Siàu-liām Só͘ Siau-sit ê Tâi-oân Lông-chhoan Hong-kéng

Goá tē-1-keng kà-chheh ê ha̍k-hāu sı̄ tı̄ Tâi-lâm-chhı̄ An-lâm-khu Cha̍p-jı̄-tiān ê Lâm-heng Kok-Sió. Chit-keng ha̍k-hāu chin sè-keng, choân-hāu kan-ta la̍k-pan nā-tiāⁿ, m̄-kú chit-keng ha̍k-hāu sı̀-chiu-ûi ê hong-kéng sı̍t-chāi chin súi. Cha̍p-jı̄-tiān tı̄ Tâi-lâm-chhı̄ sǹg sı̄ iap-thiap chng-kha ê só͘-chāi. Lâm-heng Kok-Sió ê āu-piah-bı̄n ū 1-ê sió chhoan-chng. Toà hia-ê lâng chin chió, só͘-í chng-á-lāi ê lâng tāi-ke lóng chin se̍k-sāi. Ha̍k-seng ê pē-bú tùi lāu-su lóng chin chun-tiōng. Ha̍k-hāu ê thâu-chêng kap Nn̄g-pêng-piⁿ lóng sı̄ chhân-hn̂g, ū--ê chèng koé-chí, ū--ê chèng tiū-á,ū--ê chèng hoan-be̍h. Ta̍k-pái ū siu-sêng ê- sı̂, ka-tiúⁿ lóng ē sàng koé-chí hō͘ ha̍k-hāu ê lāu-su chia̍h. Goán kap ka-tiúⁿ ê kám-chêng lóng chin-hó. Tùi ha̍k-hāu thâu-chêng hit-tiâu toā-lō͘ it-tı̍t kiâⁿ, oē-tit-thang khoàⁿ-tio̍h 1-khu 1-khu, chheⁿ-chhùi ê chhân-hn̂g. Hong chhoe--koè--lâi, chhin-chhiūⁿ chheⁿ-sek ê hái-éng, 1-chàn 1-chàn iô--leh iô--leh teh thiàu-bú. Tùi toā-lō͘ chhah tùi chhân-hoāⁿ-á-lō͘ jı̍p--khı̀, chiū ē khoàⁿ-tio̍h bô kāng-khoán ê kéng-tı̀. Nā khoàⁿ-tio̍h 1-lia̍p 1-lia̍p n̂g-sek, chheⁿ-sek--ê, sı̄ koe-á mo͘h tı̄ thô͘-kha. 1-chhop 1-chhop sè-sè-lia̍p-á âng-âng chin kó͘-chui--ê sı̄ kam-á-bı̍t. Kui-toā-phiàn ê koé-chí, hō͘ jı̍t-thâu-kng pha̍k-kàu kim-kong siám-siám, boē-su pó-chio̍h--leh. Tiāⁿ-tiāⁿ ē khoàⁿ-tio̍h pe̍h-lêng-si teh chhoē chia̍h, chúi-gû teh loê-chhân. Lông-chhoan ê hong-kéng sı̄ chiah-nı̍h pêng-chēng, sù-sı̄ koh chū-jiân. Keng-koè chiah-choē nı̂, m̄-chai chit-má piàn-sêng cháiⁿ-iūⁿ, sı̄-m̄-sı̄ koh hiah-nı̍h súi--leh? (Tâi-oân-jı̄ Cha̍p-chı̀ tē 14 kı̂, 2002 nı̂ 7 ge̍h)