tı̍t-chiap khı̀ Bêng-nāi, sı̄ beh oá pún-tó ê tùi-hoāⁿ, tùi hia chiūⁿ lio̍k khı̀ A-gi-na, keh chá-khí chē chū-tōng-chhia khı̀ Bêng-nāi, tı̄ Sèng kàu-hoē te̍k-pia̍t chū-hoē.
Tı̄ Bêng-nāi ū chı̍t ê chhiⁿ-mı̂ ê chí-bē lāu-bú chhoā i lâi iau-kiû kı̂-tó, sı̄ thiaⁿ-kı̀ⁿ chit ê chhàu-hı̄-lâng tit-tio̍h i-hó ê kiàn-chèng, goá tùi chit ê lâng thiaⁿ tio̍h Sin-heng chong-kàu khó-siong ê sū-sı̍t. Chit nn̄g lúi ba̍k-chiu i-seng i boē hó, in-ūi chı̍t-sim chı̍t-ı̀ ài tit-tio̍h khoàⁿ-kı̀ⁿ, chiū khı̀ chı̍t khoán ê chong-kàu, chiàu in ê iau-kiû hiàn chin choē chı̂ⁿ, chóng-sı̄ ba̍k-chiu bô khah hó, Pò͘ kàu-su chiū kóng “Nā chhù kap thó͘-toē lóng hiàn chiū oē hó”, chin-chiàⁿ khı̀ boē toā-thong ê chhù lâi hiàn iā bô chha, Pò͘ kàu-su chiū kóng “Nā khı̀ Pún-san chiū oē hó”, só͘-í iā chioh chı̂ⁿ chún-pı̄ beh khı̀ loē-toē ê Pún-san. Ūi-tio̍h Ki-tok kàu-hoē ê kak-chhíⁿ, kap sı̀n-tô͘ ê hùn-khı̀ chiah án-ni kiàn-chèng.
Koh tı̄ Sı̂n-hō͘ ê ha̍k-ı̄ⁿ Chó-tı̂n Khi-ioh sian-siⁿ chhoā chı̍t ūi lāu chí-bē lâi, chit ê chí-bē sı̄ ūi-tn̂g pı̄ⁿ, chhē i-seng lóng boē hó, chı̍t jı̍t tı̄ koe-lō͘ kiâⁿ, khoàⁿ-kı̀ⁿ “lân-pı̄ⁿ choân tı̄” ê kóng-kò, beh tı̂m-lo̍h khı̀ ê lâng chı̍t ki chháu-á ki mā khı̂ⁿ tiâu-tiâu, chiū khui-mn̂g jı̍p-khı̀ kiû-kiù, tı̄ hia ū chhāi kim ê ngó͘-siōng, lâng kà goá kóng, “Nā lim chit ê chúi chek-sı̂ ū èng-giām”, kı̂-tó liáu chiū lim hit ê chúi, ta̍k-jı̍t to khı̀ pài khı̀ lim, ná lim làu ná siong-tiōng, 1 lé-pài āu soà boē kiâⁿ, án-ni Pò͘ kàu-su iáu-kú kóng “Lí ê pı̄ⁿ hó lah, chit 8 tiuⁿ hû-á the̍h khı̀ kat seng-khu, chiū lóng boē koh phoà-pı̄ⁿ, 1 tiuⁿ 500 kho͘.” In-ūi pı̄ⁿ ê khó͘-thàng chí-bē chhut 4000 kho͘ the̍h hiah ê hû-á, teh kiâⁿ sí ê lō͘, Chó-tı̂n Khi-ioh sian-siⁿ ín-chhoā i lâi chhin-kūn Chú.
5. Sèng-lı̄ Ê Koa
Hoê-sióng kè-khı̀ ū siá chiah ê sı̀n-gióng pi-kek ê koa, taⁿ ài kap hiaⁿ-ché saⁿ-kap lâi chhiùⁿ khò Chú tek-sèng ê koa. Kiong-pún hiaⁿ-tı̄ sı̄ Hok-chíⁿ koān ê chng-siā lâng, huih lâu jı̍p ba̍k-chiu-jı̂n soà chhiⁿ-mı̂, choè-āu ê ǹg-bāng kau-thok i-seng chhoā kàu Kim-te̍k i-tāi pı̄ⁿ-ı̄ⁿ, chóng-sı̄ bô bāng, hiaⁿ-tı̄ tó tı̄ pı̄ⁿ-sek thó͘-khùi i ê pháiⁿ-ūn, chit ê sı̂-chūn Sı̂n-jú thoân-tō-chái O-su-bóng (Osborn) lâi kı̂-tó khui hùn-heng-hoē, hiaⁿ-tı̄ thiaⁿ-kı̀ⁿ chit ê hong-siaⁿ, chiū chhe i ê kiáⁿ tāi-lí hù-hoē, ài tit-tio̍h tāi-tó, nā-sı̄ bô ta̍t-tò ǹg-bāng, āu-lâi Chó-tı̂n tı̄ Bú-seng kàu-hoē ū te̍k-pia̍t chū-hoē, chit sı̂ tâng-sı̀n ê pêng-iú khan i lâi hù-hoē, káng-tō āu goá bián-lē “Ê-hng goá kı̂-tó ê sı̂, nā ū sı̀n pı̄ⁿ oē hó ê lâng chhiáⁿ chı̀n-chêng lâi”, hiaⁿ-tı̄ chiū choè thâu-chêng chhut-lâi, goá àn-chhiú kı̂-tó “tı̄ Chú Iâ-so͘ ê miâ lí tit-tio̍h khoàⁿ-kı̀ⁿ”, hit sı̂ hiaⁿ-tı̄ phō goá ê ām-kún chhut hoaⁿ-hí ê siaⁿ, ba̍k-chiu khoàⁿ-kı̀ⁿ lah.
Tùi hoē-chiòng-sek iā ı̀n-tap thiⁿ ê chiok-hok hoat-chhut hoaⁿ-hí ê siaⁿ. O-ló Chú ê sèng-miâ, cha-jı̍t kin-á-jı̍t tâng chı̍t-iūⁿ choè kang ê Chú ê sèng-miâ, cheng-ho̍k pı̄ⁿ-mô͘ kap tē-ge̍k, siúⁿ-sù chín-kiù kap chū-iû kiù-sio̍k ê Chú, êng-kng kui I kàu bān-sè. Kiong-pún hiaⁿ-tı̄ āu-lâi koh lâi ha̍k-ı̄ⁿ lē-hêng hoé-kái, tı̄ Siōng-tè kap lâng ê bı̄n-chêng kiû liông-sim ê kiat-chēng, khiā tı̄ siu-im-ki ê thâu-chêng thiaⁿ ê it-it kiàn-chèng kè-khı̀ ê choē, chhiong-moá giâm-siok ê sim-chêng chheng-chàn sı̍p-jı̄-kè ê huih.
Sı̍p-jı̄-kè ê huih! Sı̍p-jı̄-kè ê huih,
Lí tı̄ Kok-kok-thaⁿ thiah-lı̍h ê siong-hûn,
Tn̂g lâu bô chı̄n, kiat-chēng ê chúi-choâⁿ,
Cha-jı̍t kin-á-jı̍t éng-oán bô piàn,
Tn̂g lâu bô chı̄n, oa̍h-miā ê chúi-choâⁿ,
Chhut toā-siaⁿ, chı̍t choê chhiùⁿ-koa,
Choê siaⁿ lâi chhiùⁿ, tek-sèng ê koa,
Ha-le-lu-iah, êng-kng kui Siōng-tè.
6. Kià-thok Sı̀n-tô͘ Kàu-hoē
Chú Iâ-so͘ sı̄ Siōng-tè ê Kiáⁿ, sı̄ Kiù Chú, oē kiâⁿ choē-choē sı̂n-jiah, i-hó phoà-siùⁿ ê, lân-pı̄ⁿ ê lâng, sı̄ tong-jiân ê sū, nā-sı̄ sù-tô͘ tı̄ Sèng Sı̂n lâi hōng-sū ê sı̂, iû-goân oē kiâⁿ sı̂n-jiah, chit ê sū-sı̍t khı̂ⁿ-tiâu lán ê sim, khí-chho͘ lia̍h choè in sı̄ te̍k-pia̍t ê lâng, chóng-sı̄ ná tha̍k Sèng-keng ná bêng-pe̍k in iā sı̄ lâng. Lán nā o̍h in ê khoán oân-choân ê hiàn-sin kap ho̍k-chiông ê seng-oa̍h, iû-goân tı̄ Sèng Sı̂n ê koân-lêng, oē kiâⁿ Sı̂n-jú ê sı̂n-jiah, só͘-í bô khoàⁿ hiān-tāi ê kàu-hoē, chù-bo̍k sù-tô͘ hêng-toān ê kàu-hoē, chiâⁿ-choè in ê chı̍t ê lâi seng-oa̍h sı̄ Siōng-tè ê chí-ı̀.
Goá tùi Tāi-kiâu chí-bē thiaⁿ-kı̀ⁿ chı̍t chân khó-siong ê sū-chêng; kiáⁿ-jı̂------Lio̍k-it hiaⁿ tı̄ Ki-tok-kàu tāi-ha̍k tı̄ ha̍k-hāu tiong hoat-kông, keng-kè lóng-chóng ê i-seng ê tiau-tı̄, chóng-sı̄ bô ǹg-bāng, tiōng-hu sı̄ i-seng, só͘-í kàu choè-āu lóng oá-khò i-io̍h, nā-sı̄ tı̄ chı̍t keng cheng-sı̂n pı̄ⁿ-ı̄ⁿ siū soan-kò “che sı̄ choè ok-chit ê náu-pı̄ⁿ, boē hó” ê sı̂, siū chin toā ê táⁿ-kek. Chí-bē kàu-chia chiū siūⁿ oá-khò Siōng-tè í-goā bô lō͘, chiū khı̀ kàu Bêng-kó͘-ok chiap-siū Sı̂n-jú ê kı̂-tó, chóng-sı̄ bô kong-hāu, hoán-tńg siū-tio̍h pháiⁿ-sı̂n ê khó͘-chhó͘. Chiū-sı̄ chı̍t ê phiàn-chú khı̀ hù sèng-hoē, ké-ı̀ thòng-hoé jı̄n-choē, tó͘-kiông pài-thok bo̍k-su kā i kiâⁿ sé-lé , chit ê phiàn-chú chù-sı̂n khoàⁿ iu-chhiû ê chí-bē, kóng “Hit khoán pı̄ⁿ, choân-toē liâu-ióng tē-it hó, kau-tài goá, chhoā i sı̀-koè lú-hêng khoàⁿ hó kong-kéng chiū oē hó”, pián chin choē chı̂ⁿ khı̀, choè-āu tı̄ Kiú-chiu chiong Liông-it hiaⁿ-tı̄ pàng-sak tı̄ hia, koh kúi-nā pái lâi chhéng-kiû chı̂ⁿ, soà tio̍h chioh chı̂ⁿ kià khı̀ hō͘ i, pháiⁿ sı̂n lı̄-iōng chit khoán ê phiàn-chú, goá tı̄ Kóng-tó thoân-tō ê sı̂ siū chhiáⁿ khı̀ in chhù, chú-chhı̂ Sı̂n-jú ê chū-hoē, hiaⁿ-tı̄ ta̍k jı̍t tı̄ bı̂n-chhn̂g tiong-ng, ngāu-ngāu liām, chin khó-lı̂n ê jı̂n-siòng.
Che tı̄ phoē-pı̄ⁿ hoāⁿ-chhiú tı̄ hiaⁿ-tı̄ ê thâu-khak kı̂-tó. “Tı̄ Chú Iâ-so͘ Ki-tok ê miâ koáⁿ chhut pháiⁿ sı̂n.” Hit mı̂ Chú tùi goá kóng “Sı̂n-jiah chı̀n-hêng tiong”, keh jı̍t kap Tāi-kiâu hiaⁿ-ché lóng sı̀n Liông-it hiaⁿ-tı̄ tit-tio̍h i-hó, saⁿ-kap hiàn kám-siā ê kı̂-tó. Hit mı̂ goá thiaⁿ-kı̀ⁿ Siōng-tè ê oē, i ê tiōng-hu goân sı̄ kun-i, chhēng kun-ho̍k khiā teh lâu ba̍k-sái chhiùⁿ-koa, “siūⁿ khí khó͘-náu 3 nı̂ ê kè-khı̀”, khoàⁿ-kı̀ⁿ chı̍t ê ı̄ⁿ-siōng, goá án-ni siūⁿ; hoat-pı̄ⁿ í-lâi 6 nı̂, khí-chho͘ ê chêng poàⁿ, chhim-sı̀n i-io̍h ê khùi-la̍t, kàu boé chai bô chhái-kang, kan-khó͘ kàu bô iông-sin chi toē, chiah oē hiáu ha̍p chhiú oá loā thiⁿ-téng ê Siōng-tè ê sim-kéng. Chiap-soà hián-chhut chı̍t ê chin súi ê chè-toâⁿ, m̄-sı̄ chòng-sek, sı̄ chō hiàn-sin ê toâⁿ, sı̄ ho̍k-sāi chin ê Siōng-tè tı̄ goá ke ê chè-toâⁿ. Chit sı̂ Sèng Sı̂n kóng “kū ê Liông-it í-keng sí lah! Tı̄ Ki-tok Iâ-so͘ koh-oa̍h ê sı̀ⁿ-miā”, 2 jı̍t ê chū-hoē liáu, goá lı̄-khui chit ke liáu-āu hiaⁿ-tı̄ lı̄-khui bı̂n-chhn̂g chhut-lâi, bô koh ngāu-ngāu liām lah, chia̍h-pn̄g iā chiàu-siông, án-ni chı̍t ke chiâⁿ-choè Ki-tok ê lâng.
Che nā kap Sù-tô͘ Hêng-toān ê kàu-hoē saⁿ pí-kàu, kiám-chhái sı̄ sió-khoá sū, m̄-kú sı̄ chin ê kiàn-chèng. “Ah! Goá í-keng tit-tio̍h goá ê khı̀-kū, ah! Goá í-keng tit-tio̍h goá ê khı̀-kū”, sı̄ goá só͘ thiaⁿ-kı̀ⁿ Sèng Sı̂n ê koa ê chı̍t chat.
Goá tı̄ kè-khı̀ thong-kè kàu-hoē ê thoân-tō ū chin-choē ê sit-pāi, hoê-sióng siá tı̄ chia lâi kap sù-tô͘ sı̂-tāi ê kàu-hoē tùi-chiò choè tāi-ke ê chham-khó, goá ê sian-siⁿ Té-lah (Taylor) bo̍k-su kap Sam-hò͘ⁿ bo̍k-su chò-hoé tùi hı̂-chhı̄ kui pah ê lô-tōng-chiá thoân-tō, thàu-chá chiah ê lô-tōng-chiá chū-chı̍p ê sı̂, tit-tio̍h siōng-si ê ún-chún tı̄ hia thoân Ki-tok ê hok-im. Tiong-kan chı̍t lâng ū chı̍t-jı̍t tùi goá kóng i pháiⁿ-ūn ê khó͘-chêng kiû pang-chān, hit àm goá khı̀ thàm hit ke, chiong só͘ ū ê chı̂ⁿ lóng hō͘ i, goá í-keng bô poàⁿ ê chı̂ⁿ, chiū the̍h saⁿ khı̀ boē lâi hō͘ i, taⁿ lóng bô poàⁿ-hāng thang hō͘ i ê sı̂, chit ê pêng-iú lâi chhē goá, po-chióng bó͘ i-seng ê chû-siān hêng-ûi, thok goá kā i tâu-kó tı̄ sin-bûn, chit ê i-seng chai-iáⁿ chit ê lâng ka-têng sòng-hiong ê sū-chêng, pang-chān chı̍t ke ê pı̄ⁿ-lâng bô kā i the̍h chı̂ⁿ, goá kā i ín-siū, sin-bûn ū khan chhut chit ê sū, tùi án-ni chit ê i-seng miâ-siaⁿ tháu, seng-lí chin hó, in-ūi án-ni chit ê i-seng chiū chiau-thāi chit ê lô-tōng-chiá khı̀ lú-hêng se̍k un-choâⁿ kā i ùi-lô. Í-āu ta̍k pái thiaⁿ-kı̀ⁿ chit khoán chû-siān hêng-ûi chiū chin thó-iàm, in-ūi chai che m̄ sı̄ Siōng-tè ê chí-ı̀, sı̄ tham-io̍k ê Sat-tàn lı̄-iōng Siōng-tè ê kok, chiū bô koh án-ni choè.
“Kim gûn goá lóng bô; to̍k-to̍k goá só͘ ū ê hō͘ lí, tı̄ Ná-sat-le̍k Iâ-so͘ Ki-tok ê miâ, lí khí lâi kiâⁿ.” (Sù-tô͘ Hêng-toān 3:6) Che chiàⁿ sı̄ Ki-tok ê sim, chho͘-tāi kàu-hoē ê khoán-sit. Ū chı̍t pái chı̍t ê chheng-liân chū-chheng sı̄ chûn-oân tú-chiah tùi Lâm-iûⁿ tńg-lâi, ū the̍h chı̍t hō soè chiah kâu (Pocket monkey) tńg-lâi beh saⁿ-sàng, ūi thiⁿ ūi toē, choè-āu kóng khiàm-ēng tām-po̍h chı̂ⁿ beh chioh chı̂ⁿ, tı̄ sòng-hiong ê tiong-kan tām-po̍h chı̂ⁿ hō͘ i, tńg khı̀, liân soè chiah kâu, liân thâu-bı̄n to bô koh khoàⁿ-kı̀ⁿ. Koh chı̍t pái chit ê chheng-liân iu-iu khó͘-khó͘ lâi kiû-khit, chiū siá-si i, hit ê chheng-liân chhut kàu-hoē ê mn̂g, tùi oāⁿ koh chı̍t ê chheng-liân jı̍p lâi kiû pang-chān, āu-lâi chiah chai hit 2 ê sı̄ tông-liân, kè-e̍k-tek teh kiû-khit ê, chit sè-kan ê lâng ūi-tio̍h sè-chêng lâi tô͘-bô͘, pí kng-bêng ê lâng khah ū tı̀-hūi. (Lō͘-ka 16:8)
Sı̂n-hō͘ chúi-chai āu soan-kàu-su ūi-tio̍h kiù-chè lân-bı̂n chiū siat thok-jı̂-só͘. Soan-kàu-su choè hó ê kang, chóng-sı̄ ka-tiúⁿ liâm-piⁿ lı̄-iōng che, ū chı̍t jı̍t chı̍t ê ka-tiúⁿ lâi kóng; “goá chit pang beh tı̄ chûn-lāi khai-siat lí-hoat-tiàm, chûn beh chhut-phâng lah, khai-siat hùi bô kàu, pài-thok kā soan-kàu-su chioh tām-po̍h chı̂ⁿ”, goá siū pài-thok chiū kā i tàu kha-chhiú, āu-lâi chiah chai hit ê lâng oân-choân pe̍h-chha̍t, bô iáⁿ sı̄ chûn-nı̍h ê lí-hoat-tiàm, ta̍k-jı̍t tı̄ chhù-nih teh khùn, bô thang chia̍h chiah án-ni moâ-phiàn. Chit khoán ê sū sǹg boē liáu kóng boē chı̄n, goá sı̍t-chāi chin gōng, ná-chún chhiⁿ-mı̂ ê chhoā-lō͘ ê lè, teh beh saⁿ-kap poa̍h-lo̍h tē-ge̍k éng-oán ê hé. Ah! Kim gûn goá lóng bô, to̍k-to̍k khiā tı̄ sı̀n-gióng, oá-khò bān-sū lóng oē Ki-tok ê miâ, Pó-lô, Pí-tek, Iok-hān, Thê-mô͘-thài lóng ióng-kám chı̄n-la̍t choè hok-im ê kang. “Kim gûn goá lóng bô, to̍k-to̍k goá só͘ ū ê hō͘ lí.”
Ah! Chú Iâ-so͘ Ki-tok sı̄ goá só͘ ū ê it-chhè, Iâ-so͘ nā saⁿ-kap tı̄-teh chiū boē hō͘ Sat-tàn khi-phiàn, só͘ khiàm-ēng ê mı̍h, bô-lūn kim gûn, á-sı̄ jı̍t-sı̍t lóng chiâu-pı̄, tı̄ Ki-tok ê miâ chhiⁿ-mı̂ ê khoàⁿ-kı̀ⁿ, pái-kha ê khí-lâi kiâⁿ. Kàu-hoē sı̄ khí tı̄ Ki-tok ê chin-lí ê chio̍h-poâⁿ téng Ki-tok ê sin-thé, Chú Iâ-so͘ pún-sin choè thâu, kàu-hoē sı̄ Sèng. Lán beh hōng-sū chit ê kàu-hoē, tio̍h tı̄ Sèng Sı̂n lâi kiâⁿ, pó-siú Sèng Sı̂n ê kau-thong, khò Sèng Sı̂n lâi cheng-chiàn, sı̂-sè chiàⁿ sı̄ Sèng Sı̂n ê sı̂-tāi, goá thong-kè khó-siong kè-khı̀ ê keng-giām lâi chheng-chàn sù-tô͘ kàu-hoē.
7. Hia̍p-le̍k-chiá
Siōng-tè kok ê ūn-tōng m̄ sı̄ kò-jı̂n tan-to̍k ê oa̍h-tāng. Siōng-tè só͘ tiōng-iōng ê khı̀-kū chı̍t ê úi-tāi ê lâng chhut-thâu ê sı̂, chiū tı̄ hit-lâng ê miâ khui toā pò͘-tō-hoē, hit lâng siū tiōng-iōng ê poè-āu, ū kúi-pah kúi-chheng kı̂-tó ê lâng, ū choē-choē ê hiàn-sin-chiá, hōng-sū-chiá, chiah ê lóng-chóng ê lâng chiâⁿ choè chı̍t thé, Siōng-tè kok ê ūn-tōng chiah oē chı̀n-hêng. Só͘-í chit ê lâng ê miâ tit-tio̍h o-ló m̄ sı̄ Siōng-tè ê ı̀-sù. Chiàu Sı̂n-ho̍k só͘ kà-sı̄, lâng m̄-sı̄ sím-mı̍h, chí-ū siū Sı̂n chhiong-moá, choè Ki-tok ê lō͘-ēng nā-tiāⁿ, to̍k-to̍k tio̍h o-ló Ki-tok ê miâ. Thoân-tō-chiá loā-nı̍h ū chún-pı̄, toà káng-tâi teh thèng-hāu, nā múi chı̍t ê sı̀n-tô͘ bô ín-chhoā khùn-khó͘ ê pêng-iú lâi, hit ê chū-hoē sı̄ khang-khang. Sı̍t-chāi Siōng-tè ê kok sı̄ hia̍p-le̍k it-tı̀.
Goá tı̄ chia kài-siāu tı̄ Ki-tok ê chı̍t ka-cho̍k, chiah ê lâng sı̄ siū Siōng-tè kéng-soán, ho̍k-heng pó-poè ê chi-chhı̂-chiá, in-ūi to̍k-to̍k êng-kng kui hō͘ Siōng-tè só͘-í bô kóng-bêng i ê miâ. Hū-jı̂n-lâng siàu-liân ê sı̂ chiū jı̍p sı̀n, it-sim kiâⁿ Ki-tok ê lō͘, pang-chān sòng-hiong ê bo̍k-su, chek-chū châi-pó tı̄ thiⁿ-nı̍h bô tàng sǹg. Tang-kiaⁿ hùn-heng hoē ê sı̂, bô phah-sǹg soà tı̄ i ê chhù chū-hoē, hit ê í-chêng i ê chńg-thâu-á seⁿ ba̍k-teng kap sim-chōng-pı̄ⁿ tit-tio̍h i-hó, tiōng-hu goân-pún sı̄ sū-koaⁿ ha̍k-hāu chhut-sin ê siōng-kàu, chóng-sı̄ i hoat-hiān kun-jı̂n seng-oa̍h ûi-poē ka-kı̄ ê liông-sim, chiū lı̄-khui lio̍k-kun khı̀ o̍h choè i-seng, nā-sı̄ in sı̄ sio̍k sı̂n-koaⁿ (Sı̂n-siā ê hê-siūⁿ) ê sè-hē, ū tiòng-hong ê ûi-thoân, chong-cho̍k ê lâng lóng hō͘ tiòng-hong (tn̄g-náu-kun) khó͘-chhó͘, chóng-sı̄ chit ê lâng siū-tio̍h Sı̂n-jú ê un-hūi, hiān-chāi oá 70 hè ê lāu-lâng, iáu-kú sı̂-sı̂ kı̂-tó ho̍k-sāi chhù-piⁿ, hu-hū tâng-sim thiàⁿ Ki-tok, hia̍p-le̍k tı̄ hùn-heng-hoē, hāu-siⁿ sı̄ Tang-tāi i-ha̍k-pō͘ sin chı̀n ê i-seng, chóng-sı̄ i kò-pe̍k sı̄ ūi-tio̍h ho̍k-sāi Siōng-tè chiah kéng chit tiâu lō͘.
Su-liām hó-gia̍h ê hū-jı̂n-lâng, pang-chān Í-lı̄-sa, chi-chhı̂ i ê sian-ti ha̍k-hāu (II Ông 4:8...) sı̄ chhut-miâ ê kò͘-sū, nā sı̄ chit ke Siōng-tè só͘ pı̄-pān ê hia̍p-le̍k-chiá, hiàn-kim chin-choē, siông-siông khiam-pi, m̄-bat tı̄ lâng ê bı̄n-chêng khoa-kháu, sı̄ chiàⁿ chhiú só͘ choè bô hō͘ tò-chhiú chai ê lâng, goá tùi chit khoán sèng-tô͘ lâi khoàⁿ-chhut Thian-kok ê hia̍p-le̍k-chiá ê khoán-sit, thiaⁿ-kı̀ⁿ Au Bí chu-kok chit hō lâng chin choē, nā sı̄ Jı̍t-pún iáu chin-chió ê khoán. Chı̍t tùi hu-hū só͘ kiâⁿ choē-choē hó-sū kap hōng-hiàn goá bô siá tı̄ chia, sı̄ Ki-tok hō͘ i chit hō thiⁿ ê un-hūi, chiah oē choè chiah ê sū, só͘-í it-chhè ê êng-kng tio̍h kui hō͘ Iâ-so͘ Ki-tok ê Pē Siōng-tè, Siōng-tè ah, ūi-tio̍h ho̍k-heng chó͘-kok goān Lí heng-khí choē-choē chit-hō ê sèng-tô͘, ia̍h tı̄ Chú Iâ-so͘ ê chiàⁿ-chhiú, ēng choè êng-kng ê khı̀-kū. A-men.
8. Sin Thiⁿ Sin Tē
“Khoàⁿ ah, Goá beh choè chı̍t hāng sin ê sū, taⁿ beh hoat-hiān......” (Í-sài-a 43:9)
Thong-kè kàu taⁿ só͘ siá só͘ ū ê sū-sı̍t, Chú ū kā goá hē chı̍t ê tē-ki, sı̄ goá chiong-lâi eng-kai tio̍h choè--ê, Chú iā bēng-lēng tio̍h khí-chō tı̄ chit ê chio̍h-poâⁿ ê toē-ki téng. Í-sài-a ê chheh ū kà-sı̄; Chú pún-sin choè chhù-kak thâu-ê chio̍h, choè tē-ki. (Í-sài-a 28:16. Si-phian 118:22. Má-thài 21:42, Má-khó 12:10, Lō͘-ka 20:17, Sù-tô͘ Hêng-toān 4:11, I Pí-tek 2:7) Chı̍t tè chio̍h sı̄ keng-kè chhı̀-giām, khah iâⁿ khó͘-lān ê chio̍h, Chú hō͘ lán choē-choē sit-pāi, chhı̀-liān, khó͘-lān, sı̄ ūi-tio̍h chiong-lâi, hô-pêng ê kè-e̍k, thong-kè chiah ê kiàn-chèng, hō͘ lín chai goá ū choē-choē ê sit-pāi, nā sı̄ che sı̄ bô ké ê sū-sı̍t, goá chí-ū ha̍k-sı̍p khiam-sùn ê lō͘. In-ūi goá tı̄ kóng oē, tı̄ thāi-tō͘, tı̄ sim-su, óng-óng hián-chhut pi-chhám ê sit-pāi. Mô͘-se sı̄ sè-chiūⁿ tē-it un-jiû ê lâng. (Bı̂n-sò͘-kı̀ 12:3) Chóng-sı̄ tı̄ Ai-kı̍p sı̄ sat-jı̂n ê tui-hòng-chiá, án-ni lán chí-ū tio̍h khiam-sùn lâi siu-liān khiam-pi ê lō͘, ho̍k-sāi Siōng-tè kap lâng, choan-sim chı̀n-chêng kiâⁿ thiⁿ ê lō͘. Kiù-kèng Chú bēng-lēng goá pàng-sak chāi-lâi ê choè hoat, ǹg sin ê hōng-sū.
1) Chiong lêng-kài ê siau-sit siá tı̄ chheh-nih choè lâng ê chham-khó, kàu taⁿ só͘ siū lêng-tek kàu-hùn sı̄ chin bı̂-só͘. Chóng-sı̄ chhú-khı̀ Siōng-tè beh hō͘ lí koh khah choē ê khé-sı̄, só͘-í goá beh chiàu Siōng-tè só͘ chí-sı̄ ê siá khí-lâi, siông-siông chhut-pán, tı̄ pún-su ê lō͘-boé iā siá chı̍t pō͘-hūn, kı̂-kiû Siōng-tè hong-sēng ê chiok-hok tı̄ tha̍k chit pún chheh ê chèng-lâng, chhiáⁿ thè goá kı̂-tó, hō͘ chit ê bô lō͘-ēng ê goá, siông-siông khiam-pi, oē tit choè Chú ê lō͘-ēng.
2) Goā-toē thoân-tō. Tı̄ chia beh kóng khí Bí-kok thoân-tō ê sū. 7 nı̂ chêng tng-sı̂ goá tı̄ ke̍k-lia̍t kı̀m-chia̍h ê siu-ióng tiong, ū chı̍t mı̂, poàⁿ-mı̂ chı̄n-la̍t kı̂-tó ê sı̂ khoàⁿ-kı̀ⁿ ı̄ⁿ-siōng, goá teh khoàⁿ hn̄g-hn̄g ê tó-sū sı̄ toā-soaⁿ sió-soaⁿ khí-lo̍h ê goā toē, hiah ê soaⁿ tà moá Siōng-tè ê êng-kng, kng nà-nà kàu boē oē chim-chiok khoàⁿ, hóng-hut teh khoàⁿ chit ê êng-kng ê kok ê sı̂, tùi thiⁿ ū siaⁿ hiáng-liāng.
“Goān lín pêng-an, goá chhe lín, chhin-chhiūⁿ Pē ū chhe goá.” (Iok-hān 20:21) Chit sı̂ sim-lāi siū lêng-kám; che sı̄ Bí-kok! Goá ê choân-sin choân-lêng hō͘ Siōng-tè lia̍h-tiâu, ná chhin-chhiūⁿ lı̄-khui chit ê sè-kan ê khoán, chit-sı̂ khí goá khak-sı̀n, goá chiong-lâi tio̍h khı̀ goā-kok thoân-tō, che sı̄ Siōng-tè ê tiàu-bēng, iā áu chńg-thâu-á teh thèng-hāu hit-jı̍t kín kàu, sı̂ bē kàu liōng-chá tı̄ 5 nı̂-chêng chiū ūi-tio̍h beh chhut-hoat teh chún-pı̄, nā-sı̄ Siōng-tè lâi chó͘-chí; sı̂ iáu chá! Hok-chíⁿ koān chı̍t ê chí-bē teh ūi-tio̍h goá kı̂-tó, i tùi Siōng-tè só͘ tit-tio̍h ê bāng, siá phoe lâi hō͘ goá. “Thài-pêng-iûⁿ khí hong-thai, chûn-phoà tı̍t-tı̍t teh tı̂m-lo̍h-khı̀.” Chí-bē thı̂-thı̂ khàu-khàu tı̄ bāng-tiong kı̂-tó, kiû Siōng-tè pang-chān Chó-tı̂n bô kap chûn choè chı̍t-ē tı̂m-lo̍h-khı̀.
Goá só͘ siū ê kà-sı̄: Chú nā bô chò-chêng kiâⁿ, ēng ka-kı̄ ê la̍t lâi chı̀n-chêng, sı̄ tı̀-kàu bia̍t-bô. Thoân-tō-chiá tio̍h siū Sèng Sı̂n ín-chhoā, kap Chú saⁿ-kap kiâⁿ Siōng-tè só͘ pı̄-pān ê lō͘. Āu-lâi tı̄ Hok-chíⁿ koān ê kàu-hoē teh kı̂-tó ê sı̂, hut-jiân Chú kóng chhut-lâi, “Bí-kok thoân-tō sı̄ kau-tài goá ê siok-bēng, sı̄ thiⁿ ê tiàu-bēng.” Ūi-tio̍h án-ni tio̍h cha̍p-hun pı̄-pān sim kı̂-tó.
1959 nı̂-bé, tı̄ Tang-kiaⁿ Ko-iá i-ı̄ⁿ chū-hoē ê sı̂, Chú tùi goá kóng “Lí khı̀ Bí-kok ê sı̂ kàu lah.” Goá tùi hiaⁿ-ché kóng-khí chit chân sū, chhiáⁿ in saⁿ-kap kı̂-tó, pó-chèng ê chhiú-sio̍k ū khùn-lân, nā sı̄ Siōng-tè ēng I ê sèng-tô͘ lâi chiâⁿ chit ê sū. Keh-nı̂ sin-chiaⁿ tı̄ Tang-kiaⁿ chū-hoē teh kı̂-tó ê sı̂, goá tı̄ ı̄ⁿ-siōng-tiong khoàⁿ-kı̀ⁿ chı̍t ê Siōng-tè ê lô͘-po̍k, Chú kóng, “Goá bēng-lēng Goá chit ê lô͘-po̍k kā lí pó-chèng.” Chiū-sı̄ Hiong-káng Lō͘-tek-phài ê soan-kàu-su O-lu-sóng (Orson) bo̍k-su, goá chiong chit lâng ê hêng-siōng ūi tı̄ choá nı̍h kià hō͘ Hiong-káng ê pêng-iú Chiang hiaⁿ-tı̄ (tāi-khài sı̄ sı̀ⁿ Tiuⁿ). Chiang hiaⁿ-tı̄ chiàu Siōng-tè só͘ bēng-lēng pài-thok O-lu-sóng bo̍k-su, pó-chèng chiū sêng-lı̍p, kok-lāi hia̍p-le̍k-chiá ê hiaⁿ-ché, jia̍t-sim kı̂-tó hiàn-kim, tı̄ siū chiok-hok ê tiong-kan hui-ki-phiò iā ū lah, hit-tia̍p tı̄ poàⁿ-mı̂ ê kı̂-tó ê tiong-kan, goá saⁿ-soà khoàⁿ-kı̀ⁿ 3 ê ı̄ⁿ-siōng.
1) Tı̄ goá ê ba̍k-chiu chêng ū teh tńg-se̍h ê toā toē-kiû, tùi hit lia̍p toē-kiû ê ē-bı̄n ū gı̄ ê thài-iông kng sih-sih chiò kàu choân-toē, bô kú Bí-kok tāi-lio̍k chhut-hiān, thiⁿ-téng chheng kàu bô chı̍t tih hûn, Ki-tok ê bı̄n chhin-chhiūⁿ khēng ê sek chhut-hiān tı̄ hia.
2) Tı̄ goá ê bı̄n thâu-chêng khiā chı̍t ê hū-jı̂n-lâng; bı̄n ı̂ⁿ, tiong-téng sin-chhâi, thâu-mn̂g lio̍h-á teh pe̍h, chit ê chí-bē ê thâu-chêng ū chı̍t ê tn̂g-bı̄n ê cha-bó͘ gín-ná teh kóng-oē, bô kú chit ê hū-jı̂n-lâng kia̍h khí chiàⁿ-chhiú, ná ia̍t bı̂-chhùi kóng “Kín lâi, teh thèng-hāu lí”, āu-lâi chiah chai chiū-sı̄ Ha-oái (Hawai) chı̍t ê Kiù-sè-kun ê chí-bē.
3) Goá tùi Jı̍t-pún siū chhù khı̀, bô koh khoàⁿ-kı̀ⁿ. Án-ni 1960 nı̂ 6 ge̍h 20 jı̍t tùi Ú-tiân khong-káng chhut-hoat, chiūⁿ thoân-tō ê lō͘, lō͘-thêng keng-kè San Hu-lan-si-su-ko (San Francisco), Bá-khu-le (Barcley), Ta-lu-sa (Tarsa), Si-ka-go (Chicago), Ha-bong-lo (Hamono), Khu-li-bu-lan-lo (Clevelano), Lo-su-an-je-lu-su (Loa Angeles), Hu-le-su-no (Fresno), Sa-khu-la-men-to (Sacramento), 8 ge̍h 14 jı̍t chiū kàu Ho-no-lu-lu (Honolulu) khong-káng. Tı̄ Ha-oái (Hawai) chò oân êng-kng ê hoān-sū, chiū chē Eng-kok chûn 9 ge̍h 7 jı̍t jı̍p Hoâiⁿ-pin káng.
Chū-hoē, kàu-hoē ê chū-hoē 28 pái, ka-têng chū-hoē 50 pái, hóng-būn pı̄ⁿ-ı̄ⁿ 3 pái, hóng-būn pı̄ⁿ-lâng, ta̍k jı̍t tiān-tâi kóng-pò͘ 3 pái. Ūi-tio̍h kúi-nā pah ê pı̄ⁿ-lâng, phoà-siùⁿ ê lâng hiàn Sı̂n-jú ê kı̂-tó. Tı̄ thoân-thé, tı̄ kò-jı̂n ko-huih-ap chèng tē-it choē, kı̂-thaⁿ ūi-tio̍h choē-choē khoán phoà-siùⁿ ê lâng, lân-pı̄ⁿ-chiá kı̂-tó, kı̂-thaⁿ siū Sèng Sı̂n chhiong-moá, sêng-siū thiⁿ ê un-hūi ê lâng chin-choē in ê siàu-gia̍h kı̀ boē liáu. Ta̍k só͘-chāi toā sió lóng thang khoàⁿ-kı̀ⁿ gō͘-sûn-choeh tek ho̍k-heng ê êng-kng.
Siōng-tè séng-lio̍k, pò tām-po̍h lâi siàu-liām tng-sı̂ ê chêng-hêng. Sam-pún sian-siⁿ lâi Ho-no-lu-lu khong-káng chiap goá, chiong chū-hoē ê ū-tēng pió hō͘ goá khoàⁿ, iā kóng “Kin-á-jı̍t beh tı̄ Ma-khi khí kàu-hoē, ē-po͘ 2 tiám khí ū it-sè ê lé-pài chhiáⁿ lí soat-kàu”, chit keng kàu-hoē chheng chò Sèng-siâⁿ kàu-hoē, tú-tú chhin-chhiūⁿ Jı̍t-pún ê Pe̍h-lō͘ siâⁿ ê khoán-sit hui-siông koân. Bô it-sè ê bo̍k-su, su-kı̀ Sò͘-kiā hiaⁿ ū lêng-le̍k ê su-hoē, sı̀n-sek (message) sı̄ siá khò Sèng Sı̂n Sı̂n-jú ê koân-lêng. Só͘-í goá kiàn-chèng cháiⁿ-iūⁿ lâi choè Sı̂n-jú thoân-tō liáu chiū chı̍p-thoân kı̂-tó, “chhiáⁿ tāi-ke khiā khí-lâi, phoà-pı̄ⁿ ê lâng hoāⁿ-chhiú tı̄ kan-khó͘ ê só͘-chāi, kı̂-thaⁿ ê lâng hoāⁿ chhiú tı̄ heng-khám, tè goá kı̂-tó”, goá chiū kı̂-tó kám-siā Sı̍p-jı̄-kè ê kiù-sio̍k, chàn-bí chheng-kiat choē ê pó-huih, cha-jı̍t kin-á-jı̍t bô piàn-oāⁿ Ki-tok chín-kiù ê koân-lêng, i-tı̄ ê lêng-le̍k. Chú ah! Goán sı̀n lâi kám-siā Lí, Ha-le-lu-iah, A-men.”
Chū-hoē āu Sêng-hō͘ hiaⁿ-tı̄ pái chhut-lâi thâu-chêng, kóng “Sian-siⁿ, goá chit ê kha-thâu-u thiàⁿ, boē kiâⁿ, chhiáⁿ thè goá kı̂-tó”, goá tı̄ āu pâng kı̂-tó, hō͘ i tı̄ hoē-tn̂g lāi cháu kúi-nā pái, hiaⁿ-tı̄ tit-tio̍h i-hó, hoaⁿ-hí moá-bı̄n kiàn-chèng kóng “Ah! Kı̂-biāu, kı̂-biāu! Lóng-chóng boē thiàⁿ lah.”
Chiap-soà tı̄ Kho-kho-khái (Kokokai) ū chhiau-kàu-phài ê siu-ióng-hoē, goá iā siū chhiáⁿ 2 pái ê choè kang, hit ê siu-ióng-hoē ū Ma-khi-khi kàu-hoē hū-jı̂n-hoē ê lâng lâi hù, tiong-kan Ko-chhong chí-bē tı̄ chèng-lâng ê bı̄n-chêng kiàn-chèng i tit-tio̍h i-hó. Sam-pún sian-siⁿ lâi goá ê sin-piⁿ kā goá kóng; tı̄ 14 jı̍t ê lé-pài āu chı̍p-thoân kı̂-tó ê sı̂ keng-kah ê thiàⁿ hó khı̀, tńg khı̀ kàu chhù chı̍t ē khoàⁿ, hı̀-eng ê kū-jiah ê thòng-khó͘ tháu-pàng lah. Hit jı̍t goá tı̄ pâng-keng kı̀m-chia̍h kı̂-tó, thiaⁿ-kı̀ⁿ chit ê hó siau-sit, hōng-hiàn moá-moá ê kám-siā hō͘ Pē Siōng-tè, goá chit ê bô miâ bô siaⁿ sàn phí-phí Sı̂n-hō͘ ê thoân-tō-chiá, cháiⁿ-iūⁿ oē ū chiah toā kui-bô͘ ê chū-hoē?
Tı̄ kàu-hoē ê chū-hoē tāi-khài sı̄ chı̍t pái nā-tiāⁿ, kiat-kó bē chai chiū kè-khı̀, só͘-í bô toā ê kı̂-thāi, iáu-kú Chú Iâ-so͘ ūi-tio̍h I ê sèng-miâ khí-lâi, chiâⁿ I ê èng-ún, siúⁿ-sù choē-choē un-hūi, chín-kiù, i-tı̄, kám-siā bô soah. Hoê-kò͘ chit pái ê hóng-būn sı̄ lâi chhéng-an, soà kiàn-chèng Sı̂n-jú thoân-tō ê bô pe̍h-chha̍t. Goá sı̄ tùi Chú ê bēng-lēng siū chhe-khián, bô kiû kim-chı̂ⁿ, miâ-siaⁿ, bu̍t-chit, to̍k-to̍k kiû tı̂m-lûn ê lêng-hûn kap pı̄ⁿ-khó͘ ê pêng-iú. Bô kiû Bí-kok ê hó-chia̍h mı̍h, pak-tó͘ khang-khang, siū Sèng Sı̂n chhiong-moá lâi ho̍k-sāi Siōng-tè. Tı̄ chia kí chı̍t ê kiàn-chèng lâi kiat-sok tē 1 hoê Bí-kok thoân-tō ê pò-kò.
“Goān chài-lı̂m ê êng-kng pek-kūn ê Chú, o-ló I ê sèng-miâ, siông-siông teh siàu-liām teh kám-siā, chóng-sı̄ lóng bô siá-phoe mn̄g-an, chhiáⁿ goân-liōng, 9 ge̍h tiâu-kang lâi kàu goán tau, ūi-tio̍h goá chit ê pi-bı̂ ê lâng, hiàn i-tı̄ ê kı̂-tó chhim-chhim kā lí seh to-siā, tng sian-siⁿ teh kı̂-tó ê tiong-kan goá kám-kak chit ê kı̂-tó it-tēng oē i-tı̄ goá ê sim-sı̂n kap phoà-pı̄ⁿ, hut-jiân cha̍t-thóng-thóng ê sim-koaⁿ, kap bô sóng-khoài bô khı̀, sim-koaⁿ chheng koh sóng-khoài, í-āu ta̍k-jı̍t chheng-sóng teh kám-siā, ta̍k-hāng mı̍h to chin hó chia̍h, kám-siā! Ta̍k-jı̍t chiàu sian-siⁿ só͘ hoan-hù sı̍t-hêng so thâu-khak lâi kám-siā.
Múi-ge̍h 1 pái khı̀ chhē i-seng, chín-chhat ê sı̂ i-seng kóng, “Chin hó.” Chı̍t-sim chı̍t-ı̀ kám-sı̄ i-tı̄ ê koân-lêng, Siōng-tè ê un-hūi. Tiōng-hu iā tùi sian-siⁿ ê kı̂-tó tit-tio̍h i-hó, ū tang-sı̂-á kóng kám-kak oē sió-khoá thiàⁿ, chóng-sı̄ kin-nı̂ tùi hn̂g-nı̍h poaⁿ hoe-siuⁿ chin sóng-khoài, nā siūⁿ-tio̍h kū-nı̂ chit sı̂-chūn ê khó͘-thàng, sı̍t-chāi chin kám-siā, sian-siⁿ ū ēng Gı̄-keng ê kò͘-sū lâi bêng-bêng kà-sı̄ tē-ge̍k kap thian-kok, goán beh chı̄n-la̍t lâi tit éng-oán ê oa̍h-miā, chiū chhiáⁿ thè goán kı̂-tó.” Ka-chiu (California) Hu-le-su-no (Fresno) Chhoan-chhoan hu-jı̂n (Mrs川村) kià.
