Khí pit ài kā tāi-ke kiong-hí. Lán ê Kong-pò chiàu-khoàⁿ tı̄ Tong-lâm A ê kàu-hoē ki-koan pò-choá ê tiong-kan sı̄ tē-it chá--ê. Kám-siā Chú, hō͘ lán koh ngiâ-chih Sin ê nı̂. Goān tāi-ke kin-nı̂ ka-poē ài-kò͘, iā kiû Chú sù-hok pún Pò, hō͘ i koh-khah gâu hoat-hui i thoân hok-im kiù lâng ê sù-bēng.
Koan-hē kàu-hoē teh kéng lâng tng chit ê sū, chêng pún-lâng bat tı̄ pún Pò hoat-piáu chı̍t phiⁿ lūn, kóng-khí saⁿ ê goân-chek, chiū-sı̄ kóng: — Ē chò, beh chò, hō͘ i chò. Lán beh kéng lâng lâi tng kàu-hoē ê kong-chit, tio̍h khoàⁿ i, ē chò bē? Beh chò m̄? Nā ē chò, koh khéng beh chò, án-ni chiah thang hō͘ i chò. Sui-jiân ē chò, nā m̄-goān chò, kiat-kio̍k “ah-ke m̄-chiâⁿ pū”. Sui-jiân chin ài chò, nā bē chò, iā sı̄ hāi. Nā ē chò, koh beh chò, lán nā m̄ hō͘ i chò, chiū “oa̍h-bé pa̍k tiàm sí chhiū-thâu,” chin phah-sńg. Só͘-í chit 3 ê goân-chek chiàu goá siūⁿ lóng bē thiah-lı̄ tit.
Taⁿ pún-lâng koh siūⁿ-tio̍h 3 kù oē, ài siá tı̄ chia, kiû tāi-ke ê ngá-chèng.
Lán ê Chóng-hoē Siông-tı̀ Úi-oân-hoē í-keng ū koat-tēng beh siat-tı̀ Chóng-hoē Sū-bū-só͘ tı̄ Tâi-pak chhı̄-lāi. Choè-kı̄n tit-tio̍h Ka-ná-tāi Kàu-sū-hoē ê hó-ı̀, chiong Tiong-san Pak-lō͘ ê Soan-kàu-su siok-sià chı̍t chō lâu beh chioh Chóng-hoē chò lı̂m-sı̂ Sū-bū-só͘, chiū-sı̄ hiān-sı̂ Bêng Bo̍k-su ê siok-sià ê tùi-bı̄n chō.
Ū-tēng kin-nı̂ 2 goe̍h tiong (tāi-iok 12-15) beh khui tē 4 kài Chóng-hoē, ǹg-bāng tông-sı̂ ē thang soà khui ēng tông-hoē tan-ūi cho͘-chit ê Chóng-hoē. Kı̀-jiân chit ê Chóng-hoē sêng-lı̍p.
Chiū chāi-lâi tı̄ Lâm Pak lióng Tāi-hoē ê chèng-tı̄ le̍k-liōng kap hêng-chèng chú-koân lóng kui-sio̍k tı̄ chit ê Chóng-hoē. Ūi-tio̍h beh ūn-êng chiah ê chit-chek, Chóng Úi koat-tēng chı̀-chió tio̍h ū í-hā chit kúi ūi ê choan-jı̄m kàn-sū.
Chiū-sı̄ chı̍t ê Thoân-tō kàn-sū, siat-hoat Thoân-tō-kio̍k ê sū; chı̍t ê Soan-tō kàn-sū, lâi siat-hoat San-tē kap kı̂-û Soan-tō-hoē ê sū; chı̍t ê Chheng-liân kap Kàu-io̍k ê kàn-sū, lâi siat-hoat T. K. C. kap S. S. ê sū; iā chı̍t miâ Châi-bū kàn-sū, lâi siat-hoat it-chhè ê châi-chèng, iā tio̍h chı̍t miâ Lú Soan-tō-hoē ê kàn-sū, siat-hoat Lú Soan-tō-hoē ê kang, koh tio̍h chı̍t ūi Kong-pò choan-jı̄m ê chú-pit. Í-goā iā tio̍h ū chı̍t miâ Chóng-kàn-sū, thang pang-chān gı̄-tiúⁿ ho̍k-bū choân-poâⁿ-tek ê kang-khoè. Í-siōng chiah ê jı̂n-châi sı̄ Chóng-hoē sêng-lı̍p āu só͘ tio̍h khiàm-ēng ê kang-lâng. Tē 3 kài ê Chóng-hoē ū kau-tài Siat-kè Úi-oân-hoē jı̂n-soán thê-miâ lâi hù chhù-kài Chóng-hoē jı̄m-bēng. Siat-kè Úi-oân-hoē ūi-tio̍h ài sı̄n-tiōng kap ài tùi choân-thé ê kàu-hoē tiong lâi tui-kiû jı̂n-châi ê khí-kiàn, í-keng ū hoat phoe hō͘ 8 Tiong-hoē kap iú-koan ki-koan, chhiáⁿ in chhui-chiàn.
Taⁿ kok ūi tho̍k-chiá! “Hō͘ i toā châng ê Siōng-tè” iáu-kú chai-chhiū, ak-chúi ê sı̄ lâng. Khí chhù; khí hó, khí pháiⁿ, ēng chhâ, ēng chháu, ēng kim-gı̂n ê lóng sı̄ lâng. Sū-gia̍p beh sêng, beh pāi, chāi tı̄ “tek kı̂ jı̂n,” á-sı̄ “put tek kı̂ jı̂n”. Lán ê Chóng-hoē chhú-khı̀ ê ūn-êng iā sı̄ án-ni. Só͘-í lán tio̍h kiû Siōng-tè chí-sı̄ lán, chhin-chhiūⁿ chá-nı̂ tı̄ Pek-lı̄-hêng chí-sı̄ Sat-bó͘-nı̂ chı̍t-iūⁿ, chai-iáⁿ thang kéng ha̍p-ēng ê lâng Tāi-pı̍t.
Pún-lâng tı̄ chia kóng 3 kù “Sek-chhâi” chò chham-khó.
1. Thâu chı̍t kù “Sek-chhâi” chiū-sı̄ 識材, ē jı̄n-sek chhâi-liāu. Bûn-ông ē-hiáu khı̀ Úi-súi chhoē Chú-gâ, Lâu Pı̄ Sam-kò͘ chhó-lû chhiáⁿ Chu-kat. Che lóng sı̄ bat jı̂n-châi ê lâng. Ū-sı̂ tı̄ tùi-te̍k ê tiong-kan iā ē thang chhoē-tio̍h hó jı̂n-châi. Chê Hoân-kong tit-tio̍h Koán Tiōng, chiū-sı̄ án-ni. Kok ūi lán Tâi-oân kàu-hoē m̄-sı̄ bô jı̂n-châi, ū-sı̂ sı̄ in-ūi lán m̄-bat, tı̀-kàu “Bêng-chu àm-tâu”. Taⁿ lán beh án-choáⁿ chiah ē bat lâng? Chiū-sı̄ tio̍h lán ê Chú chí-sı̄, chhin-chhiūⁿ Sat-bó͘-ní khí-thâu m̄-bat, hiám-hiám kóng m̄-tio̍h. Kai-chài Chú ê Sı̂n chí-sı̄. Só͘-í lán tio̍h khiam-pi, phah-sí chū-ngó͘, kiû Chú chí-sı̄.
2. Tē-jı̄ kù ê “Sek-chhâi” chiū-sı̄ 適材, ēng tú-hó ê chhâi-liāu. Chhin-chhiūⁿ lán kóng, “Sek-chhâi sek-só͘”. Lâng-lâng ū i ê te̍k-tiông kap sù-bēng. Ha̍h-ēng chiū hó-ēng, m̄-thang loān-ēng. Thı̀-thâu-to khiok ē chhiat-chhài tit, bô chhái. Chhài-to khiok ē chhò-chhâ tit, phah-sńg! Pêⁿ-pêⁿ sı̄ lâng, chóng ū i ê ēng lō͘. Nā ha̍h-ēng, i hó lán iā hó, nā bô ha8-ēng, chiū i tó, lán iā tó.
3. Tē-saⁿ kù “Sek-chhâi” sı̄ 惜材, chiū-sı̄ pó-sioh jı̂n-châi. Khah hó ê jı̂n-châi to-tio̍h pó-sioh. Pún-lâng ha̍k-seng sı̂-tāi, bat thiaⁿ-tio̍h kàu-hoē tiong nn̄g kù oē. Chı̍t kù “táⁿ lûi-tâi,” lâng nā peh chiūⁿ lûi-tâi chiū kā táⁿ lo̍h-lâi. Ì-sù chiū-sı̄ nā tı̄ kàu-hoē tiong ū chı̍t ê khah chhut-tioh--ê, chiū hoē-chê kā ián lo̍h-lâi. Koh chı̍t kù oē, chiū-sı̄ “Ti-tiâu-hia̍t”. Ti-tiâu lāi bô toā-chiah ti, in-ūi chı̍t chiah toā chiah, chı̍t chiah lia̍h khı̀ thâi.
Chiàu khoàⁿ chit nn̄g kù oē sı̄ tng-sı̂ ê kàu-kài ê hong-chhı̀ giân-sû. Kàu-kài ê hong-khı̀ nā kó-jiân pı̀ⁿ kàu án-ni, sı̄ chin put-hēng.
Kok-ūi tho̍k-chiá, lán tio̍h kiû Chú lı̂n-bín lán ê kàu-hoē. Tāi-ke gâu pó-sioh jı̂n-châi. Beh táⁿ-tó chı̍t ê lâng sı̄ khoài-khoài, beh ióng-sêng chı̍t ê jı̂n-châi sı̄ bô iông-ı̄ⁿ. Lán nā bô saⁿ pó-sioh, kiat-kio̍k sı̄ hāi ka-kı̄.
Kám-siā Chú, kı̄n-lâi Chú ū chiong hó ê jı̂n-châi, chiām-chiām teh siúⁿ-sù lán, iā tı̄ Au Bí teh kā lán tàu ióng-sêng thang chò chiong-lâi hó ê jı̂n-châi. Lán nā ē pó-sioh, chiū kàu-hoē chiân-tô͘ ū kng-bêng.
Í-siōng tı̄ chit ê nı̂-thâu, te̍k-pia̍t tı̄ Chóng-hoē iàu-kiû jı̂n-châi ê chit-tia̍p, pâi-lia̍t chit 3 kù, chò kok-ūi ê chham-khó.
(Tâi-oân Kàu-ohē-kong-pò tē 817 kı̂, 1957 nı̂ 1 ge̍h)
