Sı̍t-tián-má

(Ē-bı̄n só͘ kı̀-chài lóng sı̄ sı̍t-chāi ê sū)

Ū chı̍t-ê Oē-kang miâ-chò Sı̍t-tián- má, i-ê nı̂-hoè boē kàu tiong-liân, nā-sı̄ tı̄ i pún-siâⁿ, chiū-sı̄ Tek-kok ê La̍t-sı̍t-ló͘, miâ-siaⁿ í-keng put-chí tháu; bat ê lâng kóng, pa̍t-jı̍t i tek-khak ē chin chhut- miâ; chóng-sı̄ ka-tı̄ siūⁿ kóng, Goá beh tit-tio̍h hit-ê miâ-siaⁿ tek-khak tio̍h kàu ló-liân, án-ni kàu hit-sı̂ goá ia̍h bô sim thang hióng-siū.

Sui-bóng án-ni, iáu-kú i chai kàu hit- sı̂ ta̍k-hāng ē tek-ı̀; só͘-í ke̍k tùi-tiōng chit-ê oē ê tāi-chı̀. Sui-jiân êng ê sı̂-chūn ū khı̀ chiú-lâu, hı̀-tiûⁿ, kap pêng-iú kau-poê, chóng-sı̄ koh-khah tı̀-ı̀ chit-ê oē ê sū, ná chhin-chhiūⁿ hō͘ oē ê tāi-chı̀ bê--khı̀ chı̍t-iūⁿ, tı̀-kàu tû só͘-oē--ê í-goā, lóng m̄-chai ū pa̍t-mı̍h ê tāi-chı̀.

I-ê kang-hu sui-bóng í-keng chin-hó, chóng-sı̄ iáu-boē lia̍h-chò kàu-gia̍h; i chai i-ê goān iáu-boē chiok, tùi án-ni i ná ài chı̀n-pō͘, ia̍h tùi án-ni i-ê sim siông-siông put-an.

Lâng nā hóng-hut khoàⁿ i-ê khoán, ē phah-sǹg i sı̄ hó kau-poê, gâu lí-sū, ū hok-khı̀ ê lâng; m̄-kú siông-sè khoàⁿ i- ê ba̍k-chiu phû-phû, siaⁿ sàu-sàu, chiū chai ū bô pêng-an tı̄ i-ê sim-lāi.

Ū chı̍t-jı̍t chit-ê oē-kang khiā tı̄ i-ê oē-pâng chiàⁿ-chhiú ê toā-thâu-bú chhah tı̄ io-toà--nı̍h; tò-chhiú tùi chhùi--nı̍h thiu hun-chhoe chhut lâi, sı̄ in-ūi i khoàⁿ-kı̀ⁿ chı̍t-ê Pa-lé lâi, só͘-í ēng án-ni lâi chun-kèng i.

I chiū tùi Pa-lé kóng, Sı̂n-hū ah, bē chò-tit lah. Lí só͘ beh oē chit-pak Iâ-so͘ tèng sı̍p-jı̄-kè ê tô͘ í-keng ū chin-chē lâng oē lah; taⁿ goá nā oē, tio̍h siūⁿ chhut kap pa̍t lâng khah koh-iūⁿ; án-ni hit-ê kang tio̍h put-chí chē, só͘-í lí hiah-ê kang-chı̂ⁿ bô kàu-gia̍h.

Sı̂n-hū kóng, Kang-chı̂ⁿ bô-beh kat tiāⁿ-tio̍h, goá chai lí sı̄ tiong-hō͘ lâng; chit-pak m̄ sı̄ kàu-hoē beh bé ê, sı̄ chı̍t- ê hoán-hoé choē ê lâng beh sàng ê.

Sı̍t-tián-má kóng, Ho͘h, án-ni ū cheng- choa̍h, thêng chı̍t-goe̍h-jı̍t lí chiah koh lâi, hit-sı̂ goá ē siūⁿ-chhut só͘ tio̍h ēng ê ta̍k-hāng, chiah kap lí chham-siông.

Án-ni nn̄g-lâng chiū kiâⁿ-lé saⁿ-sı̂. Chit-ê oē-kang tı̄ chı̍t-goe̍h-jı̍t lāi chhut- la̍t teh siūⁿ hit-pak tio̍h cháiⁿ-iūⁿ oē.

I siūⁿ beh oē hit-pak tio̍h soà oē khiā tı̄ sı̍p-jı̄-kè kha hiah-ê peng-teng, kap teh khoàⁿ ê Iû-thài lâng, só͘-í i ta̍k-jı̍t khı̀ Iû-thài ke, khoàⁿ Iû-thài lâng ê bı̄n- hêng kap in-ê ang-á, ǹg-bāng oē-liáu ē khah-sêng.

Teh oē ê sı̂ Pa-lé ta̍uh-ta̍uh khı̀ khoàⁿ i-ê kang-hu, ū-sı̂ kap pa̍t-ê Pa-lé saⁿ-kap khı̀. Pa-lé ê ı̀-sù sı̄ ài sı̍p-jı̄-kè oē tı̄ tiong-ng, in-ūi i só͘ tı̀-ı̀--ê sı̄ chit-ê sı̍p-jı̄- kè, í-goā ê lâng-bı̄n kap tô͘--nı̍h ê kong- kéng sı̄ khah bô siong-kan.

Thian-chú-kàu tı̄ la̍k-goe̍h chhe-it ū chı̍t-ê cheh, miâ-chò Sèng Nı̂-ko-bí-lí ê cheh; Pa-lé ê ı̀-sù ài kàu hit-jı̍t chit- pak thang tiàu tı̄ lé-pài-tn̂g nı̍h.

Chhun-thiⁿ boé, thiⁿ-sı̂ put-chí chheng-chhái; Sı̍t-tián-má hioh-khùn chhut- mn̂g, kiâⁿ chha-put-to 8 lí lō͘, tú-tio̍h chı̍t-ê sòng-hiong ê cha-bó͘ gín-ná miâ- chò Pē-pí-tà, i-ê i-chiûⁿ sui-bóng sı̄ lâ-sâm phoà-noā, nā-sı̄ i-ê bı̄n-iông chhin-chhíⁿ hó-khoàⁿ. Sı̍t-tián-má ài oē i-ê siōng, chiū kap i iok chı̍t lé-pài khı̀ i tau saⁿ-pái, lâi hō͘ i oē. Í-keng kàu jı̍t, chit-ê Pē-pí-tà chiū lâi Sı̍t-tián-má tau; khoàⁿ-kı̀ⁿ i lāi-bı̄n ū chē-chē kı̂-iūⁿ ê mı̍h, chhin-chhiūⁿ kó͘-chá ê chiàn-kah, chá- chêng ê hûi-khı̀, tiau-khek ê mı̍h-kiāⁿ, khoàⁿ-liáu chin ài khoàⁿ. Āu-lâi khoàⁿ kàu Sı̍t-tián-má só͘ oē hit-pak Iâ-so͘ tèng sı̍p-jı̄-kè ê tô͘, koh-khah chù-sı̂n siông-sè khoàⁿ, ia̍h ēng chhiú kí hit-pak mn̄g Sı̍t-tián-má kóng, “Hit-ê sı̄ chı̄- chúi?” Sı̍t-tián-má kóng, “Ki-tok.” Koh mn̄g, “Hiah-ê lâng teh kā i chhòng sím- mı̍h?” Sı̍t-tián-má chhiⁿ-cho̍h ı̀n kóng, “Kā i tèng sı̍p-jı̄-kè.” Koh kóng, “Lí tio̍h oa̍t khah chiàⁿ-pêng lâi.” Oa̍t-liáu chiū kóng, “Hó, án-ni hó.” Sı̍t-tián-má ê khoán nā teh oē ê sı̂ put-chí m̄-ài lâng kóng oē.

Gín-ná koh mn̄g kóng, “Sı̍p-jı̄-kè kha hiah-ê pháiⁿ-bı̄n-chhiuⁿ ê lâng sı̄ chı̄- chūi?” Sı̍t-tián-má kóng, “Taⁿ lí tio̍h tiām-tiām, chit-tia̍p teh oē, goá lóng m̄ ài kóng oē.”

Gín-ná thiaⁿ-kı̀ⁿ Sı̍t-tián-má chit-hō ê khoán-sit m̄-káⁿ koh-chài mn̄g, chóng-sı̄ lia̍h hit-pak kim-kim khoàⁿ.

Hit-tia̍p liáu-āu ta̍k-pái nā lâi, chiū khoàⁿ hit-pak, ná khoàⁿ ná ài khoàⁿ. I put-chí ài mn̄g, ū-sı̂ chiū hó-táⁿ mn̄g kúi-kù. Bat chı̍t-pái mn̄g kóng, “Lâng siáⁿ-sū kā i tèng sı̍p-jı̄-kè, sı̄ in-ūi chin- pháiⁿ, á m̄-sı̄?”

Sı̍t-tián-má kóng, “Bô, chin-hó.”

Pē-pí-tà hit-sı̂ m̄-káⁿ koh mn̄g, chóng- sı̄ sim-lāi teh siūⁿ Sı̍t-tián-má só͘ kóng ê.

Pa̍t-jı̍t koh mn̄g kóng, “I nā-sı̄ hó- lâng, lâng siáⁿ-sū án-ni tèng i? Sı̄ tèng tiap-á-kú chiū pàng i, á m̄-sı̄?” Sı̍t-tián-má kóng, “Sı̄ in-ūi...” kóng kàu-chia chiū khı̀ hâ hit-ê gín-ná ê toà, hō͘ i khah hó-sè.

Pē-pí-tà chiū mn̄g, “In-ūi cháiⁿ-iūⁿ?” Sı̍t-tián-má khoàⁿ i sı̄ chin ài chai, chiū khó-lı̂n i kóng, “Pē-pí-tà ah! Lí tio̍h thiaⁿ. Chit-ê tāi-chı̀ goá beh chò chı̍t-pái kā lí kóng, í-āu lí lóng m̄-thang koh mn̄g.” Chiū chiong Iâ-so͘ siū tèng ê sū kóng bêng hō͘ i thiaⁿ.

Pē-pí-tà chêng lóng m̄-bat thiaⁿ-kı̀ⁿ chit-ê tāi-chı̀, chóng-sı̄ thiaⁿ-liáu ba̍k-sái chhē-chhē-tò. Sı̍t-tián-má sui-bóng kú- kú chai chit-ê sū, nā-sı̄ sim-koaⁿ choân- jian8 bô tín-tāng.

Pē-pí-tà ê siōng kap sı̍p-jı̄-kè ê tô͘ tâng-sı̂ oē hó, Pē-pí-tà lóng bô sim thang khoàⁿ i ka-tı̄ ê siōng, kan-ta kióng- chhiú chù-sı̂n khoàⁿ hit-pak sı̍p-jı̄-kè, lóng m̄-ài soá-kha. Sı̍t-tián-má tùi i kóng, “Pē-pí-tà ah! Lâi, goá chiah-ê kang-chı̂ⁿ hō͘ lí, lēng-goā koh chit-ê kim-á siúⁿ lí, taⁿ lí thang tò--khı̀, khiám- chhái pa̍t-jı̍t beh koh kiò lí lâi oē.”

Pē-pí-tà thiaⁿ-kı̀ⁿ án-ni chiū ûn-ûn-á tńg-sin kóng, “Sian-siⁿ to-siā.” I-ê ba̍k- chiu tâm-tâm, mn̄g Sı̍t-tián-má kóng, “Hit-ê tèng sı̍p-jı̄-kè-ê thè lí tam-tng hiah-toā ê kan-khó͘, lí ū put-chí thiàⁿ--i bô?” Sı̍t-tián-má put-chí kiàn-siàu, bı̄n hoat-âng, bô oē thang ı̀n; hit-ê cha-bó͘ gín-ná chiū tò--khı̀.

Cha-bó͘ gín-ná tò-khı̀ liáu-āu, i ê oē toā-toā kha̍p-tio̍h Sı̍t-tián-má ê sim, ài hō͘ chit-ê oē bē kı̀-tit, chóng-sı̄ chin tiâu lóng bē lut. I chiū kín-kín chiong hit-pak sàng kàu Pa-lé, ǹg-bāng nā bô khoàⁿ-kı̀ⁿ chiū ē khah bē kı̀-tit, chóng-sı̄ lóng bô-chhái-kang; āu-lâi kan-khó͘ tòng bē tiâu, iáu-kú koat-ı̀ beh tû-khı̀ chit-ê kan-khó͘, chiū khı̀ kı̀ⁿ chı̍t-ê Pa-lé, tùi i jı̄n choē, Pa-lé mn̄g i kúi-nā hāng, jiân-āu tùi i kóng, “Lí ê choē sià- lah.” Sı̍t-tián-má chiū kiám-siu oē hit- pak ê kang-chı̂ⁿ.

Hit-tia̍p liáu-āu lé-pài lāi i ê liông-sim khah bô chek-pı̄, só͘-í khah bô kan-khó͘, nā-sı̄ bô joā-kú hit-ê cha- bó͘ gín-ná só͘ mn̄g ê oē koh-chài tùi sim- lāi hoat-khí, siông-siông ka-tı̄ mn̄g kóng “Lí ū thiàⁿ i á-bô?” Án-ni Sı̍t-tián-má koh bē pêng-an, lóng bē chò-kang; i chiū sı̀-kè kiâⁿ, ài thiaⁿ sin-bûn, ǹg-bāng ē hō͘ sim khah-khui.

Ū chı̍t-jı̍t chhut-mn̂g kiâⁿ kàu siâⁿ- chhiûⁿ piⁿ khoàⁿ-kı̀ⁿ lâng kui-tı̄n kín-kín tùi chı̍t-keng phoà-chhù jı̍p khı̀, ū-ê tùi tang lâi, ū-ê tùi sai lâi. Sı̍t-tián-má khoàⁿ-liáu chin kı̂-koài, m̄-chai sı̄ siáⁿ-sū, chiū mn̄g lâng kóng, “He sı̄ teh siáⁿ- sū?” Hit-sı̂ lâng m̄ kā i kóng. Koè nn̄g saⁿ jı̍t chiah thiaⁿ-kı̀ⁿ kóng sı̄ chı̍t-ê chhut-goā lâng tiàm tı̄ hit-keng chhù; hit lâng sı̄ pàng-sak Thian-chú-kàu lâi kui tı̄ Iâ-so͘-kàu ê lâng, tāi-ke iàm-chiān i khoàⁿ-khin i; in-ūi hit só͘-chāi khah- chē sı̄ Thian-chú-kàu, nā khoàⁿ-kı̀ⁿ lâng ta̍k-hāng ê tāi-chı̀ ài thàn sèng-keng chiū biáu-sı̄ i, m̄ ài kap i kau-poê, lâng nā kap i kau-poê ia̍h-sı̄ put-chí bô ún- tàng.

Sı̍t-tián-má ka-tı̄ siūⁿ kóng, Khiám- chhái hit lâng ū oa̍h ê sı̀n, in-ūi bat thiaⁿ-kı̀ⁿ hit-hō lâng kam-goān ūi-tio̍h chin-lí pàng-sak sı̀ⁿ-miā, sui-bóng tú-tio̍h kan-khó͘ i ia̍h an-sim, án-ni goá tùi i kiám-chhái ē tit-tio̍h pêng-an ê lō͘. Siūⁿ-liáu chiū tiāⁿ-tio̍h beh chhoē i, kiám-chhái beh mn̄g i kúi-kù, chóng-sı̄ koat-toàn m̄ kap-i chò pêng-iú; m̄-kú mı̍h tú-tio̍h hoé bē bián-tit to̍h--khı̀. Hit-lâng tı̄ hia put-chí kan-khó͘, ū-ê chêng hō͘ lâng put-chí kèng-tiōng i, taⁿ lóng khoàⁿ-khin i; siat-sú in nā pàng- sak tō-lí, lâng iû-goân beh chun-kèng i, chóng-sı̄ i koat-toàn m̄.

Sı̍t-tián-má chiū khı̀ kı̀ⁿ hit-lâng (i sı̄ Iâ-so͘-kàu thoân-tō-lí ê lâng), khoàⁿ i ê khoán put-chí hó, só͘ kóng ê ia̍h-sı̄ put- chí hó, khoàⁿ i ê khoán-sit sı̄ chhin- chhiūⁿ teh kap Iâ-so͘ saⁿ-kap kiâⁿ ê lâng. Hit-ê thoân-tō-lí ê, ēng chı̍t-pún sin-iok chioh i khoàⁿ, chóng-sı̄ bô loā-kú in-ūi siū khún-tio̍k, hit-ê thoân-tō--ê tio̍h cháu-khı̀ pa̍t só͘-chāi, hit-pún chheh ia̍h soà toà khı̀, nā-sı̄ chheh-lāi ê oē í-keng jı̍p Sı̍t-tián-má ê sim.

Chêng i thiàⁿ Iâ-so͘ ê sim sı̄ bô-tiāⁿ bô-tio̍h, ū-sı̂ ū, ū-sı̂ bô, taⁿ chiū ka-kı̄ chai put-chí kian-kò͘, ia̍h put-chí jia̍t, ta̍uh-ta̍uh ka-tı̄ kóng, “Iâ-so͘ án-ni thiàⁿ goá, thè goá siū chit-hō ê kan-khó͘, goá thài-ē pò chit-hō ê hó siau-sit; goá ê chı̍h put-chí tūn kóng bē chhut, siat-sú beh kóng ia̍h bē-hiáu kóng, to̍k-to̍k Ki-tok ê thiàⁿ tı̄ goá ê sim chhin-chhiūⁿ hoé teh to̍h, sui-bóng bô oē thang hián- bêng, iáu-kú goá sim chai kàu put- chí siông-sè.”

I chı̍t-pái teh siūⁿ ê sı̂, chhiú--nı̍h the̍h chı̍t-tè hoé-thoàⁿ, bû-ı̀-tiong oē chı̍t-ê lâng ê thâu-khak, thâu-khak-téng tı̀ chhı̀-á ê bián-liû; oē-liáu chı̍t-ē khoàⁿ, i-ê ba̍k-chiu liâm-piⁿ tâm lo̍k-lo̍k; hut- jiân siūⁿ kóng, Goá ē oē, án-ni, goá tio̍h ēng goá ê oē lâi pò-iông Iâ-so͘ ê thiàⁿ- thàng, chiū kūi-lo̍h kiû Siōng-tè pang- chān i, hō͘ i só͘ oē ê ē kui êng-kng tı̄ I.

I siūⁿ chêng só͘ oē hit-pak Iâ-so͘ tèng sı̍p-jı̄-kè ê tô͘ bô tú-tú tio̍h, in-ūi i oē Iâ-so͘ ê bı̄n sı̄ kan-khó͘ ê khoán-sit; taⁿ siūⁿ tio̍h oē i jı̂n-ài hoaⁿ-hí hiàn i pún- sin ê khoán-sit; i chiū jı̍t-jı̍t chhut-la̍t koh-chài oē, ia̍h thok-tiōng Siōng-tè pang-chān i.

Hit pak oē liáu ē-té soà siá-jı̄ kóng, “Goá thè lí tam-tng chit-hō ê kan-khó͘, lí beh thè goá chò sím-mı̍h?”

Chit pak pí chêng oē hit pak put-chí khah hó-khoàⁿ, chèng-lâng lóng ı̀-ài, ta̍k-ê ài lâi khoàⁿ, i ka-tı̄ ia̍h m̄-kam bē, chiū the̍h--khı̀ sàng koaⁿ-hú, tiàu tı̄ kong-só͘, hō͘ ta̍k-lâng thang khı̀ khoàⁿ. Hit-sı̂ ū chin-chē lâng khı̀-khoàⁿ, khoàⁿ kàu chit pak ê, lóng sı̄ chēng-chēng khoàⁿ, m̄-ài soá khui, tò-khı̀ in tau ta̍k- ê siūⁿ kóng, “Iâ-so͘ thè goá tam-tng kan-khó͘ kàu án-ni.”

Sı̍t-tián-má siông-siông khı̀ hit-ê kong-só͘ siám-phiah ê só͘-chāi, thè hiah- ê lâi khoàⁿ chit pak ê lâng kı̂-tó, kiû Siōng-tè hō͘ in tùi só͘ khoàⁿ ê, sim-koaⁿ ē siū kám-kek.

Ū chı̍t-jı̍t Sı̍t-tián-má khoàⁿ-kı̀ⁿ chı̍t- ê cha-bó͘-gín-á khiā tı̄ hit pak ê thâu- chêng, teh lâu ba̍k-sái chin-chē, chiū kı̄n-oá beh kap i kóng-oē, mn̄g i kóng, “Cha-bó͘-eⁿ, lí háu siáⁿ-sū?” Hit-ê cha- bó͘-gín-á thâu-khak chı̍t-ē oa̍t koè--lâi, chiah chai sı̄ Pē-pí-tà; Pē-pí-tà ēng chhiú kí hit pak kóng, “I put-chí thiàⁿ lí, chóng-sı̄ goá sı̄ sòng-hiong ê cha-bó͘- gín-á, goá phah-sǹg i lóng m̄-bat goá, bô thiàⁿ goá.” Kóng-soah ba̍k-sái koh- chài lâu. Sı̍t-tián-má kóng, “Pē-pí-tà ah? Iâ-so͘ só͘ siū ê, lóng sı̄ in-ūi lí;” kóng-liáu chiong hō͘ i só͘-mn̄g--ê kám- kek sim, kàu oē chit pak ê sū ta̍k-hāng kā i kóng. Koaiⁿ-mn̂g ê sı̂ nn̄g-lâng iáu-kú saⁿ-kap teh kóng-oē; Sı̍t-tián- má chiū chiong Iâ-so͘ ê lâi-le̍k tùi chhut-sı̀ kàu sí koh-oa̍h chiūⁿ-thiⁿ, kap cháiⁿ-iūⁿ thang sı̀n lâi tit-tio̍h kiù ê sū kóng-bêng hō͘ i chai; Pē-pí-tà thiaⁿ ia̍h sı̀n--i.

Koè nn̄g-nı̂ tang-thiⁿ ê sı̂, sı̀-kè lóng sı̄ seh; ū chı̍t-mê Sı̍t-tián-má hioh- khùn chē tı̄ hoé-lô͘ chêng, teh khoàⁿ chı̍t-pún ka-tı̄ bé ê sin-iok, hut-jiân goā-bı̄n ū lâng teh phah-mn̂g, khui--jı̍p-lâi, khoàⁿ-kı̀ⁿ hit-lâng chhēng iûⁿ-mn̂g saⁿ, thâu-mn̂g sàm-sàm, bı̄n chheⁿ-chheⁿ, chhin-chhiūⁿ iau ê khoán-sit; hit-sı̂ Sı̍t- tián-má ê toh-téng ū mı̄-pau kap bah, hit lâng kim-kim siòng hiah-ê mı̍h, kóng-oē ê sı̂ ia̍h tı̍t-tı̍t khoàⁿ, kā Sı̍t- tián-má kóng, “Chhiáⁿ lí kap goá khı̀ chò put-chí iàu-kín ê tāi-chı̀.” Sı̍t-tián- má kóng, “Beh khı̀ tah-lo̍h?” Hit-lâng ı̀n kóng, “M̄-káⁿ kóng sím-mı̍h só͘-chāi.” Koh mn̄g, “Chhiáⁿ goá khı̀ beh chhòng sím-mı̍h tāi-chı̀?” Hit-lâng kóng, “M̄-káⁿ kóng, to̍k-to̍k chhiáⁿ lí khı̀ khoàⁿ beh sí ê lâng.” Sı̍t-tián-má kóng, “Hó, Goá beh chham lí khı̀, taⁿ chhiáⁿ lí chia̍h.” Hit-lâng kóng, “To-siā.” Chiū hoaⁿ-hí khı̀ chia̍h. Sı̍t-tián-má mn̄g i kóng, “Lí pak-tó͘ iau, hō͘ⁿ?” Ìn kóng, “Goán lóng beh gō sí lah.”

Sı̍t-tián-má chiū khoán kúi-nā hāng ê chia̍h-mı̍h, mn̄g hit-lâng kóng, “Chiah- ê lí ē giâ á-bē?” Kóng, “Ē, hoaⁿ-hí, chóng-sı̄ tio̍h lâi-khı̀, m̄-thang iân- chhiân.” Hit-lâng chiū kín-kín chò-thâu chhoā lō͘, Sı̍t-tián-má toè i kiâⁿ; kiâⁿ kàu siâⁿ-goā goe̍h í-keng chhut, hn̄g-hn̄g khoàⁿ-kı̀ⁿ chhiū-nâ, bô loā-kú jı̍p chhiū-nâ lāi, hiah-ê chhiū lóng sı̄ seh, lō͘ lóng hō͘ seh khàm--khı̀, put-chí oh-tit kiâⁿ, chóng-sı̄ hit-lâng chin se̍k, Sı̍t-tián-má thang toè i.

Kàu chhiū-nâ ê tiong-ng ū chı̍t-ūi pêⁿ-tē, bô chhiū, tı̄-hia ū kúi-nā keng ê chhù-á, hit-lâng kí chı̍t-keng kā i kóng, “Chhiáⁿ lí jı̍p-khı̀.” Hit-sı̂ chē-chē lâng tùi chhù-lāi chhut-lâi ûi i, ka-tı̄ chiū chiong só͘ giâ ê tē-á sià-lo̍h thô͘-kha.

Sı̍t-tián-má ku-ku jı̍p--khı̀, khoàⁿ-kı̀ⁿ hit-keng chhù chin phoà, lāi-bı̄n ū chı̍t- ê cha-bó͘-gín-á tó--teh, ēng ta ê chhiū- hio̍h chò jio̍k-á, bı̄n chhin-chhiūⁿ chin iau, khoán-sit ná-chún bat keng-koè tāng-tāng ê kan-khó͘ chı̍t-poaⁿ-iūⁿ, i-ê ba̍k-chiu kheh-kheh; Sı̍t-tián-má jı̄n-tit sı̄ Pē-pí-tà, chiū kiò i kóng, “Pē-pí-tà ah!” Cha-bó͘-gín-á ba̍k-chiu liam-piⁿ khui kàu kim khok-khok, chhùi lı̍h-lı̍h, bı̄n chhiò-chhiò, seng-khu sió-khoá peh khí lâi kóng, “Ū-iáⁿ, I ū lâi, tit-beh chhoā goá khı̀, I chhun I-ê chhiú, I-ê chhiú ū hoeh, I put-chí thiàⁿ goá.” Kóng-soah chiū koè-khùi.

Hit-pak taⁿ bô lah, in-ūi kúi nı̂-chêng hit-keng kong-só͘ hé sio, hit-pak iā tio̍h khı̀; tng hit-pak iáu tı̄ teh ê sı̂ ū put-chí lı̄-ek lâng. Ē-bı̄n beh kóng-khí chı̍t-lâng miâ Jı̂n-jı̂n-ló͘ ê tāi-chı̀. Sı̍t-tián-má, Poè-pí-tà sí choē-choē nı̂, ū chı̍t-ê chun-kùi ê lâng chē-chhia hit-ê siâⁿ, i ê bé hioh tı̄ kheh-tiàm, i chiū chhut-mn̂g sı̀-kè chhit-thô, jı̍p hit-ê kong-só͘. Che lâng sı̄ siàu-liân hó ha̍k-būn ê lâng; i ê chhin-lâng lóng sı̄ toā-koaⁿ, chit lâng āu-jı̍t oē choè put-chí toā ê lâng, tit-tio̍h sè-kan choē-choē ê êng-kng; hit-jı̍t khoàⁿ-kı̀ⁿ Sı̍t-tián-má só͘ oē hit-pak Iâ-so͘ tèng sı̍p-jı̄-keh ê tô͘ ū jı̂n-ài ê khoán-sit, ná khoàⁿ ná ài-khoàⁿ, khoàⁿ-liáu sim siū kám-ke̍k, koh khoàⁿ-kı̀ⁿ “Goá thiàⁿ lí kàu án-ni, lí thoè goá choè sím-mı̍h?” Hí nn̄g-kù, tha̍k-liáu koh khoàⁿ, khoàⁿ-liáu koh tha̍k, i ê sim chin tı̀-ı̀, lóng m̄-ài lı̄-khui, ba̍k-sái tı̍t-tı̍t lâu. I khiā hia ū kúi-nā tiám-cheng kú, kàu jı̍t-àm, kò͘ kong-só͘ ê lâng lâi hoāⁿ i ê keng-thâu kóng: “Iáu-boē, hoán-tńg.” In-ūi chit-ê siàu-liân-lâng sim-lāi éng-oán oa̍h ê jı̍t tú-á chhut.

Tò-khı̀ kheh-tiàm koh-chài chē i-ê chhia, chóng-sı̄ m̄-ài tò-khı̀ i-ê pún só͘- chāi; sı̄ ēng i-ê sèⁿ-miā, hù-kùi, miâ- siaⁿ it-chı̄n hē tı̄ Iâ-so͘ ê kha-ē; in-ūi hit nn̄g-kù siông-siông hoat-khí tı̄ i-ê sim-lāi.

Āu-lâi Jı̂n-jı̂n-ló͘ chò Mô͘-loē-bí-a Soan-tō-hoē ê táng-sū, put-chí chhut-la̍t ho̍k-sāi Chú, bián-lē chē-chē lâng; kàu Chú-āu 1760 nı̂ 5 goe̍h koè-óng.

Siōng-tè ēng lâng chò I-ê khı̀-khū, I- ê hoat-tō͘ m̄-nā chı̍t-khoán, in-ūi ta̍k- hāng tı̄ I-ê chhiú, chhut-chāi I lâi ēng. Khoàⁿ I ēng Sı̍t-tián-má ê oē chò ke̍k- hó ê pò-iông, án-ni thang chò pı̂n-kı̀.

(Tâi-oân Hú-siâⁿ Kàu-hoē-pò tē 50~51 koàn,1889 nı̂ 8~9 ge̍h)