Siàu-liām Kò͘ Lı̂m Lı̂n Tiúⁿ-ló

Lı̂m Lı̂n Tiúⁿ-ló sı̄ Lí-lāng Kàu-hoē-oân Lı̂m Su-siong hiaⁿ ê lāu-pē. Khoàⁿ kiáⁿ-jı̂ ê jia̍t-sim kap sı̀n-tek, chiū chai lāu-pē ê sı̀n-tek kap jia̍t-sim, thang siàu-liām lâi kui êng-kng Chú Siōng-tè. Tı̄ 3 ge̍h 7 jı̍t, i ê tē-saⁿ kiáⁿ Lı̂m Su-khé kun kap Phoaⁿ--sı̄ Goa̍t-kim lú-sū beh kú-hêng kiat-hun-sek. Kin-nı̂ tú sı̄ i 61 hoè, sūn chit ê ki-hoē i ê kiáⁿ beh kā i chiok-siū. Put-hēng tı̄ boē hióng-siū siang-hí ê chêng chhe-sı̀, àm-chhia khı̀ Gio̍k-lí boé-pān, hit-àm tı̄ lí-koán khí-pı̄ⁿ (náu-ek-hiat). Kàu thiⁿ-kng chhe-gō͘ chá-khí 8 tiám, khoàⁿ-tio̍h Tiúⁿ-ló niû kap i ê kiáⁿ ê sı̂, an-sim éng-bı̂n hó-khùn, hióng-siū 61 hoè. 3 ge̍h chhe 6 ē-po͘ 2 tiám, tı̄ i ê chhù kú-hêng kò-pia̍t-sek; hù-sek ê lâng ū 200 chó-iū. Nā-sı̄ kóng-khí Lı̂m Lı̂n Tiúⁿ-ló, chiū Lâm-pō͘ khah lāu ê sian-siⁿ á-sı̄ bo̍k-su, lóng bat--i. In-ūi i 18 hoè ê sı̂ lı̄-khui pún-hiuⁿ khı̀ Táu-la̍k, hit-sı̂ kap Lâu Bān-kiàm Tiúⁿ-ló, Gô͘ Lo̍k Tiúⁿ-ló choè pêng-iú; tùi án-ni jia̍t-sim ho̍k-sāi Siōng-tè. Tı̄ 22 hoè ê sı̂, siū kú-chiàn tha̍k Sı̂n-ha̍k. Tı̄ 26 hoè chhut-lâi thoân Chú ê Hok-im. Tı̄ 32 hoè ê sı̂, tú-tio̍h Sian-siⁿ-niû kè-óng; koh ū 3 ê kiáⁿ, cha-bó͘-kiáⁿ, put-tek-í tio̍h sı̂ Thoân-tō ê kang, lâi Tang-pō͘ toà tı̄ Bān-jı̂n-po͘; tı̄-hia koh tit-tio̍h hiān-sı̂ ê Tiúⁿ-ló-niû. I ū 7-ê kiáⁿ 4-ê cha-bó͘-kiáⁿ; lūn i ê kiáⁿ-jı̂ tı̄ Bān-jı̂n-po͘ sı̄ thang o-ló ê bô͘-hoān chheng-liân, tē-it toā ka-cho̍k koh jia̍t-sim. Chú kóng, “Pháiⁿ-chhiū boē-oē kiat hó ké-chí.” Sı̍t-chāi, khoàⁿ i ê kiáⁿ-jı̂ chiū thang siàu-liām Lı̂m Tiúⁿ-ló ê sı̀n-tek kap jia̍t-sim. (Tâi-oân Kàu-hoē Kong-pò tē 604 koàn, 1935 nı̂ 7 ge̍h)