XV
Liông-sim
(1) Liông-sim chiū-sı̄ Tō-tek á-sı̄ kám-kak ê hoat-chek. Liông-sim sı̄ teh puh-íⁿ tı̄ jı̂n-keh ê lāi-bı̄n. Liông-sim khiàm-ēng kà-sı̄, hùn-liān, liān-sı̍p kap sı̍p-koàn. Hoân-kéng oē toā éng-hióng tı̄ liông-sim ê hoat-ta̍t.
Chhin-chhiūⁿ lán ū phoàⁿ-toàn súi-bái ê tı̀-sek, só͘-í oē chai che sı̄ súi á-sı̄ bái, só͘-í lán ū liông-sim thang pang-chān lán hun-piat hó-pháiⁿ ê cheng-chha.
(2) Khó͘-thàng chiū-sı̄ sin-thé ê ki-koan bô tú-hó ê siaⁿ, teh pò lán hit-ê gûi-hiám ê siau-sit. Tú-tú chhin-chhiūⁿ án-ni, Lêng-hûn ê bô pêng-an kap khó͘-thàng chiū-sı̄ choē-koà ê kè-chí. Tú chhin-chhiūⁿ phê-hu ê kám-kak ê khoán, liông-sim sı̄ teh kéng-kài gûi-hiám kap bia̍t-bô, ia̍h chhoā lán kàu tı̄ chín-kiù ê lō͘.
(3) Oá hái-hoāⁿ ê chûn tùi khoàⁿ Teng-tâi, toā-chio̍h á-sı̄ toē-thâu ê khoán-khiok, chiū oē chai chit tia̍p chûn sı̄ tı̄ sím-mı̍h só͘-chāi. Chóng-sı̄ nā-sı̄ tı̄ goā-hái ê sı̂ sı̄ kan-ta oá-khò chhiⁿ kap lô-kiⁿ nā-tiāⁿ. Só͘-í lán ê lêng-hûn beh kàu Siōng-tè ê só͘-chāi, liông-sim kap Sèng Sı̂n sı̄ tē-it iàu-kín, oá-khò chiah-ê, lán oē thang ta̍t lán ê bo̍k-tek.
XVI
Pài Sı̂n-beng 5
(1) Sè-kan lâng tāi-khài ū pài Sı̂n-bêng á-sı̄ pài pa̍t hāng ê mı̍h. Siat-sú ū Iàm-sè-ka, á-sı̄ Kho-ha̍k-chiá, sui-bóng in m̄ pài Siōng-tè; iáu-kú in ū chông-pài toā jı̂n-bu̍t, eng-hiông, á-sı̄ lí-sióng ê mı̍h. Hu̍t-chó͘ bô chiong Siōng-tè lâi kà-sı̄ ha̍k-seng. Tı̀-kàu i ê pō͘-hā ê lâng lóng sı̄ pài i choè sı̂n. Tiong-kok lâng lóng sı̄ pài chó͘-kong, bô siū kà-sı̄ tio̍h pài Siōng-tè. Lán thang khoàⁿ-kı̀ⁿ, bô siū kàu-io̍k ê lâng mā sı̄ teh pài kúi-sı̂n. Kiat-kio̍k lâi kóng, lâng ū ài pài Sı̂n ê sèng tı̄-teh. In-ūi Siōng-tè ū chhòng-chō lâng ài kūi-pài I ê sim-koaⁿ tı̄-teh. Só͘-í lâng chiah ū thang kap Siōng-tè kau-poê, ia̍h thang hoaⁿ-hí ū thang kap Siōng-tè saⁿ kau-poê éng-oán kàu éng-oán.
(2) Káu-koài ê lâng m̄ sı̀n Siōng-tè, siat-sú kóng ū Siōng-tè ê chèng-kù bêng-bêng tı̄ i ê bı̄n-chêng, á-sı̄ Siōng-tè hō͘ i khoàⁿ-kı̀ⁿ, i m̄-sı̄ bô beh sı̀n. Che ū nn̄g-hāng ê in-toaⁿ. Siat-sú Siōng-tè pún-sin hián chhut tı̄ in ê bı̄n-chêng, koh chèng-bêng I sı̄ Siōng-tè, in iā boē-oē liáu-kái. In-ūi lâng ê tı̀-sek kap tiat-ha̍k bô kàu-gia̍h thang liáu-kái Siōng-tè. Koh chı̍t hāng :
Siat-sú Siōng-tè nā-sı̄ hō͘ in ū tı̀-sek oē liáu-kái I sı̄ Siōng-tè ê sı̂, in beh iàm-chiān khoàⁿ-khin kóng, “Chiah-ê sū goán chū-jiân chai, Siōng-tè bô pí goán khah gâu, goán só͘ siūⁿ ia̍h sı̄ kap I saⁿ-tâng. I kiám-chhái pí lâng ū khah iâⁿ tām-po̍h-á mā-sı̄ chha bô goā-choē”.
(3) Lâng sı̄ ú-tiū ê chı̍t pō͘ hūn ia̍h sı̄ I ê kiáⁿ. Só͘-í ū khoàⁿ-kı̀ⁿ á-sı̄ bô khoàⁿ-kı̀ⁿ ê mı̍h, lóng sı̄ siū chhòng-chō, chhin-chhiūⁿ I ê khoán. Kan-ta lâng oē soat-bêng siū chō ê bān-mı̍h. Lâng chiū-sı̄ chū-jiân ê giân-gú. Chū-jiân sui-bóng bô khui-chhùi, iáu-kú teh kóng-oē, Lâng chiong chū-jiân ê oē e̍k choè giân-gú.
(4) Lán lâng sı̄ iú-hān, só͘-í lāi-goā ê kám-kak ia̍h sı̄ ū chè-hān. Só͘-í lâng boē-oē chiâu-chn̂g chai bān-mı̍h. Nā beh chiâu-chn̂g chai, tio̍h khiàm-ēng chiâu-chn̂g ê kám-kak. Só͘-í ēng iú-hān ê kám-kak kan-ta oē chai chı̍t pō͘-hūn nā-tiāⁿ, boē-oē thang chiâu-chn̂g chai. Sui-bóng sı̄ án-ni lán ê sim-koaⁿ ū chı̍t hāng ê pó-poè, chiū-sı̄ chhē tio̍h Siōng-tè, che m̄-sı̄ tı̀-sek só͘ oē chai ê. Lán ê ba̍k-chiu sui-bóng soè-lúi; iáu-kú oē khoàⁿ chin hn̄g, lán só͘ boē tit kàu ê só͘-chāi ia̍h sı̄ khoàⁿ oē tio̍h. Phı̀-lūn lâi kóng : Lı̄ lán kúi-nā pah-bān lí ê chhiⁿ lán khoàⁿ oē tio̍h, i ê hêng-tōng kap kng ia̍h oē khoàⁿ-tio̍h. Tú-tú chhin-chhiūⁿ án-ni, lán sim-koaⁿ ê ba̍k-chiu oē khoàⁿ-kı̀ⁿ Siōng-tè, ia̍h oē hiáu lâi pài-kūi, tùi I lán beh tit-tio̍h boán-chiok éng-oán kàu éng-oán.
XVII
Chhē Siōng-tè
(1) Tang-hng ê Phok-sū, hō͘ chhiⁿ chhoā kàu Gı̄ ê jı̍t-thâu ê só͘-chāi. Chiah-ê phok-sū sı̄ beh lâi chhē gı̄ ê Jı̂n-kun, beh lâi pài I, thang hō͘ in ê sim só͘ ǹg-bāng ê oē tit chiâⁿ thang hoaⁿ-hí boán-chiok.
Chóng-sı̄ I pún só͘-chāi ê lâng m̄-bat I; hoán-tńg kā I tèng sı̍p-jı̄-kè, lâi sit-lo̍h in ê hok-khı̀. Bô lūn tang-pêng á-sı̄ sai-pêng ê lâng lâi chhē I, chhē tio̍h ê sı̂, ēng sim ēng Sı̂n lâi pài-kūi, tı̄ I ê kha-ē hiàn lé-mı̍h. Tùi chiah-ê lé-mı̍h tı̄ Siōng-tè ê kok, in thang tit-tio̍h éng-oán oa̍h. Chia̍h-miâ ê Ki-tok-tô͘, tùi chı̍t hong-bı̄n lâi khoàⁿ sı̄ Chú ê peh-sı̀ⁿ; m̄-kú i ê kiâⁿ-choè lóng sı̄ tùi-hoán, tı̀-kàu sit-lo̍h toā ê hok-khı̀. Tang-hng ê phok-sū in-ūi toà bô kú ê iân-kò͘, boē tit thang thiaⁿ Chú ê kà-sı̄, thang khoàⁿ Chú ê sı̂n-jiah, á-sı̄ Chú siū sí koh-oa̍h, á-sı̄ chiūⁿ thiⁿ chiah-ê sū, só͘-í in m̄-bián khı̀ sı̀-koè thoân hok-im. Tú chhin-chhiūⁿ án-ni, teh chhē Siōng-tè ê lâng, bô kap Siōng-tè kau-poê, tit-tio̍h I siúⁿ-sù ê oa̍h-miā, á-sı̄ chín-kiù, só͘-í in m̄ bián thoân hok-im tı̄ phó͘ thiⁿ-ē.
(2) “In-ūi kı̀ⁿ-nā ū-ê, beh hō͘ i, hō͘ i ū chhun; bô ê liân i só͘ ū-ê, ia̍h beh the̍h i” (Má-thài 25:29) Siat-sú bô-ê, beh cháiⁿ-iūⁿ oē kā i the̍h tit? I kiám-chhái ūi-tio̍h pı̂n-toāⁿ ê iân-kò͘ bô châi-tiāu, ia̍h bô hó-mı̍h thang the̍h; chóng-sı̄ i iáu ū chhun chı̍t-hāng mı̍h, chiū-sı̄, phoàⁿ-toàn chin ké ê lêng-le̍k tı̄-teh. Siat-sú i nā bô ēng chit khoán châi-lêng, chiū beh kā i chhiúⁿ-the̍h. Āu-lâi i ê liông-sim chiū bâ-pı̀, kàu bé chiū sí. Nā án-ni i chiū-sı̄ khang-khang bô mı̍h tı̄-teh.
(3) Ū lâng m̄ sı̀n Siōng-tè sı̄ lóng-chóng ê oa̍h-miā ê goân-thâu, chiū chiong kho-ha̍k-tek ê khı̀-khū lâi chhē chit sè-kan ê oa̍h-miā ê goân-thâu, tı̀-kàu sit-lo̍h hun-piat hó pháiⁿ ê lêng-le̍k. In siūⁿ oa̍h-miā sı̄ tùi liû-chhiⁿ (meteors) lâi ê,…Che sı̍t-chāi bô iáⁿ. Siat-sú bô oa̍h-miā ê mı̍h boē-oē siⁿ-chhut oa̍h-miā, thài-thó kap tē-kiû, kâng-khoán ê liû-chhiⁿ beh chiáⁿ-iūⁿ oē siⁿ-chhut oa̍h-miā? Siat-sú liû-chhiⁿ kap tē-kiû sı̄ bô kâng khoán ê mı̍h, nā sı̄ án-ni bô kâng-khoán ê mı̍h koh tı̄ bô kâng hoân-kéng ê mı̍h, cháiⁿ-iūⁿ hia ê oa̍h-miā tı̄ chit-ê sè-kan ná oē oa̍h…? To̍k-to̍k Siōng-tè nā tı̄ hia, hia chiū ū oa̍h-miā. Bô lūn sio-chúi á-sı̄ léng-chúi hit lāi-bı̄n lóng ū thâng teh oa̍h. Sui-bóng un-choâⁿ hit lāi-bı̄n iā ū thâng teh oa̍h. Che sı̄ teh hián-bêng Siōng-tè ê toā koân-lêng. Bô lūn tı̄ sím-mı̍h kéng-gū, tı̄ sím-mı̍h só͘-chāi Siōng-tè lóng ū siúⁿ-sù oa̍h-miā.
(4) Tùi chin-lí ê ké-chí chiū thang bat chin-lí. Chiàu Siōng-tè ê kà-sı̄ lâi kiâⁿ ê lâng, beh tit-tio̍h hoaⁿ-hí, chiong-lâi i beh hióng-siū I ê ké-chí. To̍k-to̍k Siōng-tè chiah oē hō͘ iau-gō ê lêng-hûn tit-tio̍h pá kap moá-chiok.
Lâng sui-bóng hām-lo̍h choē-koà; iáu-kú ài tùi-tiōng chin-lí. Phı̀-lūn lâi kóng, ài kóng pe̍h-chha̍t phiàn pa̍t lâng ê lâng, sui-bóng i ài phiàn lâng; chóng-sı̄ bô ài pa̍t lâng lâi phiàn i. Sui-bóng i tùi pa̍t lâng bô láu-sı̍t bô iàu-kín; chóng-sı̄ pa̍t lâng nā tùi i bô láu-sı̍t, i chiū bô hoaⁿ-hí. Che chiū-sı̄ teh piáu-bêng sui-bóng tı̄ bô ı̀-tiong ia̍h sı̄ hoaⁿ-hí láu-sı̍t, ǹg-bāng chin-lí, lâi chı̄n-tiong. In-ūi Siōng-tè chhòng-chō lâng ū hit-khoán him-bō͘ chin-lí ê sim, tùi toā chin-lí thang tit-tio̍h hok-khı̀. Siat-sú lâng nā ûi-ke̍h chin-lí, i tio̍h tú-tio̍h chai-ē, in-ūi i m̄ hān-tiāⁿ hoán-tùi ka-kı̄ ê sèng-chit, ia̍h ûi-ke̍h chhòng-chō chin-lí ê Siōng-tè.
(5) Chin-lí ū chin-choē khoán. Ta̍k lâng chiàu Siōng-tè só͘ siúⁿ-sù ê le̍k-liōng ū teh hián-chhut koh-iūⁿ ê chin-lí. Pı̂ⁿ-pı̂ⁿ tâng chı̍t châng ké-chí lâi kóng, ū lâng ūi-tio̍h ài ké-chí, só͘-í lâi tı̄ chhiū-á kha, ū lâng sı̄ khoàⁿ-kı̀ⁿ i ê hoe ê súi, só͘-í ia̍h kiâⁿ oá lâi. Só͘-í in chiàu kok-lâng só͘ kám-tio̍h hit hong-bı̄n lâi soat-bêng chit châng ké-chí ê kè-ta̍t. Só͘-í tiat-ha̍k-chiá, kho-ha̍k-chiá, si-jı̂n, oē-ka á-sı̄ sı̂n-pı̀-ka, ta̍k lâng chiàu in ê châi-tiāu, chiong só͘ kám tio̍h ê lâi soat-bêng chióng-chióng ê chin-lí. Chı̍t ê lâng boē-oē bat lóng-chóng ê chin-lí, ia̍h boē-oē soat-bêng.
(6) Beh chai chin-lí tio̍h tùi kúi-nā hong-bı̄n lâi khoàⁿ; nā bô, kiaⁿ-liáu oē sit-chhò. Phı̀-lūn lâi kóng, lán chiong chı̍t-ki tı̍t-liù-liù ê chhê-á, chiong chı̍t ba̍k tùi chı̍t thâu lâi kā I khoàⁿ ê sı̂, lán m̄-chai hit ki chhê-á ê tn̂g-té, chóng-sı̄ tùi pa̍t hong-bı̄n lâi khoàⁿ chiū koh-iūⁿ. Chı̄n-sim, chı̄n-ı̀ teh chhē Siōng-tè ê lâng, i beh tú-tio̍h, in-ūi Siōng-tè kú-kú teh chhē i, ài chhoā i kàu hok-khı̀ ê só͘-chāi. Tú chhin-chhiūⁿ phah-m̄-kı̀ⁿ ê gín-á teh chhē i ê lāu-bú, kàu bé oē thang koh tò-tńg khı̀ i ê lāu-bú ê sin-piⁿ, in-ūi kiáⁿ iáu beh chhē lāu-bú ê sı̂, lāu-bú í-keng teh chhē i ê iân-kò͘ lah.
XVIII
Hoán-hoé koé-pı̀ⁿ kap tit-kiù
(1) Beh tit-kiù tio̍h hoán-hoé koé-pı̀ⁿ chiah oē ēng-tit; chóng-sı̄ nā bô tit-tio̍h Siōng-tè ê un-tián kā i sià-choē, kan-ta hoán-hoé koé-pı̀ⁿ ia̍h sı̄ boē tit-kiù. Phı̀-lūn lâi kóng, goá ēng chio̍h-thâu tı̀m sí chı̍t ê lâng, ia̍h goá ū hoán-hoé; chit khoán ê hoán-hoé sı̄ kan-ta āu-pái m̄-káⁿ koh choè nā-tiāⁿ boē-oē hō͘ hit-ê koh-oa̍h, ia̍h boē-oē choè lâi pó͘ tit. To̍k-to̍k Siōng-tè oē sià-bián goá, ia̍h hō͘ hut-jiân tú-tio̍h sí chit-ê lâng ê lêng-hûn ū ki-hoē thang koh-oa̍h tı̄ lâi-sè. Chhin-chhiūⁿ án-ni, thâi lâng ê lâng kap hō͘ lâng thâi ê lâng lóng oē tit-kiù.
(2) To̍k-to̍k Siōng-tè chiah oē chiàu kong-gı̄ lâi hêng-hoa̍t á-sı̄ sià-bián, in-ūi i chai lâng ê khoán-sit kap lâng ê só͘ kiû, ia̍h chai, sià-bián kap hêng-hoa̍t ê kiat-kó. Hêng-hoa̍t ê bo̍k-te̍k boē oē siông-siông tit-tio̍h, in-ūi sı̄ m̄ chai choè m̄ tio̍h ê lâng sim só͘ kiû kap i ê sū-chêng. Ū sı̂ hêng-hoa̍t m̄ hān-tiāⁿ bô hó kong-hāu, hoán-tńg koh khah pháiⁿ, nā-sı̄ sià-bián hoán-tńg oē hō͘ i hoán-hoé koé-pı̀ⁿ.
M̄-kú nā tùi pa̍t hong-bı̄n lâi khoàⁿ, nā kā i sià-bián, hoán-tńg hō͘ i khah ū ki-hoē thang choè pháiⁿ; nā-sı̄ hêng-hoa̍t, i chiū oē koé-pı̀ⁿ. Kiat-kio̍k lâi kóng, Siōng-tè chiah ū sı̍t-chāi chai lâng ê sèng-chit, chiàu lâng ê só͘-kiû, m̄ hān tiāⁿ chín-kiù choē-koà ê kiat-kó, ia̍h kiù choē-ok ê goân-in.
(3) Lêng-hûn ê só͘-kiû chiū-sı̄ éng-oán sı̍t-chāi ê hoaⁿ-hí. Chóng-sı̄ beh tit-tio̍h chit khoán ê bo̍k-tek, lâng kiâⁿ m̄ tio̍h lō͘, tı̀-kàu hām lo̍h choē, i ê kiat-kó chiū-sı̄ bia̍t-bô. In-ūi Siōng-tè ēng i ê thiàⁿ lâi chhòng-chō lâng, hō͘ in ū tı̀-sek, châi-tiāu, kám-kak thang kap Siōng-tè kau-poê, lâi hióng-hok éng-oán ê hok-khı̀. Che chiū-sı̄ tit-kiù.
(4) Khoa-kháu chiū-sı̄ choē-koà, in-ūi khoa-kháu ê lâng, chhin-chhiūⁿ pông-jio̍k bô-jı̂n, siūⁿ i ka-kı̄ pí Siōng-tè khah gâu; tı̀-kàu sit-lo̍h Siōng-tè ê un-tián, tı̂m-lo̍h tı̄ choē-ok lâi bia̍t-bô i ê lêng-hûn. Bô láu-sı̍t sı̄ hoán-tùi chin-lí, só͘-í ia̍h sı̄ choē-koà. Gâu kóng pe̍h-chha̍t ê lâng, tùi i put-sı̂ phiàn-lâng ê in-toaⁿ āu-lâi iû-goân oē ka-kı̄ phiàn. Kàu-bé i m̄ sı̀n-iōng i lāi-goā ê kám-kak, put-sı̂ giâu-gı̂ chin-lí. Soà giâu-gı̂ Siōng-tè ê thiàⁿ-thàng kap un-tián, tı̀-kàu sit-lo̍h i ê oa̍h-miā kap toā hok-khı̀. Siūⁿ-tham ê lâng chiū-sı̄ choē-koà, in-ūi siáu-tham chit sè-kan ê mı̍h, tı̀-kàu pàng-sak Siōng-tè. Kan-ı̂m ia̍h sı̄ choē-koà, in-ūi kan-ı̂m ê iân-kò͘, ke chiū m̄ chiâⁿ ke, sit-lo̍h cheng-chiat, tı̀-kàu sòng-sit i ê sı̀ⁿ-miā. Thau-the̍h iû-goân ia̍h-sı̄ choē-koà, in-ūi thau-the̍h pa̍t lâng ê mı̍h choè hoaⁿ-hí. Só͘-í lán nā beh tit-kiù, hō͘ Siōng-tè ê chí-ı̀ chiâⁿ tı̄ toē-nı̍h chhin-chhiūⁿ tı̄ thiⁿ-nı̍h, tio̍h chiong téng-bı̄n só͘-kóng chiah-ê choē-koà kap í-goā lóng-chóng ê choē-koà it-chı̄n hoán-hoé koé-pı̀ⁿ sı̄ tē-it iàu-kín.
(5) Kho-ha̍k-chiá kap tiat-ha̍k-chiá sı̀n chı̀n-hoà-lūn kóng. Tùi chū-jiân ê gâu chhui-chhiâu, ū ha̍h, ū tek-tong ê mı̍h oē chı̀n-hoà lâi seng-chûn. Chóng-sı̄ tùi bū-sò͘-bān ê oa̍h-mı̍h ê chı̀n-hoà, só͘ chèng-bêng í-goā iáu ū chı̍t hāng koh khah toā-ê : chiū-sı̄ tùi Siōng-tè ê chhui-chhiâu ū chı̍t khoán bô ha̍h ê chiū-sı̄ ū choē ê lâng, tek seng-chûn ê sū-sı̍t. Siōng-tè tùi choē-ok khùn-lân ê tiong-kan chín-kiù hò͘ⁿ lim-chiú--ê, kiâⁿ kan-ı̂m--ê, thâi lâng--ê, thau-the̍h--ê, lâi thoat-chhut choē-ok thang tit pêng-an, kap hoaⁿ-hí ê oa̍h-miā. Chit khoán ê chín-kiù chiū-sı̄ tùi Ki-tok Iâ-so͘ lâi tit-tio̍h--ê, In-ūi i lı̂m-kàu sè-kan sı̄ beh kiù ū choē ê lâng. ( I Thê-mô͘-thài 1 : 15)
XIX
Choē-ok ê Goân-thâu.
(1) Sı̄-toā-lâng ê pháiⁿ-pı̄ⁿ oē liân-lūi kàu in ê kiáⁿ-sun. Chóng-sı̄ pē-bú nā-sı̄ chhiⁿ-mı̂ á-sı̄ khê-kha phoàⁿ-siùⁿ; m̄-kú in ê kiáⁿ-sun m̄-bián tè in lâi khê-kha phoàⁿ-siùⁿ. Só͘-í choē-ok ê goân-thâu iā-sı̄ án-ni; pē-bú hó-pháiⁿ ê sèng-chit boē-oē liû-thoân hō͘ in ê kiáⁿ-sun, gín-á ê phín-keh khah-choē sı̄ tùi in ê kiâⁿ-ta̍h lâi tit chiâⁿ. Siat-sú in nā-sı̄ sêng-chiap pē-bú ê sèng-chit, in chiū m̄-bián kín-sı̄n in ê hêng-ûi. Gín-á ê lêng-le̍k kap phín-sèng sió pō͘-hūn tùi pē-bú lâi; toā pō͘-hūn sı̄ tùi in pún-sin ê lô͘-le̍k lâi tit-tio̍h--ê.
(2) Siat-sú nā ū chı̍t hāng mı̍h oá lâi kng ê sı̂, chiū oē siⁿ-chhut o͘-iáⁿ. (e̍k-chiá kóng chhin-chhiūⁿ lâng-ńg) sit-ge̍h ê in-toaⁿ chiū-sı̄ tē-kiû kiâⁿ kàu Jı̍t-thâu kap ge̍h ê tiong-kan só͘-tı̀. Nā-sı̄ hō͘ pa̍t-hāng mı̍h ê ńg kā lán khàm teh ê sı̂, lán chiū bô chek-jı̄m, in-ūi che m̄-sı̄ lán ka-kı̄ ê só͘-choè. Só͘-í ūi-tio̍h ńg ê só͘-tı̀ liân-lán soà pı̀ⁿ choè ńg o͘-o͘ ê sı̂, lán iû-goân bô chek-jı̄m. Chóng-sı̄ chhin-chhiūⁿ hut-jiân khí o͘-hûn, kui-thiⁿ o͘ ba̍k-ba̍k ê khoán, lán ê sim-koaⁿ nā hō͘ choē-ok lâi tı̀-kàu o͘-ba̍k-ba̍k, hit-tia̍p lán chiū ū chek-jı̄m.
(3) Choē-ok kap i ê kiat-kó sui-bóng sı̄ chin gûi-hiám; chóng-sı̄ m̄ sı̄ kú-tn̂g--ê, Siōng-tè kap I siúⁿ-sù ū éng-oán-oa̍h ê mı̍h í-goā bô chı̍t hāng oē éng-oán tı̄-teh. Siat-sú nā ū chı̍t hāng mı̍h lı̄-khui Siōng-tè, ka-kı̄ oē éng-oán tı̄-teh, i tek-khak tio̍h ū chhin-chhiūⁿ Siōng-tè ū éng-oán oa̍h ê sèng-chit chiah oē ēng tit. Chóng-sı̄ che sı̄ ún-tàng bô ê sū; in-ūi Siōng-tè chí-ū chı̍t-ê nā-tiāⁿ. Siōng-tè sı̄ éng-oán tı̄-teh, poē-ge̍k Siōng-tè--ê, (choē-ok) tiāⁿ-tio̍h boē-oē éng-oán tı̄-teh. “In-ūi siū-chō ê mı̍h hâng-ho̍k tı̄ khang-hu, m̄-sı̄ i ê kam-goān, chiū-sı̄ tùi hit-ê hō͘ i hâng-ho̍k--ê; sı̄ teh ǹg-bāng liân siū-chō ê mı̍h iā beh tit-tio̍h tháu-pàng, thoat-lı̄ pāi-hoāi ê khu-sok, lâi jı̍p tı̄ Siōng-tè ê kiáⁿ-jı̂ ê êng-kng ê chū-iû.” (Lô-má 8 : 20---22)
