7 Kiông-Toa̍t
Téng-bı̄n chhiáⁿ àn-hā. Kóng Ek-sam ê Bó-kū Thian-tek kàu hit-jı̍t chiū kiò chı̍t-ê siáu-ùi kap 30 goā ê peng, kap Ek-sam ke-lāi ê jı̂n-hu kiōng oá 40 liân-ê, chiū kng chı̍t-téng kiō khı̀ Sù-liông-chng. Kàu-ūi jı̍t tú lo̍h-soaⁿ, tāi-ke khı̀ chhı̄-tiûⁿ chia̍h-pn̄g, chia̍h-pá àn-sǹg liâm-piⁿ beh siat-hoat ēng-kiông-ê chhiú-toāⁿ lâi kiông-kng Hūi-bí khı̀. Oá 8 tiám chiū lâi ûi Hūi-bí in ê chhù. Hit-sı̂ Hūi-bí kap lāu-bú lóng tı̄ pâng-nih teh tha̍k Sèng-chheh, tú sı̄ àm-sı̂ ê lé-pài. Lé-pài soah siūⁿ beh khùn ê sı̂, hut-jiân thiaⁿ goā-bı̄n hoà-hoà-kiò ê lâng-siaⁿ, koh bô loā-kú chı̍t-ê lâng jı̍p-lâi chin toā-siaⁿ hoah kóng, ū-lâng tı̄-teh á-bô? Tı̄-chia ū Lâm-kiaⁿ tē 2 liân-tūi su-lēng-koaⁿ ê phoe. Hūi-bí kap lāu-bú thiaⁿ chı̍t-ē sim chin-kiaⁿ, chiū chông chhut-lâi. Tiúⁿ-ló-niû pō͘-pı̄n m̄-bat khoàⁿ-tio̍h chē kun-peng, bô-in-toaⁿ lâi ka-tı̄ ê lāi-bı̄n, chin-kiaⁿ, khui-siaⁿ kı̂-tó Siōng-tè, kóng , Siōng-tè ah! Goān-lí khui-lō͘, hō͘ cha-bó͘-kiaⁿ tit-tio̍h pêⁿ-tháⁿ. Kiaⁿ-kàu ngia̍uh-ngia̍uh-chhoah.
Hūi-bí chiū chı̀n-chêng tūi siáu-ùi kóng, Lín lâi beh chhòng sím-mı̍h? Siáu-ùi ı̀n kóng, Su-lēng-koaⁿ ê bēng-lēng, kiò goán lâi kng Hūi-bí khı̀. Kóng ū tāi-chı̀ beh kap i chham-siông. Hūi-bí chin hó-táⁿ, chin siū-khı̀, kóng, Goá sı̄ hū-lú ê poè kap i ū sím-mı̍h kan-sia̍p, cháiⁿ-iūⁿ i beh lâi kiò goá khı̀ chham-siông sím-mı̍h? Siáu-ùi toā hoah kóng, Lia̍h-chiūⁿ kiō. Peng-teng phin-pòng-kiò chiū oá-lâi. Lāu-bú tùi cha-bó͘-kiáⁿ lám-teh, tı̍t-tı̍t khàu. Kiáⁿ ò! Chú ah, kiù leh! Ah! Sı̍t-chāi chin chhám, chhám siōng ka-chhám. Cha-bó͘-kiáⁿ Hūi-bí toā-siaⁿ kā A-niá kóng, Án-niá ah! Taⁿ kàu-chia m̄-bián hoân-ló; to̍k-to̍k bāng Chú chhun-chhut Sèng-chhiú chiū-sı̄. Tiúⁿ-ló-niû kóng, Kiáⁿ ah, lí nā khı̀, goá lēng-khó͘ sí. Ah! lâu goá bô lō͘-ēng lah. Ah! Án-niá, tio̍h khò Siōng-tè lah, m̄-thang hoân-ló kàu án-ni. Siáu-ùi m̄-chún in kóng, tı̍t-tı̍t kā in thoa-khı̀. Tiúⁿ-ló-niû pàng-siaⁿ toā-khàu, iā-sı̄ bo̍k-koài: kiáⁿ sí, tiōng-hu tú-sí bô loā-kú, cha-bó͘-kiáⁿ iā siū-lia̍h. Ah! hō͘ phoah-tùi thiⁿ-thang lo̍h-lâi.
Tiúⁿ-ló-niû chai bô hoat-tō͘ lah chiū kóng, Kiáⁿ ah! lí tio̍h khı̂ⁿ-tiâu tı̄ Chú o͘h! M̄-thang ūi sè-kan lâi phah-kiaⁿ-lâng lí ê sin-khu. Tı̀-kàu hō͘ Chú ê miâ siū lêng-jio̍k. Lâng tùi Hūi-bí tı̍t-tı̍t chhah-tùi mn̂g-goā chhut-khı̀. Chóng-sı̄ Hūi-bí ū thiaⁿ lāu-bú ê siaⁿ teh kiò, i chiū kóng, Án-niá, chò lí an-sim, goá kàu sí bô chiong goá kau-hō͘ mô͘-kúi. Tùi hit-tia̍p chiū chhah jı̍p kiō kng-khı̀, kiō-mn̂g kiō-thang koaiⁿ-ba̍t-ba̍t, lāu-bú hūn-tó tı̄ thiaⁿ-nih. Lāi-bı̄n ê chú-chia̍h-ê kā i chhah leh, keh-piah kúi-nā ê sı̀n-Chú ê chí-moāi lâi tàu-kiù; iā ū-lâng kín chiong chit-chân sū khı̀ pò bo̍k-su.
Bo̍k-su thiaⁿ-liáu chin kiaⁿ, hit-mê tú sı̄ hiaⁿ-tı̄ ê kı̂-tó-hoē, pài-tn̂g ū oá 20 goā lâng, kín kap Bo̍k-su tui chhut-khı̀ khoàⁿ. Jiok-kàu chı̍t-tiâu sió-lō͘, hut-jiân ū chı̍t-tui ê lâng, hoah sat, thûi-á ê siaⁿ khı̍h-khia̍t-kiò. Hit-mê sı̄ goe̍h-àm-mê. Goân-in chiū-sı̄ lâng khı̀ pài-tn̂g pò ê sı̂, Bo̍k-su in kín koh kı̂-tó chiah pı̀-hoē chhut-lâi; m̄-kú Tiúⁿ-ló ê tn̂g-kang Siú-jı̂n, thiaⁿ in sió-chiá siū-lia̍h, kín tùi āu-boé chhut-khı̀, sa chı̍t-ki ke̍h āu-boé toā-mn̂g ê kàu-chan-thûi-á, tı̍t-tı̍t-jiok, lâi-kàu hia khı̀ hō͘ i gū-tio̍h. Só͘-í phah-khui chèng-lâng, tùi 2-ê kng-kiō ê bō chı̍t-ē tó-tó lo̍h-khı̀, lâng chhiàng-chhiàng-kún. Hūi-bí thiaⁿ Siú-jı̂n ê siaⁿ chin an-sim, i chai che-sı̄ Chú ê khui-lō͘; nā siat-sú Siú-jı̂n bô-khı̀ hù kı̂-tó-hoē, iā bô hiah-khoài hō͘ in lia̍h-lâi kàu-chia. Siáu-ùi, tı̍t-tı̍t hoah tia̍p. Āu-lâi Siáu-ùi chhı̍h oá-lâi, hō͘ Siú-jı̂n kui-sian-lâng lia̍h siak-tùi hit-pêng koè, thâu-khak tōng-tio̍h toā chhiū-thâu chhùi-iâm-iâm. Hit-tia̍p tāi-ke lio̍h-á lún-chhiú, i chiū phah-khui kiō-mn̂g, tùi Hūi-bí āiⁿ-teh; chóng-sı̄ chhun-ê peng tı̍t-tı̍t tui-lâi kàu-hia, tú hō͘ Bo̍k-su in gū-tio̍h, tāi-ke toā phah chı̍t-tiûⁿ, chiū chhiúⁿ tó-tńg.
Tùi án-ni chhun ê peng kap ka-teng cháu tò-khı̀ pò. Lóng-chóng sí 2 ê kng-kiō ê kap siáu-ùi, tāng, khin-siong ê chiâⁿ cha̍p-ê. Tāi-ke kàu-ūi, kàu toā-mn̂g-khàu m̄-káⁿ jı̍p-khı̀. Lāi-bı̄n chin nāu-jia̍t teh tán sin-niû lâi. Ek-sam chhēng lé-ho̍k piān-piān beh ha̍p-hun, thiaⁿ goā-bı̄n ū-lâng teh khàu ê siaⁿ. Goân-in sı̄ hit chiâⁿ cha̍p ê ka-jı̂n (kng-kiō ê sı̄ ka-jı̂n), í-keng sí, chhun hiah-ê m̄-káⁿ jı̍p-khı̀, tı̄ hia teh kiu, lun. Tiong-kan chı̍t-ê lāu lô͘-po̍k, pı̀n-piⁿ kòng chı̍t-khang teh lâu-hoeh, hit-ê sı̄ tiàm khah kú ê lô͘-po̍k. Só͘-í tāi-ke tu i chò-chêng. Tú teh kiu, lun ê sı̂, Ek-sam jiok chhut-lâi, khoàⁿ chı̍t-ē khı̀ chhiong-thiⁿ. Mn̄g kóng, Sin-niû leh. Lāu lô͘-po̍k kūi lo̍h-khı̀, kóng, Chú-kong-ah to m̄-hó kóng ah lo͘h! Ek-sam ēng kha-chiⁿ chiū kā i that-khı̀. Chhàu lô͘-châi leh, sím-mı̍h sū m̄-hó kóng, Sin-niû kā goá kng tùi tó-ūi khı̀? Lô͘-po̍k tāi-ke má-má-khàu, lāu lô͘-po̍k kóng, Ah to kng-kàu poàⁿ-lō͘ hō͘ lâng chhiúⁿ-khı̀ lah. Chhiúⁿ tùi tó-ūi khı̀? M̄-chai leh, chin khı̀--lâng ah. Jı̍p-khı̀ gia̍h chı̍t-ki tı̂n-tiâu chhut-lâi loān-loān-bu̍t, bu̍t-kàu khàu-pē-khàu-bó. Lāi-bı̄n ê lâng-kheh jiok-jiok chhut-lâi, tāi-ke mn̄g án-choáⁿ, Ek-sam khı̀-phut-phut bē kóng, ba̍k-chiu chheⁿ-gı̂n-gı̂n ná siáu-káu-ba̍k leh, tı̍t-tı̍t-ok, tı̍t-tı̍t-hoah kóng, Hó-hó, lín chiah-ê sí lô͘-châi, hó, khoàⁿ lâng kā goá kng-tùi tó-ūi khı̀? Chèng-lâng khǹg-bē-chū, tú in Bó-kū tı̄ peng-iâⁿ lâi, in-ūi chı̍t pō͘-hūn ê peng cháu-khı̀ pò in bó-kū.
8 Tô-Thoat
In bó-kū lâi, chiū tùi i ê chhiú kā i khan teh, kóng: Siàu-liân-lâng lóng-sı̄ án-ni, kín-sū-khoaⁿ-piān, ûn-á siat-hoat kiaⁿ-liáu m̄ tı̄-teh. Tùi án-ni chiū bô koh tia̍p. Kiò lâng m̄-bián chhòng-pn̄g hō͘ hiah-ê chia̍h, hō͘ in iau, lô͘-po̍k tāi-ke chin m̄-goān, chı̍t-lâng háu chı̍t-lō͘. In Bó-kū chiah kóng, Gōng goē-seng, bo̍k-koài ka-jı̂n kng bē-lâi, liân siàu-ùi to kóng iā siū phah-sí lah, hô-hòng ka-jı̂n, chóng-sı̄ bô iàu-kín, goá chū-jiân ū hoat-tō͘.
Ah! hit-jı̍t chin bô sim-sek, lâi hù ê lâng-kheh chin bô ı̀-sı̂n. Pông-pian ê lâng-kheh, ū-ê sim iā sı̄ chin hoâiⁿ: kóng, Lín bó-kū sı̄ bú-koaⁿ, hô-pit hoân-ló chhoā-bē-lâi? Chóng-sı̄ iā ū-lâng sim àm-àm teh hiâm, án-ni beh kā ngē-chhoā, iā sı̄ hêng-ge̍k; chóng-sı̄ bô lâng káⁿ kàn-chèng. Tùi án-ni lâng-kheh lóng soàⁿ-sek. Ek-sam khi-phut-phut, bé khiâ leh, cháu-kàu Sū-lióng-chng, beh khoàⁿ hit-ê hi-sı̍t. Kau-ūi tē-hng loān-kún-kún, kóng cha-mê phah-sí lâng. Bo̍k-su iā chiong chit-chân sū kóng-bêng hō͘ tē-hng koaⁿ-thiaⁿ, tē-hng-koaⁿ iā-chai Ek-sam in ê bô lí-khı̀, só͘-í chit-chân sū bô sím-mı̍h tı̀-ı̀ beh chhap; put-kò nā lia̍h-tio̍h Siù-jı̂n ê sı̂, iû-goân siong-tong tio̍h pān. Ek-sam in bó-kū iā-chai choè án-ni sı̄ kun-ui lām-iōng, iā m̄-káⁿ bêng-bêng hoat-piáu lâi kò-só͘; put-kò iû-goân àm-àm kè-e̍k beh lia̍h-kàu Siú-jı̂n kap Hūi-bí tio̍h chiū-sı̄. Chia chhiáⁿ àn-hā.
Kóng Siú-jı̂n tùi Hūi-bí āiⁿ leh, tı̍t-tı̍t cháu-jı̍p soaⁿ, án-ni i chai sū-sè bái, iā Hūi-bí chiong lāu-bú kau-tài Bo̍k-su. Bo̍k-su hoaⁿ-hí tam-niá, só͘-í bô khoà-lū, kap Siú-jı̂n tı̍t-tı̍t cháu. Cháu-kàu Hô-lâm séng Lâm-iông-siâⁿ ê chhù. Só͘-í kàu tāi-chı̀ ê keh-jı̍t, Ek-sam lâi chhoē bô. Khı̀ pài-tn̂g chhoē, hō͘ Bo̍k-sū kap Tiúⁿ-ló-niû kā i tāng-tāng chek-pı̄, liông-sim hoat-hiān, iā chai ka-tı̄ ê chhò, tı̍t-tı̍t hoē m̄-tio̍h, iā kiû beh khoàⁿ Hūi-bí; chóng-sı̄ in lóng m̄-chai, Tiúⁿ-ló-niû to̍k-to̍k kā i kóng chı̍t-hāng, chiū-sı̄ lí nā beh chhoā goá-ê cha-bó͘-kiáⁿ, lí nā-kó chin thiàⁿ i kàu án-ni, chiū-sı̄ tio̍h kap goán jia̍t-sim lâi sı̀n Ki-tok, koh tio̍h pó-hō͘ Sú-jı̂n bô sū; nā án-ni chiū kè--lí. Ek-sam chiong chit-chân sū tò-khı̀ hoê-hok bó-kū. Bó-kū thiaⁿ-liáu bô sím-mı̍h hoaⁿ-hí, tı̀-ı̀ ài pò-siû, só͘-í àm-chēⁿ phài-lâng tiāu-cha, beh chhoē kàu tio̍h.
Sı̂-jı̍t chin khoài-koè, liâm-piⁿ kàu koè-nı̂. Thiam-tek sı̄ toā ím-chiú-ka, tı̄ 29 mê chia̍h-chiú chin-chē, toā chùi. Pêng-sı̂ ài chia̍h-chiú, só͘-í náu-kin lám, hit-mê koh lim hiah-chē chiú, chùi, tó tùi toh-ē lo̍h-khı̀, thâu-khak tōng-tio̍h toh-koaiⁿ, hut-jiân náu-kin tn̄g-khı̀. Kín chhiáⁿ i-seng lâi, chai sı̄ bô hoat-tō͘, chiū soà sí-khı̀. Chia chhiáⁿ àn-hā.
Kóng Hūi-bí kap Siú-jı̂n khı̀ Lâm-iông-siâⁿ, in só͘ tiàm ê chhù sı̄ tı̄ siâⁿ-goā phian-phiah ê só͘-chāi, jı̍t-sı̂ chiū bih, àm-sı̂ chiū chhut-lâi kā-lang chò-kang. Iā Thiam-tek sí, chiū chit-chân tāi-chı̀ ná-leng. Ek-sam iā chai chhò. Chóng-sı̄ sim chin tı̀-ı̀ ài chhoē kàu-tio̍h. Chhoē-tio̍h i ê ı̀-sù m̄-sı̄ beh hāi in, iû-goân ài sim-chûn beh chhoā Hūi-bí ê ı̀-sù, iā chai iōng ūi-la̍t bô lí-khı̀, bē ēng-tit. Tùi án-ni bô chia̍h thâu-lō͘ sı̀-koè chhoē. Chı̍t-sim iā liông-sim chū-chek, kóng tùi i chı̍t-sı̂ ê chhóng-pōng, hāi só͘-thiàⁿ ê Hūi-bí sàng, chhám, só͘-í sim siūⁿ kóng: Nā chhoē-tio̍h, chiū beh kā i hoē m̄-tio̍h, kiû i sià-bián. Chhoē chiâⁿ poán-nı̂ liû-liû-khı̀, Ek-sam in lāu-bú iā sı̄ hoân-ló. Siù-chhun ê sim chin hoaⁿ-hí, ài hō͘ chhoē bô.
Chhoē-kàu ū chı̍t-jı̍t, kiâⁿ lâi-kàu Lâm-iông-siâⁿ lâm-mn̂g goā ê hiuⁿ-chng ê chng-ē, tı̄ hia hioh-khùn. Tú-hó thàu-chá Hūi-bí phâng saⁿ-á-khò͘ beh chhut-lâi sé, hō͘ i gū-tio̍h, Ek-sam cháu oá-khı̀ tùi Hūi-bí khan-teh, ba̍k-sái chhē-chhē-tò, tı̍t-tı̍t hoē sit-lé, kiû sià-bián. Hūi-bí khoàⁿ i ū chai-choē chiū sim iā sng, khan i jı̍p-khı̀ só͘-bih ê chhù. Tú gū Siú-jı̂n tùi goā-bı̄n tò-lâi, chin siū-khı̀, chū án-ni beh soà kā i táⁿ hō͘ i sí, chin khó͘-ò͘. Tùi chit-ê lâi jiá toā-sū, chiū tùi heng-khám khiú teh, beh kā i siak lo̍h-khı̀. Ek-sam tı̍t-tı̍t kiò m̄-káⁿ, jiâu-miā leh. Hūi-bí khoàⁿ-liáu, iā hó-chhiò, iā khó-lı̂n, chiū kiò Siú-jı̂n kā i pàng-khı̀, Siú-jı̂n chiū kā i pàng. Kiaⁿ-kàu khı̄-khı̄-chhoah, tı̍t-tı̍t jı̄n-chhò, kóng in Bú-kū ê chhò-gō͘, iā i gō͘-chiông i ê oē. Taⁿ bó-kū to sí lah, chit-chân sū to soah lah, i tek-khak beh pó in bô-choē. Túi án-ni Siú-jı̂n chiū khah bô siū-khı̀.
Ek-sam tı̍t-tı̍t kiû Hūi-bí tio̍h chiâⁿ i chit-chan chhin-sū. Hūi-bí kóng bô, lí sı̄ bô sı̀n Chú ê lâng, goá koat-toàn bē-tit kè-lí. (Goá goān sı̀n-Chú ê chí-moāi tāi-ke ū chit-hō chı̀-khı̀) hit-sı̂ í-keng àm, chiū tı̄-hia keh-mê. Ek-sam kiâⁿ-lâi kàu-chia chin-siān, chū 2, 3 jı̍t chiū ū lio̍h-á hō͘ i kám-tio̍h, chit-mê soà hoat-jia̍t. Hūi-bí chin thiàⁿ i, chiàu-kū hó khoān-thāi i, kā i ù léng-chúi, chiong in só͘-toà ê piān-io̍h hō͘ i chia̍h, phàu gû-ni chéng-chéng hó khoán-thāi i. Hit-sı̂ Ek-sam thiàⁿ Hūi-bí ê sim ná chhim, kám-sim i ê jı̂n-keh, it-hoat ài chhoā i. Chóng-sı̄ chū-kak chı̍t-hāng, chai pún-sin nā m̄-sı̄ lâi sı̀n Ki-tok-kàu, chiū chit-chân sū bē-sêng; m̄-kú nā beh sı̀n Ki-tok-kàu, ún-tàng ē hō͘ lāu-bú siū-khı̀, koh kiaⁿ pêng-iú khoàⁿ-khin. Só͘-í sam-sim lióng-ı̀. Chóng-sı̄ siūⁿ-lâi-siūⁿ-khı̀, chiū siūⁿ-chhut pháiⁿ-sim kóng, tio̍h lâi ké-chò jia̍t-sim sı̀n tō-lí (chit khoán ê lâng sè-kan chin chē) Tùi án-ni chiū tiāⁿ chhiáⁿ Hūi-bí thè i kı̂-tó tha̍k sèng-keng hō͘ i thiaⁿ, iā kà i gı̂m-si, tı̄-hia kap i tiàm chiâⁿ lé-pai, o̍h kàu ē-hiáu gı̂m kúi siú si. Chóng-sı̄ Hūi-bí bô hiah-khoài sı̀n-iōng i, khiok sim ū teh hoaⁿ-hí Ek-sam beh sı̀n Chú ê khoán. Tiàm chı̍t lé-pài āu, i chiū kóng beh chhoā i tò-khı̀, lâi pó in bô-choē.
9 Jı̍p Lo͘-Bāng
Hūi-bı̀ koat-toàn iàu-boē beh kap i khı̀, in-ūi i tiàm hia sı̄ jia̍t-sim chı̀-moāi ê ke, chin an-ún, āu-lâi Siú-jı̂n kap i tāi-seng chhut-lâi thàm-thiaⁿ chêng-hêng. Chai chiah-ê sū kó-jiân léng-khı̀ lah. (che-sı̄ Chi-nà chèng-hú ê khoán). Chiū khı̀ pài-tn̂g kı̀ⁿ thâu-ke-niû, kóng-khí chiah-ê sū hō͘ in thiaⁿ. Kòng Hūi-bı̀ hiān-sı̂ ióng-ióng tı̄ tó-iū. Tiúⁿ-ló-niû thiaⁿ-liáu sim chin hoaⁿ-hí, kám-siā Siōng-tè. Tùi hit-tia̍p liáu-āu. Ek-sam ta̍k lé-pài to lâi lé-pài, soà koh ho̍k-chit chò chúi-iû kong-si ê sin-lô, chhéng phài-lâi Sū-liông-chng chò chhut-tiuⁿ-só͘-tiúⁿ. Tùi án-ni ta̍k lé-pài to khı̀ pài-tn̂g, sèng-keng chū-jiân hàn-jı̄-ê chiū se̍k-se̍k. Bo̍k-su khoàⁿ i ê jia̍t-sim iā hoaⁿ-hí. Chia àn-hā.
Siú-jı̂n chiū khı̀ chhoā Hūi-bí tò-lâi. Kàu-ūi bó-kiáⁿ kı̀ⁿ-bı̄n hoaⁿ-hí kàu lâu ba̍k-sái. Tùi án-ni chı̍t-ke thoân-oân, koh poaⁿ-khı̀ tiàm ka-kı̄ ê chhù, Ek-sam iā tiāⁿ-tiāⁿ khı̀ Hūi-bı̀ in tau, in iā bô khioh-hı̄n, chiàu-kū hó khoán-thāi i.
Koè chiâⁿ-nı̂, Ek-sam chin jia̍t-sim, iā lâi tàu-kà Chú-jı̍t-o̍h, chin gâu kà. Tùi án-ni tiúⁿ-ló-nûi, chiū chin hoaⁿ-hí. Bo̍k-su iā chàn-sêng. Chiū ı̀n chò--i, iā tı̄ Sū-hiông ê kàu-hoē chiàu Ki-tok-kàu ê hoat-tō͘ lâi kiat-hun. Oh! Ek-sam ê hoaⁿ-hí, oán-jiân jû-gû-tek-sùi, lán m̄-bián koh kòng. Hūi-bí iā-sı̄ chı̄n chò hū-jı̂n-lâng ê pún-hūn.
Kiat-hun āu chiâⁿ lé-pài chiū chhoā tò-khı̀ Lâm-kiaⁿ beh khı̀ kı̀ⁿ lāu-bú, kàu-ūi lāu-bú bô sím-mı̍h hoaⁿ-hí. In-ūi sı̄ lo̍h-kàu--ê, koh-beh ha̍p-hun, iā bô tò-lâi pài thiⁿ-tē, kap kong-má, chiū chin bô chhèng-ı̀, bı̄n àu-kiâ-kiâ. Hūi-bí sim chin kan-khó͘; chóng-sı̄ chı̄n só͘-ē chò khı̀ chiū--i. Chia àn-hā.
Kóng tò-lâi keh-jı̍t āu, lāu-bó pı̄-pān ta̍k-hāng hó-sè, in-ūi sı̄ Ek-sam in lāu-pē ê kı̄-sı̂n kàu, kiò in tio̍h pài. Ek-sam khí-thâu m̄ pài, hō͘ in lāu-bú ok, lé, khu̍t, chiū pài; iā beh kiò in soà pài lóng-chòng ê kong-má lâi pó͘ in kiat-hun ê sı̂ bô pài. Ah! Chit-ê chin-chiàⁿ sı̄ Hūi-bí ê khó͘-tàⁿ. I koat-toàn m̄, chiū tı̀-kàu hō͘ in ta-ke phah. Ek-sam chin hoân-ló, Siù-chhun khiā tı̄ piⁿ-ah chin hoaⁿ-hí. Tùi án-ni ke-lāi chı̍t-jı̍t koè chı̍t-jı̍t ná bē hô (khǹg sı̀n Chú ê chí-moāi chò pē-bó-ê tio̍h chú-ı̀).
Ta-ke ta̍k-jı̍t to lé, khu̍t, hiuⁿ nā gia̍h khí-lâi tùi kong-má ê bı̄n-chêng chiū lé, hē kong-má tio̍h lia̍h i. Hūi-bí ê kan-khó͘ m̄-nā chit-iūⁿ. Ta̍k-tǹg chia̍h gı̂n-oáⁿ gı̂n-tı̄, gō͘ kin-kê, chūn liàm, pêng-kin ta̍k-jı̍t ū. Toā-thúi, ba̍k-chiu-phoê siông-siông o͘-chheⁿ. Ah! kin-á-jı̍t kàu-chia chhám lah, bô khah su lo̍h oa̍h-tē-ge̍k. Chóng-sı̄ Hūi-bí m̄-káⁿ tâu-hâng: in-ūi kò͘ tiōng-hu ê miâ-siaⁿ,iā m̄-káⁿ kap i jiáng, kiaⁿ-liáu chhiò-phoà lâng ê chhùi, iā m̄-káⁿ hō͘ lāu-bó chai; in-ūi kiaⁿ lāu-bó hoân-ló. Àm-sı̂ ba̍k-sái-à lâu-lâu leh, hō͘ lâng liàm ê ūi, àm-sı̂ thau hian khí-lâi ēng io̍h-iû boah-boah leh. Ah! chin-chiàⁿ chhám bô-tè kóng; to̍k-to̍k kı̂-tó, ǹg-bāng Chú khui-lō͘.
Ū chı̍t-jı̍t ta-ke khı̀ sio-kim tò-lâi, le̍k-lō͘ ū tām-po̍h chhiah-lı̄, i beh oá-khı̀ kò͘--i, iā bô-thang, hoān-sū, chhiàⁿ koh sı̂, ke-lâi nā kòng-phoà chı̍t-tè oàⁿ, sí chı̍t-chiah ke-á, lóng kóng-sı̄ chit-ê lo̍h-kàu-pô soah-soah-tio̍h. Siù-chhun ná kap Ek-sam ê lâu-bú siāng-sim lâi kong-kek. Ek-sam khoáⁿ-liáu iā-sı̄ chin bô-lō͘, beh tùi Hūi-bí chhoā chhut-khı̀ liû, m̄ thih; chóng-sı̄ Hūi-bı̀ chin gâu thun-lún, tı̍t-tı̍t kiû Chú khui-lō͘, m̄-ài chhut-khı̀, in-ūi kiaⁿ ná chhut-khı̀ ná pháiⁿ-miâ. Chóng-sı̄ ba̍k-sái siông-siông chún pn̄g thun. Siù-chhun sū-sū lóng lōng-koân, ū-sı̂ lâng-kheh nā lâi teh kiò Hūi-bí Tân sin-seⁿ niû, i ê ba̍k-chiu khiā tı̄ piⁿ-ah iā gı̂n kàu beh lak chhut-lâi. Tı̀-kàu Hūi-bí chin m̄-ài lâng kiò Tân sin-seⁿ niû. Iā ū sı̂ lâi phah Hūi-bí teh kap lâng kóng-oē, i iā lēng-goā thèⁿ-thâu chhùi-châm, ū-sı̂ tng chèng-lâng ê bı̄n-chêng iā hō͘ Siù-chhun hat, chin-chiàⁿ chhám. Lóng bô chı̍t-sut-á ê chū-iû-koân.
