Siàu-liām kò͘ Ia̍p Poa̍t-nāi hiaⁿ
Kóng-khí í-keng kè-óng, jia̍t-sim ê sèng-tô͘ ê miâ, lâi tui-liām i thang o-ló ê sı̀n-tek, sı̍t-chāi sı̄ choè lán tāi-ke ê lı̄-ek; ia̍h sı̄ hián-bêng Siōng-tè ê êng-kng. Poa̍t-nāi hiaⁿ, chin-chiàⁿ sı̄ lán tāi-ke só͘ tio̍h siàu-liām ê sèng-tô͘. I tı̄ Chiau-hô 9 nı̂, 12 ge̍h 22 jı̍t ē-po͘ 7 tiám, chai-kioh Siōng-tè tiàu i kui-thian ê sı̂ í-keng kàu, chiū tiàu-chı̍p ke-lāi toā-soè lâi choè lé-pài, ka-kı̄ kéng Sèng-si tē 19 siú “Goá ba̍k kia̍h khı̀ ǹg thiⁿ, Siōng-tè só͘ tiàm só͘-chāi”, kap ke-lāi ê lâng saⁿ-kap gı̂m. Lé-pài soah, kóng I siān, chiū tó-lo̍h bı̂n-chhn̂g an-bı̂n, hó khùn; hióng-siū 67 hoè. Pêng-sò͘ kap i saⁿ-bat-ê, thiaⁿ-tio̍h chit-ê siau-sit, tek-khak beh kóng Tiong-le̍k Kàu-hoē ū sit-lo̍h chı̍t ê hó bô͘-iūⁿ ê sı̀n-chiá. Poa̍t-nāi hiaⁿ chin-chiàⁿ sı̄ hó ê bô͘-iūⁿ; lūn siú lé-pài, tùi goá kū-nı̂ 4 ge̍h lâi hù-jı̄m í-lâi, i m̄-bat hioh chı̍t lé-pài, m̄-nā án-ni, i ê chhù lı̄ pài-tn̂g put-chí hn̄g, iáu-kú i sı̄ tē-it chá chiū kàu pài-tn̂g. Lūn hiàn-kim I ia̍h put-chí kam, thang kóng i sı̍t-chāi sı̄ chı̄n i ê khùi-la̍t tı̄-teh hiàn. Lūn tùi tı̄ Siōng-tè ê oē ê thài-tō͘, ia̍h sı̄ chin khó-chhú. Tı̄ Sèng-keng-hoē, tı̄ thiaⁿ soat-kàu, i bô peh-khí peh-lo̍h, sı̄ chin koan-sim àⁿ hı̄-khang teh thiaⁿ. Sui-bóng só͘ thiaⁿ--ê bô ta̍k-kù oē bêng-pe̍k, iáu-kú i ê sim chin jia̍t. Goá sı̀n, i teh thiaⁿ tō-lí ê thài-tō͘, tek-khak m̄-sı̄ ài beh thiaⁿ kóng-kó͘ lâi tit-tio̍h hó-chhiò; chiū-sı̄ tùi iau, chhùi-ta, him-bō͘ gı̄ ê sim, ài beh thiaⁿ Siōng-tè ê oē. Siōng-tè ê oē kóng chı̍t-pah kù ê sı̂, I nā oē-thang tit-tio̍h nn̄g-kù nā-tiāⁿ, I ia̍h sı̄ tek-khak chin boán-chiok. In-ūi i ê choè lâng sı̍t-chāi khiam-pi, i chai-iáⁿ ka-kı̄ ê khùi-la̍t, i m̄-káⁿ ēng ka-kı̄ ê khùi-la̍t, beh lí-kái Siōng-tè lóng-chóng ê chin-lí. Tùi tı̄ Siōng-tè ê oē, i sı̄ khiam-pi, sı̄ ēng kám-siā ê sim teh thiaⁿ, tek-khak m̄-sı̄ khiā tı̄ phoe-phêng ê thài-tō͘ lâi teh thiaⁿ. Koh-chài i tı̄ kàu-hoē ê seng-oa̍h, sı̄ sūn-thàn ê seng-oa̍h, sı̄ kám-siā ê seng-oa̍h. Tı̄ kàu-hoē, i sı̄ ài hōng-sū, m̄-sı̄ ài chi-phoè; só͘-í lóng m̄-bat thiaⁿ-kı̀ⁿ i tùi kàu-hoē ū khǹg sím-mı̍h put-pêng, á-sı̄ sím-mı̍h bô hoaⁿ-hí. I siông-siông kò-pe̍k ka-kı̄ ê bô kàu-gia̍h, m̄-bat hiâm pa̍t-lâng. Chhin-chhiūⁿ chit khoán, sı̍t-chāi thang kóng sı̄ chin-sı̍t bat Chú ê Ki-tok-tô͘, sı̍t-chāi thang choè lán ê hó bô͘-iūⁿ. Lán tio̍h siàu-liām chit-ê Sèng-tô͘ lâi o̍h i ê sı̀n-tek. (Tâi-oân Kàu-hoē Kong-pò tē 600 koàn, 1935 nı̂ 3 ge̍h)