Sū chin lân-tit ké

Chiâⁿ cha̍p nı̂ chêng tı̄ Kńg-tang séng bó͘-mı̍h koān ū nn̄g-ê hiaⁿ-tı̄ á, chı̍t lâng chhoā chı̍t-ê bó͘, tāi-ke chò-hoé siāng chı̍t chhù-lāi khiā. Tı̄ bó͘-goe̍h nn̄g-ê hiaⁿ-só sió-chím kok seⁿ chı̍t-ê kiáⁿ chêng-āu chha-put-to lı̄ nn̄g-saⁿ jı̍t nā-tiāⁿ, āu-lâi ū chı̍t-jı̍t hit-ê sió-chím pa̍t-tè khı̀, i-ê eⁿ-á chhiáⁿ-hē tı̄ chhù-lāi. In hiaⁿ-só ê eⁿ-á, m̄-chai án-choáⁿ-iūⁿ hut-jiân-kan khiok sí--khı̀. In lāu-bó ê sim-koaⁿ soà pı̀ⁿ m̄-hó chiah siūⁿ-chhut chı̍t-ê kè-tı̀, chiong hit-ê sí gín-ná phō tı̄ in sió-chím pâng--nı̍h, kā i oāⁿ hit-ê oa̍h ê gín-ná, chún-chò i-ê kiáⁿ iû-goân ia̍h oa̍h-oa̍h tı̄-teh; kı̍p-kàu in sió-chím tò-khı̀, chı̍t-ē jı̍p pâng khoàⁿ i-ê kiáⁿ sí-khı̀, soà bong bô liáu-á-mn̂g, m̄-kú siông-sè kā i khoàⁿ, jı̄n-tit sı̄ in hiaⁿ-só ê; chiū liâm-piⁿ khı̀ mn̄g in hiaⁿ-só, khoàⁿ i án-choáⁿ-iūⁿ chiong i-ê sí gín-ná phō tı̄ in pâng-nı̍h, i pún-sin ê kiáⁿ nı̄ bô-khı̀. In hiaⁿ-só chiū tùi i kóng, Goá ê kiáⁿ oa̍h-oa̍h tı̄-chia, chit-ê chiàⁿ-sı̄ goá ê, goá m̄ chai lí ê kiáⁿ án-choáⁿ-iūⁿ sí. In sió-chím toā siū-khı̀, chek-sı̂ chiū-khı̀ gê-mn̂g kek-kó͘ hiàm-oan. Hit-sı̂ koaⁿ-oân liâm-piⁿ chē-tn̂g mn̄g-khoàⁿ i hiàm-oan sím-mı̍h tāi-chı̀. Hit-ê hū-jı̂n-lâng pá oāⁿ gín-ná ê chêng-hêng kóng hō͘ i thiaⁿ. Hit-ê koaⁿ-hú sûi-sı̂ chhe gê-ia̍h tiàu in hiaⁿ-só lâi sím-mn̄g. In hiaⁿ-só kóng, chit-ê oa̍h ê gín-ná bêng-bêng sı̄ i ka-tı̄ ê, nā-sı̄ in sió-chím iā sı̄ kóng án-ne. Nn̄g-ê chèⁿ-lâi chèⁿ-khı̀ oh-tit thang piān chin-ké. Hit-ê koaⁿ-hú sim seng chı̍t-kè; chiū kā in nn̄g ê kóng, Lín nn̄g lâng án-ne teh saⁿ-chèⁿ, m̄ ta̍t-tio̍h chiong hit-ê gín-ná phō lâi hō͘ goá. In nn̄g-lâng ko͘-put-chiong tio̍h thiaⁿ i-ê oē, thêng tiap-á-kú koaⁿ-hú koh kā in kóng, Goá beh chiong chit-ê gín-ná bı̂n-á-jı̍t phō khı̀ hiat-lo̍h hái, hō͘ lín nn̄g-ê bián-tit saⁿ-chèⁿ. Mn̄g-liáu liâm-piⁿ thè-tn̂g.

Bı̂n-á-jı̍t koaⁿ-hú pún-sin chē sı̀-kiō, chiong gín-ná phō tı̄ chhiú-nı̍h, am-kàu ba̍t-chiuh-chiuh, kiaⁿ-liáu siong tio̍h hong. Chı̍t-ē chhut-mn̂g, toā lô khı̀ⁿ-khoàiⁿ-kiò, chip-sū chı̍t toā tui, hêng-khū lóng chiâu-pı̄, i-ê ui-hêng put-chí thang kiaⁿ, chèng peh-sèⁿ thiaⁿ-kı̀ⁿ chit-hō siau-sit chı̍t-chhùi thoân chı̍t-chı̍h, chiū i chio lí, lí chio goá, tāi-ke hoaⁿ-hí khı̀-khoàⁿ. Koaⁿ-hú chı̍t-ē kàu hái-kı̂ⁿ, liâm-piⁿ lo̍h-kiō, chiong i chhiú-lāi hit-ê gín-ná chı̄n-la̍t hiòng chúi-bı̄n tàn-khı̀. Nā-sı̄ chı̍t-ê hū-jı̂n-lâng jím bē tit tiâu iā soà tiô-lo̍h-khı̀, koáⁿ-kín khı̀ lám hit-ê gín-ná phō-teh pi-ai; khoàⁿ-kàu siông-sè khiok sı̄ chı̍t boé hı̂, ēng gín-ná ê i-chiûⁿ khı̀ pau--teh. Hit-ê koaⁿ-hú khoàⁿ kı̀ⁿ chiah chai hit-ê hū-jı̂n-lâng sı̄ i-ê lāu-bó, liâm-piⁿ chhe lâng khan i khí--lâi, chiah tùi i kóng, Chit-ê oa̍h ê gín-ná chiàⁿ-sı̄ lí chū-kí-ê, m̄-sı̄ lín hiaⁿ-só ê, goá taⁿ bô gı̂; chiū chhoā i kàu gê-mn̂g phō hit-ê eⁿ-á tò-khı̀. Chèng peh-sèⁿ khoàⁿ-kı̀ⁿ án-ni bô chı̍t-ê m̄ o-ló i bêng, kóng i gâu siūⁿ piàn-pō͘, só͘-í khoài ē tit thang kiat-àn. Sio̍k-gú kóng,“Sū chin lân-tit ké,”chiū-sı̄ chhin-chhiūⁿ án-ni.

(Tâi-lâm Hú-siâⁿ Kàu-hoē-pò tē 154 koàn, 1898 nı̂ 1 ge̍h)