Siàu-liām Phoaⁿ Bo̍k-su

Goá kı̄n-jı̍t tùi Tâi-oân chiap-tio̍h chı̍t tiuⁿ iu-būn ê phoe, chiū chai pêng-sò͘ só͘ him-bō͘ ê Phoaⁿ Bo̍k-su í-keng koè-óng. Lūn-kàu Phoaⁿ Bo̍k-su sı̍t-chāi sı̄ goá put-tek-put tio̍h ēng choân-sim lâi thiàⁿ-thàng him-bō͘, chun-kèng i chhin-chhiūⁿ goá ê chhin-hiaⁿ chı̍t-poaⁿ--lah. Goá iā tek-khak chai tı̄ Tâi-oân chiòng kàu-hoē kap Ki-tok-tô͘ bô-m̄ ūi-tio̍h i koè-óng lâi siong-pi. Siūⁿ Phoaⁿ Bo̍k-su chāi-seⁿ ū chē-chē hó tek-hēng. I ê chûn-sim sı̂-siông tek-khak beh chhoē ta̍k-hō ê ki-hoē lâi lı̄-ek kàu-hoē lāi-goā ê lâng. Koh i hó tek-hēng tiong-kan kài hián-bêng--ê, chiū-sı̄ sêng-sim kı̂-tó chē-chē sı̂; pa̍t-lâng í-keng khùn, i iáu-kú teh kı̂-tó. Che tāi-chı̀ sı̍t-chāi sı̄ phang-phang thang chhèng-kàu thiⁿ-téng, siōng-tè tiāⁿ-tio̍h hoaⁿ hí chiap-la̍p, in-ūi i ū hit-hō kèng-khiân ê sim--lah. Nā-sı̄ i iū-koh sı̂-sı̂ choan-bū ha̍k-sı̍p Siōng-tè ê Sèng-keng, che hoat sı̍t-chāi ē kap Siōng-tè siong-thong, ka-tı̄ ia̍h ē-tit ū châi-lêng khùi-la̍t lâi pang-chō͘ pa̍t-lâng lêng-hûn ê khiàm-khoeh. Só͘-í bô lūn sím-mı̍h lâng, nā bô sı̂-siông kı̂-tó khı̂n-khı̂n tha̍k Sèng-keng, chiū bē tit-thang hō-chò Siōng-tè ê hó lô͘-po̍k--lah.

Lūn Phoaⁿ Bo̍k-su chò lâng, tāi-khài só͘ chò kok hāng sū, pit-tēng liû-sı̂n chù-sim, chiàⁿ tı̀-kàu ē sêng-kong. Siūⁿ i tı̄ Toā-o̍h ê sı̂, cha̍p-hun pek-chhiat tha̍k-chheh, só͘-í sū-sū lóng ē iâⁿ-koè tâng-phoāⁿ. Kàu i chò Thoân-tō sian-seⁿ ê sı̂, chin gâu kám-hoà lâng ê sim, bô lūn i só͘ kàu tó-ūi ê hoē-tn̂g, to lóng tit-tio̍h chē lâng lâi thiaⁿ chin-lí. Koh khǹg lâng kèng-pài Siōng-tè kài ū hó hoat-tō͘, iū pek-chhiat bián-lē lâng chhut-la̍t lâi pang-chān Sèng-hoē. Tng i tı̄ Tiong-o̍h chò sian-seⁿ ê sı̂, kà chheh cha̍p-hun chhut-la̍t hō͘ ha̍k-seng toā tit-tio̍h lı̄-ek; koh-khah iàu-kín--ê, ài ín-chhoā ha̍k-seng kín-kín kui Iâ-so͘. Chiàu goá teh siūⁿ, chhin-chhiūⁿ chit-hō chı̄n-le̍k ê hù-sū chin-chiàⁿ sı̄ lân-tek--lah.

Tng Tâi-lâm taⁿ-chiah siat Tāi-hoē ê sı̂, i cha̍p-hun chı̄n-la̍t pang-chō͘, in-ūi i ū toā kiàn-sek, só͘-í ū toā kong-hāu, ē-tit sêng-chiū só͘ siat ê sin hoat-tō͘. Kàu Tāi-hoē soán i chò Bo̍k-su liáu-āu, kang-hu koh khah toā lô-hoân, in-ūi i só͘ tio̍h liāu-lí--ê ū kàu-ūi hoē-tn̂g, to̍k-to̍k i bô hiâm kan-khó͘, koat-ı̀ ài chı̄n i ê pún-hūn. Nā-sı̄ án-ni lán chiah-ê só͘ thiàⁿ-thàng him-bō͘ ê Phoaⁿ Bo̍k-su kham hō͘ chē-chē lâng chun-kèng, in-ūi i siông-siông hián-chhut un-jiû khiam-sùn ê bô͘-iūⁿ. Koh kok-sū ū chhin-chhiūⁿ lán tāi-seng só͘ chhim thiàⁿ ê Thô͘ Bo̍k-su chı̍t-poaⁿ-iūⁿ, iā thang hō-chò kap Mô͘-se siāng chı̍t-lūi ê lâng--lah.

Put-lūn sím-mı̍h lâng nā kap i saⁿ-bat tek-khak o-ló i ê hó phín-hēng, in-ūi i só͘ kiâⁿ ê sū kham chò lán ê bô͘-iūⁿ--lah. Siat-sú lán chiah-ê choan-sim oá-khò Siōng-tè, iā thang chò ū lō͘-ēng ê lâng, chiū kap Phoaⁿ Bo̍k-su bô koh-iūⁿ--lah.

Siōng-tè in-ūi i ê chı̄n-tiong sı̀n-sı̍t, ia̍h tek-khak siúⁿ-sù i êng-kng bē pāi-hoāi ê bián-liû. I chāi-seⁿ sin-thé ū chē-chē kan-lân khùn-khó͘, to̍k-to̍k taⁿ chı̍t-ē i kàu ê só͘-chāi, tek-khak tit-tio̍h éng-oán thoat-lı̄ pēⁿ-thiàⁿ chai-lān, lâi hióng-siū éng-oán ê pêng-an--lah. I chāi sè-kan ê sı̂ jia̍t-sim kap Iâ-so͘ saⁿ kiat-liân, taⁿ tı̄ Thian-tông kap Chú chò-hoé toà, tek-khak tit-tio̍h chiâu-pı̄ ê hok-khı̀--lah. Siat-sú lán tāi-ke só͘ kiâⁿ ta̍k-hāng sū, ē jia̍t-sim ài kèng Iâ-so͘, chiū lán ê hok-khı̀, ia̍h tek-khak chhiong-chiok--lah. Ǹg-bāng lia̍t-ūi chò-hoé tit-tio̍h che chin pó-poè ê lı̄-ek, chin-chiàⁿ sı̄ sim só͘ goān.

Choan-choan kià hō͘ lia̍t-ūi ê Kàu-sū kap hiaⁿ-tı̄ chí-moē kong-ke khoàⁿ.

(Tâi-oân Hú-siâⁿ Kàu-hoē-pò tē 178 koàn, 1900 nı̂ 1 ge̍h)