Siàu-liân Sı̂-tāi ê Un7-tōng

Hoan-e̍k Chı̍t tùi 80 kúi hoè ê lāu ang-á-bó͘ koh tńg khı̀ in siàu-liân chho͘ kı̀ⁿ-bı̄n, loân-ài ê só͘-chāi iû-lám. Chē tı̄ ka-pi-thiaⁿ lāi-té, lāu a-kong--á mn̄g lāu thài-thài kóng, “ Lí kám iáu ē kı̀-tit lán 50 nı̂ chêng tı̄ chia thâu chı̍t piàn chò-hoé sńg ê chu-bı̄? Lán thau-cháu jı̍p-khı̀ lâng ê chhân-hn̂g. Lí hoāⁿ tı̄ lı̂-pa-á, goá tùi āu-bı̄n phak teh chò-hoé ūn-tōng.” “Lí kı̀-tı̂ ná ē chiah hó, kı̀ kah tiâu-tiâu-tiâu.” “Lán koh kiâⁿ-lâi-khı̀ hit ê só͘-chāi, khoàⁿ lán sı̄-m̄-sı̄ iáu-kú ū châi-tiāu chhin-chhiūⁿ 50 nı̂ chêng án-ni sńg.” “Ô͘, Henry, iáu m̄ jı̄n-lāu, káⁿ siūⁿ chit khoán put-sù-kúi ê tāi-chı̀.” Keh-piah toh, chı̍t ūi tiong-liân lâng thau thiaⁿ--tio̍h, thau-thau-á chhiò. Koat-tēng beh toè in khı̀ thau-khoàⁿ. 2 ê lāu--ê, thuh 2 ki koáiⁿ-á, chò-hoé khan--leh, bān-bān-á kiâⁿ. Kiâⁿ kàu in 50 nı̂ chêng tı̄ hia thâu chı̍t pái “ūn-tōng” ê lı̂-pa-á hia. Tio̍h chiàu 50-nı̂ chêng ê “tōng-chok-pán” khai-sí piáu-ián. Hut-jiân kan, chit ūi thau-thau-á toè lâi khoàⁿ ê tiong-liân lâng ū ba̍k-chiu í-lâi thâu-chı̍t-pái khoàⁿ--tio̍h. Chit tùi 80 kúi hoè ê lāu ang-bó͘ ūn-tōng--khí-lâi chhin-chhiūⁿ 18 hoè ê siàu-liân ê hiah ióng, hiah béng. It-tı̍t hut leh 40 hun-cheng kú. Lāu thài-thài kàu-boé chiah hoah chı̍t siaⁿ, “Ouh ! Gá !” Lāu a-kong mā chí-ū sı̄ tiām-tiām-á mo͘h teh chhoán. 50 nı̂ āu chit tiûⁿ phuh-lo͘h kip ê ūn-tōng liáu-āu, 2 ê lāu--ê lóng soah-kó͘--ah, tó tı̄ thô͘-kha it-tı̍t phı̄ⁿ-phēⁿ chhoán. Bih teh thau-khoàⁿ ê lâng khoàⁿ kah gāng-gāng-gāng. It-tı̍t teh hoâi-gı̂ in ū sím-mı̍h pı̀-hng. Ia̍h khai-sí siūⁿ kóng i ka-kı̄ ê lāu pē-bú kám ū chit khoán kang-hu. 2 ê lāu--ê theⁿ kui poàⁿ tiám-cheng kú chiah ū châi-tiāu khí-lâi tín-tāng, chhēng saⁿ-khò͘. Chit ê tiong-liân lâng jú siūⁿ jú tòng bē tiâu. Koat-tēng beh chhéng-kàu in tàu-té ài chia̍h sím-mı̍h sian-tan. Tán-hāu in kiâⁿ--chhut-lâi, tiong-liân lâng tio̍h oá khı̀ chhéng-kàu, “Khak-sı̍t sı̄ chiàⁿ-káng ê kang-hu, ū châi-tiāu chhiau-koè 40 hun-cheng kú. Chhiáⁿ mn̄g chit pé kang-hu sı̄ khò sím-mı̍h pı̀-hng?” “Mā bô sím-mı̍h.” Lāu-hoè-á lâng án-ni ı̀n. “Kap 50 nı̂ chêng bô-kāng--ê, sı̄ chit-má ê lı̂-pa-á sı̄ tàu tiān--ê.” (Tâi-oân-jı̂ Cha̍p-chı̀ tē 9 kı̂, 2001 nı̂ 9 ge̍h)