Sı̍p-jı̄-kè ê kı̀-hō 06

Ùi Wiki Tô·-su-kóan
 16 Tē 2 Kong-Phoàⁿ 
 Lâu-chú chiū kóng, Chiàu goá só͘-chai, Ek-sam peng-sı̂ sı̄ gâu chia̍h-chiú ê lâng, pa̍t-hāng i khiok khah m̄-ài; put-kò be̍h-á chiú chám-jiân ē-lim, oá poàⁿ-táⁿ; goá iā bat khoàⁿ i lim; iā hit-mê chiah lim oá 2 kan nā-tiāⁿ. Kóng liáu chiū chē--lo̍h-khı̀. Kiám-chhat-koaⁿ chiū kóng, Taⁿ chiàu Sài-hoe-lâu lâu-chú ê oē, Ek-sam hit-mê chí-ū lim oá 2 kan, taⁿ ài ūi-tio̍h khah khak-sı̍t ê in-toaⁿ, ài chhiáⁿ sím-phoàⁿ koaⁿ-tiúⁿ lí koh mn̄g i chı̍t-piàn, khoàⁿ khak-sı̍t sı̄ án-ni nā-tiāⁿ á-m̄-sı̄. Sím-phoàⁿ koaⁿ-tiúⁿ chiū koh mn̄g, lâu-chú, Ek-sam khı̀ lí hia kó-chin lim hiah-ê nā-tiāⁿ. Sı̄, Kiám bô koh lim pa̍t-mı̍h? Bô. Chiū koh chē--lo̍h-khı̀. Kiám-chhat-koaⁿ chiū kóng, Taⁿ lia̍t-ūi chiàu lín só͘ thiaⁿ, Ek-sam pêng-sı̂ ē kham-tit lim poàⁿ-táⁿ be̍h-chiú ê lâng, hit-àm lim bô 2 koàn, cháiⁿ-iūⁿ ē chùi, án-ni bêng-bêng sı̄ pe̍h-chha̍t. Piān-hō͘-sū chiū khí-lâi toā-siaⁿ hoah kóng, án-ni kiám-chhat-koaⁿ bē-bián-tit koè-hūn, lí sı̄ kiám-chha̍t, kiám ē sái-tit chò kàm-tēng-jı̂n? Lí iā bô chhin-sin kap i chò-hoé kiâⁿ, lí iā chai i kó-chin sı̄ bô chùi. Án-choáⁿ i pún-lâng kóng ū chùi, iā lí kóng bô chùi? Kiám-chhat kóng, Nā-sı̄ án-ni, goá ài sím-phoàⁿ koaⁿ-tiúⁿ, chhiáⁿ Lâm-kiaⁿ ê ı̄ⁿ-tiúⁿ lâi giām. Khoàⁿ chit-ê lang ê khı̀-chit, kó-jiân chia̍h 2 koàn be̍h-chiú chiū ē-chùi kàu hāi sí-lâng soà m̄-chai á-bē. Tùi án-ni chek-sı̂ khı̀ chhiáⁿ ı̄ⁿ-tiúⁿ lâi. ı̄ⁿ-tiúⁿ sı̄ chin chhut-miâ ê I-ha̍k phok-sū, bat koè Tek-kok liû-ha̍k kú-kú. Ek-sam chai, chhám lah, hō͘ chit-ê phok-sū lâi giām, ún-tàng liâm-piⁿ chai. Īⁿ-tiúⁿ sèⁿ Gô͘ miâ Chài-seng, jı̍p-lâi liâm-piⁿ kā i giām, giām-liáu hoat-piáu kóng, chiàu i-ha̍k chiūⁿ lâi kóng, chiàu i ê thé-chit kı̀-jiân sı̄ siông chia̍h-chiú ê lâng, koh bat siông-siông chia̍h 6 koàn, iā chit-pang chia̍h 2 koàn sı̄ bô chùi ê lí-khı̀; koh goá ū chhiam i ê hoeh chhı̀-giām, chai i ê hoeh í-keng ū hit-hō jím-nāi chia̍h chē chiú iā bô hiah khoài chùi ê sèng. Kiám-chhat-koaⁿ chiū koh mn̄g kóng, Iā lâng nā í-keng chùi, kàu liân hāi-sí lâng iā bē-kı̀-tit, án-ni ê chùi hit-sı̂ náu kap sim-chōng ê khoán seⁿ-chò cháiⁿ-iūⁿ? Lâng nā kó-jiân chùi kàu án-ni, chiū náu lóng loān, ū-sı̂ ū náu-kin pia̍k-lı̍h ê gûi-hiám; in-ūi hit-sı̂ hoeh lóng kiâⁿ chin kín, ta̍k-ūi ê hoeh-kin lóng oē chin toā-tiâu, sim-chōng iā chhéng, seng-khu bô-la̍t, khōng-khōng-phiân bē chū-iû. Iā nā-sı̄ án-ni hit-sı̂ ê sim-lí cháiⁿ-iūⁿ? Hit-sı̂ nā phó͘-thong ê chùi, sim sı̄ iáu chāi-chāi, khah siông chhùi-poe-poe; M̄-kú tāi-chı̀ iáu chai, kóng liáu chiū chē--lo̍h-khı̀. Kiám-chhat-koaⁿ chiū kóng, Taⁿ kı̀-jiân chiáu I-ha̍k phok-sū ê oē, lâng nā sió chùi, sim chiū iáu chāi-chāi, nā kı̀-jiân toā-chùi chiū chùi tio̍h só͘-chò ê sū, liáu-āu bē-kı̀-tit. Taⁿ chiàu Ek-sam ê oē, i chùi-āu iáu ē-kı̀-tit i ū lám i ê kha, án-ni bêng-bêng sı̄ sió-chùi koh sı̍t-chāi sı̄ bô sió-chùi, in-ūi i ê thé-chit kap pêng-sı̂ ê chiú-liōng, tek-khak m̄-si 2 kan be̍h-chiú ē chùi ê lâng. Só͘-í bêng-bêng sı̄ thiau-ı̀-kò͘ lâi chò. Piān-hō͘-sū kàu-chia iā siūⁿ bô lō͘ thang piān. Ek-sam ê bı̄n chı̍t-chūn-chheⁿ chı̍t-chūn-le̍k, thâu-khak chhih-chhih. Kiám-chhat-koaⁿ kóng, Chiàu chit khoán ê choē-chōng, kı̀-jiân bô oē thang piān-kái, goá kiû bêng tio̍h sí-hêng; in-ūi sı̄ ok-ı̀ ê sat-jı̂n sū-kiāⁿ. Phoàⁿ-koaⁿ-tiúⁿ toh-téng chiū tah-lo̍h-khı̀, kóng, Ek-sam, lí iáu-ū sím-mı̍h oē thang piān-kái; nā bô koh 10-hun kan beh kā lí sí-hêng soan-kò. Ek-sam kap piān-hō͘-sū lóng tiām-tiām, boán-tiûⁿ ê lâng iā lóng tiām-tiām, sim chin kan-khó͘, oán-jiân tē-ge̍k. Sı̂-cheng tı̍t-tia̍k, tı̍t-tia̍k siaⁿ tı̍t-tı̍t koè, chhun 5 hun, chhun 4 hun, chhun 3 hun. Ah! Ek-sam ê sèⁿ-miā, kàu tı̄ kin-á-jı̍t, nā tēng sí-hêng liáu-āu chiū bô lâng ē tit kái-e̍k. Ah! Ek-sam ê sèⁿ-miā, chhun 3 hun kan. Ek-sam ê ba̍k-sái chhē-chhē tò. Pông-têng ê lâng tāi-ke sim lóng teh siūⁿ, tı̄ chit sı̂ kiám lóng bô lâng thang kóng kúi-kù lâi kiù i mah? Ek-sam ê sim-tiong tı̍t-tı̍t kiû Siōng-tè tio̍h kiù i ê lêng-hûn. Hit sı̂ Ek-sam ê tiūⁿ-ḿ, iā lâi tı̄ hia khoàⁿ, sui-bóng i sı̄ hāi sí cha-bó͘ kiáⁿ, sı̄ tùi-te̍k; m̄-kú khah pháiⁿ iā sı̄ kiáⁿ-sài, ba̍k-sái nih-nih lâu. Siù-jı̂n tı̄ hia chē, iā sı̄ m̄-kam. Ah! 2 hun-cheng. Sím-phoàⁿ koaⁿ-tiúⁿ toā siaⁿ hoah kóng, Ek-sam, chhun 2 hun-cheng, lí kiám lóng bô thang kóng? Sím-phoàⁿ koaⁿ-tiúⁿ tú kóng soah. Tiûⁿ-āu ū chı̍t-ê siaⁿ hoah kóng, Chit-ê lâng nā pān sí-hêng sı̄ bô kong-tō. I ê tāi-chı̀ thâu-kàu-boé goá lóng chai. Tāi-ke chú-ba̍k khoàⁿ--i, sı̄ chı̍t-ê cha-bó͘ gín-ná, kin-nı̂ oá 20 hoè ê chó-iū, chhēng o͘-hoe-á saⁿ sı̄ phó͘-thong-lâng. Kiám-chhat kiò-chiáng hoat-têng ê lâng kā i koáⁿ chhut-khı̀. Kóng hit-ê cha-bó͘ gín-ná sı̄ siáu cha-bó͘. Tùi án-ni hit-ê cha-bó͘ gín-ná hō͘-lâng thoa chhut-khı̀, cha-bó͘ gín-ná ba̍k-sái nih-nih-lâu. Chia àn-hā. 
 Kóng Piān-hō͘-sū khoàⁿ chit-chân sū chek-sı̂ peh khí-lâi, kóng, Chit-ê cha-bó͘ gín-ná chiū-sı̄ Ek-sam ê sèⁿ-miā, i sı̄ Ek-sam choè-hó ê piān-kái. Cháiⁿ-iūⁿ kiám-chhat-koaⁿ koáⁿ i chhut-khı̀? Án-ni bē-bián-tit ū oan-óng ê ūi. Lán ê hoat-lu̍t kiám m̄-sı̄ beh hêng-hoa̍t pháiⁿ-lâng lâi pó-hō͘ hó-lâng? Ek-sam bô hit-hō choē, siū khut, iā chit-tia̍p thiⁿ thè i khui-lō͘, án-choáⁿ Kiám-chhat-koaⁿ ēng ok-ı̀ lâi at-chı̍t chit-ê hó ê oa̍h-lō͘? Kiám-chhat-koaⁿ kóng, bô, i bêng-bêng sı̄ siáu-lâng, nā-sı̄ hó-hó ê lâng, i kiám m̄-chai hoat-têng sı̄ sı̂n-sèng. Kui-kí chhiú-sio̍k i kiám m̄-chai? I nā ài chò piān-hō͘ ê chèng-jı̂n, i ū siong-tong ê chhiú-sio̍k, cháiⁿ-iūⁿ bô thàn. Bô, i-sı̄ cha-bó͘-gín-ná-lâng bē bián-tit khah m̄-chai, goá sı̀n i sı̄ tùi chit-kiāⁿ sū-kiāⁿ, toā ū koan-hē thàu-thiat ê lâng; nā bô, i cha-bó͘-gín-ná-lâng tı̄ chiah-chē lâng ê tiong-kan, i tek-khak bô khí-lâi kóng i lóng chai. Bô, hit-ê cha-bó͘-gín-ná sı̄ nńg-sim, iā chı̍t-sı̂ ê kám-chêng nā-tiāⁿ. Án-ni chin bô lí-khı̀, goá chhéng chit-kiāⁿ sū iân-kàu bı̂n-á-jı̍t, hō͘ goá lâi khı̀ chhoē chit-ê hū-jı̂n-lâng kàu tio̍h, thang lâi chò hó ê piān-hō͘-jı̂n. Kiám-chhat-koaⁿ kóng bē-ēng-tit, chèng-kù í-keng chhiong-hun, m̄-thang koh chhiân; koh chhiân ài ū pê-pēng. Piān-hō͘-sū kóng, Nā-sı̄ án-ni toā bô kong-tō, án-ni lán ê lu̍t-hoat sı̄ lô͘-bāng, oa̍h-tauh, sı̄ hı̄n-bē-tit lâng sí; nā sı̄ án-ni ū oa̍h-lō͘ thang kiù-lâng, iā lán m̄ chhái-iōng, nā m̄ iân-kàu bı̂n-ná-jı̍t, bô, tı̄ chit-tia̍p iā chhiáⁿ liōng 3 tiám-cheng hō͘ goá lâi-khı̀ chhoē. Hit-tia̍p chē-tı̄ tâi-āu ê poê-sím-oân, tiong-kan chı̍t-lâng peh khí-lâi kóng, Nā-sı̄ án-ni chiáu goá siūⁿ, lán í-keng chū-chı̍p koè ē-pō͘ ê tiám-goā lah, lóng bô hioh-khùn. Taⁿ tio̍h hioh-khùn, iā chiong chit-ê sı̂-kan oá 2 tiám-cheng kú hō͘ piān-hō͘-sū khı̀ chhoē; chhoē nā ū, chiah koh lâi phah-sǹg, nā bô, chiah chū án-ni kái-koat. Sím-phoàⁿ koaⁿ-tiúⁿ ı̀n, hó. Tùi án-ni bêng-lēng chiām-sı̂ hiu-têng, ē-po͘ 3 tiám poàⁿ koh khui-têng. Tāi-ke hioh-khùn. Chia àn-hā. 
 Piān-hō͘-sū kín chē chū-tōng-chhia sı̀-kè chhoē, mn̄g hoat-ı̄ⁿ mn̂g-kháu ê thoa jı̂n-le̍k-chhia--ê khoàⁿ ū khoàⁿ i kiâⁿ tùi tó-ūi khı̀, tāi-ke pò kóng, Oat-tùi tò-chhiú-pêng ê toā-ke khı̀. Kàu hia chhoē bô, chhoē-lâi-chhoē-khı̀, kàu 3 tiám poàⁿ koh khui-têng. Sím-phoàⁿ koaⁿ-tiúⁿ mn̄g kóng, Taⁿ chhoē ū á-bô? 
 17 Kiù-Chheⁿ 
 Piān-hō͘-sū khí-lâi hoê-ta̍p, kóng chhoē bô. Chiap-soà koh kóng, Án-ni goá chin m̄-goān. Kiám-chhat-koaⁿ háng-hoah hit-ê hū-jı̂n-lâng, hū-jı̂n-lâng sı̄ lú-sèng, loán-jio̍k, i tǹg-toh hoah lâng thoa i chhut, án-ni chin-chiàⁿ oan-óng. Kiám-chhat-koaⁿ kóng, Bô, hit-ê hū-jı̂n-lâng chiàu goá ê ı̀-kiàn sı̄ piān-hō͘-sū chhiàⁿ--ê; in-ūi siông-siông ū piān-hō͘-sū ēng tām-po̍h chı̂ⁿ lâi chhiàⁿ hit-hō bû-nāi-hàn, lóng nā i piān bô-oē ê sı̂, chiah chhiáⁿ i jiáng chı̍t-kù, hō͘ i ū ki-hoē thang koh piān; nā m̄-sı̄ án-ni, i nā kó-chin chai, tek-khak ē lâi chū-siú. Piān-hō͘-sū chin siū-khı̀, kóng, Kiám-chat-koaⁿ ná kóng ná bô chêng-lí, án-choáⁿ kóng sı̄ goá khı̀ chhiàⁿ hit-ê hū-jı̂n-lâng lâi jiáng-ê? 
 Tú-tú cheng-lūn ê sı̂, Te̍k-bū thàn-cheng Chhoà Thian-phêng jı̍p-lâi, peh chiūⁿ tâi, phak tı̄ Sím-phoàⁿ koaⁿ-tiúⁿ ê hı̄ⁿ-khang teh kóng-oē, chin sè-siaⁿ, iā sím-phoàⁿ koaⁿ-tiúⁿ chin giâu-gı̂, chhùi chı̍p-chı̍p-kiò, piān-hō͘-sū sim teh siūⁿ phah-sǹg ū ǹg-bāng ê lō͘. Ek-sam chin kiaⁿ, i ê ı̀-sù kan-ta siūⁿ taⁿ ē sí lah, lâi khı̀ n̂g-choâⁿ kı̀ⁿ Hūi-bí. Chhoà Sian-siⁿ tùi phoàⁿ-koaⁿ kóng, Kiám-chat-koaⁿ iā sı̄ chin giâu-gı̂ ê khoán, goân-in chiū-sı̄ Chhoà Sian-siⁿ chhoā 2-ê hū-jı̂n-lâng lâi, chı̍t-ê kóng sı̄ Sò͘-lân, chı̍t-ê kóng sı̄ Hūi-bí, 2 lâng ka-tı̄ lâi chū-siú. Ah! chin-chiàⁿ kı̂-koài, thái ū chit-hō sū ah! Phoàⁿ-koaⁿ-tiúⁿ chiū kiò 2 lâng chhut-lâi, tāi-seng kiò Hūi-bí chhut-lâi, hō͘ Ek-sam jı̄n, khoàⁿ chit-ê kó-chin sı̄ Hūi-bí á-m̄-sı̄. Ek-sam khoàⁿ chı̍t-bı̄n chin kiaⁿ, sim-koaⁿ àm-àm teh siūⁿ sı̄ Hūi-bí ê lêng-hûn hián-sèng. Tı̍t-tı̍t jiáng, Hūi-bí, Hūi-bí lí tio̍h sià-bián goá. Thèng-chiòng tāi-ke chin kiaⁿ, ū-ê peh-peh khí-lâi khoàⁿ, in-ūi tāi-ke lóng siūⁿ kóng, Hūi-bí sí, cháiⁿ-iūⁿ kin-á-jı̍t iáu tı̄-chia. Phoàⁿ-koaⁿ chiū mn̄g, lí kó-chin sı̄ Hūi-bí á-m̄-sı̄? Hūi-bí ı̀n kóng, Sı̄. Lí kiám m̄-sı̄ í-keng sí? Bô, goá kóng lín chiū chai. Taⁿ chhiáⁿ lí kóng.
 Goá 11 goe̍h chhe 2 àm, tı̄ tı̂-piⁿ, goá chhoā goá ê lú-pı̄ Só͘-lân chò-hoé khı̀ tı̄-hia kı̂-tó, in-ūi goá kap Sò͘-lân lóng-sı̄ ki-tok-tô͘. Sò͘-lân khoàⁿ i ê tiōng-hu kap 2-ê sè-ı̂ lâi, chiū bi-cháu, chhun goá tı̄-hia, iā goá lám tiōng-hu ê kha, i kā goá that-khı̀. Hit-sı̂ goá ū tǹg-lap-chē; chóng-sı̄ bô tı̀-kàu siak-lo̍h tı̂. Goá ē siak-lo̍h tı̂, m̄-sı̄ tiōng-hu ê kha that goá, sı̄ Siù-chhun ê kha that goá, kap kı̂-thaⁿ iáu chı̍t-ê hū-jı̂n-lâng ê chhiú sak goá, nā bô, goá bô hiah khoài lo̍h tı̂. Taⁿ Siù-chhun that lí, lí kiám ū sím-mı̍h chèng-kù. Ū, i that goá, goá beh siak-lo̍h tı̂ ê sı̂, goá ū giú tio̍h i ê phoê-ê-chiam, iā i ê phoê-ê-chiam ū ēng kim-ê hoe lâi jı̍p Ek-sam ê siōng (che sı̄ hiān-tāi goā-kok choè liū-hêng-sek ê ê chiū-sı̄ chiong siōng chun-kèng, só͘ thiàⁿ ê lâng ê siōng lâi jı̍p-tı̄ ê-boé ê hoe) hiān-sı̂ tı̄-chia. Chiū tùi tē-á jı̂m khí-lâi, iā goá siak-lo̍h-khı̀ ê sı̂, chhiú iáu pan-tı̄ tı̂-piⁿ ê chio̍h-thâu beh liòng khí-lâi, hit-sı̂ Ek-sam cháu khı̀ jiáng kiù-lâng, iā Ge̍k-chu kā goá pak chhiú soà chhia lo̍h-khı̀. Hit-sı̂ goá beh tı̂m lo̍h-khı̀, ū sa-tio̍h i ê chhiú-tê boé, só͘-í i ê chhiú-chí ū chı̍t-lia̍p, kim-kong-chio̍h hō͘ goá giú tio̍h, la̍k tı̄ goá chhiú-nih, hit kha chhiú-chhí pêng-sı̂ sı̄ goá teh ēng, chio̍h ku̍t-ku̍t siông-siông ka-la̍uh, tùi i lâi, Ek-sam kā goá pak hō͘ i koà. Só͘-í hit-mê hit-lia̍p chio̍h-á chiah ē lak-tı̄ goá ê chhiú, taⁿ lóng tı̄ chia chò chèng-kù. Iā goá poa̍h-lo̍h-khı̀ ê sı̂, chháu-se phè-teh tı̂m-lo̍h-khı̀ ê sı̂ ū koh phû khí-lâi, hit-sı̂ Siù-chhun kap Gek-chu nn̄g-lâng í-keng cháu-khı̀. Goá phû khí-lâi ū khı̂ⁿ-tio̍h chı̍t-chiah bán lêng-kak ê chûn-á. In-ūi goán ê tı̂-té ū pàng lêng-kak, goá khı̂ⁿ-khí-lâi chûn-á-téng ê sı̂, kiò Sò͘-lân, i bih-tı̄ toā-chhiū āu, kín chhut-lâi, ēng chı̍t-tiâu gín-ná hı̀ⁿ-chhân-chhiu tn̄g-tı̄ chhiū-kha ê soh-á, chı̍t-thâu hiat hō͘ goá, goá kā i pa̍k-tı̄ chûn-á, chı̍t-thâu hō͘ Só͘-lân thoa, án-ni giú chiūⁿ hoāⁿ, tùi hit-tia̍p goá ū tô-cháu, iā So͘-lân tèⁿ m̄-chai tò-khı̀ iā tùi hit-sı̂ goá cháu-tùi Siōng-hái khı̀ sı̀-kè kā-lâng chú-chia̍h, lóng-sı̄ tú-tio̍h pháiⁿ-thâu-ke. Só͘-í khı̀ chhoē chı̍t-ê Bo̍k-su. Bo̍k-su siông-siông khı̀ kaⁿ-lāi kóng tō-lí. Só͘-í ín-chin goá jı̍p kaⁿ-ga̍k ê pēⁿ-ı̄ⁿ chò khàn-hō͘-hū. Hit-tia̍p goá kái-miâ chò Lı̂m sı̄ Siok-cheng só͘-í bô lâng chai. Ū-chı̍t-mê Ek-sam beh chū-chı̄n, tı̄ kaⁿ-pâng goá khoàⁿ i jiok chhut-lâi, āu-lâi siak-tó tı̄ chháu-po͘-á, goá kā i chhah teh tı̄ goá ê chhiú. Hit-sı̂ i pēⁿ-āu náu pı̂n-hiat put-séng-jı̂n-sū, goá kap kò͘-kaⁿ--ê kā i chhah jı̍p-khı̀ khùn, hit-tia̍p goá ū khioh-tio̍h i ê ûi-giân-sū, chit-tia̍p tı̄-chia, chiū the̍h kau phoàⁿ-koaⁿ. Kóng kàu chia Ek-sam ê sim hui-siông ê hoaⁿ-hí, iā kiaⁿ, chiah koh siūⁿ-kı̀ⁿ hit-mê tı̄ Siōng-hái ū-sím kaⁿ-pâng ê sū. Iā goá ūi-tio̍h tha̍k chit-tiuⁿ ûi-giân-chn̄g. Chai kó-chin m̄-sı̄ i chûn ok-ı̀ beh hāi goá, só͘-í, goá chiah thiau-kang beh lâi ūi i piān-kái. Siat-sú nā bô chit-tiuⁿ ûi-giân-su, goá koat-toàn siūⁿ m̄-ài koh jı̍p i ê mn̂g, só͘-í chò goá cháu. Kóng kàu chia Sím-phoàⁿ koaⁿ-tiúⁿ kóng, Án-ni hó, chhiáⁿ chē. Chiū kiò Su-kı̀ lâi tha̍k ûi-giân-chn̄g, tha̍k liáu kó-jiân ū-iáⁿ, Ek-sam sı̄ iáu chûn thiàⁿ Hūi-bí ê sim, chiū koh kiò Sò͘-lân lâi mn̄g. 
 18 Hoaⁿ-hí ê ba̍k-sái 
 Sò͘-lân chiū kóng, Hit-mê goá kap goán a-niû tı̄ tı̂-piⁿ kı̂-tó, iā goá khoàⁿ goán a-koaⁿ kap hit-ê sè-ı̂ lâi, goá ū khı̀ bih-tı̄ chhiū-āu, khoàⁿ goá A-niû hō͘-lâng chhia lo̍h-khı̀, goá chin kiaⁿ; chóng-sı̄ m̄-káⁿ jiáng, kiaⁿ-liáu goá iā ē siū-hāi. Goán a-koaⁿ khı̀ hoah kiù-lâng ê sı̂, Siù-chhun chiū khan Ge̍k-chu ê chhiú ná kiâⁿ sè-sè siaⁿ kóng, Taⁿ thò-tòng lah, bô chit-ê chhá-ke, lí goá thang an-sim; chiū koh kóng, Goá kā i that chı̍t-ē bô sím-mı̍h lo̍h-khı̀, iā lí ū kā i sak-kàu tı̂m lo̍h-khı̀ bô? Ge̍k-chu ı̀n kóng, Ū. Taⁿ hó, taⁿ hó, m̄-thang hō͘-lâng chai, ē-hng o͘-àm thiⁿ-tē, só͘-í bô iàu-kín.
 Nn̄g-ê ná-kóng ná khı̀, chiū goá kín siat-hoat kiù goán a-niû, keh 2-3 jı̍t, goá liâm-piⁿ hō͘ Siù-chhun koáⁿ chhut-lâi, taⁿ goá koh kap lâng toà, iā téng-po͘ goá ū lâi khoàⁿ lâng kong-phoàⁿ, hit-sı̂ goá chin hó-táⁿ, khí-lâi pó A-koaⁿ; chóng-sı̄ hō͘-lâng kā-goá chhia chhut-khı̀, iā khı̀ kàu lō͘-nih, koh gū-tio̍h goán a-niû, chiū chò-hoé tò-khı̀ goán sin thâu-ke hia chia̍h-pn̄g. Chia̍h-pn̄g pá chiah chhoā-lâi kı̀ⁿ Chhoà sin-seⁿ. Sím-phoàⁿ-koaⁿ thiaⁿ-liáu chiū kóng, Taⁿ chiáu i só͘-kóng, i ū giú-tio̍h Siù-chhun ê ê-boé ê hoe, ū jı̍p siōng, taⁿ khı̀ tiàu Siù-chhun lâi. Siù-chhun chū Ek-sam hō͘-lâng lia̍h-khı̀ Lâm-kiaⁿ ê sı̂, chiū chin kiaⁿ, soà chhin-chhiūⁿ siáu-ê tiāⁿ gōng-gōng, boē-hiáu hoân-ló, in-ūi koè-thâu kiaⁿ, iā soà chiong ê the̍h-lâi tùi, kó-chin ū-iáⁿ, Siù-chhun kàu-chia iā láu-sı̍t jı̄n, koh kiò lâng the̍h Ek-sam khı̀ Siōng-hái só͘ ēng ê lú-hêng phoê-pau lâi, Phoê-pau ēng hong-tiâu hong-teh, sı̄ Siōng-hái ê ū-sím phoàⁿ-koaⁿ kā i hong.
 Ge̍k-chu beh bâi-chòng ê sı̂, kim-khı̀ lı̄ lóng pak khí-lâi siu tı̄ phoê-pau lāi. Koāⁿ lâi, chiū mn̄g Ek-sam chit kha sı̄ lí-ê á m̄-sı̄? Sı̄. Taⁿ bô lâng kā lí khui. Ge̍k-chu hit-jı̍t bâi-chòng, kim-khı̀ ū lóng pak khí-lâi tı̄ chia á-bô? Ū, hit-jı̍t koà kúi kha chhiú-chí? Koà 6 kha. Ū koà soān-chio̍h ê chhiú-chí bô? Ū koà tı̄ tò-chhiú ê tiong-cháiⁿ, ū siu-jı̍p tı̄ chit siuⁿ-lāi á-bô? Ū, só-sı̂ Ek-sam ka-tı̄ koà tı̄ khò͘-toà. Chiū the̍h-lâi khui. Khui liáu tiám kim-khı̀ chin-chu kó-jiân lóng tı̄-teh, chhiú-chí iā 6 kha; tiong-kan chı̍t-kha só͘ jı̍p ê chio̍h á lak-khı̀, bêng-bêng sı̄ pian la̍k-khı̀ ê kı̀-hō. Chiū kiò Hūi-bí, sı̄ chit-kha chhiú-chí á-m̄-si? Sı̄. Jı̍p khoàⁿ māi, lí só͘ the̍h ê pó-chio̍h ū bô chit-ê khang á bô? The̍h-lâi jı̍p, kó-jiân ū.
 Siù-chhun iā í-keng chū-jı̄n, koh chèng-kù chhiong-hun, tùi án-ni soan-kò Siù-chhun têng-ek 7 nı̂, āu-lâi pēⁿ-sí tı̄ kaⁿ-lāi. Iā Ek-sam siū sià bô choē, thong tiûⁿ ê thèng-chiòng lóng tah-chhiú hoah bān-soè. Ek-sam chhin-chhek pêng-iú toā hoaⁿ-hí. Hit-sı̂ Ek-sam kap Hūi-bí kap Lı̂m tiúⁿ-ló-niû kóng, Kiáⁿ-ah chin-chiàⁿ sı̄ Án-niâ ê choē, kā lí kè hō͘ bô sı̀n-Chú ê lâng, chiah-ē lâi tı̀-kàu kin-á-jı̍t ē chiah chhám. Ek-sam tùi chhùi ı̀n kóng, Án-niâ m̄ sı̄ án-ni; lóng-sı̄ goá ê choē, goá nā chū hit-sı̂ jia̍t-sim thiaⁿ tō-lí, bô léng-sim lâi chhoā sè-ı̂ iā bô án-ni, chin-chiàⁿ sı̄ goá léng-sim chhoā sè-ı̂ m̄-tio̍h. Hūi-bí kóng, Taⁿ lín 2 lâng bián koè-thâu iu-būn, sı̄ goá ê miā. Taⁿ tāi-ke tò-lâi. Tùi hit-tia̍p khı̀, chiong tiūⁿ-ḿ poaⁿ-lâi Lâm-kiaⁿ, chū Sū-liông-chng ê gia̍p khı̀ hō͘ Siú-jı̂n, iā tāi-ke tiūⁿ-ḿ kiáⁿ-sài, lāu-bó, cha-bó͘-kiáⁿ lâi tiàm Lâm-kiaⁿ, hióng-siū hô-lo̍k saⁿ-thiàⁿ jia̍t-sim kèng Chú ê ka-têng. Taⁿ í-keng koh seⁿ 3 ê hāu-seⁿ 2 ê cha-bó͘ kiáⁿ, ta̍k jı̍t hoaⁿ-hí gı̂m-si o-ló Siōng-tè lâi koè-jı̍t. (Ah! Chiong cha-bó͘-kiáⁿ kè hō͘ bô sı̀n Chú ê ka-têng, kap chhoā sè-ı̂ ê ka-têng chin-chiàⁿ thang kiaⁿ) 
 Ko-hiông 裾野逸人 
Loā jı̂n-seng tù.
A.D. 1924: 11:1~8