Saⁿ--goe̍h ê Má-chó͘-pô

Hit ê ta-sò tán bô mûi-hō͘ ê 3--goe̍h, jı̍t-chí mā-sı̄ ài koè. Chı̍t-nı̂ chı̍t-pái ê Má-chó͘-seⁿ, tı̄ tiong-pō͘ hái-soàⁿ ê chng-á-thâu khai-sí leh lāu-jia̍t, pài-pài sı̄ chng-á-lāi sı̄-toā-lâng ê kái-io̍h, phoà-pēⁿ bē hó--ê, ti-á chhı̄ bē toā--ê, chhoā bô bó͘--ê, khı̀ biō--nih chhoē sı̂n-bêng poa̍h-poe, àm-sı̂ tō ē hó-khùn. A-má m̄-bat jı̄ mā m̄-bat teh khoàⁿ sin-bûn, siáng chò chóng-thóng, siáng teh oai-ko, tı̄ a-má sim-lāi, éng-oán pí bē koè siáng in chhù koh ū hó kè iáu-boē kè ê ko͘-niû-á, toh-ūi ū thang bé-tio̍h âng-phiau bí-chiú khah iàu-kín. Kū-le̍k 19, sı̄ chng-á-lāi ngiâ Má-chó͘ ê jı̍t. Tán chı̍t-tang--a, tán kah kha-chhiú phı̄-phı̄-chhoah ê a-pô a-má, chá tō thâi ke thâi ah, nn̄g-chiah-kha--ê, sı̀-ki-thúi--ê chá tō lóng khû tı̄ biō-kháu kā ông-lâi teh tán--a. Mā m̄-chai ùi tang-sı̂ khai-sí, lán pài-pài hiah-ê iōng lâi hē-goān ê lé-sò͘, nah ē sı̄ pa̍t-chióng tōng-bu̍t tn̄g-kha tn̄g-chhiú chò seng-lé? Hèng-chhù pài-pài kap koah-hiuⁿ lâi an-sim koè-jı̍t ê a-má, ta̍k-nı̂ nā a-kong chò-kı̄ mài sǹg, thâi ke thâi ah thâi kah siōng hoaⁿ-hí--ê tō-sı̄ chit-pái. Í-keng thàu-tiong-tàu--a, jı̍t-thâu chin iām. Thàu-chá tō khí-lâi thâi ke bán-mn̂g ê a-má, chit-chūn, khoàⁿ-tio̍h bı̄n thâu-chêng kui-toh ê chheⁿ-chhau, chiah thó͘ chı̍t-kháu-khùi, būn-būn-á chhiò kóng: “M̄-chai Má-chó͘-pô ū kah-ı̀--bô?” Goá chai a-má ta̍k-nı̂ chiah-nı̄ kang-hu leh pài-pài, mā-sı̄ in-ūi i sim-lāi chò lāu-bó ê chı̍t-ê chek-jı̄m, goá siōng sè-hàn ê a-chek, chia̍h kàu 40 thòng hoè iáu-boē chhoā-bó͘, tō in-ūi a-chek bô siūⁿ beh chhoā, ta̍k-nı̂ pài-pài to m̄-chai koh ū joā chē soe-siâu ê ke ài hông thâi. A-má mā bô i ê hoat, kan-taⁿ chı̍t-sian pài koè chı̍t-sian. “Goá bē-kı̀-tit oāⁿ lan-san--ê!” A-má hoah chı̍t-siaⁿ, ùi lak-tē-á jı̂m nn̄g-tiuⁿ âng-sek ê choá-phiò, kiò goá khı̀ biō-kháu oāⁿ-chı̂ⁿ. A-má kiò goá oāⁿ ê gı̂n-á-kak, sı̄ beh hō͘ hiah-ê kiâⁿ tı̄ Má-chó͘-pô chhut-sûn tūi-ngó͘ thâu-chêng, teh lāng sai-thâu hoah-hiu ê khit-chia̍h-kong kap khit-chia̍h-pô--ê, a-má kā goán kóng, hiah-ê lâng tō-sı̄ bô hó-hó-á tha̍k-chheh, chiah ē toè tı̄ Má-chó͘-pô sin-khu-piⁿ teh thó-seng-oa̍h, a-má it-tı̍t lóng m̄-chai, chit ê thâu-lō͘, sı̄ goá kap sè-hàn ti-ti siōng siūⁿ beh chia̍h ê thâu-lō͘. Goá kap ti-ti mā kóng hó--a, goá lāng sai-thâu i toè sai-boé. Goá chhiú phâng a-má kiò goá khı̀ oāⁿ ê gı̂n-á-khak, ná kiâⁿ í-keng ná thiaⁿ-tio̍h lâng teh pàng phàu-á ê siaⁿ. Tú oat-koè hāng-á-kháu, tō khoàⁿ-tio̍h a-má ná kiâⁿ ná cháu, chhùi--nih koh ná hoah kóng: “Goá koh khı̀ bé chı̍t-koá kim-choá sûi tńg--lâi, lí seng tńg--khı̀ m̄-thang ná cháu ná sńg, pài-pài ê sı̂ bē-tàng sńg-chhiò……” A-má cháu khı̀ biō-kháu ê kám-á-tiàm, hit ê tı̀ le̍h-á phāiⁿ ti-kha-kho͘ teh kā Má-chó͘-pô kūi--lo̍h ê pò-bé-á, í-keng kiâⁿ koè mn̂g-kha-kháu, a-má koh iáu m̄ tńg--lâi, tō beh bē-hù--a, hiuⁿ gia̍h--khí-lâi, goá o̍h a-má leh pài án-ne, ná pài chhùi--nih ná liām, chhiah-ia̍h-ia̍h ê jı̍t-thâu mā lâi tàu-lāu-jia̍t. Hiông-hiông ū chı̍t-ê lâng chông jı̍p-lâi chhù--nih: “Gín-á! Lín a-má hūn-tó tı̄ biō-kháu, lín chhù-lāi ū toā-lâng--bô?” Thàu-tiong-tàu, biō-kháu ê táⁿ-má-ka chiok sio--ê, biō-kháu khiā chı̍t-tı̄n lâng, ū--ê teh kā a-má chhit-koāⁿ, ū--ê teh ia̍t-hong, kui-bı̄n ê lāu-lâng-pan kap tâm-tâm ê ba̍k-kho͘, jı̍t-thâu iáu tı̄ thiⁿ-téng tiām-tiām-á iām. 『過度亢奮, 腦血管栓塞導致下半身血管嚴重阻塞, 必須予以截肢, 否則血液無法流通, 動作要盡快, 以免危及病人的生命安全, 家屬請簽讀此份切結書, 手術即刻進行.』 A-má chhut-ı̄ⁿ poàⁿ-nı̂ āu, a-chek tō kiat-hun, sin-niû sı̄ chiàu-kò͘ a-má ê hō͘-sū che-che. Hit-kang, chē tı̄ lûn-í téng-thâu ê a-má, í-keng oai--khı̀ ê chhùi, chhiò kah chin kam-goān, chhùi-noā ná lâu ba̍k-sái ná tih, he sı̄ chı̍t-ê ma-ma ê chhiò-iông. A-má chē tı̄ lûn-í téng-thâu, khiau-ku ê hêng-iáⁿ, kap hit-kang pài Má-chó͘ ê seng-lé, khoàⁿ--khí-lâi nah ē hiah kāng-khoán? (TGB Thong-sı̀n tē 28 kı̂, 2002 nı̂ 1 goe̍h)