（Oē ke̍k)
Jı̂n-bu̍t :
Chhiⁿ-mı̂ lâng.
Kè-lō͘ lâng A, B, C, D, E.
Hoat-lı̄-sài lâng 1, 2, 3.
Chhiⁿ-mı̂ lâng ê lāu-pē.
Kı̂-thaⁿ kûn-chiòng.
Sı̂-kan :Iâ-so͘ chāi sè tiong.
Só͘-chāi :Iâ-lō͘-sat-léng siâⁿ-goā, Se-lô-a tı̂ piⁿ. Keh chı̍t tiâu nāu-jia̍t ê lō͘ ê hit pêng, ū chin chheng ê Se-lô-a tı̂. Tı̄ tı̂ piⁿ ū hoat chı̍t jiah chı̍t jiah ê lô͘-úi. Tùi chia khoàⁿ kè-khı̀ ū Iâ-lō͘-sat-léng ê sèng-tiān, hit ê pe̍h-sek chiò tio̍h thài-iông oē hoán-siā. Sı̄ chēng-chēng chhun-thı̄ⁿ ê chá-khí-sı̂.
Bō͘ khui
Chhiⁿ-mı̂ lâng koáiⁿ-á tok-leh tok-leh, tùi chiàⁿ-pêng teng-tiûⁿ.
Chhiⁿ : Ouh ! Kàu lah, kàu lah, ū phı̄ⁿ-tio̍h chin chēng ê chúi hiàn, (koáiⁿ-á tuh-leh kiâⁿ 2 ,3 pō͘) soè-jı̄ leh, m̄-thang chhū-tó. Chhiⁿ-mı̂ lâng ēng koáiⁿ-á ûn-á tuh-leh tuh-leh kiâⁿ-oá tı̂ piⁿ. Kè-lō͘ lâng tùi tò-pêng koáⁿ kín khí-lâi.
Kè-lō͘ A : Lia̍h-chún sı̄ siáⁿ lâng leh, tō sı̄ pêng-sı̂ tı̄ sèng-tiān ê mn̂g-kháu teh kiû siá-sı̀ ê khit-chia̍h. Tiàm chit ê tı̂ piⁿ sô-lâi sô-khı̀, nā poa̍h lo̍h-khı̀ leh.
Chhiⁿ : To-siā, chin tùi put-chū, chhiáⁿ chhoā goá khah oá chúi-piⁿ leh, hó m̄?
Kè-lō͘ B: Sı̄ beh chhòng sím-mı̍h? Ba̍k-chiu chı̍t-ē bô khoàⁿ-kı̀ⁿ, m̄-káⁿ teh siūⁿ beh chū-sat leh?
Chhiⁿ : Chū-sat .... sı̍t-chāi iā bat siūⁿ beh sí, chhin-chhiūⁿ chiah-nih bô chū-iû, put5-jû sí-sí leh..... iā bat kúi-nā pái án-ni siūⁿ. Chóng-sı̄.
Kè-lō͘ C: Iā taⁿ koat-tēng beh sí no͘h, iā soà siūⁿ beh kiò goán kā lí an-pâi siān-āu nih.
Chhiⁿ : M̄-sı̄, m̄-sı̄, kin-á-jı̍t ê goá sı̄ moá ū ǹg-bāng ê, chhiáⁿ lín khoàⁿ goá ê ba̍k-chiu leh.
Kè-lō͘ A: (Kap B, C, saⁿ khoàⁿ, chhiò-chhiò kóng) án-choaⁿ, goán khoàⁿ leh.
Kê-lō͘ C : Hǹg, he ba̍k-chiu m̄-chai kô͘ sím-mı̍h mı̍h?
Kè-lō͘ A : Hò͘ⁿ, lō͘-kô͘-bê lah.
Chhiⁿ : Che sı̄ Ná-sat-le̍k ê Iâ-so͘ kā goá kô͘ ê. Iā Iâ-so͘ kiò goá lâi Se-lô-a tı̂ soé, só͘-í koáⁿ-kín ài soé-soé leh. Chhiáⁿ khah kín chhoā goá oá-khı̀ chúi-piⁿ leh, pài-thok.
Kè-lō͘ A: Hǹg, hō͘ Iâ-so͘ kā lí kô͘ ê ò͘. M̄-kú Iâ-so͘ kiám oē i-tı̄ chhut-sı̀ chiū bô khoàⁿ-kı̀ⁿ ê chhiⁿ-mı̂ lâng leh, ún-tàng sı̄ teh an káu-sim no͘h!
Kê-lō͘ C: Sı̄ lah, ún-tàng sı̄ án-ni lah. Iâ-so͘ sı̄ siūⁿ kóng lí che bô hoat-tō͘ thang khoàⁿ-kı̀ⁿ, só͘-í o͘-pe̍h kā lí kóng. Chin-chiàⁿ bô hoat-tō͘.
Chhiⁿ: Chhiáⁿ lín m̄-thang án-ni kóng, goá chai Iâ-so͘ m̄-sı̄ hit khoán pián-sian-á, chū-kàu-taⁿ I só͘ choè ê sū lóng bô ū hit khoán bô iáⁿ chiah ê.
Kè-lō͘ C: Oà--ah, lí ê ba̍k-chiu nā oē khui, goá kam-goān tò-thâu-chai peh sèng-tiān ê gı̂m-á hō͘ lí khoàⁿ.
Kè-lō͘ B: Bô tāi bô chı̀ pı̀ⁿ chit khoán pá-hı̀, lí nā bô jı̂n-khı̀, choè khit-chia̍h chiū m̄-bián siūⁿ beh pun ū.
Chhiⁿ : (Seng-khu chhoah chı̍t-ē). Bô iàu-kín, goá bô boē kı̀-tit Iâ-so͘ só͘ kóng ê oē (kha chhip-leh chhip-leh, soà àⁿ lo̍h-khı̀ ēng 4 kha chhip oá khı̀ chúi-piⁿ).
Kè-lō͘ A: Hà ! Soà teh khí khong.
Kê-lō͘ B: Sí sı̂n teh chhē i.
Kê-lō͘ C: Ah ! ah ! oē chhū lo̍h-khı̀ chúi lāi. Chhiⁿ-mı̂ lâng hò͘ chúi soé ba̍k-chiu.
Kê-lō͘ B: Chin chhut-la̍t teh soé.
Kê-lō͘ C: Hà, bô hoat-tō͘. Chhiⁿ-mı̂ lâng hiông-hiông peh khí-lâi, chhut hoaⁿ-hí ê siaⁿ.
Chhiⁿ: Ah! ū khoàⁿ-kı̀ⁿ, ū khoàⁿ-kı̀ⁿ, ba̍k-chiu ū khoàⁿ-kı̀ⁿ (peh khí-lâi thiàu, cháu kàu tı̄ tiong-ng, kha thí-khui, chhiú kia̍h koâiⁿ, khoàⁿ thiⁿ, kı̂-û ê lâng lóng gông-ngia̍h). Hò͘! chiah nih súi, he chiū-sı̄ thiⁿ ò͘ (kí chêng-āu, chó-iū) he chiū-sı̄ chháu-po͘ ò͘ ! Hiah-nih súi ê sek, hit ê koâiⁿ-koâiⁿ ê só͘-chāi chiū-sı̄ soaⁿ! Ū khoàⁿ-kı̀ⁿ, ū khoàⁿ-kı̀ⁿ, (hiông-hiông hoat-kiàn ka-kı̄, khoàⁿ ka-kı̄ ê chhiú),che sı̄ sím-mı̍h! o͘h, sı̄ chhiú (mn̄g kè-lō͘ lâng), sı̄ m̄? Che sı̄ chńg-thâu-á, 1,2, 3 ,4....ū 10 ki (kha kia̍h koâiⁿ) che sı̄ kha, án-ni chı̍t-pō͘ thang kiâⁿ (chhiú hı̀ⁿ-leh, hı̀ⁿ-leh kiâⁿ-lâi kiâⁿ-khı̀).
Hoat-lı̄-sài 3 lâng tùi chiàⁿ-pêng khí-lâi, khiā teh khoàⁿ hit ê chhiⁿ-mı̂ lâng.
Hoat 1 : (Hiông-hiông kiâⁿ oá-khı̀, tùi chhiú lia̍h--teh). Tiām-tiām, lí sı̄ siáⁿ-lâng. Kin-á-jı̍t sı̄ an-hioh-jı̍t, toà chit lō͘-nih tiô-lâi tiô-khı̀, chin bô kín-sı̄n.
Chhiⁿ : (Hō͘ lâng hoah chı̍t-ē, soà pháiⁿ-sè pháiⁿ-sè, chóng-sı̄ chin hoaⁿ-hí). Sian-siⁿ, goá in-ūi chin hoaⁿ-hí, hoaⁿ-hí kàu boē kò͘-tit.
Hoat 2 : Sı̄ teh hoaⁿ-hí sím-mı̍h, tı̄ an-hioh-jı̍t án-ni choè sı̄ hoān lu̍t-hoat ê.
Hoat 3: Oē hông-hāi kau-thong.
Chhiⁿ : Goá m̄-sı̄ teh tiô-thiàu, sı̄ ba̍k-chiu tit khoà-kı̀ⁿ teh hoaⁿ-hí.
Hoat 2 : Ou-pe̍h kóng, thiⁿ-kng ba̍k-chiu chiū khoàⁿ-kı̀ⁿ sı̄ eng-kai ê, hoān lu̍t-hoat chiū-sı̄ hoān-choē, beh kò tı̄ gı̄-hoē ô͘.
Chhiⁿ: Goá kàu thâu-tú-á sı̄ chhiⁿ-mı̂ lâng , iā hiān-kim tit-tio̍h khoàⁿ-kı̀ⁿ.
Hoat 2 : Sím-mı̍h, kóng hit hō bô ê (tùi chèng-lâng) lín tāi-ke, chit ê kiám chin-chiàⁿ ū chhiⁿ-mı̂?
Kè-lō͘ A: (Ta̍h chı̍t pō͘ chı̀n-chêng). Sı̄, kàu tú-á i sı̍t-chāi sı̄ chhiⁿ-mı̂.
Kè-lō͘ B : Cha-hng iáu chē tı̄ sèng-tiān ê mn̂g teh kiû-khit.
Hoat 3 : Nā kóng án-ni, ná chhin-chhiūⁿ bat khoàⁿ-kı̀ⁿ. (Tùi chhiⁿ-mı̂ lâng)iā sı̄ thài oē liâm-piⁿ pı̀ⁿ ū khoàⁿ-kı̀ⁿ?
Hoat 1 : Siông-sè kóng khoàⁿ-māi.
Chhiⁿ : Ū chı̍t ê kiò Iâ-so͘ ê, I chiong thô͘-bê kô͘ tı̄ goá ê ba̍k-chiu, kiò goá lâi Se-lô-a ê tı̂ khı̀ soé, só͘-í goá chiū án-ni choè, iā chiū tit-tio̍h khoàⁿ-kı̀ⁿ. Hoat-lı̄-sài lâng tāi-ke saⁿ khoàⁿ, tiām-tiām. Chhiⁿ-mı̂ lâng m̄-kam m̄-kam khioh koáiⁿ-á khí-lâi, siūⁿ beh-thè tiûⁿ.
Hoat 1: Bān-chiah-sı̄, hit ê Iâ-so͘ tı̄ tó-ūi?
Chhiⁿ: Goá m̄-chai.
Hoat 2: Nā bô láu-sı̍t kóng, sı̄ tùi lí put-lı̄ ô͘.
Hoat 3: Lí sı̄ kap Iâ-so͘ kiat-tóng teh phiàn lâng m̄!
Chhiⁿ : I sı̄ toā sian-ti, sian-ti lâng thái oē phiàn lâng.
Hoat 2: Hǹg, lí ū tùi Iâ-so͘ tit-tio̍h chı̂ⁿ hò͘ⁿ ?
Chhiⁿ : Tit-tio̍h pí kim-chı̂ⁿ khah hó ê.
Hoat 2: Tit-tio̍h sím-mı̍h?
Chhiⁿ: Siáⁿ-sū goá chhin-chhiūⁿ choē-jı̂n teh siū sím-mn̄g? Pí kim-chı̂ⁿ khah hó ê chiū-sı̄ khui goá ê ba̍k-chiu.
Hoat 3: Hit ê Iâ-so͘ sı̄ bô siú lu̍t-hoat--ê, hit khoán lâng m̄-sı̄ sian-ti.
Chhiⁿ: Iâ-so͘ kiám án-ni. Kiám-chhái án-ni kóng sı̄ sit-lé, goá khoàⁿ lín sı̄ chin chū-ko ê. Iâ-so͘ tek-khak m̄-sı̄ hit khoán lâng. I chin jı̂n-chû, chhin-chhiūⁿ goá chit khoán khit-chia̍h, lâng I iā ēng chhiú kiáu thô͘ kā goá kô͘.
Hoat 2: Lí sı̄ tùi goán Hoat-lı̄-sài tóng beh hoán-khòng m̄?
Chhiⁿ: M̄-sı̄, m̄-sı̄, sı̄ chiàu só͘ siūⁿ án-ni kóng nā-tiāⁿ. Tùi chiàⁿ-pêng í-keng ū hè ê chhiⁿ-mı̂ lâng ê pē-bú saⁿ khan chhiú chhut-lâi, lóng sı̄ chhēng bái-bái.
Pē : Ouh ! lí thái oē tı̄ chia.
Bú : Cha-mı̂ lí sı̄ khı̀ tó-ūi? Iā bô tńg-lâi chhù-nih, lín pa-pa kap goá thong mı̂ bô khùn hoân-ló lí.
Chhiⁿ: Ah, pa-pa, ma-ma, chhiáⁿ lín hoaⁿ-hí, goá ê ba̍k-chiu í-keng khoàⁿ-kı̀ⁿ lah, chhut-sı̀ kàu taⁿ thâu chı̍t pái khoàⁿ-tio̍h lín ê bı̄n. Bô ū pí chit ê khah hoaⁿ-hí ê.
Pē: Sím-mı̍h, (khoàⁿ chhiⁿ-mı̂ lâng ê bı̄n). Ouh! lí ê ba̍k-chiu tit-tio̍h khui, che chin kı̂-biāu!
Bú: (Phō chhiⁿ-mı̂ lâng) ba̍k-chiu tit-tio̍h khui (háu).
