Siàu-liām Phêⁿ-ô͘ soan-tō siat-kàu-chiá
Tú-tú 68 nı̂ chêng, chiū-sı̄ 1886 nı̂ 5 goe̍h chhe 6, ū chûn tùi Tâi-oân chhut-phâng beh khı̀ Phêⁿ-ô͘. Chûn sı̄ sè-chiah phâng-chûn nā-tiāⁿ, ná chhin-chhiūⁿ bô sím-mı̍h te̍k-pia̍t ê só͘ choè, hō͘ lán 68 nı̂ āu iáu-kú ài siàu-liām i. Chóng-sı̄ hit chiah chûn hit pái ê chhut-hoat sı̍t-chāi sı̄ le̍k-sú tiong ê sin ê chhut-hoat-tiám, in-ūi chûn-té m̄-nā chí-ū chûn-oân kap seng-lí lâng nā-tiāⁿ; ia̍h ū Siōng-tè chı̄n-tiong ê lô͘-po̍k saⁿ lâng, í-keng hó-táⁿ koat-sim beh ēng hok-im ê chin kng lâi chiò tı̄ chı̍t ê o͘-o͘ àm-àm m̄-bat thiaⁿ-tio̍h tō-lí ê tē-hng. Ū Kam Bo̍k-su, Ko Tióng Sian-siⁿ kap koh chı̍t-ūi, lán le̍k-sú ê chheh bô kı̀ i ê miâ, chóng-sı̄ lán chai Siōng-tè bô bē kı̀-tit i. Koh nn̄g-jı̍t chiū sin ê sū í-keng hoat-seng toà tı̄ Pe̍h-soa-tó Chhiah-khàm ê hı̂-bı̂n, chiū thâu chı̍t pái khoàⁿ-kı̀ⁿ chı̍t-ūi toā-kho͘ lâu chhùi-chhiu ê goā-kok lâng kap nn̄g ūi Tâi-oân lâng kiâⁿ tı̄ in ê ke-lō͘; in cháu oá-lâi beh khoàⁿ ê sı̂, chiū thiaⁿ-kı̀ⁿ in kóng-khí chı̍t ê chhòng-chō lâng kap bān-mı̍h ê chin Sı̂n, chiū-sı̄ thiàⁿ lâng, chhe I ê kiáⁿ Iâ-so͘ lâi thè in sí ê Siōng-tè. In thiaⁿ liáu chin kı̂-koài. Ū lâng sim-lāi hō͘ Sèng Sı̂n ê hong chhoe tín-tāng. Keh-jı̍t chiū hū-kı̄n Ka-poà-sū ê lâng ia̍h khoàⁿ-kı̀ⁿ, thiaⁿ-kı̀ⁿ sio-siāng hit saⁿ ê thoân-kàu-chiá tı̄ in tiong-kan pò͘-tō. Koh nn̄g jı̍t āu chiū Sai-sū ê Tek-ko-oan ia̍h sı̄ án-ni. 5 goe̍h 17, hit saⁿ ê lâng chiū kàu Má-keng, tı̄ hit ê chin-chē sı̄-biō ê só͘-chāi koh-chài chhut siaⁿ, kiò lâng pàng-sak hu-ké ê ngó͘-siōng lâi kui-ǹg Siōng-tè. Án-ni in ta̍k jı̍t sı̀-kè phun-pháu, chin ke̍k-lia̍t ló͘-le̍k teh thoân-tō, tı̀-kàu Kam Bo̍k-su phoà-pı̄ⁿ, ko͘-put-chiong tio̍h lı̄-khui; chóng-sı̄ ū lâu Ko Sian-siⁿ tı̄ Má-keng thang kè-sio̍k pò͘-tō, kiàn-siat kàu-hoē. Lán 68 nı̂ āu tha̍k chiah ê sū, ná chhin-chhiūⁿ tha̍k Sù-tô͘ Hēng-toān ê chı̍t chiuⁿ, hō͘ lán siūⁿ-khí koh-khah chá ê saⁿ ūi thoân-kàu-chiá tah chûn khı̀ Ku-pí-lō͘ tó, kàu Phàⁿ-hut, tı̄ hia thoân-tō (khoàⁿ Hēng-toān 13 chiuⁿ). Án-ni lán bē bián-tit siàu-liām le̍k-tāi ê sèng-tô͘ ēng Sèng Sı̂n ê khùi-la̍t choè kang. Chóng-sı̄ lán te̍k-pia̍t tı̄ chit ê gō͘ goe̍h chhe, ài kı̀-liām Phêⁿ-ô͘ soan-tō siat-kàu ê thâu chı̍t chām. Lán siàu-liām hit kúi ūi khı̀ Phêⁿ-ô͘ ê sian-siⁿ ê ióng-kám, jím-nāi kap sı̀n-sim, chiū kám-siā Siōng-tè, ài beh o̍h in ê hó bô͘-hoān. Lán ia̍h siàu-liām hiān-chāi tı̄ hiah ê tó-sū tio̍h-boâ ê lâng, lâi thè in kı̂-tó, ǹg-bāng Siōng-tè koh kám-tōng chē-chē lâng ê sim, hō͘ in thang ūi-tio̍h chit ê ke̍k tiōng-tāi ê kang lâi koan-sim. (Tâi-oân Kàu-hoē Kong-pò tē 785 hō, 1954 nı̂ 5 ge̍h)