Sū-sı̍t siáu-soat--kiû chit kı̀

1. Hó siau-sit. Goá hut-jiân tı̄ pò-choá khoàⁿ-tio̍h chı̍t ê hó siau-sit, hui-siông ê hoaⁿ-hí, chek-sı̂ chiong hit tiuⁿ pò-choá ēng cháu-ê the̍h-lâi kàu lé-pài-tn̂g beh pò Lı̂m Bo̍k-su. “Bo̍k-su, bo̍k-su! goá í-keng ū thâu-lō͘ lah.” “Ū-iáⁿ! Án-choáⁿ tit-tio̍h?” “Lí khoàⁿ chit tiuⁿ pò-choá só͘ khan ê,tú-tú sı̄ goá chit kúi nı̂ lâi ta̍k jı̍t teh bōng-sióng ê tiâu-kiāⁿ. Lı̂m Bo̍k-su chiong hit tiuⁿ pò-choá the̍h khí-lâi khoàⁿ, Kip-teng gia̍p-bū-oân khé-sū:“Chèng-tāi Hoà-kang Iú-hān Kong-si, ūi-tio̍h beh khok-tiong gia̍p-bū, beh chiau-bō͘ gia̍p-bū-oân 10 miâ, thāi-gū múi ge̍h 2000 kho͘ í-siōng, nā-sı̄ Chho͘-tiong pit-gia̍p thêng-tō͘, iú ı̀ èng-teng chiá chhiáⁿ kià lí-le̍k-su hù hān-sı̂ iû-phiò kià lâi Tâi-lâm iû-siuⁿ 3856 hō, gia̍p-bū-chhù siu. Nā sím-cha ha̍p-keh chek thong-ti biān hia̍p.” “Goá khoàⁿ chit ê khé-sū ū tām-po̍h giâu-gı̂ ê só͘-chāi, kūn-lâi chhē chit-gia̍p m̄-sı̄ hiah-nih kán-tan ê sū, ná-lí ū chho͘-tiong pit-gia̍p oē thang thàn 2000 kho͘ ê thāi-gū? Che kiám-chhái sı̄ teh phiàn lâng iā bô tek-khak.” “Che sı̄ kong-khai khan tı̄ pò-choá, ná oē phiàn lâng ê lí-iû?”Goá ı̀n. “Bûn-seng , goá siūⁿ lí m̄-thang chı̍t-sim chı̍t-ı̀ teh him-bō͘ beh khı̀ chhı̄-lāi chia̍h thâu-lō͘, lí sui-jiân bô chit-gia̍p, m̄-kú lí ū kúi hun chhân-hn̂g, lí nā phah-piàⁿ choan-sim choh-sit, goá khoàⁿ bô khah-su khı̀ chhı̄-lāi chiah tio̍h, hô-hòng lí ê pē-bú í-keng nı̂-lāu, iā bô ài lí lı̄-khui in, tiàm chhù hó-hó hōng-thāi sı̄-toā lâng, Siōng-tè it-tēng oē chiok-hok lí ê kang-chok.” “Goá to sı̄ hō͘ goán lāu-pē chiah ê m̄-chiâⁿ chhân-hn̂g pa̍k tiàm chit ê kó͘-chíⁿ lāi chiah tio̍h chhiⁿ-chhám; chit ê sı̂-tāi ê chheng-liân nā boē-hiáu siūⁿ bo̍h bùn chhut-khı̀ goā-bı̄n phah-piàⁿ, tiàm chia bān-sı̀ boē chhut-thâu-thiⁿ.” “Chóng-sı̄ tiàm hiong-chhoan mā ū hiong-chhoan ê hó, tiàm to͘-chhı̄ mā ū to͘-chhı̄ ê bái, bô it-tēng tio̍h lóng tı̄ chhı̄-lāi, lí khoàⁿ lán kàu-hoē ê Lū Tiúⁿ-ló, Lí Chip-sū, in kiám m̄-sı̄ tiàm soaⁿ-nih phah-piàⁿ, keng-êng chhân-hn̂g, mā sı̄ hō͘ Siōng-tè toā chiok-hok. Iā khı̀ chhı̄-lāi ê lâng mā ū chin-choē tńg-lâi teh kiò khó͘ liân-thian.” “Bô-iáⁿ-ô͘! Nā ū thâu-lō͘ khah kóng mā beh lâi-khı̀ chhı̄-lāi, lí khoàⁿ Gô͘ Tiúⁿ-ló, N̂g Chip-sū, in nā bô khı̀ chhı̄-lāi, éng-oán to sı̄ teh kia̍h tı̂-thâu, koh khoàⁿ A-sam ko, Hok-châi hiaⁿ, chı̍t-ē khı̀ chhı̄-lāi, chhēng-chhah lóng sin-sū khí-lâi, í-chêng ê chháu-toē sông bı̄ lóng bô--khı̀.” “M̄-kú ū chı̍t hāng lí m̄-chai-iáⁿ,” Lı̂m Bo̍k-su kóng, “Chia ê lâng tı̄ lán kàu-hoē sı̄ chin jia̍t-sim ho̍k-sāi Siōng-tè, lé-pài hù chū-hoē, choè kàu-hoē ê kang hui-siông phah-piàⁿ, sui-jiân seng-oa̍h bô thang hó, nā-sı̄ sim-lêng chin khoài-lo̍k teh kè-jı̍t, taⁿ tı̄ chhı̄-lāi, chiàu goá só͘ chai, ū chin-choē lâng ê sı̀n-gióng í-keng chiām-chiām léng-tām, sı̄m-chı̀ ū ê í-keng lı̄-khui Siōng-tè, bô teh choè lé-pài lah, in boē kham-tit siū hia ê choē-ok ín-iú, chhin-chhiūⁿ Bo̍k Tiúⁿ ló, Bō͘-siông hiaⁿ ...... lóng í-keng sit-khı̀ sı̀n-sim, pı̀ⁿ choè Mô͘-kúi ê lô͘-châi lah.” “Lí kóng án-ni sı̄ sū-sı̍t, put-kò he sı̄ chāi lâng ê sı̀n-sim ū kian-tēng bô? Goá sı̄ hō͘ goá bô ki-hoē thang khı̀ hia, nā chit pái Chú pang-chān goá oē thang lâi-khı̀ chiū-chit, it-tēng beh tı̄ hù-kūn ê kàu-hoē ka-pē jia̍t-sim lâi ūi Chú choè kang.” “Lâng lóng oē loán-jio̍k, lí tio̍h chai-iáⁿ chhı̄-lāi ê choē-ok, khúi-khiat sı̄ lán siūⁿ boē kàu ê, te̍k-pia̍t hoān-choē ê iú-he̍k sı̍t-chāi hō͘ lán khó-phàⁿ.” Lı̂m Bo̍k-su kóng kàu chia koh thán-pe̍h kā goá kóng, “Goá chai-iáⁿ lí sı̄ chı̍t ê jia̍t-sim khó-chhú ê chheng-liân, tı̄ lán kàu-hoē tam-tng T.K.C. hoē-tiúⁿ, Chú-jı̍t-o̍h kàu-oân iàu-kín ê chit, chit keng jio̍k-siáu ê kàu-hoē Siōng-tè ū toā khiàm-ēng lí tı̄ chia choè kang, goá siūⁿ ūi-tio̍h lí ê pē-bú, ūi-tio̍h lán kàu-hoē ê iân-kò͘, choè hó hòng-khı̀ kàu to͘-chhı̄ ê liām-thâu, ló͘-le̍k tı̄ ka-kı̄ ê chit-tiûⁿ, goá siong-sı̀n Siōng-tè oē chiok-hok lí sêng-kong ê chı̍t jı̍t. Hô-hòng pò-choá teh pò chit ê siau-sit, m̄-chai sı̄ chin á-sı̄ chı̍t tiûⁿ ê phiàn-kio̍k? Ká-sú nā-sı̄ chin-ê, kan-ta chhı̄-lāi lâng mā ín kàu bô hūn, kiám ū hoat-tō͘ thang tio̍h lán?” “Sı̄, só͘-í goá m̄-thang sit-khı̀ chit ê ki-hoē, tio̍h lâi-khı̀ chhı̀ khoàⁿ-māi, Siōng-tè nā bô ài goá khı̀, chit ê sū chiū boē sêng.” Goá tùi lé-pài-tn̂g chhut-lâi, ná kiâⁿ ná siūⁿ, che sı̄ chhian-cháiⁿ it-gū ê ki-hoē, goá bô-lūn jû-hô m̄-thang hō͘ bo̍k-su ê oē kái-piàn goá ê liām-thâu, bo̍k-su lóng sı̄ teh khó-lū i ka-kı̄ ê lı̍p-tiûⁿ, tong-jiân bô ài goá khı̀ pa̍t-ūi, ū iáⁿ goá nā cháu, kàu-hoē í-keng bô lâng thang koh oa̍h-tāng. Chóng-sı̄ i lóng bô khó-lū goá ê būn-toê, chı̍t ê bô tha̍k-chheh ê lâng siōng-chhiáⁿ bô ài tiàm chhân-chng lah, hô-hòng goá chit ê Ko-tiong pit-gia̍p-seng kiám m̄-sı̄ koh-khah tio̍h thàn ki-hoē nǹg jı̍p chhı̄-lāi mah? Goá tı̄ hia mā sı̄ oē thang ūi Chú jia̍t-sim lâi lı̄-ek kàu-hoē, kàu-hoē sı̄ Siōng-tè ê, goá nā cháu, Siōng-tè chū-jiân oē heng-khí tú-hó ê lâng thèⁿ khí-lâi, m̄-bián khoà-lū chit ê sū. Goá tńg-lâi chhù, tùi thoah-á khui khí-lâi, the̍h hit tiuⁿ í-keng siá hó thèng-hāu chin kú ê lí-le̍k-su, sûi-sı̂ cháu lâi iû-kio̍k boé chı̍t tiuⁿ hān-sı̂ ê phe-lông kap boé chı̍t tiuⁿ 2.50 ê iû-phiò, kap lí-le̍k-su lok tı̄ phoe-lông lāi, chiū án-ni toà tio̍h moá-hoâi ê sı̀n-sim, lok lo̍h-khı̀ iû-tâng, goá lóng bô kóng hō͘ pē-bú chai-iáⁿ, hô-pit tio̍h hō͘ in chai-iáⁿ. II. Èng-teng. Chı̍t jı̍t, 2 jı̍t kè-khı̀, goá chha-put-to boē chia̍h, boē khùn-tit, put-sı̂ ba̍k-chiu khoeh-khoeh teh kı̂-tó, koh-khah bô sim thang choè kang, tı̄ mn̂g kháu kiâⁿ-lâi kiâⁿ-khı̀ teh liâu-bāng le̍k-sek ê thiⁿ-sài kong-lı̂m. Kám-siā Siōng-tè, tē 3 jı̍t siōng-ngó͘ hoê phoe lâi lah, sı̄ chı̍t tiuⁿ bêng-sı̀n-phı̀ⁿ, ēng iân-jı̄ ı̀n hó, kan-ta thâu-chêng hit kúi jı̄ “黃文生”ēng mô͘-pit siá ê nā-tiāⁿ. Pún kong-si chiap-tio̍h chheng-bān hong èng-teng ê sı̀n-kiāⁿ tiong, tı̄ chā-hng ê táng-sū-hoē gí-tēng tâi-toan ūi ha̍p-keh jı̍p-soán, chhiáⁿ tı̄ 3 jı̍t lāi chiong sin-hūn-chèng, pit-gia̍p chèng-su, ı̀n-chiong kap 300 kho͘ ê chiū-chit chhiú-sio̍k-hùi chhin-sin lâi pún kong-si gia̍p-bū-chhù teng-kı̀ biān-tâm. Chèng-tāi Hoà-kang Iú-hān Kong-si Gia̍p-bū Chú-jı̄m: Má × × 地址:臺南市中正路一三五八號 Phoe-lāi ū tǹg toā ê kong-si ê koan-hông kap chú-jı̄m ê ı̀n-chiong chin chheng-chhó. goá liân-soà khoàⁿ kúi-nā pái, ná tha̍k ná chhiò, án-ni ū chū-sı̀n lah, hóng-kiam goá sı̄ ko-tiong pit-gia̍p ê, it-tēng oē tùi goá chit ê ha̍k-le̍k khah koân ê iu-sian. Tio̍h! Sı̂-kan iàu-kín, it-chhùn kong-im it-chhùn kim, iā tio̍h cheng-chhú sı̂-kan, nā bô koáⁿ-kín lâi-khı̀, oē hō͘ chhı̄-lāi ê lâng chhiúⁿ-khı̀. Kàu Tâi-lâm, goá the̍h chit tiuⁿ bêng-sı̀n-phı̀ⁿ chhin-chhiūⁿ teh tiāu-cha hō͘-kháu,tı̍t-tı̍t tùi nāu-jia̍t ê chhı̄ tiong-sim lâi, ba̍k-chiu chı̍t-ē tùi hn̄g-hn̄g khoàⁿ-khı̀, tı̄ Un7-hô piⁿ kó-jiân ū koà chı̍t ê chin toā tè ê chiau-pâi siá tio̍h “正大化工股份有限公司業務處” ê jı̄ chin chheng-chhó. Goá chin hoaⁿ-hí ēng cháu--ê kàu mn̂g-kháu, tāi-seng khiā tı̄ goā-bı̄n siông-sè khoàⁿ jı̍p-khı̀ hián-jiân sı̄ chı̍t keng sin khai-gia̍p ê kong-si, lāi-bı̄n ū pâi 5, 6 tè ê pān-kong-toh, í-goā lóng bô sím-mı̍h, tiong-ng hit tè khah toā tè ê toh ū khǹg chı̍t ki tiān-oē, ū siá gia̍p-bū chú-jı̄m ê jı̄ pâi tı̄ toh-chêng, chē tı̄ hia hit ê lâng it-tēng sı̄ chú-jı̄m, piⁿ-á ê toh-á iā ū chē nn̄g ê sū-bū-oân kap chı̍t ê lú--ê,in ê ba̍k-chiu put-sı̂ teh khoàⁿ goā-bı̄n.chiàu khoàⁿ bô sím-mı̍h kong-sū thang pān ê khoán, goá khoàⁿ-liáu chiū kiâⁿ jı̍p-khı̀, tú-tú toh-kha ū poa̍h chı̍t tiuⁿ choá goá hut-jiân siūⁿ-khí Lı̂m Bo̍k-su tı̄ káng-tō ê sı̂ bat ín chı̍t ê phı̀-jū kóng, ū chı̍t ê kong-si beh chiau-bō͘ chı̍t ê sū-bū-oân,chóng-sı̄ èng-teng-chiá chin-choē, chóng-keng-lí bô hoat-tō͘ thang koat-tēng sím-mı̍h lâng, chiū chiong chiah ê lâng tiàu lâi sûi-ê kháu-chhı̀, tiâu-kang tı̄ in ê bı̄n-thâu-chêng thau khǹg chı̍t ki chiam tı̄ toē-nih, àn-sǹg sím-mı̍h lâng nā oē-hiáu chiong hit-ki chiam khioh khí-lâi, chiū beh chhái-iōng hit ê lâng, in-ūi nā oē-hiáu tı̄ sió sū chı̄n-tiong, chū-jiân chiū oē tı̄ toā ê tiong-sim, só͘-í goá chai-iáⁿ chit tiuⁿ choá kiám-chhái sı̄ teh chhı̀ goá, lâi koat-tēng goá ê miā-ūn, goá sûi-sı̂ àⁿ-lo̍h the̍h khí-lâi, khǹg tı̄ chú-jı̄m ê toh-téng, koh kiâⁿ 90 tō͘ ê kiok-kiong tùi chú-jı̄m kóng,“× × chú-jı̄m, goá tiâu-kang tùi hiong-chhoan lâi beh èng-teng ê, chhiáⁿ bān-sū pài-thok.” Kóng liáu tùi tē-á lāi the̍h hiah ê su-lūi kap 300 kho͘ khí-lâi kau hō͘ i, i lia̍h goá siòng chı̍t-ē, chiah ēng Kok-gú kā goá mn̄g chin-choē tāi-chı̀, goá iā ēng Kok-gú kā i ı̀n-tap, i ná kóng ê sı̂ ná khoàⁿ hiah ê su-lūi, khoàⁿ liáu hêng goá, chiong hit 300 kho͘ siu jı̍p-khı̀, koh tùi thoah-á the̍h chı̍t thong ê thiam-pò-toaⁿ kā goá kóng. “Hû-ha̍p goán ê tiâu-kiāⁿ lâi teng-kı̀ ê lâng kàu chit sı̂ ū 50 miâ í-siōng, nā-sı̄ goán chí-ū beh chhái-iōng 10 ê nā-tiāⁿ, só͘-í goán koat-tēng beh hō͘ hiong-chhoan ê lâng iu-sian, tong-jiân lí sı̄ ha̍p tı̄ iu-sian ê chu-keh, chóng-sı̄ ū chı̍t ê tiâu-kiāⁿ lí nā tah-èng, chiū sûi-sı̂ oē thang koat-tēng beh chhái-iōng lí, m̄-chai lí goān-ı̀ bô?”“Tong-jiân goān-ı̀,” goá tı̍t-tı̍t tàm-thâu. “Pún kong-si kiò-choè ‘股份有限公司’, lí chai-iáⁿ chit ê ı̀-sù hò͘ⁿ? Só͘-ūi “股份”chiū-sı̄ ēng chin-choē lâng ha̍p-kó͘ lâi keng-êng ê kong-si, só͘-í hoān-nā beh choè pún kong-si ê chit-oân, chiàu chiong-thêng it-tēng tio̍h ka-jı̍p choè kó͘-tong chiah oē ēng-tit.” Goá thiaⁿ-tio̍h kóng tio̍h hūn kó͘-tong, sim-lāi chai-iáⁿ án-ni bô hoat-tō͘, chı̍t kó͘ káⁿ tio̍h kúi cha̍p bān, á-sı̄ kúi bān kho͘ leh, chiū mn̄g i kóng, chı̍t kó͘ sı̄ joā-choē chı̂ⁿ? Chı̍t ê lâng tio̍h hūn kúi kó͘? I ı̀n kóng, “Chı̍t kó͘ sı̄ 3000 kho͘, múi chı̍t ê chit-oân chı̀-chió ài ka-jı̍p chı̍t kó͘ í-siōng, chóng-sı̄ múi nı̂ oē thang tit hông-lı̄.” Kah sı̄ 3000 kho͘ bô būn-toê, kūn-lâi thiaⁿ lâng kóng, nā beh tit-tio̍h chı̍t ê chit-ūi, lóng tio̍h ēng 5000 kho͘ í-siōng, sǹg khí-lâi iáu chin séng, chiū kā i kóng, “Chú-jı̄m, m̄-kú goá kin-á-jı̍t bô toà chı̂ⁿ lâi?”“Bô iàu-kín, hān lí nn̄g jı̍t lāi the̍h-lâi ka-jı̍p, tùi lí ka-jı̍p hit jı̍t khí, chiū chèng-sek sı̄ goán kong-si ê chit-oân, só͘-í ná kín ná hó.” “Án-ni hó, chhiáⁿ iông-ún goá tńg-lâi chún-pı̄, kiám-chhái tı̄ bı̂n-á-jı̍t goá chiū the̍h-lâi.”“Hó! Taⁿ chhiáⁿ lí thiam chia ê su-lūi, chı̍t thong sı̄ 店保, tio̍h ài pún-chhı̄ nn̄g keng siong-tiàm ê pó-chèng, koh chı̍t thong sı̄ khè-iok-su, ı̀-sù sı̄ lí nā ka-jı̍p kong-si í-āu, tio̍h chun-siú chia ê kui-chek, ū sím-mı̍h sū lóng bô ı̄ⁿ-gı̄, khàm-ı̀n choè chèng, chiong chiah ê su-lūi kap kó͘-kim choè-hoé the̍h-lâi.” “To-siā, toā-toā pài-thok.” Tùi kong-si chhut-lâi. ná kiâⁿ ná siūⁿ,nn̄g ê tiàm-pó bô būn-toê, goá tha̍k ko-tiong ê sı̂, ū kúi-nā ê tông-o̍h sı̄ chhı̄-lāi lâng, lâi-khı̀ kā in pài-thok it-tēng ū, nā-sı̄ 3000 kho͘ beh án-choáⁿ? Tńg-lâi kā sı̄-toā-lâng the̍h, m̄-kú in bô hoaⁿ-hí goá chhut-lâi, ún-tàng m̄ hō͘ goá. Ah! tio̍h ! sūn-soà kā Tâi-lâm ê pêng-iú chioh, chı̍t ūi chioh 1000 kho͘, goá nā chiū-chit liáu, múi ge̍h-jı̍t ū 2000 kho͘ ê siu-jı̍p, oē thang khiām 1000 kho͘ khí-lâi, án-ni lâi hêng in, 3 ge̍h-jı̍t chiū oē hêng liáu. III. Chiū-chit. Tit-tio̍h pêng-iú ê pang-bâng, tiàm-pó kap 3000 kho͘ lóng chún-pı̄ hó. Tē 2 jı̍t chheng-chá, goá chin kín-kip beh kiâⁿ lâi kong-si teng-kı̀ chiū-chit, in-ūi kiaⁿ-liáu hō͘ lâng khah tāi-seng cheng-chhú khı̀ chiū bô hāu. Teh kiâⁿ ê sı̂, goá hut-jiân tùi sim-lāi ū chı̍t ê tē 6 kám giâ khí-lâi, Êⁿ! che kiám-chhái sı̄ Lı̂m Bo̍k-su só͘ kóng ê phiàn-kio̍k ô͘? Ū giâu-gı̂ ê só͘-chāi ô͘? Teh pān-kong hiah ê lâng khoàⁿ khí-lâi bô sêng kong-bū-oân ê khoán? Tàu-tí in kong-si ê kang-chhiúⁿ tı̄ tah-lo̍h? ...............Hài, lí m̄ teh sı̂n-keng, lí bô khoàⁿ chèng-chèng tong-tong tı̄ nāu-jia̍t tiong-sim khàn-pán (招牌) koà hiah toā-tè, pān-kong-thiaⁿ hiah toā keng, koh ū tiān-oē, jı̂-chhiáⁿ tio̍h ēng tiàm-pó, ná-lí sı̄ teh phiàn lâng? Goá nn̄g ê sim teh kau-chiàn, chóng-sı̄ put-ti put-kak kàu ūi lah. Goá khiā tı̄ goā-bı̄n siūⁿ beh koh siông-sè khó-lū chı̍t pái, nā-sı̄ chı̍t ē khoàⁿ tùi lāi-bı̄n jı̍p-khı̀, ū chiâⁿ 10 ê lâng ûi tı̄ hia teh pān chhiú-sio̍k lah. Goá bô khó-lū chiū chông jı̍p-khı̀, kai-chài chia ê lâng lóng bān goá chı̍t pō͘, teh pān thâu-pái ê chhiú-sio̍k nā-tiāⁿ. Tng goá chiong su-lūi kap 3000 kho͘ kau hó-sè, chú-jı̄m chhiò-chhiò tùi goá kóng, “Tùi taⁿ khí, lí sı̄ pún kong-si ê chit-oân, bı̂n-á-jı̍t lí khai-sí lâi siōng-pan.” “Chú-jı̄m, goá tio̍h ài tńg-khı̀ chhù-nih chún-pı̄ chı̍t-ē, m̄-chai oē thang hō͘ goá 3 jı̍t āu chiah chèng-sek lâi siōng-pan hó bô?” “Khó-í.” Chú-jı̄m tı̀m-thâu. Goá phāu-tio̍h moá-hoâi ê kám-siā kap hoaⁿ-hí tńg-lâi chhù-nih, kı̀-jiân ū thâu-lō͘, chiū thán-pe̍h tùi pē-bú kóng, iā khı̀ kı̀ⁿ Lı̂m Bo̍k-su kóng, sui-jiân in lóng bô koh chó͘-tòng goá, chóng-sı̄ iā bô kā goá piáu-sı̄ kiong-hí. Tē 2 jı̍t àm-sı̂, Lı̂m Bo̍k-su tiàu-chı̍p chèng hoē-iú kā goá khui sàng-pia̍t-hoē. Bo̍k-su tāi-seng o-ló goá kè-khı̀ tı̄ kàu-hoē ê jia̍t-sim choè kang, jiân-āu bián-lē goá tı̄ chhı̄-lāi tio̍h kín-sı̄n goá ê hêng-ûi, i kóng: Tı̄ siâⁿ-chhı̄ hoān-choē ê sū pí chng-kha m̄-chai ke kúi pah pē, tı̄ hia ū pí chia tiàm chin choē ê pháiⁿ lâng. Hiah ê choē-toā ok-ke̍k, tı̄ chheng-thian pe̍k-jı̍t hā chhiúⁿ-kiap, kiông-kan, sat-jı̂n lóng tùi hia chhut. Hia ū thun-bia̍t sòng-hiong, khi-chà tiong-hō͘ ê chı̍p-thoân, kok chióng chhia-hoâ iú-he̍k, hi-êng, tó͘-phok, khi-phiàn, ı̂m-loān chiū-sı̄ i ê tāi miâ-sû. Hia sı̄ chı̍p sè-kan choē-ok ê chóng-hoē, koân-sè kap kiông-pō ê tiong-sim. Só͘-í satyricus tùi siâⁿ-chhı̄ ai-tō kóng, Goán beh tit-tio̍h sím-mı̍h ah? Goán só͘ oē thang tit-tio̍h ê, put-kò sı̄ ke̍k toā ê kiàn-siàu nā-tiāⁿ. Bo̍k-koài Í-sài-a iā thó͘-khùi kóng, “Hāi ah, tiong-sı̀n ê siâⁿ pı̀ⁿ-choè chhiong-ki; chiông-chêng chhiong-moá kong-pêng, kong-gı̄ tiàm tı̄ hit lāi-bı̄n; hiān-kim sı̄ hiong-siú khiā-khí, Lí ê gûn pı̀ⁿ-choè che-tái; lí ê chiú thàu-chúi. Lí ê koaⁿ-tiúⁿ hoān-hoat, kap chha̍t tàu-phoāⁿ; ta̍k ê ài siū pò͘-lō͘, siàu-siūⁿ siā-lé; in bô ūi-tio̍h bô pē ê kiáⁿ sin-oan, chiú-koáⁿ lâng ê àn-kiāⁿ boē tit-tio̍h kàu i ê bı̄n-chêng (Í-sài-a 1: 21---23). Bo̍k-su kóng soah, chin choē hoē-iú khí-lâi thoè goá kı̂-tó. Hoē soah, tāi-ke saⁿ ak-chhiú, tùi goá kóng chiok-hok ê oē, choân kàu-hoē sàng goá chı̍t pún kim-kı̂ⁿ ê Sèng-keng. Tē 3 jı̍t, goá koāⁿ chı̍t toā phê-siuⁿ ê hêng-lí lâi Tâi-lâm pêng-iú ê chhù, goá ê pêng-iú kap goá chhut-khı̀ sè chhù, m̄-kú hiông pōng-pōng chhē lóng bô, ko͘-put-chiong pêng-iú chhiáⁿ goá chiām-sı̂ tiàm in hia. IV. Goân-lâi jû-chhú. Siōng-pan hit chá-khí, goá chhēng tio̍h hán-tit chhēng ê chı̍t su se-chong, thâu-mn̂g, bı̄n, phê-oê lóng chéng-lí chin phiat-sè, oán-jiân m̄-sı̄ í-chêng ê Bûn-seng; tong-jiân kin-á-jı̍t ê Bûn-seng sı̄ Tâi-lâm chhı̄ Chèng-tāi kong-si ê chit-oân. Tı̄ hit keng chin toā keng ê gia̍p-bū-chhù ū goá ê chı̍t ūi kau-í tı̄ hia, ná-lí bô hoaⁿ-hí ê lí-iû. Goá 8 tiám chiū kàu kong-si, khoàⁿ tio̍h iáu ū lâng teh pān chhiú-sio̍k, goá chı̍t bı̄n hoaⁿ-hí, in-ūi goá tāi seng lâi, só͘-í chiah ū ǹg-bāng, koh chı̍t bı̄n chin kám-khài kin-á-jı̍t sit-gia̍p ê lâng chiah nih choē, sı̍t-chāi ta̍t-tit tông-chêng. Goá kiâⁿ chı̀n-chêng lâi tùi chú-jı̄m kap tông-sū kóng gâu-chá, kı̂-koài, in ná chhin-chhiūⁿ m̄-bat goá ê khoán, kim-kim kā goá siòng, tāi-khài sı̄ goá ê chng-thāⁿ hō͘ in it-sı̂ jı̄n boē chhut-lâi, bô joā-kú, chú-jı̄m kap nn̄g ê chit-oân kiò goá jı̍p-khı̀ lāi-bı̄n kā goá kóng-oē. “Hoan-gêng lí choè pún kong-si ê chit-oân, lí ê pān-kong-toh sı̄ pâi tı̄ choè goā-bı̄n hit tè, chóng-sı̄ chiàu goán ê kui-chek beh choè sū-bū-oân tio̍h ài tāi-seng sı̍t-sı̍p choè goā-bū-oân liáu-āu chiah oē ēng-tit.” Goá iáu-bē bêng-pe̍k che sı̄ sím-mı̍h ı̀-sù ê sı̂, ū chı̍t ê siⁿ-choè bô chin súi ê sió-chiá tùi lâu-téng lo̍h-lâi, chhiú koāⁿ chı̍t toā tē ê mı̍h-kiāⁿ kap chı̍t tui ê gín-ná oán-kū, hı̂, hê, lā-pa téng. Chú-jı̄m tùi tē-á tháu khui hō͘ goá khoàⁿ, kā goá kóng: “Che sı̄ pún kong-si chhut-phín ê Tāi-kong soé-i-hún, 3 pau kap chı̍t chih oán-kū sı̄ boē 10 kho͘. Chit 10 kho͘-gûn lí tit-tio̍h nn̄g kho͘ ê lı̄-sûn, só͘-í lí chı̍t jı̍t nā boē ū 500 kho͘, chiū oē thang thàn 100 kho͘ lah, chı̍t ge̍h-jı̍t chiū ū 3000 kho͘ ê siu-jı̍p, lí nā sêng-chek hó, nn̄g kò-ge̍h āu chiū oē thang seng khí-lâi choè sū-bū-oân. Ūi-tio̍h beh hō͘ lí o̍h chhui-siau ê ki-su̍t, thâu chı̍t lé-pài goán phài chit ūi Chhoà Sió-chiá kap lí chhut-khı̀ ........” Goá í-keng thiaⁿ boē lo̍h-khı̀, goá ê thâu-khak gông khí-lâi, kha lóng khiā boē tiâu, khoàⁿ chhù-téng ná chhin-chhiūⁿ lia̍h tò-tiàu, sim-lāi ê hé tı̍t-tı̍t chhèng khí-lâi, goá siūⁿ beh toā-siaⁿ jióng chhut-lâi, nā-sı̄ bián-kióng khòng-chè soè-siaⁿ tùi in kóng. “Nā-sı̄ án-ni, goá bô hoat-tō͘ thang choè, goá boē-hiáu choè seng-lí, chhiáⁿ lí chiong hiah ê chı̂ⁿ hêng goá.” “Lí teh kóng sím-mı̍h? Chhiáⁿ lí khoàⁿ lí ka-kı̄ tǹg-ı̀n chit tiuⁿ khè-iok-su kóng sím-mı̍h?” I chiong hit tiuⁿ khè-iok-su the̍h lâi ēng chhiú chí hō͘ goá khoàⁿ, tē 10 tiâu án-ni siá. Nā-sı̄ tiong-tô͘ beh lı̄-khui pún kong-si, só͘ ka-jı̍p ê kó͘-kim kap kı̂-thaⁿ ê chı̂ⁿ it-chhè bô hêng. “Phiàn-kio̍k! phiàn-kio̍k!” goá jím boē tiâu hoah chhut-lâi, hut-jiân ū chı̍t ê lâng tùi goá ê heng-á sa leh, soè-siaⁿ kóng. “Lí ê ba̍k-chiu-mn̂g sa khah kim leh,khoàⁿ chia ê sı̄ sím-mı̍h lâng, lí nā m̄-goān choè, tiām-tiām tńg-khı̀, nā beh toā-siaⁿ hoah, chiū bián siūⁿ beh ū sı̀ⁿ-miā lı̄-khui chia.” Goá tùi hiah ê lâng chı̍t-ê chı̍t-ê kā in siòng, kó-jiân ta̍k sian lóng chin toā sian,koh ke chin choē ê, chia ê it-tēng sı̄ phah-chhiú, boē thó-tit, goá ê siū-khı̀ kap hùn-khài oāⁿ choè pı̄-pı̄-chhoah, thâu-khak kā in tı̀m-thâu, i chiah kā goá pàng-khı̀. É-káu teh-sí kiáⁿ bô oē kóng, phı̄ⁿ-á bong-bong leh, tiām-tiām chhut-lâi. Goá khoàⁿ-tio̍h hiah choē lâng tı̄ hia teh tán-hāu beh pān chhiú-sio̍k, boē bián-tit thó͘ chı̍t ê khùi thoè in khó-lı̂n siong-sim, goá siong-sı̀n in m̄-bián nn̄g jı̍t iā siāng khoán chia̍h tio̍h kiⁿ. Goá hui-siông m̄-goān tńg-lâi pêng-iú ê chhù, chiong chia ê tāi-chı̀ kóng hō͘ in thiaⁿ, in lóng thoè goá hùn-khài kóng, it-tēng tio̍h thó hit 3000 kho͘ tńg-lâi chiah oē ēng-tit. Hit ē-po͘ goá ê pêng-iú khı̀ chio i ê pêng-iú, lóng-chóng ū chiâⁿ cha̍p ê lâi kàu chit ê mō͘-pâi kong-si, iáu-bē jı̍p-khı̀ chiū thiaⁿ-tio̍h tǹg-í tǹg-toh ê siaⁿ, goân-lâi í-keng ū chı̍t kûn ê lâng lâi teh khí hoe lah. Goán khiā tı̄ goā-bı̄n thiaⁿ in teh jióng ê siaⁿ, “Lín sı̄ beh hêng á m̄ hêng? Nā m̄ hêng beh kiò kéng-chhat lâi, á-sı̄ tùi Hoat-ı̄ⁿ kò lín chà-khi.” “Goán m̄-kiaⁿ, goán kı̀-jiân káⁿ chèng-sek êng-gia̍p, chū-jiân ū pān-hoat, goán m̄-sı̄ bô chit-gia̍p beh hō͘ lín, sı̄ lín m̄ chiap-siū ê, beh án-choáⁿ kò?” “Sı̄ m̄-sı̄ tio̍h ēng bú-le̍k chiah beh hêng sı̄ bô?” “M̄-sı̄, chóng-sı̄ lín ê kûn-thâu-bú nā ū khah toā lia̍p, lâi chhı̀ khoàⁿ-māi iā sı̄ hó.” Thiⁿ ah! Ū-iáⁿ bô-hoat i ta-oâ, cha̍p goā ê toā lô͘-moâ lóng lám-heng khiā tı̄ sı̀-piⁿ teh tán, goán tāi-ke khoàⁿ-phoà beh liu-soan ê sı̂, keh-piah siong-tiàm ê láu-pán khiā tı̄ mn̂g-kháu kā goán kóng: “Lín tio̍h khoàⁿ-phoà lah, saⁿ chheng goā kho͘ bé chı̍t ê kà-sı̄, che sı̄ chı̍t ê o͘-sek ê chı̍p-thoân, tàu-chhù khan sin-bûn pián lâng, lín bô hoat-tō͘ in lah.” “Chóng bô tı̄-an ki-koan, hoat-lu̍t iā bô hoat-tō͘ thang chè-chhâi in?” Goá mn̄g. “Ū! m̄-kú 道高一尺, 魔高一丈, chı̍t lé-pài chêng in soè chhù tı̄ chia, nā kàu hō͘ lâng hoat-kak liáu-āu, in chiū sûi-sı̂ poaⁿ-khı̀ pa̍t-ūi, ēng pa̍t ê miâ-chheng kè-sio̍k khan sin-bûn khi-phiàn lâng, só͘-í put-sı̂ kap kéng-chhat teh lia̍h-ku cháu-pih, kun-pún bô hoat-tō͘ tı̄ in.” Goá bêng-pe̍k lah, goá chin-chiàⁿ siū phiàn, goá ná siūⁿ ba̍k-sái ná lâu chhut-lâi, sui-jiân pêng-iú lóng an-ùi goá, pèng goān-ı̀ chiong in chioh goá ê chı̂ⁿ, hō͘ goá khiàm kàu ū chiah hêng, nā-sı̄ goá ná ū bı̄n koh tńg-khı̀ kı̀ⁿ pē-bú kap kàu-hoē chèng hoē-iú? Goá sı̂-pia̍t pêng-iú, chhiú koāⁿ tāng-tāng ê hêng-lí, kha kiâⁿ ià-siān ê kha-pō͘, thâu-khak àⁿ-àⁿ ǹg hiong-chhoan ê kò͘-hiong tńg-lâi, goá ná chhin-chhiūⁿ chı̍t ê hoān toā choē ê kaⁿ-hoān chhut-kaⁿ, iā chhin-chhiūⁿ hòng-tōng-chú toà tio̍h iu-ut, thòng-khó͘, kiàn-siàu ê sim chı̍t iūⁿ. Goá chhim-chhim kám-kak Lı̂m Bo̍k-su ê oē sı̄ tio̍h ê; tùi taⁿ khí, goá koat-chı̀ beh chiàu i ê oē lâi kiâⁿ. (Tâi-oân Kàu-hoē Kong-pò tē 980-981 hō,1966 nı̂ 4-5 ge̍h)