Nā kóng-tio̍h Lân I-seng chiū beh kóng siàu-liām kám-in ê oē, kám-kak kóng lóng bē liáu ê lâng ún-tàng hui-siông chē.
Ū ê sı̄ siū-tio̍h i kiù-tio̍h sèⁿ-miā khí-sí hoê-seng, ū ê sı̄ hō͘ i kong-jiân á-sı̄ àm-chı̄ⁿ thiàⁿ-thàng pang-chān khan-sêng lâi tit-tio̍h seng-kè oa̍h-lō͘ á-sı̄ thê-poa̍t hoat-tián. Ū lâng tùi tı̄ bat i, hō͘ i jı̂n-keh sı̀n-gióng ê kám-hoà lâi hùn-hoat lı̍p-chı̀ toè i ê kha-pō͘ lâi chò Chú ê ha̍k-seng. Ū só͘-chāi kàu-hoē siū i khek-kí hōng-hiàn, tit-tio̍h chha-put-to choân-gia̍h ê kiàn-tio̍k-hùi. Ū lâng tùi i ê sū-gia̍p siū kám-tōng tit-tio̍h tō-lí, tit-tio̍h bat Chú ê thiàⁿ, tit-tio̍h sı̀n-gióng ê kó͘-lē. Chóng-sı̄ chit ê chhin-chhiūⁿ sèng-jı̂n ê Lân I-seng taⁿ khı̀-sè lah! Tek-khak ū lâng kám-kak iáu ū chē-chē pái iáu-boē kā i piáu kám-in, kā i piáu kám-siā, m̄-kú taⁿ í-keng koè-sin lah.
Lân I-seng tı̄ 87 nı̂ chêng chhut-sı̀ tı̄ So͘-kek-lân chı̍t ūi bo̍k-su ê ke. Liân-chheng ê sı̂ siū tiàu-bēng ài chò Chú ê kang, lâng kó͘-bú i tha̍k sı̂n-ha̍k; i ka-kı̄ kò͘-khiam kóng thài bô kháu-châi, m̄-káⁿ tng chit hō chit. Khiok ū iáⁿ; Lân I-seng m̄-sı̄ giân-lūn ê lâng, m̄-sı̄ kháu-châi ê lâng, m̄-kú i ê un-sûn, khoan-sù, koáⁿ-be̍k, jı̂n-chû, tok-hēng, tiong-hō͘, jím-nāi, sı̀n-sı̍t, khek-khı̂n, bû-su, hi-seng, hōng-sū, í-goā iáu-kú chin chē chin chē ê hó tek-hēng, beh pí-kàu tı̄ tâi-téng chē-chē hiông-piān ê káng-ián-sû sı̄ iâⁿ-koè chē-chē bē sǹg-tit lah!
I tı̄ 1895 nı̂ 12 goe̍h 18 jı̍t kàu Tâi-oân tùi An-pêng chiūⁿ-lio̍k. Tông-hêng ê ū Liâm Tek-lia̍t Bo̍k-su kap Mûi Kam-bū Bo̍k-su 3 lâng, lóng sı̄ So͘-kek-lân chhut-sin ê hó tông-chı̀, lı̍p-chı̀ beh hái-goā thoân-kàu, ka-jı̍p Eng-kok Tiúⁿ-ló Kàu-hoē Soan-kàu Hia̍p-hoē. Lâi kàu Tâi-oân liáu, kó-jiân bô ûi-poē Siōng-chú ê kau-tài. Tāi-seng tùi Lı̂m Iàn-sı̂n Sian-siⁿ ha̍k-sı̍p Tâi-oân oē ê sı̂, chiū kám-hoà Lı̂m Sian-siⁿ hō͘ i jı̍p sı̀n-gióng, jiân-āu chiâⁿ-chò Lâm-pō͘ kàu-hoē ê toā goân-ló. Lı̄-khui Tâi-lâm Sin-lâu kap Mûi Bo̍k-su kàu Tiong-pō͘, kó-jiân chı̍t ê thoân-tō, chı̍t ê i-liâu, kiàn-lı̍p Chiong-hoà I-koán, í-kı̍p Toā-siā, Tâi-tiong, Chiong-hoà, Lo̍k-káng, Khe-ô͘, Toā-siâⁿ, Jı̄-lı̂m, Hoan-oah (Hong-oán), Chháu-tun, Lâm-tâu, Toā-tō͘ chèng kàu-hoē. Nn̄g lâng tâng tiⁿ-khó͘, tâng seⁿ-sí, tâng iau-gō, tâng chhùi-ta lâi kiàn-siat poê-iúⁿ chiah-nı̍h chē keng ê kàu-hoē.
Iû-kı̂-sı̄ tı̄ Chiong-hoà I-koán ê kong-chek sı̍t-chāi sı̄ oh-tit ū lâng ē thang pí-gí ê. In-ūi i ū kàu-gia̍h ê chı̄n-tiong, thun-lún, khı̂n-khiām, hi-seng kap ke̍k iu-oa̍t ê i-su̍t lâi i-tı̄ lâng ê pı̄ⁿ-thiàⁿ, ǹg-bāng tùi án-ni thang chhoā lâng sı̀n Chú Iâ-so͘.
I 25 hoè kàu Tâi-oân, 67 hoè lı̄-khui Tâi-oân, 42 nı̂ kú sı̄ phok-sò͘, khek-kí, khiân-sêng ê koè jı̍t. Pit-chiá ha̍k-seng sı̂-tāi ūi phoà-pēⁿ siū i chiau-thāi toà I ê chhù kui goe̍h-jı̍t kú, ta̍k jı̍t ū tit-tio̍h i chông-ko jı̂n-keh kám-hoà, siāng sı̂ koh ū chı̍t ūi choân-sin moá-moá tı̄ thiàⁿ-sim chhin-chhiat ài chio-ho͘ lâng, ài pang-chān lâng ê I-seng-niû ê hó khoán-thāi, chiâⁿ-chò pit-chiá chı̍t-sı̀-lâng siū kám-hoà choè chhim ê chı̍t ê sı̂-kı̂.
Taⁿ siū in hu-hū thiàⁿ-thàng, khan-sêng, thê-poa̍t, chai-poê--ê ún-tàng ū kui-pah ê; siū in ín-chhoā, kám-hoà, thiàⁿ-thàng, táⁿ-tia̍p pēⁿ-thiàⁿ lâi bat Chú, soà ke-thiⁿ sı̀n-gióng ê, ún-tàng ū kúi-nā chheng; nā kóng siū i i-tı̄, táⁿ-tia̍p pēⁿ-thiàⁿ koh kám-kek in ê thiàⁿ-sim ê, ún-tàng ū kui-bān. M̄-kú chit ê chiah-nih hó ê lâng, taⁿ í-keng koè-sí lah!
Koh i ê sí sı̄ chin khó-siong, in-ūi 8 goe̍h boé ê chı̍t-jı̍t, i chhut-khı̀ toā-lō͘ kiâⁿ ê sı̂, hō͘ chū-tōng chū-choán-chhia tōng-tio̍h, poa̍h-tó, thâu-khak tio̍h-siong, chū án-ni sit--khı̀, m̄-chai-lâng, āu-lâi chai-iáⁿ náu ū tio̍h-siong, chiah kā chhiú-su̍t, chóng-sı̄ khó-sioh bô hāu. Cha̍p goe̍h 11 jı̍t, tı̄ thàng-thiàⁿ siong-sim ê tiong-kan pia̍t-sè. Ûi-cho̍k, ū lāu I-seng-niû, Tāi-pı̍t I-seng, Tāi-pı̍t I-seng-niû, cha-bó͘-kiáⁿ Jı̂n-ài, sun 3 ê. I-seng Tāi-pı̍t kè-sio̍k ûi-gia̍p, iáu tı̄ Chiong-hoà I-koán ho̍k-bū, hiān-sı̂ kui-kok hiu-kà tiong, che sı̄ lán só͘ chai, sim-pū iā sı̄ I-koán ê i-seng; lāu I-seng-niû chhú-khı̀ sı̄ ko͘-to̍k ê ló-kéng, cha-bó͘-kiáⁿ kap chı̍t ê ta-po͘ goā-sun thang kap i chò-phoāⁿ nā-tiāⁿ.
Siàu-liām in ê lâng ún-tàng hui-siông chē, sū-sı̍t in ê ûi-tek iā sı̄ chin-chē, pit-chiá tı̄ moá-pak ê kám-kek kap siong-sim, seng siá kúi-jı̄ lâi pò-kò, soà kiû Chú lı̂n-bín chiàu-kò͘, lāu I seng-niû kap chu ûi-cho̍k ê téng-bı̄n, koh hō͘ i ê ûi-gia̍p tı̄ Chiong-hoà toā-toā thang kè-sio̍k êng-kng Chú. A-bēng.
(Tâi-oân Kàu-hoē Kong-pò tē 827 hō, 1957 nı̂ 11 goe̍h)
