Saⁿ-kāng Taⁿ-tàⁿ

Ùi Wiki Tô·-su-kóan
Bat ū chı̍t ê ku-lí hō͘ lâng chhiàⁿ i khı̀ hoé-chhia-thâu, beh kā chı̍t ê goā-kok lâng taⁿ hêng-lí. Tú-hó hit ê lâng-kheh ê hêng-lí sı̄ kan-ta chı̍t kha tāng-tāng ê siuⁿ-á nā-tiāⁿ. Ku-lí m̄ ài ēng giâ, ia̍h boē taⁿ-tit, i chiū khı̀ khioh chı̍t-tè chio̍h lâi thı̄n-thâu thang taⁿ. I án-ni chò, chai sui-bóng ū têng-poē ê tāng, kú sı̄-khah khoàⁿ-oa̍h. 
Taⁿ lán tı̄ chit-sè-kan lóng ū tāng-tàⁿ tio̍h taⁿ, ia̍h ū-sı̂ teh siūⁿ nā taⁿ lán ka-tı̄ ê tàⁿ chiū kàu-gia̍h; chóng-sı̄ Sèng-keng kóng, “ Lín ta̍k lâng ê tāng-taⁿ tio̍h saⁿ-kāng taⁿ.” Ì-sù chiū-sı̄ tio̍h chiong pa̍t lâng ê tàⁿ kap lán-ê saⁿ thı̄n. 
Ū chı̍t-pái tı̄ chin koâⁿ ê só͘-chāi ū nn̄g-ê lâng choè-hoé teh kiâⁿ-lō͘, in-ūi hit-tiâu lō͘ ū lo̍h-seh chin choē, tı̀-kàu in koâⁿ-kàu beh-sí, teh siūⁿ m̄-chai kiâⁿ oē kàu in só͘-ài khı̀ ê siâⁿ iah bē, hut-jiân-kan khoàⁿ-kı̀ⁿ chı̍t-ê lâng tó tı̄ lō͘-piⁿ, phoà-pı̄ⁿ siong-tiōng, iā kiò in tio̍h hó-sim kiù i, kā i āiⁿ-kàu ún-tòng ê só͘-chāi.
In chı̍t-ê m̄-thiaⁿ, kóng: “Goá chū-kí to chiah-nı̍h kan-khó͘ kiâⁿ, thái oē koh āiⁿ pa̍t-lâng leh?” chóng-sı̄ koh chı̍t-ê bô án-ni siūⁿ ka-kı̄ ê khùn-khó͘ chiū khó-lı̂n i, hû i khí-lâi, kā i āiⁿ teh, chiū koh khí-sin, sui-jiân teh kiâⁿ sı̄ chin bān, m̄-kú khah bē kan-khó͘, in-ūi hit-lâng ê sin-khu àⁿ tı̄ i ê kha-chiap-nı̍h soà hō͘ i m̄-chai koâⁿ.
Teh beh kàu siâⁿ ê sı̂, hut-jiân ū khoàⁿ-tio̍h lâng ê sin-si tı̄ lō͘-piⁿ, kı̄n oá-khı̀ khoàⁿ chiah jı̄n-tit sı̄ tú-á i hit-ê phoāⁿ m̄-ài tàu āiⁿ chit-ê kan-khó͘-lâng ê, khı̀ hō͘ koâⁿ-sí tó tı̄-hia, kai-chài chit-ê hó-sim thé-thiap lâng ê ū tit-kiù, an-jiân kàu-ūi, in-ūi i hoaⁿ-hí kā pa̍t-lâng tàu-saⁿ-kāng. Kò͘ ka-kı̄ ê lâng i só͘ kiâⁿ ê lō͘ khah siông sı̄ tē-it lân-tit, iū-koh i só͘ taⁿ ê tàⁿ iā-sı̄ tē-it tāng; in-ūi i bô ēng pa̍t lâng ê tàⁿ lâi thı̄n-thâu. Ài lán ka-kı̄-ê khah khoài taⁿ, tio̍h ke taⁿ pa̍t lâng-ê.
Kiám-chhái Siōng-tè siúⁿ-sù lán nn̄g ki chhiú ia̍h ū chit hō ê ı̀-sù tı̄-teh; chı̍t ki hō͘ lán koāⁿ ka-tı̄ ê mı̍h, chı̍t ki thang chān pa̍t lâng. Iū-koh lán siang-thâu ê pín-taⁿ tek-khak iā sı̄ án-ni-siⁿ; chı̍t thâu lí ê tàⁿ, hit thâu pa̍t lâng-ê, “ Lín ta̍k lâng bo̍h-tit kò͘ ka-tı̄ ê sū, iā tio̍h kò͘ pa̍t lâng ê sū .”
(Tâi-lâm-kàu-hoē-pò tē 430 koàn, 1921 nı̂ 1 goe̍h)