Lâm-khàm kàu-hoē ê Gô͘ Thiam-iú Tiúⁿ-ló, tı̄ 8 ge̍h 25 jı̍t ū siū Chú kéng-tiàu lı̄-khui sè-kan tò-khı̀ thian-tông, hióng-siū 81 hè. Gô͘ Tiúⁿ-ló ê choè lâng sı̄ phoh-sı̍t tiong-hō͘, tùi kàu-hoē, tùi kok-ka chin chhut-la̍t hōng-sū, ū thâu, ū bé; chin sêng-sı̍t, chheng-liâm, chèng-khı̀, jia̍t-sêng sı̀n Chú; hō͘ lâng-lâng só͘ siàu-liām, chı̍t-ē thiaⁿ-kı̀ⁿ i lı̄-khui sè-kan, chin m̄-kam. I 3 hè ê sı̂ chiū bô lāu-pē, tit-tio̍h hiân-bó ê khan-sêng, kàu 9 hè ê sı̂, ū jı̍p chu-pâng tha̍k-chheh. Kàu 14 hè ê sı̂, chiū chhut tı̄ siā-hoē lâi tam-tng chı̍t ke ê seng-kè, tiàm tı̄ Lâm- khàm tiàm-á choè sió-khoá ê seng-lí. Kàu 26 hè ê sı̂, ū choán-gia̍p lâi tı̄ hiān-sı̂ ê só͘-chāi keng-êng lông-gia̍p, tı̍t-tı̍t kàu tı̄ i kè-sin ê jı̍t, choè chı̍t ê tok-lông-ka tı̄ Lâm-khàm.
Lūn Gô͘ Tiúⁿ-ló tùi kok-ka, tùi kàu-hoē, tùi ka-têng ê kòng-hiàn, goá ài pâi-lia̍t tām-po̍h, thang hō͘ lán saⁿ-kap êng-kng Siōng-tè ê miâ.
A. Tùi Kok-ka ê chit-bū. Tı̄ Tè-kok léng Tâi tong-sı̂, Bêng-tı̄ 29 nı̂, ū tam-tng Hun-kiat-siú, tı̄ 32 nı̂ ū tong-soán choè Chóng-kiat-siú. 33 nı̂ siū bēng choè Lı̂m-sı̂ thó͘-tē tiau-cha úi-oân. 34 nı̂ siū soán choè pó-chiàⁿ, (Pó-kah chè-tō͘ tùi chit nı̂ chhòng khí), tı̍t-tı̍t kè-sio̍k kàu tı̄ hiān-kim, lóng m̄-bat làng chām. 38 nı̂ siū bēng choè Lâm-khàm Kong-ha̍k-hāu ha̍k-bū úi-oân. 39 nı̂ siū bēng choè thó͘-tē chéng-lí úi-oân. Tāi-chèng 9 nı̂, ū tam-tng Khu-chóng-tāi. Tı̄ Tāi-chèng 4 nı̂, ū chhut-la̍t tàu chio-ho͘ khoàn-bián lâng lâi ka-jı̍p Lâm-khàm Sı̀n-iōng cho͘-ha̍p, soà siū kéng choè Phêng-tēng úi-oân. Kı̂-thaⁿ siū cha̍p-goā thoân-thé ê chiok-thok, kóng boē chı̄n. Tùi tı̄ i ū tiong-sı̍t, i ê kang ū kòng-hiàn tı̄ siā-hoē, tı̀-kàu ū siū Chóng-tok ê piáu-chiong 5 pái. Koh-chài Chóng-bū tiúⁿ-koaⁿ, chiu ti-sū, thiaⁿ-tiúⁿ, kūn-siù, chng-tiúⁿ, kı̂-thaⁿ kok thoân-thé ê piáu-chiong sò͘ cha̍p pái. Chiah-ê thang chèng-bêng Gô͘ Tiúⁿ-ló ê chı̄n-tiong pò kok.
B. Tùi Kàu-hoē ê chit-bū. Gô͘ Tiúⁿ-ló goân-lâi sı̄ jia̍t-sim sı̀n ngó͘-siōng chong-kàu ê lâng, put-chí ū chong-kàu sim. Tı̄ Bêng-tı̄ 23 nı̂, Lâm-khàm chho͘ siat Ki-tok kàu-hoē ê sı̂, tùi tı̄ i ê chong-kàu-sim ê piáu-hiān, ū ióng-kám lâi gián-kiù tō-lí. Kàu chai chit ê chong-kàu sı̄ chin ê sı̂, chiū pàng-khı̀ i chêng só͘ ho̍k-sāi ê, lâi niá-siū Chú ê hok-im. Sui-jiân hō͘ lâng thí-chhiò, lóng bô iô- choah, it-hoat jia̍t-sim; tı̄ Bêng-tı̄ 35 nı̂ siū kéng choè chip-sū, chı̄n-la̍t tı̄ chip-sū ê kang, chhut-la̍t tı̄ pài-tn̂g ê kái-tiok. Bêng-tı̄ 38 nı̂ siū kéng choè Tiúⁿ-ló, tı̍t-tı̍t kàu tı̄ lı̂m-chiong ê jı̍t, lóng bô tn̄g-chām. Siông-siông khı̀ hù Tiong-hoē, iā bat khı̀ hù Tāi-hoē, bat I ê lâng lóng o-ló i ê sı̀n-tek. I kūn nı̂ khah choē hè, hı̄-khang tāng, só͘-í bô khı̀ hù Tiong-hoē; chóng-sı̄ i lō͘-bé pái ê hù Tiong-hoē sı̄ 7 nı̂ chêng, tú-tú sı̄ i ê hāu-siⁿ Gô͘ Thian-bēng siū siat-lı̍p choè Kàu-su ê sı̂, Siōng-tè ê liap-lí chin kı̂-biāu.
C. Tùi Ka-têng ê chit-bū. Thang kóng Gô͘ Tiúⁿ-ló ū toā heng-khí ê ka-cho̍k. I tı̄ 3 hè ê sı̂ lāu-pē kè-sin, i ê lāu-pē nn̄g hiaⁿ-tı̄, chí-ū kı̀ⁿ i chı̍t lâng thang thoân-sû. Tı̄ chit khoán ê sı̂, tit-tio̍h hiân-bó ê khan-sêng kap Siōng-chú ê tı̀-ı̀m, i ū tióng-sêng, kiàn-tı̀ ka-têng. I kap Tiúⁿ-ló-niû kiat-hun í-keng 60 nı̂ kú, lâng teh kóng m̄-bat khoàⁿ-kı̀ⁿ in saⁿ ke-oē, thang kóng chin hô-bok, saⁿ-kap hōng-ióng lāu-bú, iúⁿ-chhı̄, khan-sêng sı̄-sè. Saⁿ-kap sı̀n Chú niá-siū Chú ê un-tián. Tùi in chit khoán oân-boán ê ka-têng, Siōng-tè ū sù in 50 goā ê sı̄-soè tı̄ in ê sin-piⁿ, 60 nı̂ kú tùi in nn̄g lâng ū thoân, nā hâm goā-sun soà sǹg, ū oá 80 goā lâng. Tùi chiah ê sı̄-soè, I chin gâu khan-sêng kàu-io̍k, sui-jiân I ê ka-kè m̄-sı̄ hù-jū, iáu-kú gâu chhiâⁿ-tı̂ sı̄-soè. Toā kiáⁿ, soè kiáⁿ ū siat-hoat soà-chiap i keng-lông. Tē 2 kiáⁿ choè I-seng, tē 3 kiáⁿ choè io̍h-kio̍k-seng pang-chān 2 hiaⁿ. Tē 4 kiáⁿ hiàn hō͘ Chú, hiān-sı̂ tam-jı̄m Tâi-pak Sı̂n Ha̍k-hāu kàu-su. Cha-bó͘-kiáⁿ ê tiong-kan. iā chı̍t ê hiàn hō͘ Chú, hiān-sı̂ tı̄ Tām-chúi Lú-ha̍k-ı̄ⁿ choè sià-kam, chai-poê lú-chú. Kı̂-thaⁿ ê sun iā-sı̄ lóng tòng-liông--ê. Toā-sun ū tam-jı̄m lâm-khàm kàu-hoē ê chip-sū. Toā-kiáⁿ chit-pái ū siū kéng lâi chiap i choè Pó-chiàⁿ. Koh-chài i chin tı̀-ı̀ ín-chhoā chiah ê sı̄-soè lâi pài Siōng-tè, put-sı̂ khoà-lū sı̄-soè ê sı̀n-tek. Sı̍t-chāi thang kóng tùi ka-têng ê chit-bū ū chı̄n.
Ū kúi-nā hāng thang hō͘ lán siàu-liām i :--
(1) Jia̍t-sim sı̀n Chú. Gô͘ Tiúⁿ-ló m̄-bat hioh-khùn lé-pài-jı̍t téng ē-po͘ ê chū-hoē, nā ū hioh-khùn, sı̄ chhut-goā á-sı̄ sin-khu bô sóng-khoài. Siông-siông kap thoân-kàu-chiá khı̀ pò͘-tō, i khah-siông sı̄ ēng Sèng-si lâi thoân tō-lí. Chin gâu thé-thiap thoân-kàu-chiá, nā bat khı̀ Lâm-khàm tam-jı̄m ê thoân-tō-chiá, chiū lóng chai i ê thiàⁿ-sim.
(2) Chheng-khı̀ sim-koaⁿ. Jia̍t-sim sı̀n Chú ê kiat-kó, ū hō͘ i ê sim-koaⁿ chheng-khı̀, i lóng sı̄ kóng-chhut hó-oē, goá lâi Lâm-khàm thâu-bé 5 nı̂ kú, m̄-bat thiaⁿ-kı̀ⁿ i kóng chho͘-ló͘ ê oē, bô tùi kóng-oē lâi poa̍h-tó. Gô͘ Tiúⁿ-ló sı̍t-chāi ū sûn-kiat kap bí-lē tı̄ siā-hoē jı̂n-kûn-tiong, bô m̄ chhiau-koè chèng-lâng. Ta̍k lâng him-soān i ê chheng-khı̀-siùⁿ.
(3) Siōng-tè chı̄n-tiong ê lô͘-po̍k. Gô͘ Tiúⁿ-ló chin gâu tàu pang-chān kàu-hoē ê kang. Choè Tiú-ló iā hoaⁿ-hí tàu pang-chān chip-sū ê kang. Chin khek-kí, kam-goān kàng-kē, lâi ho̍k-sāi lâng, só͘ choè ū lı̄-ek lâng. Khoàⁿ sè-jı̂n teh iau, teh chhùi-ta, siông-siông chiong Chú ê tō-lí hō͘ lâng lim, hō͘ lâng chia̍h. Thang kóng i sı̄ Chú só͘ thiàⁿ ê sin-niû.
(4) Gâu hêng-hàu i ê lāu-bú. Goá ū thiaⁿ lâng kóng, Lâm-khàm ū chhut nn̄g ê hàu-chú, chı̍t-ê sı̄ Gô͘ Tiúⁿ-ló, koh chı̍t-ê sı̄ Tiuⁿ Chip-sū. I siông-siông tı̄ kiáⁿ-sun ê bı̄n-chêng, lâi kóng-bêng i ê lāu-bú ê sū, khoàn-bián in lâi siàu-liām i. Gô͘ Tiúⁿ-ló chit khoán ê sı̀n-tô͘, ū tit-tio̍h Chú toā chiok-hok i, hō͘ i tn̂g-hè-siū, tit-tio̍h kı̀-liām Soān-chio̍h-hun ê jı̍t-chí. Koh i ê sı̄-soè lóng ū tè i ê kha-pō͘ ho̍k-sāi Siōng-tè. Thang kóng i sı̄ Chú ê sin-niû, lāi-goā lóng súi, tı̄ chá-chá chiū hō͘ Iâ-so͘ koè-tiāⁿ, kàu tı̄ 8 ge̍h 25 jı̍t chiū hō͘ Iâ-so͘ chhoā-khı̀. I beh kè-sı̀ ê sı̂ lóng bô khoà-lū, in-ūi sè-kan ê sū i lóng chhòng bêng-pe̍k, chhùi lóng sı̄ kóng téng-bı̄n ê sū, kha phoat-lâi phoat-khı̀, lâng mn̄g i kán beh án-ni, i kóng Iâ-so͘ kap goá tı̄-teh, Sèng Sı̂n kap goá tı̄-teh, goá teh kiâⁿ lō͘ beh lâi khı̀ thian-tông, choân-jiân bô chı̍t-sut-á ê iu-chhiû. Sı̍t-chāi chin kám-siā Siōng-tè ê só͘-chāi.
Lâng chı̍t-ē thiaⁿ-kı̀ⁿ i sí, chin m̄-kam, chèng-gı̄ it-koat, chiū phah 4 tè chio̍h-pi lâi chhāi tı̄ i ê bōng-nih, choè kú-tn̂g ê kı̀-liām. Chng-tiúⁿ chı̍t tè siá kóng, Hōng-kong chı̀-sêng (奉公至誠). Pó-kah liân-ha̍p-hoē chı̍t tè siá kóng, Khek-chit liâm-chèng (克職廉正). Sı̀n-iōng cho͘-ha̍p chı̍t tè siá kóng, Sí-chiong it-koàn (始終一貫). Lâm-khàm kàu-hoē chı̍t tè siá kóng, Ûi Chú tiong-po̍k (為主忠僕). I sı̍t-chāi oē kham-tit siū chit 4 khoán ê chheng-ho͘.
Tı̄ 9 ge̍h 3 jı̍t ū kò-pia̍t-sek, ū koaⁿ-thiaⁿ, bı̂n-kan, í-kı̍p kàu-hoē kui-nā pah lâng lâi hoē-chòng, ū choē-choē lâng tha̍k tiàu-sû, iā ū tiàu-tiān kúi-nā cha̍p tiuⁿ. Tùi Tâi-pak hong-bı̄n ū kúi-nā ê bo̍k-su lâi hoē-chòng. Úi Pí-tek Bo̍k-su, Sı̂n Ha̍k-hāu, ha̍k-seng lóng ū pı̄-pān tiàu-sû lâi ai-tiàu. Lán ū chit khoán sian-poè lâi chō-chiū chit chām ê hó le̍k-sú tı̄ kàu-hoē, chin-chiàⁿ sı̄ êng-kng ê só͘-chāi. Taⁿ i iáu ū Tiúⁿ-ló-niû kap ûi-cho̍k, ǹg-bāng Siōng Chú an-ùi in, thâu kàu bé, gâu tè in ê sı̄-toā ê kha-pō͘ lâi kiâⁿ thiⁿ-lō͘.
(Tâi-oân Kàu-hoē Kong-pò tē 607 koàn, 1935 nı̂ 10 ge̍h)
